Bulung Gadung Mandailing

Martarup Seng

2011-12-31T09:00:00.001+07:00

Marrondam

2011-11-28T14:57:00.000+07:00

Boa-boa

2011-10-31T16:29:00.006+07:00

Kiriman sian Kahanggi di Bandung

Ari Sabtu i tanggal 22 Oktober 2011, bertempat di Rumah Makan Ponyo, Jl. Malabar no. 60 Bandung, madung di adokkon pengajian rutin bulanan Perkumpulan Tolong Manolong Tapian Nauli Bandung dan sekitarnya, dihadiri sakitar 60 halak ama- ama, ina -ina dohot angka naposo-poso.

Kabotulan penceramahna pe sian anggota hian do. na somal antong manangion do Bapak on, tapi topet di ari Sabtu on Bapak on ma jadi penceramah, ima Bapak Drs H. Panusunan Pulungan, MH. Hakim tinggi di Pengadilan Tinggi Agama Jawa Barat. Bapak on pe baru dope sa taon ibana pindah tu Bandung on sian Pengadilan Tinggi Agama di Medan. Terkesan do nia diraso halahi tinggal di Bandung on.Judul di kaji nami sadari i ima Upaya menjadi Muslim yang cerdas dan bermakna.

Tapi bope songon i anggo pandapot ni Bapak on tar songon na patigor-tigor fatihah do kaji on. Tapi bope songon i porlu do on, harana na bahatan do di hita on, inda sadar hape bahat na salah na hita baen i sanga na hita amalkon i. Misalna jungada Bapak on pasuo dohot bayo na jadi imam sumbayang. Adong rupa di bege Bapak on bacaan ni imam i na sala. Jadi antong didokkon ibana ma tu imam on dung sidung sumbayang, "Aropku na salah do hubege bacaan di Bapak i, pacocokkon ma jolo tu Al-Quran i, Ning Pak Pulungan on. Jadi antong di pacocokkon halahi ma, rupana botul mada na salah do bacaan ni imam i.

Di dokkon ia ma bahasa leng na songon i ma ia mambasa ayat i padahal ma 13 taon ia jadi imam.Jadi imada, ning Pak Pulungan, porlu hita ligi mulakkon hita pareso sanga na dung botul do na hita amalkon i. Molo na dung pade antong syukur, tapi molo inda dope, hita pature ma, mumpung dompak mangolu hita.Selain sian i, dikaji Pak Pulungan ma antong rukun islam na 5 dohon rukum iman na 6 i. Harana na 5 on do dasar ni Islam i.

Goarna ma rukun. angkon na lengkap do. Tarsongon bagas sanga pe bangunan, anggo inda lengkap inda deges.jadi molo diibaratkon, syahadat i ima pondasina, angkon na mantap do pondasina anso togos bangunan i. Dungi sumbayang ima tiangna. Ibarat bagas anggo inda adong tiangna, inda kuat i bagas i. sumbayang on wajib tu sude na mangolu. molo inda bisa jongjong bisa juguk, anggo inda bisa, berbaring, sanga pe pake isyarat. Jadi inda adong kamus nai maninggalkon sumbayang.

Puaso ima tarupna. di hita on bahat do halak sanga na di sangajo sanga na botul, satiap ro bulan puaso, mulai ma maag nia kambuh. ima alasan nia anso inda puaso. adong musa hum na mancit ulu sajo do, inda puaso be. padahal anggo di kaji Quran i, puaso i angkon na totop do dikarejohon i di bulan na lain. Jadi ulang dianggap, "Ah, inda bisa au puaso mancit butuha kku, niba" molo marpanyakit iba di bulan puaso, dikarejohon di bulan na lain. Dungi zakat, minimal zakat fitrah, ima jandela dohot pintuna.Molo haji tu Baitullah bagi na mampu, ima pagar na.Jadi on sude angkon na dikarejohon do anso sampurna islam niba.Dungi salaho tu Rukun Iman, sebagai halak na maragama Islam, angkon na beriman do tu na onom i. ima, percaya kepada Allah SWT, tu malaikat-malaikat, tu rasul-rasul, tu kitab-kitab. tu hari qiamat dohot tu qadar baik dohot buruk.

