Silalat di Angkola,
Bulung Gadung di Mandailing
Ulang marmayam amang di na sikola
Anggo gara-gara ni bujing-bujing



Jumat, 26 September 2008

Boa-boa

Tu Sude Kahanggi, songoni Mora boti Anakboru, torus muse tu dongan-dongan sasudena nadung markunjung di Blog on,
.......
Sadarion dua pulu onom ari ma puaso (26), Insya Allah opat (4) ari nai doma Ari rayo muse ma ita, jadi hami marrencana untuk sementara waktu mungkin inda Online (aktif), rap maklum ma hita sasudena jabat get donok ari rayo nabahatan muse mai uruson,
.......
Manangkok tu Tanamale
Ulang Lupa Maroban Goni
Dua Ari nai Nangkan Namangalame
Ijia doma luai dapot manginjam kuali
.......
Layang-layang Terbang Melayang
Songgop satongkin di Batang ni Jati
Tolu Ari Nai Nangkan Namangalomang
Tujia Sipulut nangkan u jalaki
.......
Manatap tu Tor Simago-mago
Kiri-kanan Batang Ni Koje
Opat ari nai doma so Ari Rayo
Pakean ni Daganak indape nasalose
.......
Jadi sonimada, olo pe songon na pajolok-jolokkon, mudah-mudahan di lehen Allah SWT dihita umur panjang sahinggo rap sampe hita sudena tu 1 Syawal 1429 nangkan naro, Amin Ya Arhamarrohimin.
.......
Mula ke ho tu Hutadangka
Ilewati ho mai simpang Manambin
Takodir Adong Dongan Hata Nasala
Mangido Mohof Lahir dot Bathin
.......
Singkam mada ijolo
Pisang Siolot si Tabarbari
Aropku tarsaima jolo
Dung Ari rayo hita Ulaki
(Insya Allah)

Taqobbalallohu minna waminkum, Syiamana wasyiamakum
Selamat Hari Raya Idul Fitri 1429 H
sian
Fadhly Abadan Syakuro Nasution Sekeluarga
Wassalam,

Kamis, 25 September 2008

Mancalong Boja




Judul Asli : Manangko Boja di Hutaraja
Kiriman : Adi Daulay


Najolo dompak kalas 2 SD do pe, ke ma au disada ari dot dongan-dongan tu saba Hutaraja ngun Sihepeng. Rencanana got manangko boja, masoi boja Hutaraja mantong namanis-manisna. Inda tarorom be molo binege alak Hutarajai maroban boja di incir, “boja maniis” ningia mantong panggadisna. Ancogot nai mulak sikola markisar jam 10, uontang ma dongan-dongan ke manangko boja tu Hutaraja ngun saba jaean ma ami so hum donok. Maropat kalak ma ami mardalan, maroban piso sada be (panggotap ni boja) dot salin maridi ngun karung topung nabaru ipajaitkon di si Langkitangan pambungkusna, piso na pe namajal doba matolpang muse dope, ujung nai pe namatipuk do harana inda sampat dope ipatitipkon di udai si Lobe. Marangkat ma ami na opat, dung sampe tu saba bojaan (Hutaraja), munduk-unduk ma songon uting na giot manangko aso-aso namarsira so ulang tarida nampunasa nai, baen mopopna ami pargotapi ma songoni sada-sada tangkil ni bojai inda kajion be namalamun sanga namata, namutuk sanga ipangan bulan, na dayuk sanga namangkal (botik dei), naponting masuk tu salin paridi dot aronduk (tas tu kobun sanga tusaba), dompak sadiri i inda ke umak tusaba jadi uoban ma aronduk nia i, ipe inda naiboto ni umak i. “paipas ma kanang ro naron alak nai” ning si Gabe mantong mandok ami.
Pala tar 2 dope dapot au, mangompoti ro alak nai mangkojar dot parang bengkok (lading)… inda tar baen be mosa, mangalumpat ma ami na opat tu saba eme ni alaki, inda binoto be namalapat sanga inda pokokna marlojong. Nampuna boja on pe madung songon na kasetanan, i parrambankon ia ma boja nia i tu ami, naposo-poso nai doba, antong molo namatobang i marugi dei. Marlojong ma ami sampe tu toru ni batang koje nasantak godang iparik ni pasar Sihepengi, disi ma ami marjuguk-juguk maradian lalu martata baen biarna (olo ba, ise nasomabiar ikojar halak dohot lading). Jam 5 potang tolap ma tubagasna be. Isapai umak mantong sanga ngunjia, udokon songoni ngun kobun jului. “aha baenon muyu tu kobun jului, inda na ioban-oban ni begu omu?” ning umak ma. “indaba umak, na giot mancalong bulung gadung do lalu mangarambas joring naposo na i samping kuburan ni nenek si Benak i“, ningku muse antong. “alah na dao tu dei, tai iparik taon na adong do bulung gadung, aso ma ke omu tusi? Sikola arab pe inda ke ho”, ibek-beki umak au.

Rabu, 24 September 2008

Si Taslim Mar-Ari Rayo

Adong dua halak daganak na mardongan akrab ima si Taslim dohot si Parar, dua-duana rap sikola SD kalas opat. Si Taslim on anak yatim (inda adong ayahna be), tai anggo si Parar on lengkap dope orangtuana. Daganak naduaon salalu mai sauduran, baik atiha disikola atope atiha diluar sikola. Halai tinggal disada kampung namenek di daerah Siabu, kampung na deges songoni dohot nadenggan-denggan lagi ramah-ramah muse pendudukna.

