Silalat di Angkola,
Bulung Gadung di Mandailing
Ulang marmayam amang di na sikola
Anggo gara-gara ni bujing-bujing



Rabu, 27 Februari 2013

Mur Ma Lapang

"Adope le, marmasukan bo hamu tuson, ulang jagoi hamu idalan-dalani" ning Japardamean mandok Jakoje rongkon Jamangampun najuguk didalan-dalan i ijolo lopo di Jarundut di potang-potang ni ari.
"Olo, ro ma hami on", ning Jakoje antong mangalus
"Roma hami ningmu, tai leng na juguk do hamu didalan-dalani, tuson mada pajuguk kamu nadua da, so ibaen tuhamu kopion, dompak milas bo" ning Japardamean muse mandok halai nadua.
"Tu homa isampakkon" ning Jakoje muse mambalos.
 
Inda sadia onok tong ro ma Jakoje dot Jamangampun tu bagasan lopoi.....
 
"Adope, geser tusi sotik" ning Jamangampun mandok Jabodil nadompak asik manonton TV
"Anggo hamu peda ipar, anggo inda manyompit-nyompiti inda na sonang roha muyu" ning Jabodil mandok Japangampun.
 
"Songon najarang-jarang kuida hamu ro tulopo on, tako nadung i dapur muse ma manderai?" ning Japardamean adop Jamangamampun
"Inda ba pareban, tai iboto hamu do parsontingan sajo, daganak marsikolaan, porlu on porlu i, ngana mangarti iba dabe, manombo na mur masompit do ulala dung gok daganak on.
"Bo, nasantak muse antong pangirasoan muyu tile, anggo au boto, anggo au do da dongan, na mur malapang do ulala dung gok daganak" ning Japardamean lao mangkardak kalai naopat.
 
"Jiana doon, sai tobang-tobang kamu baya, marroncaman dope parkobaran muyu" ning alak bagas Jarundut nampuna lopoi.
Olo ba, ima tobang-tobang na halai dongan leng naroncam dope" ning roa ni namambaca tulisan on muse sada-sadana

"Inda na roncam kami dale dongan, napeto do carito on" ning Japardamean leng tata

Senin, 04 Februari 2013

Tahan Tampul



"Paido ma dabo sanga aha jo, ulang ko maila so mangan kita" ning Japardamean mandok Jakudo dongan akrab nia dompak rap poso-poso najolo. Ima onokna ita inda pasuo, anggo hum na mangan do dabo Insya Allah adong dei epengku ning Japardamean muse mulaki. Olo ba au na ujajar mon ning Jaburas lao mangkuah indahan nia dohot gule bulunggadung di Simpang STAIM an dua taon na solpu.
Madung marbabere maho ubege? ning Japardamean mandok Jakudo
Madung, borunta nagodang nai marbagas tubalikan
Madung adong paompu?
Indape
Anggo soni hum sonang maho sannari tie, madung marbabere, na godang nai pe nimu madung salose ma sikolana, um nayang mai pikironkon tu bagas.
Ah ahadei jabat sonangna, au anggo hangoluan do dot sikola ni daganak muloi sian najolo natenang doau i, namarsakna roangku dabo balanjo ari-ari dei pardapur.
Aupe ba imaia i namarsakna roangku ning Jaburas lao manungkiskon partambuan i tupinggan nia.
Aupe ba soni dei, sarupo dei ita ning Japardamean muse mangalus.
Bulunggadung Mandailing, O Tano Hasorangan, Tano Hatubuan, Inganan Parmayaman, Lubuk Parkatimbungan, Sian Ranjo Batu Santak Tu Sihepeng, Tano Nagambur Nanapu, Ingkon Mulak do au pala marhepeng..... alaleee bayaaa...