Jadi ima sipaingot ni Pak Pulungan anso torus dipareso sanga na dung botul do na di karejohon i. Bope kaji on hanya Rukun Islam dohot Rukun Iman, ulang di sapele hon. Harana on do pangkal na. Apalagi hita na dung tobang-tobang. inda leleng be namangolu on. mar siligian ma, obuk ma bontar-bontar, ipon pe mamartalgangan, kulit pe markariput, ning Pak Pulungan mikim.Dung sidung antong ceramah, tanya jawab dohot mambaca doa, dilanjutkon dohot santap arian. Bahat do hubege na mandok "topet" tu ceramah ni Pak Pulungan on.Jadi pangajian on, sanoli sabulan do on, tempat na pe tetap do di Rumah Makan i. madung langganan do on sian tahun 2006 ninna.

Wassalamu alaikum wr wb.,

Mhd. Darwis Nasution

Marsimohopan

2011-09-08T09:07:00.003+07:00

Assalamu Alaikum WW,

Maradopkon koum sisolkot, boti tu barisan ni mora, kahanggi dot anak boru.....

Hami sian Admin ni "Bulunggadung Mandailing", olo pe songon na tarlambat mangucapkon :

"Selamat Hari Raya Idul Fitri 1 Syawal 1432 H"

Minal Aidin Wal fa Idzin, Mohon maaf Lahir dan Bathin

Tu Sude koum na ro marsilaturrahmi tu Blog on, hami mangido mohof juo harana madung tola dokonon lobi sataon inda na adong kami mangisi blog on. On sude harana sompit ni karejo mada dongan di saba, jadi mohon do hami rap maklum kita, namun jaru songoni molo adong dongan boti koum-koum na adong caritona, tolong kirim tu emal nami anso hita pamasuk tu blog on, hami tulis ise pengirim dan pengarangna.

Tarsaima jolo hata na tarpaida di hami, hurang lobina mangido izin

Fas Nasution

Jambatan Di Muara Mais

2011-08-18T14:14:00.004+07:00

Jambatan baya di Muara Mais
Marsambung dua di tonga-tonga
Pikirkon do Anggi marabis-abis
Ulang Baen Baya Mardua Satonga

Jambatan Baya Di Muara Mais
Ipangkal nai lopo Paradianan
Maraburan Ilu hara ni Tangis
Pasari-sari Badan Naganjil Bagian

Jambatan Baya Di Muara Mais
Mardinding Bosi Kiri Kanan
Ate-ate Marosros Mangkagisgis
Harani hancit na marsikhianatan

Jambatan Baya di Muara Mais
Ilambung nai Panimbangan ni Gota
Araniho ho ma au baya ari-ari markais
Taru so unjung ko baya mambaen sonang ni roa

Jambatan Baya di Muara Mais
Antara ni Panyabungan tu Kotanopan
Harani ate-atengku madung mangkagisgis
U tuntut doho saulakon di hadopan ni Tuhan.........

Abdul Goni (Marhaban Ya Ramadhan)

2011-07-19T14:08:00.002+07:00

Lobima dua poken inda jungada ro udan, sahinggo muloi ma manapu bulung ni apea, hiang muse aek nai. Marsak roa ni pangguris, marsak muse roa ni par saba, harana eme na baru isuan dope dor hiang kiangan inda dong aekna. Juguk tondo ompung Jagulo disopo saba niai atiha maradian pukul sabolas arian raya namandonting i. Utatap sian nadao, tarida ma diau ompungi mambalun pusuk timbako gayor, isertek ia api-api, iarsik ia timbakoi lao manatap tu nadao.

Ro au palan-palan manopotkonsa :

"Assalamu 'alaikum ompung..."
"Alaikum salam, bo ho dei Japardamean, ngon dia doho nangkin?"
"Ngadong ba ompung, mancalong nasi-nasi sian sabai bo, por roangku ibolgang" ningku mangalus.
"Bo, aso nga dohot anggi i?" ning ompungi muse mulak marsapa
"Tai le sibuk ia pature daganak nasikola, lagi por roangku soni marlao-lao, madung na onokan au inda jungada mangaligi sabai" ningku muse.
"Bo, soni do langa caritona, aupe on mabo, eme le pot-potan, aek inda dong, mangkagisgis doma ulala tangani namancabuti duhuti, lagi ari ama na milas, taraso ma dabo ulala angin ni puasoi" ning ompungi mandok au.

Sip au antong inda ualusi be, upajuguk disopo niai, iarsik ia muse pusuk i marulak-ulak, tarpaida ma diau songon na ekel ompungi, bulus marsapa au tusia.