Sabotulna muloi awal ni puasoi, sering mai si Parar cimburu mangaligi si Taslim, harana pala potang dung marbuko, epeng parabur si Parar lima rupia mai ilehen ayah nia, tai anggo si Taslim sering mai duapulu lima rupia, harana bahat halak namasadokah di si Taslim on. Rap maklum ma ita antong anggo bulan puaso, nabahatan i namalim mangompot (contona si Udin, biaso piso guris do tioponna, dung masuk bulan puaso namaniop tasbih sajo doma, dor putarna inda binoto sanga aha bacaanna). Kadang-kadang pas ijolo si Parar ilehen halak i epeng di Taslim, kehe mai si Parar tu topi harana inda tar paida-ida ia. Namun jaru songoni pe si Taslim on anak na tardidik do, pala ilehen halak isia panganon ato pe epeng, ilehen ia juo do di si Parar deba, pala inda dong halak ijagit si Parar mei, tai pala rami halak purak-purak mai inda giot si Parar.
Adope, ari rayo mur donok ma, sadarion madung dua pulu opat ari puaso, adong ma sada-sada namanulak pitarah tu halak si Parar, bahat muse namarsadokah antong. Harana sadarion ari poken di Sinonoan, kehema si Parar tu poken dohot umak nia manabusi baju nabaru dohot saraor nabaru. Dung mulak ngon pasar, marsapa ma si Parar tu si Taslim, :
"Madung piga sude baju ari rayomu?" ning si Parar
"Opat, dua itabusan poken nalewat, dua muse itabusan nangkin, pala ho madung piga?" ning si Taslim muse marsapa.
"Au baya dua maia itabusi ayah, sipatumu madung adong?" ning si Parar marsapa
"Madung, ho?" ning si Taslim
"Au inda dong sipatuna, solop Jepang do itabusi ayah natuari" ning si Parar antong songon na sedih.
"Paraburmu pala ari rayo madung adong?" ning si Parar muse mulak marsapa
"Madung, Opat ratus pitu pulu dope, tai biaso adong dei ngon musojid pala sada ari rayo, pala ho madung?" ning si Taslim antong lao manjawab torus marsapa.
"Au tolupulu lima maia" ning si Parar antong.
Borngin nai atiha marbuko, marcarito ma si Parar di bagas ni halai i tu ayah dot umak nia, : "Umak, ayah, donganku si Taslim tagi doma, bahat doma alak marsadokah disia baen na anak yatim i ia, baju nia ari rayo sajo opat, pake sipatu, epeng parabur nia ari rayo lobi lima ratus, au baya bajuna dua maia, inda dong sipatuna, solopna pe solop Jepang do, epeng paraburna pe ari rayo on tolu pulu lima maia, Sugari songon ia i iba tagi doma roangku".
"Aha ning babamu?" ning ayah nia lao mangkojar si Parar nadung ke marlojong parjolo tutoru. "Aha do namangua?" ning Katua i na lao kehe tu masojid get sumbayang Isya, i da ia ayah si Parar madung mangamuk. "Olo antong, anak tai si Parar, nadung por dei roa nia roangku mate au" ning ayah si Parar lao masuk tubagas.

Minggu, 21 September 2008

Lailatul Qodar

Dompak sikola najolo di Madrasyah Ibtidaiyah, jungada ma gurungku (gorarna Bapak Habib) marcarito mangenai Lailatul Qodar on, bahaso adong disada borngin di bulan Puaso, khususna sapulu malam na pangabisan. Molo pasuo dot iba Lailatul Qodar i, sanga aha pangidoan niba santongkin i ikabulkon. "Tola dei mangido kareta (sepeda angin)?" ning si Sannip ma marsapa, maso i kareta dope kenderaan dan patenna. "Tola, aha sajo pangidoan niba di waktu i, pasti bisa dohot langsung i kabulkon Allah SWT" ning gurungki antong mangalusi. Marangan-angan ma iba maso i pasuo dot sada borngin na i dokon di bagasan Al-Qur'an ima malam Lailatul Qodar, so mangido iba sanga aha naporna roa niba, muloi sian pakean nabaru, epeng, dot panganon natabo-tabo. Maso i pala malom dua pulu pitu, sibuk ma iba i panaet lilin di tangga di bagas, ibaen bage mai motor-motor ngon galendong dot kaleng susu ibaen lilin ibagasan nai, pala i tulak non marputar-putar mai api nai, manombo itutung bage mai takar. Pokokna sonjia so torang di kampungi harana maso i indape masuk PLN, "get lewat non ruh" ning iba mai adop dongan-dongan nibai. Na anehna pandokon ni gurui, pala pas ma ningia waktu nai, sujud mai gunung, hayu, bagas dohot na lain-lainna sude. Torang ari nai, pala adong eme na unggal idokon mai tu dongan niba nadapot Lailatur Qodar, songoni juo pala adong sopo sanga rinti namarumbak idokon muse mai nadapot Lailatul Qodar, pokokna aha saja na unggal.
...........................
Dung muloi ma iba magodang, ragu ma iba tu sude nai dokon ni gurui najolo, harana inda unjung pasuo dohot iba hayu na sujud, bagas nasujud apalagi gunung na sujud.
...........................
Umur mur martamba, iba mur matobang, i dohot-dohotan muse ma mulak pangajian di kampung olope na sakali sapoken sangan sakali dua poken. Disada maso atiha panyambutan puaso marsapa muse ma au tu guru, atiha gurui manorangkon Lailatul Qodar mengenai usaho dot doah so bisa iba pasuo dot sada borngin na idokon Lailatul Qodar.
"Botul dei apak pala na sujud gunung, hayu dohot nalain-lainna?" ningku marsapa
"Botul dobai, tai Nash (Al-Qur'an) dei, "Ligi ma surah Al-Hajj, Surah Ar-Rohman"ning gurungki antong mangalus. Upareso antong surah na idokon ni gurungki, sangajo botulma antong, tartulis di bagasan Al-Quran Surah Al-Hajj ayat 18 : "Apakah kamu tiada memperhatikan, bahwa kepada Allah bersujud apa yang ada di langit, di bumi, matahari, bulan, bintang, gunung, pohon-pohonan, binatang-binatang yang melata dan sebagian besar daripada manusia? dan banyak di antara manusia yang telah ditetapkan azab atasnya. dan Barangsiapa yang dihinakan Allah Maka tidak seorangpun yang memuliakannya. Sesungguhnya Allah berbuat apa yang Dia kehendaki".
"Satiop mamandang na Ghoib, ulang salalu hita mangandalkon mata niba, tai dot mata hati niba do dohot nurani so tarida, harana anggo dot mata sajo do tarbatas dei parnidaan niba. Jia ma antong angkan na tarida gunung sujud, sementara mangaligi halak na sujud pe kadang jarang do hita, bahkan mungkin hita sandiri pe jarang do sujud" ning gurungku palalu kaji.
..............................
Antong mula nasonima, mare rap hita pargunaon waktu nasotikon, di sapulu malam na terakhiron, dohot ita parbahat mar amal ibadat, iktikaf di masojid, mambaca Qur'an, marsadokah, soni tu amal-amal na lainna, mudah-mudahan pasuo di hita malom Lailatul Qodar on, malom nalobi mulio sian saribu bulan (80 taon). Sementara umurta pe di ginjang ni duniaon mungkin inda jabat sai be, harana mur tu ujung, na mur ma pendekma do umur ni ummat Muhammad on. Pala inda dapat bahat, sotik pe jadi ma, naporlu bisa marubah kehidupan ta on tu na mur dengganna baik dunia tarlobi-lobi akhirat, Insya Allah.

Jumat, 19 September 2008

Romadhon tu Romadhon (Lima)

SURAT SI PUNJUT TU SI SALEHA
(Inda Bisa Mulak Ari Rayo)

Di partongahan puaso i, ro ma si Punjut sian Simpang Limun tu dongan nia sakampung si Rohana na tinggal di Sampali-Medan, maroban surat get pakirimkonna tu kampung harana sataon on inda bisa mulak.
"Lalu do kakak mulak tu kampung ari rayo on?" ning si Punjut mamamuloi obar
"Pala inda dong halanganna, lalu" ning si Rohana muse antong mangalusi
"Andigan kakak?" ning si Punjut muse
"Mungkin dua pulu ari puaso, harana sadarion muloi ma cuti abangmu, mangua nanga?" ning si Rohana muse margonti marsapa.
"Get pakirimkon surat sugari tukampung, au inda bisa mulak sataonon, maklum ma kakak, na manganggur dope madung onom bulan bo" ning si Punjut muse antong mangalus.
"Baen di etek nai jomui do?" ning si Rohana mulak marsapa
"Inda ba kakak, baen di si Saleha do sugari, marjanji ami dabo sataonon, tai sonon ma bo keadaanna dompak" ning si Punjut mekel-ekel adop toru.
"Boru ni Udak Lobe i do, nailambung musojid i, naporluan doma antong ilala ho bayai disia pado di etek nai jomui, isia pake surat, tu etek aha kirimonmu?" ning si Rohana songon na paingot si Punjut.
"Tu umak kirim solom ma soni, ngoni adong ison epeng sotik bo, saratus pitu pulu lima, lehen kakak ma jolo di umak" ning si Punjut muse antong mangalusi.
"Olo, jiarma soni, uoban pe pala mulak kami cogot" ning si Rohana
"Tarimo kasi parjolo kakak" ning si Punjut baen godang ni rohania
Torang ari nai antong mulak ma halak si Rohana sakeluarga tu kampung mar ALS, lalu ma manyogot-nyogot markisar jam sambilan, torus ipataru si Rohana antong epeng di umak si Punjut torus surat di si Saleha.
...............
Dung itarimo si Saleha surat i, inda tanggung muse be riangna ilala ia, ioban ia ma copat-copat tubagas, torus masuk kamar, gulung ia diasur i mambuka surat ni Abang sayang nia si Punjut, i ummah ia muse antong surat i lao muloi mambaca palan-palan.