"Aso ekel ompung sasada ompung i?" ningku
"Ngadong ba, taringot au najolo di dongan" ning ompungi mandok au
"Taringot songon dia, ise dei dongan ni ompungi?" ningku mulakan marsapa
Ah, dongan na jolo doba i, ning Rosulullah dabo gorar i jadi doah dei, jadi adong donganku sasikola najolo adaboru gorarna si Sholatmaia. Mungkin doah ni simatobang nai so ringgas botu niaon mangkarejohon sumbayang. Atiha di kampung ni lai i, mungkin biaso do ibege dongan, jadi inda jabat na adong na hum di gorar niaon. Tai dung masuk sikola SMP di Kotanopan, pas ipio guru i gorarnia, bo adong muse dongan na ulah, isimbilkon ia muse goraron.
"Sholatmaia" ning gurui
"Sumbayang ma ia" ning dongan kon sian pudi, rap martata hami na sasikolai. Asidunganna boto inda sadia onok mohot muse goraron disikolai, asal do tarida ia dihalak, totop mai ipio halak ..."Sumbayang ma ia".... lao margiri. Walhasil baen ilana ilala danakon mantak boto ia na sikolai.
"Najahat mantong ompungi i, manggorar-gorar kalak"
'Inda ba le au i anggi, dongan-dongani dei" ning ompung i songon na mambela diri.

2011-06-15T09:08:00.001+07:00

Inda Pe Adong Judul Dot Caritona.....

Lubang ni Jamanggalundung (Sala Taram Mardosa)

2011-05-25T13:43:00.002+07:00

"Songonjia jabat naga tagina namangalubangi?" ning Japardamean adop Jamanggalundung
"Bo... taon mate-mate di lubangi" ning Jamanggalundung mangalusisa

Tingon Bagas Dei Mijurna

2011-04-20T10:06:00.004+07:00

Sajongkal dope baya pahu
Madung itinggang pangaritan
Sajongkal dope baya au
Madung itinggang parkancitan

Habang roba-roba
Nasonggop tusopo godang
Anggo inda baen namabiar dosa
Degenan doma au sugari habang

Andilo najoloi
Tali kadangan doma baya sannari
Pangidoanki najoloi
Tanggungan ni badan doma baya sannari

Malapat lapat doma sora ni uyup-uyup si Tangguli di ginjang ni horbo ni amanguda nia lao marmahan di saba julu di sada maso potang-potang.

"Sanga ro isaraormu" ning Jagudembas lao margiri pabege-bege ende si Tangguli lao manyalangi duru ni saba nia.

"Sugari baya nadung godang ia, giot do au sugari disia i" ning si Lanboina muse mandok dongan ni si Lasniari lao mulak tingon saba sareto mangkobari diginjang gadu i. Peto antong dongan, angke si Tangguli on umurpe sapulu taon dope, baen ni parsuadaan do harana nadung parjolo damang dainang nia ipio Tuhan tai, tarpaksa manompang ia dohot amanguda nia soleng dapot parsioram pala manyogot ni ari, so leng adong bagas parsisioan sapala borngin, olope namaramak amparan, olope namarbantal tangan sapala modom.

Mamura Tu

2011-03-23T15:58:00.004+07:00

"Geser jolo sotik, so dohot au juguk" ning Jauldop mandok Jarundut lao juguk di lopo ni Jamangombak di topi dalan-dalan tu masojid i.

"Bo, na ro dope hamu langa?" ning Jarundut lao manggesek juguk nia mur donok tu tipi i.

"Tujia sajo do hamu langa dongan, songon najarang tarida, tako namarorot do hamu di bagasan?" ning Jarundut muse lao mangarsak Jauldop.

"Inda namarorot ia i, tai namanyapsap mardahan dei sannari, harana anggo ro sajo ia tu lopo on, dor hona pelos" ning Jamanggutu muse dohot-dohotan mangarisak Jauldop

"Inda ba ale dongan, adong sotik epeng naupalugut-lugut taon nasolpu, jadi ubaen pature dapur tai, tai ba nagalang muse dope bo, inda dong isi dongan pinjaman jolo?" ning Jauldop mandok Jarundut.

"Ois leh, mangido tanduk doho baya antong tu uting, bo ijia muse mai upoluk?" ning Jarundut mandok Jauldop.