Medan, 17 Romadhon 1397 H
Hutostos suhat sada
Tupotpot niurung siala
Hutongos surat sada
Tumopotkon Saleha di Kampung Tonga
.....................................................................
Dung hita sitarak
Jolo Sitangkis podom-podom
Dung hita marsarak Saleha
Lolotan tangis do baya pado namodom
.........................................................
Magodang Aek Sosa
Inda tarbaen naso mandurung
Dung pe Saleha dalan mardosa
Inda tarbaen naso malungun
..................................................
Hancit ni namandurung
Sada-sada incor di batu
Hancit ni namalungun
Sada-sada ilu madabu
......................................
Mandurung ko anggi mandurung
Mayup sanggar di Batanggadis
Molo malungun ko anggi malungun
Dokon gorarku ulangko tangis
....................................................
Sian Botung Tu Muara Botung
Antara Nai Parsabaan
Por ni Roa mulak tu kampung
Bia baenon dompak suada di tangan
..............................................................
Malapat da anggi buntu-buntu
Panyaratan ni ria-ria
Malapat-lapat da Saleha rohangku
Malungun tu ho inda tarida
...............................................
Tor dolok Siojo
Dilombang Nai Ranggasoli
Idok ko di abang najolo
Angkon na ke nimu tu Tano Doli
........................................................
Pasendeng tu Ranggasoli
Bahat halak sauduran
Dung do lalu abang tu Tano Doli
Sampe sannari leng pangangguran
............................................................
Losung di Pidoli
Tumbuk Salapan Indaluna
Janjintai Saleha Nasanoli
Ulang tu halak sugari laluna
.................................................
Mula ke ho anggi marsoban
Ulang lupa maroban bongko
Uharopkon doho Saleha Sobar
Painte Au mulak ngon Ranto
..................................................
Jambatan di Muara Pungkut
marsambung Dua ditonga-tonga
Pandok ni Datu Janggut
Angkon na rap do hita nadua
..................................................
Marmayam tu Sigalangan
Singgah santongkin di Siabu
Pala inda adong halangan
Ari Rayo Taon Naro Mulak Do Au
(Pala Adong Epeng Dot Waktu)
....................................................................
Sian Abang Sayangmu
(PUNJUT BAYOPANGGURIS) Harap di Balas!!!
......................................................
Dung siap ibaca si Saleha surat i, iummah ia sakali nai, ialuk ia laos mangecek "Olo abang Punjut, upainte pe ho" ning si Saleha adop gambarni si Punjut dompak marsaraor pontong na isimpan si Saleha ditoru ni Bantal. Dung i torus ma ia tu bagas ni halak si Rohana get marsapa sanga andigan mulak tu Medan.
"Kakak, andingan do kakak mulak tu Medan?" ning si Saleha
"Hum nabaru ro dope halak antong, madung isapai ho sanga andingan mulak, tako na kaboratan doho na ro on au?" ning si Rohana antong marsianyang.
"Indaba kakak, pala mulak kakak sugari idokon kakak di au tongkin nai, get mambalos surat naioban ni kakak i" ning si Saleha songon namaila.
"O, jiarma, Insya Allah sapoken ari rayo pala inda lupa au udokon pe di ho" ning si Rohana martata.
.......................................
"Sonjia ma le balosan ni surat nai?" ning si Muktar muse dope parebanku marsapa
"Tai sapoken ari rayo do ning si Saleha" ning Mamak Katuman mangalus
"Masusah tu domai uida karejo ni halai i, pake surat bage, i SMS nanga" ning si Muktar muse
"Jia ma adong SMS taon pitu pulu" ning Mamak Katuman muse antong manjawab
"Aha do na dong?" ning si Muktar
"UBS"
"Ahadei?"
"Ulang Bahat Sapamu" ning Mamak Katuman

Senin, 15 September 2008

Romadhon tu Romadhon (Opat)

MANCIT OBUK NIA

Disada maso najolo, di sada kampung namargorar Hutanaginjang, pas dompak bulan Puaso (songon sinetron sajo doma) adong ma sada danak namargorar si Ilman. Si Ilman on kalas dua dope esde (SD), tai tingkah lakuna madung songon na dewasa, apalagi danakon sipajuak-juakon (pala iangkat-angkat, aha sajo pe idokon ikarejohon ia). Namun ulang lupa, sijuak-juakon naon tu na denggan do, khusuna di bidang Agama.
Harana ia anak na godangna, orang tua nai marmaksud mandidikna di bidang agama, pas muse antong bulan puaso jadi tontu iajari muse ma puaso.
"Anggo abangmuyu na tahanan puaso i" ning umak nai sajo ma atiha mangelehen mangan anggi-anggi nai di pukul 10 manyogoti.
Itahan si Ilman muse antong inda mangan, padahal merdet doma ijur nia mangaligi namangani, manaek mijur muse baya talonan ni danaki mangaligi tabo ni gulena. Gorar na pe bulan puaso, napatabo-tabohon sajo dei anggo panganon, paling menek mei bolgang "bulunggadung", salainna Lelan Batanggadis na isale, Garing na i panggang, Ikan Mas na i asom podeh, Incor na i arsikkon, Aruting na igule siak, Bolut na i rondang sareto dot joring, soni muse na lain-lainna. Aso ma nga dosir ijur ni si Ilman antong mangidana baya (saling namambaca tulisanon pe dosir ijur nai). Disamping ni i muse si Ilman danak namenek dope, tai baen na idokon ni umak nia nangkin tahan dei puaso, itahan-tahan ia sajo olope dor mangapus ijur sian topi ni bibir nia.
Nasonting na inda soni, umak si Ilman di Puaso na pa lima bolasna inda dohot be puaso (biaso mantong, gorarnape adaboru tontu adong halanganna).
"Halangan sonjia do ompung, jelas mantong dokon ompung da?" ning si Moncot muse dope adop ompung Dolok namarcaritoon.
"Ima da so marbagas iba da, so binoto sanga sonjia adaboru, ulang sei namarmahan Orbo sajo karejo" ning ompung Dolok antong mangalusi. Rupana Ompung Dolok antong madung tolu kali marbagas, jadi wajar mai molo nabotoan ia anggo masalah ni adaboru.
Jadi, rupana pas mangalehen mangan adik-adik si Ilman i dot muse ma umak si Ilman mangan, tarpaida disi Ilman.
"Ida homu mei, pado-pado umak pe tahanan dei abang muyu Ilman puaso" ning umak nai muse ma. Inda sajia onok ro muse ma ayah nia manakik (mangguris), torus muse mangan (rupana baya inda na puaso muse), maila ia di anak nia si Ilman, dohot-dohotan muse ma mangecek bayo i "Anggo abang Ilman da, pado-pado ayah pe tahanan do ia dongan puaso" ningna muse ma. Ro muse ma ompung nia ngon bilik tiop roti dot kopina sagalas godang, "Salingkan daripada ompung pe tahanan si Ilman" ning ompung nia muse ma. Mijur baya danaki ngon bagas, tangis juguk di anak tangga na partoru lao manatap adop langit, mandoah tu Tuhan "O Tuhanku, salamatkon da keluarga nami on!" ningia.
Rupana tarbege di umak nia dot ayah nia na tangis ia, "Aso tangis ko Ilman?" ning kalai.
"Inda dong ba ayah, mancit obukku" ning si Ilman lao mangalap abit karung tu bagas torus kehe tu Masojid sumbayang Kotu Luhur.

Jumat, 12 September 2008

Romadhon tu Romadhon (Tolu)


TIMBAKO PUSUK API-API

Layang-layang ni si Andilo
Mangalumpat uting tu parapi
Ayam-ayam ni si tukang paido-ido
Timbako pusuk api-api


"Adong Mamak ku namargoar Jasadaroa na tinggal di Tabaringin (inda tola sidokon sangan Tabaringin jia, harana Tabaringin 5 di Madina on sapambotoanku, Tabaringin Tombangbustak-Kuala Lumpur, Tabaringin Maga, Tabaringin Sabajior, Tabaringin Sinonoan dot Tabaringin Pagur). Disada maso najolo dompak bulan Puaso, ro au mangulangi tu bagas nai, ning umak manyuru au manjalin Silaturrahmi do, tai au natorus santampul dua lancim doba. Sambalik antong get mangulangi, tai sambalik nai nagetmangaligi boru nai do au, harana adong boruna sisada-sada inda tanggung litakna, on naget ari rayo muse, ehmmmmm" ning si Kirman muse ma mamuloi carito.


"Aha do so marcarito na litak-litak ko, mangkehem bage, tako inda napuso ho?" ningku marsapa. "Maksudna pala maridi litak, ho dabo anggo topek tu carito namaraek i, nabegean supingmu" ning si Kirman mangalus.


"Jadi sondia nagkin carito nai?" ning ku muse


Imada, lalu au tusi antong borngin ma markisar kotu Isya, kehe au tudapur mangaligi ampot adong dope lobi-lobi ni parbuko, rupana Pusuk ni Otang doma itoru ni tudung nasi dot lasiak kecap. Jadi inda mangan au be, harana anggo di amian najolo di jae ni Muara Sipongi inda ipangan halak i pusung ni otang, batasan dei pusuk ni singkam pala inda pusuk ni kopi iparulam baen dongan ni indahan. Borngin nai antong modom ma au dibagas i di ruar, markisar jam 4, lingo-lingo ubege mangkuling nantulang "Butet, ngoti abangmu so Sahur kita" ningna ma ubege. U pa purak-purak modom so ingoti na au tu luar, "iparar do-on" ning roangku antong. "Abang, abang, ngot ma abang, madung jam 4, mangan ma ita ning umak" ningna ma manggoti au laos mangalaok. "Mmmmmm", ning ku soni asok (madung ingoti ia na ngot, ning roangku antong), lao u elehen tanganku so itarik na au juguk, isambutna muse antong tanganku, torus ma hami mangan andostorang. "Aha do so ekel ko, mangan indahan do dabo" ning si Kirman manyonggak au. "Ol,ololooo, mangaaaannnn" ningku gogap.


Dung siap mangan, upatik sigaret Listrik (Lucky Strike) sabatang, ibuat mamak muse sigaret ki sabatang. "Na tabo antong sigaret muyu on bere" ning mamak ma adop au. "Ah, ngada ba mamak" ningku mangalus, tai ibagasan roangku "antong i idup mamak sajo Timbako Gayor, aso nga capot". Siap sumbayang subuh, modom au mulak di ruar, ubaen sigaret di ginjang meja dot lotingna. Markisar jam 10 tarsonggot au modom, uligi sigaret inda dong iginjang meja be, usapai inang ni danak (eh, boru tulangi) sanga adong ipasimpan ia sigaretku, inda dong ningia. Markisar jam 11, ro mamak tu bagas, lao mangkuling "Ulang patibal-tibal komu sigaret di ginjang meja i pala arian, inda tahan au i" ning na ma songon na get mambekbeki au. "Imei dabo napayahna ilala mamakmu pala puaso" ning nantulang muse dohot-dohotan. "Olo mamak, nalupa dau i nangkin" ning ku antong. "Sambang do jengkar antong baya, mangaligi sigaret pe inda bisa pula puaso" ning roangku dibagasan.