"Bo na i bagasanan mai bai poluk komu jolo" ning Jauldop muse songon naholas, tai obarani madung songon na simbil tu siambirang.

Leam - Lepe

2011-02-06T10:32:00.008+07:00

"Namapayah tu dei dabo karejo ni ompungi, mambalun-balun pusuk" ning si Muldop mandok ompung lobe Japardamean nadung pake kaco mata harana dung matobang.

"Sasakali on langa i patik ompung jolo", ningia muse lao manyurduon Gudang Garam merah.

"Ah, batuk au non anggi" ning ompungi lao torus manjagitsa, rupana ompungi pe ngana tarorom nia paida-ida sigaret si Muldop i.

"Dompak tempo langa mangajar (mangguris) sadarion ompung?"

"Inda ba ale anggi, kehe do au nangkin satongkin, tai tar tolu pulu batang dope u ajar, taro na marimbus muse ma udan ale, dari pada mayup sude non tinggal lojana diiba, kasidunganna mulak au lepe-lepe" ning ompung i mangalusisa.

"Aso mai jabat lepe hum songkoni ompung?, tai au ari poken na lopus, get mandaek ma au, madung pajolo do idaek dongan" ning si Muldop muse lao manyangkuliti pining kumango.

"Baen na so rasokinta dope dabole mungkin anggi i, tongkin nai domai di adopan ni Tuhan tai pot dilehen ia dihita mulakan, naponting antong sobar kita" ning ompungi muse songon na paingot si Muldop.

"Olo ba ompung, anggo na so rasokinta dope antong ba ngana tarpangan i, manombo tai nadung di papangan niba pe na rado madabu" ning si Muldop muse songon na pakokoh obar ni ompungi.

"Imada anggi, au najolo dompak daganak jungada mai songkoni" ning ompungi lao mangangkat pat nia sabariba taro mangarsik Gudang Garam, i bangku-bangku ni sopo jago i.

Disada maso dompak a asikanna dope ami marmayam markalas-kalas, tiop ma lidingku lao mangkais-kais parkalas-kalasan nami i, sapala na so iambang-ambang roha mu, tar kais au epeng tukaran limper (lima perak, lima rupia). Sapala marsurak au mandok dongan-donganki laos patidaon epeng na lima rupia i. Adope na roamu, mantak maryam, rap mangkais ma hami disi dapot kami ma maso i opat tukaran Limper i (maso i ba sapulu rupia dope sabungkus pocal).

Tai baen dung honokna roangku na tanom i epengi jadi madung songon na marsegoan tarida, jari kehe ma hami tu masojid manggosokna pake buapak torus ibasu so tangkas mulak tarida gambar nai (tukaran limper maso gambar ni amporik). Dung salose igosok, marpokat ma hami natolu sanga tu aha itabuskon epengon.

"Adope, kei tabusi hamu di hita karupuk" ningku mandok si Abah dot si Badu

"Inda adong karupuk i be jabat ari Kamis" ning si Abah mandok au

"Aha do songkoni?" ningku mandok alai nadua

"Pocal ma ita tabusi" ningsi Badu

"Pala na pocal, pocal ma, kei ma tabusi hamu so upainte dison" ningku muse mandok halai nadua

"Si Badu ma manabusisa, mabiar do au i inda laku epengnai, nadung sasa bagenan do angko nai" ning si Abah mangilak.

"Kei sogkoni Badu!" ningku muse mandok si Badu

"Aupe inda barani au i, homa kehe" ning si Badu muse mandok au.

"Ah, aupe ben naso barani ma au" ningku muse

Inda sadia onok roma dongan nami sada nai, ima si Awal.

"Ia ma hita suru songkoni" ningku

Dung donok si Awal tu lambung nami, mangkuling ma au adop ia

"Awal, kei tabusi jolo jita pocal dua bungkus, oban non tuson da so rap ita pangan" ningku lao mambaen tukaran na tardeges nai tingon ginjang.

"Olo, ningia muse antong lao marlojong tu umak Pisah an manabusi pocal na u suru i.

Juguk ma hami natolu di tangga-tangga ni masojid i painte-inte si Awal, lima minit, sapulu minit santak hampir satonga jom inda na marnaro si Awal on. Dung lobi dope satonga jom, sapala mungkap ma sian nadao, mardalan marpalan-palan ro manopotkon hami na tolu, tai inda dong tarida sanga aha pe itiopsa. Dung lalu tu lambung nami torus ma au marsapa.