Potang nai pas marbuko, upangan sada Tamar, baru minum, dung i ubuat sigaret nangkinani sabatang upatik, torus ke au tu Masojid get sumbayang. Dung kaluar au Istinjak ngon WC, u ida tulang i madung juguk marsandar di tiang di sopo-sopo pancur masojid i. "Mangua dei mamak?" ning ku marsapa. "Monggot au baen naso mangani dope, utiru-tiru hamu nangkin dung marbuko ubuat sigaret muyu i sabatang, upatik muse" ning mamak mangalus. "Aso antong itiru-tiru mamak au" ningku mangalus, "Poso-poso ma paiut-iuton ni mamak" ning ku lao manogu mamak tu bagas.

Rabu, 10 September 2008

Romadhon tu Romadhon (Dua)

PAINTE OTUK MANGKULING

Painte-inte marbuko marcarito ma Amang Boru Jamarpuyu di lopo ni alak si Mariam lao dor manjama-jama Toge dot Kue Bongko na adong iginjang meja i sanga na dia naboratna get obanon mulak tubagas non. Iangkat ia sada-sada kue i, padahal sada do get tabusan nia, "Timbang dabo dot timbangan on, udak na" ning umak si Mariam lao mangalehen timbangan ukuran 150 kilo.
............................
"Ning Rosulullah SAW, adong dua kebahagiaan di halak napuaso : Napasadana molo marbuko (marbuko potang) soni muse molo Ari Rayo, napaduana molo saulakon pasuo dohot Allah SWT di Yaumil Akhir. Jadi muloi sian daganak iba najolo molo get tibo ma waktu marbuko totop doi mar riang-riang iba di jolo ni Masojid. Mar sikojar-kojaran mai dohot dongan-dongan niba, dor muse mai Udak Bokar mangondam otuk i dot tokok-tokok nai so marlojong iba tubagas. "Ahhhh, ala leee" ning iba muse mai baen naso jadi i ipalu ia, harana antong hurang dope waktuna markisar 15 minit nai. Margiri muse mai iba dot dongan niba mulak, marsikojar-kojaran dot mar taba-taba tobu saruas, pala adong dongan niba na jonjong longang itulingkon mai tot nai ngon balakang, lao idokon "Taba Saruas" martata mai iba non pala get unjom dongan niba i. "Tung, tung, tung" ning otuk mangkuling, marlojong ma iba i tu bagas torus marbuko, minum aek dot kolak pisang, torus mangan muse sampe mabutong tu doma. Dung mangan langsung tarpodom, inda bisa taraweh be, pala bisa pe ke taraweh dor mai tarpodom atiha sumbayang. Epengpe ilehen sajo mai tiop ari baen parabur niba, namombo ilehen umak mai 10 rupiah, tai doran dei 5 rupiah, namun jaru songoni dapot juo mai sabungkus pocal maso i. Inda dong susahna anggo puaso iba, salalu mai marriang ni roha tarutamo nagkinani pala painte marbuko, sampe sadarion dung matobang iba asalna napuaso totop do riang roa niba pala get marbuko", ning amang boru Jamarpuyu ma tu hami.
"Molo ari rayo antong ulang be, pakean nabaru dot epeng parabur madung ilehen umak dot ayah di iba, ipe sampe sannari dung matobangon iba inda jabat katinggalan ilala pala inda marbaju nabaru, naponting tarkarejohon sude suruh ni Tuhan tai salama bulan puaso i, madung dot maiba ari rayo dot marriang-riang" ning amang boru i muse. "Jadi pala adong halak nai namar riang-riang ni roha sementara inda puaso, naso tau di untung dei alak nai" ning amang boru palalu carito.
"Kebahagiaan pala marsuo dot Tuhan tai incogoton, sonjia udak?" ning si Borgo marsapa.
"Anggo i ba inda pe ita boto i, tai nga pe mate ita" ning amang boru i lao jonjong, harana mabiar ia mur marsapa hami inda tarjawab ia, baen tahekna do napuasoi sadarion so get mar dakwah ia di lopoi, anggo modal dakwah na pas-pasan do.
"Kue bongko muyu dope bo udak na" ning umak si Mariam mandok amangborui nadung lalu tu dalani get mulak. "Tuk mei sada nanga?" ning umak si Maryam muse lao main mata dot alak lai niai. "Cukup ma bai, anggo daganaki ngana jiot kalai i" ning amang borui, padahal baen namabiar do ia inda dong non panabusi ni Gudang Garam pala dung marbuko.

Selasa, 09 September 2008

Romadhon tu Romadhon (Sada)

TARLAMBAT SAHUR

"Pacopat bo sonduk indahani, udokon do ulang modom be jabat dung mardahan sahur, on waktu saparopat jom nai doma, naso mangan dope, get mangidup bage dope iba, kopi pe indape ibaen" ning Sutan Mangkutur mambekbeki adaborui natarpodom di amak sumbayangi salose sumbayang Tahajjud dung siap mardahan andostorang nangkin. "Olo abang, mangido mohop au, cogot Insya Allah ida be ubaen be" ning adaborui antong mangalus dohot lambok ni pangkulingna (marangan-angan doma namambaca tulisanson jabat). "Botulma margamu Margabus" (inda tola idokon margana, mardosa), ning roa ni adaborui ibagasan roa nia sa sada ia.
Isonduk ia antong indahan, soni muse dot gulena, ibaen ia diginjang meja i dijolo ni alak lai i. "Nabo abang, ulang dabo matubekbek sajo, macopat dei iba matobang" ning adaborui lao mambaen parbasuanna. Mangan ma Sutan Mangkutur marisar-isar di ujung ni waktu sahur i (markisar 10 minit nai doma), ipandang ia jom mur sompit, isuru ia muse alak bagas nia i mambuat sigaret nia, dot mangangkat kopi nia. Mur masompit waktuna, tangan siamun Sutan Mangkutur manjomak indahan, tangan siambirang nia maniop sigaret. I sulang sansulang, i arsik muse sigaret sangarsik, isirup muse kopi sansirup. Sonima torus marisar-isar sampe markisar lima putaran.
Pas jomak na pa pituna, ..... Immmmsaakkkkkkkk, ning sora ni Muazzin di Masojid. Sutan i nangkin pas manjomak godang indahan, bolnang mata nia mangiligi jom dot mambege sora ni Muazzin, ipaksa ia monolon indahan nadi papangan niai, ibasu ia tangannia, huk kek ma Sutan Mangkutur harana inda sompat minum. I muse jolo karejo ni adaborui mangarut abara ni Sutan Mangkutur, padahal adaborui nangkin inda namangan sahur, hum na minum maia harana inda sompat mosa pambaen ni Sutan i. "U arut donon palalu urat ni talonanmu bo, ampot Gim ko" ning roa ni adaborui soni ibagasan, get lupa muse ma ia daganak namarkalamotan.

Sabtu, 06 September 2008

Puaso Riuk - riuk

"Ulang komu marsurak daganak, markean jolo marmayam!" ning umak si Lomlom mandok daganak nia na eruk dibagas marmayam koje. "Naron ro hamu mulak tuson dung ngot ayahmu, tarsonggot ia non mangamuk ia!" ning ia muse adop daganak i.
Sadarion puaso na pa onomna ma, on dope so puaso si Kutom, ipe baen ilana do ilala ia mangida nantulang nia na ro sian Taliang natuari maroban eme na baru isabi baen pandaian, lao mangaligi paompu nia di Muara Singkut. Dung do Sahur na modom sajo ma si Kutom, sampe inda binoto ia jabat nadung mulak nantulang nia tu Taliang manyogoti jam salapan i. Puaso napasadana mancit ningia boltok nia, padahal baen naso tarorom nia do lobi-lobi ni gule rondang natuarian dot tulang sup nai, sada satonga kilo ma antong dagingna, dua kilo tulang supna, inda habis rupana sude andostorangi. Di ari napaduana, kehe ia tu kobun inda tar paida-ida ia muse botik namalamun di batangnai, ibotalkon ia muse puaso nia. Napatoluna, baen napoken i, kehe ia manggadis kantalan tu pasar, rupana kehe ia tu pasar bawah marlao-lao, marbuko muse ia disi, untungma inda tartangkup polisi, anggo inda madung maila. Napaopatna puaso, inda dohot ia sahur, na palimana torangan ari. Pokokna adong sajo ma alasan si Kutom so inda puaso, tai jaru songoni anggo adaborui ba napuaso sajo do, songoni muse daganak nia, hum si Lomlom maia naso puaso, ipe baen na tolu taon dope umurna.
Markisar jam 11.00 tarsonggot ma si Kutom, taraso ma iala ia marngaok boltok nia baen malena, mangkuling muse ma ia adop adaborui. "Inda dong indahan dongan isi be?, inda natahan au roangku na puasoon da" ning si Kutom adop adaborui. "Palalu abang ma dabo, madung get kotu ma dongan, satonga ari nai doma, non potang sanga aha giot ni abang parbuko upamasak pe" ning adaborui lao mangarut-arut pat si Kutom. "Naget ro ma parumaen, leng naso ra dope puaso" ning roa ni adaborui ni bagasan roha nia. "Jiar ma soni, pala inda tahan non, ubotalkon doba" ning si Kutom muse dope adop adaborui. "Tahan dei dabo Insya Allah, u ompa abang non pala payah ilala abang" ning adaboru i muse mangelek si Kutom.
Jam 2 dope arian madung margoso adaboru i pature parbuko giot si Kutom muloi sian Pusuk ni Hotang Panyabungan, lopek Maga, Kue Lapis Kayu Laut, Kue Bongko Kotanopan, Gule Incor Tamiang, Gule Apesong Aek Kapesong (adong nanga i?). Es campur, Es batu, madung marsusun ipantar i, tinggal sada nai doma naso masak ima bolgang "Bulunggadung" gule tradisional Mandailing naso tola itinggalkon pala mangan marbuko Magorib. "Ise sajo na so margule Bulunggadung satiop halak Mandailing pala potang, puaso nai sah tai inda botal" ning Ustad Husin disada maso lao margiri, sampe martata halak namambegena (mungkin mikim juo dei na mambaca tulisan on).
"Tambai sirana!", ning si Kutom adop alak bagas nia.
"Madung ma utamba abang" ning alak bagas nia mangalus
"Tambai sotik nai" ning si Kutom muse
Itambai adaborui muse sanggolom nai, "asal torus puaso, capot, capot ma soni" ning roa ni adaborui sasada ia.
Sa jom nai so marbuko, madung ikuah si Kutom kinan indahan nia dot bolgang bulunggadung nangkinani, tangan nia madung di parbasuan i kinan, songon perajurit na get marangkat porang, beker madung ilambung nia, padahal daganak na marmayam dope diluar. Saparopat jom nai, madung igaor-gaor ia kinan indahan nia dot tangan nia, mikim-mikim adaborui mangaligina "sambang do baya kaji-kaji, dohot halak napayah mandalankon agama ni Tuhan on" ning roa nia lao taringot ia tu ombar banjar nia najolo di Taliang, tamatan sikola Purbabaru nadung onok margaul dot ia, tai dohot bayo on do jodoh sonjia ma binaen.
"Tung, tung, tung, tung..... " ning sora ni otuk di Masojid, jomak godang si Kutom mangangkat laos mangan, inda mambaca Bismillah, inda muse mambaca doah, "ngap, ngap, ngaaaaapp" sulang nia laos mangan, "heeekkkk, heekkkk, heeeekkkkkkk", ning sora talonan si Kutom laos muta tu pantari. Rupana, capot macom ja na paet dai ni bulunggadung i baen bahat ni sirana nangkin, inda porsaya iya diadaborui nangkin, itambai ia muse dope dot kecap.