"Aso onokna ho nanga, madung ijia pocal i?" ningku marsapa

"Inda dong pocal be di umak Pisah an" ning si Awal mangalusi au

"Jadi aha doma na adong?"

"Soto ma ia na adong" ningia muse mangalus

"Soto pe jadi, ima tabusi, paisar sotik" ningku muse mandok si Awal

"Inda dong epengna ba be, inda dong nangkin pambungkusna ning umak Pisah, jadi upangan isi soto dua tapak" ning si Awal lao mangapus bibir nia na marmiak dohot marlasiak-lasiak, torus naniopi boltok nia nadung butong-butongan, torap muse dope ia adop kami.

Sip doma hami soni da Leam Lepe, iba loja baya alak do na butong-butongan.

Dung lalu tu bagas marcarito au di dainang, ro dainang gusar muse tuau.

"Aso antong manjalak-jalaki epeng na deret-deret ko, inda iboto honanga pala iparjolokan naderet-deret, haram dei" ning dainang muse mandok au.

"Songon na tabo do boto ulala sigaretmon bo, jau nanga sabatang nai mangua?" ning ompung Japardamean muse mandok si Muldop.

"Sabatang nai doma ompung" ning si Muldop lao marisar-isar kehe, mabiar ia roangku habis sigaret nia i pas-pas ompung Japardamean.

.....

Malua Naso I Tambat

2011-01-14T09:37:00.004+07:00

Pala taringot iba najolo dompak daganak, manombo boto ho ale dongan na dua tolu por do roa niba mulak tusi, bo asi idokon kamu songkoni langa ale dongan? Harana dompak daganak iba najolo antong na hepi sajo do iba ari-ari on, dungpe marlamutak bustak disabaan sangape madung gumatali ibalun alalante, ngajabat namarsak roa niba i. Dungpe kotuk ni baju natimpang, dungpe solop nadung matombuk, dungpe saraor nadung markacomata sian pudi, nasada dei roa niba, salang-salang pe sasadari antong na asi do. Anggo sannari boto hamu ulang icubo-cubo i, lalu mai irambani alak iba.

Jadi imada dongan, taringot di maso daganak najolo, nabahatan i ulah ni simatobang niba diiba so ulang jahat iba atope so ulang sala langka niba.

Pala payah iba so modom borngin, busa-base baen lojana namarmayam i sasadari, mangkuling mai dainang tu iba : "He Lian, paisar modom, adong ning kalai na masa na muba, malua naso i tambat" ning dainang mai mandokon iba. Rope antong iba na so mangarti on bo, iambang muse mai adong babiat namalua, namarsampulung ma iba i u bagasan ni ulos rumah sakit *) i baen biarna.

Manombo sidung marbadai iba dohot angkang niba sangape dohot dongan-dongan niba ditorui, i elek inang muse mai iba "Sip ko ayah so ulang tangis, inda ra i magodang alak na partangis" ningna muse mai. Bo i kaua ni tangis de luai roa muyu tu namagodang?.

Muda tarbuat iba sanga suan-suanan ni alak, burangkit mai dainang "Papangani na itangkoi, so tubu tongkin nai iboltokmu" ningna muse mai. Tarbayang ma di iba i tubu arambir di boltok niba, nga antong roamuyu ale na jebu dei?
Pala inda kehe iba sumbayang, madung loja daiang manyurusa, matubekbek muse mai dainang "Angke

2010-12-15T08:59:00.004+07:00

SELAMAT TAHUN BARU ISLAM

I MUHARRAM 1432 HIJRAH

Mudah-mudahan Allah SWT salalu mangelehen umur na lanjang dohot rasoki na halal dihita sasudena songoni dohot kebaikan dunia tarlobi-lobi kebaikan Akhirat saulakon,

Amin Ya Arhamarrohimin.

FAS Nasution & Keluarga

Tahan Tampul

2010-11-23T10:27:00.000+07:00

Utangion di Koran Ubaca Di Radio

2010-10-12T16:30:00.008+07:00

Di opatAri Ari Rayo i, atiha mangan manyogot marrami-rami di dapur, mangkuling ma alak bagas Jarundut mandok anak panggoraran ni halai ima si Lindung.