Selasa, 02 September 2008

Ulang Dokon-dokon

Dompak daganak najolo adong donganku namargorar si Asril, hami nadua mardongan akrab, rap tujae rap tujulu, rap tuginjang rap tu toru.
"Songon siala Sampagul do uda" ning si Torkis mandok Japardamean, namarcarito di sopo saba pas atiha udan naporan lao painte-inte potang ari get marbuko.
"Olo mada, pala malamun saulak lalu, pala magulang rap margulu" ning Japardamean muse lao patorus carito.
Najolo hami di Mandailing julu dompak daganak atiha bulan puaso, begadang dei i Masojid pala borngin dung sumbayang Isya dot Taraweh. Sandang mei abit karungna songon namanyandang kadangan laos mar Tadarus muse. Dung salose mangaji, margulangan mai di Masojid painte-inte jam 12.00 tonga borngin. Dung jam 12.00 mangkuling mai Uda Sahlan, pangurus masojid i "Adope daganak, palu hamu otuk i" marbagi mai hami ma maluna, deba di otuk nai deba muse di Tabuh nai (songon gondang, tai lanjang sarangnai ibuat ngon ayu nadi lubangan, di hamian najolo Tabuh gorarna). Dung solose i marsurak mai iba di kampung i "sahuuuuuuuurrrr, sahuuuuuurrr, ning iba mai mar rami-rami sampe jam 1.00.
Dung sidung i ke ma hami tu Bagas, mangan Sahur, torus mai modom, naron ingoti umak muse mai jam 5.00 sumbayang subuh torus manolongi umak mangguris tu Aek Lilian.
Baen nacopat i mangan andostorang, jadi inda heran iba be pala dung markisar jam 2.00 arian, lomah mai sibuk niba (tahek ning halak najolo).
"Aso copatna antong mangan andostorang uda?" ning si Torkis muse. "Tai ale baen susahna hangoluan maso i, dung mangan andostorang angkan na modom dope, harana get kehe mangguris, jadi so ulang hurang podom" ning uda Japardamen muse mangalus.
Disada ari dung ro mangguris tarpodom au dibagas, pas dung tarsonggot au markisar jam tonga opart taraso ma lomah, sampe payah doma ulala pala get jongjong, mangadu au tu umak maso i. Di suru umak au ke sumbayang Ashar jolo, so margogo mulak ning dainang pala dung manjawek dot sumbayang. Dohot langka na borat, upaksa juo kehe tu Masojid sumbayang Ashar oban abit karungna. Rupana baya botulma nai dokon ni umak i nangkin, pas lao get manjawek au, inda sodar tarinum au aek pancur ni masojid i, rap ita boto mantong anggo aek di masojid, nalangsung dei iselangkon sian gunungan, bontar doma baen iasna, topek muse tarinum dompak apayahanna puaso, manis doma ulala raso ni aek i. Dung sidung sumbayang mangadu au tu umak satontang tu masalah nangkinan, idokon umak di au, inda botal puaso niba i anggo peto-peto na lupa. Inda dong dokonan da be salain mangucapkon Alhamdulillah, badan pe madung tumogar mulak, lagi ari pe na potang ma.
Kehe ma au marmayam tu toru, pasuo muse ma dot si Asril nagkinani, ucaritoon disia kajadian i, goyak roa nia diau, namun jaru songoni kehe juo ami marmayam pa potang-potang ari lao manjalaki pote baen dongan ni indahan non pala marbuko. Sapanjang pardalanan i, molo ucaritohon na puaso, goyak ma roa nia di au. "Ulang dokon-dokon na puaso, au pe get minum au non pala lupa" ning ia adop au. "Mikim au sasada au mambegena, torus sampe marbuko inda unjung si Asril lupa, jadi totop do ningot na puaso", ning uda Japardamen lao kehe to topi ni saba manaba pisang nadung mongkol. Ilehen ia jami sa siat be baen parbuko cogot ningia pala dung malamun.
Bulunggadung Mandailing, O Tano Hasorangan, Tano Hatubuan, Inganan Parmayaman, Lubuk Parkatimbungan, Sian Ranjo Batu Santak Tu Sihepeng, Tano Nagambur Nanapu, Ingkon Mulak do au pala marhepeng..... alaleee bayaaa...