"Ning roangku dabo mang, baen nadung cukup ma umurmu, harana bulan na ro pas maho marumur dua pulu onom taon, jadi madung cocok do pokat nami dohot ayahmu anggo na olo doho, ning roangku manjaki boru ma hita dabo baen di ho" ning umak si Lindung mamangkal kecek.

"Ammanggg, inda pe na giot marbagas au da umak" ning si Lindung antong mangalusisa

"Inda soni dabo amang, daripada manjal ko soni tujae tujulu, tongkin nai bo tarihut-ihutan muse ho dohot dongan-donganmu mangkaremuti sanga na asingna maila ita, lagi so malo ho manjalaki na tuho boti dompak poso dope ho sannari margogo" ning inang nia muse mulakan.

"Peto do bai na idokon ni umakmu Lian, harana anggo na manjal sajo karejo tujae tujulu, radei tongkin nai tarihut-ihutan ko tunaso pade, harana sian na ubege dikoran ubaca di radio, pangangguran i ma sada sobobna bahat halak mangalangka tu naso pade" ning Jarundut lao martambu napaopat kalina (pangabisan ni gule rondang ari rayo mantong, aso nga ke sajo). Mangkair kalai namangani antong mambege carito ni ayah niai.

"Na balik dei dabo angkang pandokon mi suang songon tot ni manuk, ubaca di koran utangion di dario do dabole katua" ning inang si Lindung muse palidang obar ni ayah si Lindung.

"Radio do dabo umak, inda dario" ning si Jenab muse palidang obar ni inang nia, mur maribur namangani.

"Peto do dabo mang, natuari boto madung ro ma koumta na manyapai si Jenab giot obanon ning kalai tu Kuala Lumpur" (Kuala Lumpur sapetona do dongan on, inda Kuala Lumpur Tombang Bustak ba). "Tai baen na hami dokon inda pe maringanan ko, jadi ima so ami dokon diho, ulang antong tongkin nai ilangkai anggimu muse ho" ning inang nia muse patorus obar.

"Pokokna inda pe nagiot marbagas au, umak ma marbagas sakali nai" ning si Lindung sumbarang dok.

"Anggo umak antong baya marbagas sanoli nai, malarat mai lalu amangmu" ning inang si Lindung lao manyirik Jarundut.

Peto do antong baya aha na didokon ni umak si Lindungi, angke anggo Jarundut do hum gorarna sajodoma na harato pucako ni alai, anggo namarkais inang si Lindung do disi. Ulang do torang ari na dung parjolo do inang si Lindung kehe tu apea mangguris, anggo Jarundut antong baya jianadei, na marpiul-piul dope ia dilopoan salao marburas. Rado do non pukul sambilan so tolap ia tuapeaan. Sidung mangguris non, inang si Lindung torus tusaba, marbabo sanga na pature batangi na dung i taraktor ni nangon durui (babi) borngini. Anggo Jarundut na dung mulak muse mai tuhuta, mardobol di lopo ni Jamarungkaman. Ra muse dei non pukul tolu so ro ia tusaba manolongi inang si Lindung.

"Ehmmm...!!!" ning Jarundut lao mambasu tangan nia namangani, nga binoto sanga baen na goyak pe roa nia sanga na tarsinggung ia sanga na peto na adong nasolot di aru-aru nia.

Pondok caritona baen na isosak ama dot inang nia sajo hampir tiop ari, ra juo do Lindung na matobang i, ima dohot boru tulang nia na sian Muara Losung. Tai boto hamu dongan muloi sian manyapaina santak tu namangkobarisa, ngana jungada dohot si Lindung. Daripada ra dohot degenan keia mangkail tu Batang Gadis, namombo borngin pe na kehe do ia marsulu dohot dongan-donganna lao marmangan-mangan di bagas podoman ni halai ima di sopo godang ni halak si Parlagutan an. Hinggo disada maso mangkuling ma ayah si Lindung tusia manyogot-nyogot, :

"Naron borngin boto mang namarikah ma, inda mungkin naso dohot ko i, ise muse dei antong manjagit nikah nai, inda mungkin au" ning Jarundut songon na holas.

"Olo ayah" ning Silindung antong mangalus lao manjungkit ipon nia lao mambongka pining kumango di tataring i.

..........

Kosong-kosong

2010-09-29T09:19:00.004+07:00

Assalamu Alaikum WW,

Maradopkon dongan-dongan songoni tu barisan ni hakouman na ro sian jae dot sian julu, khususna na ro marsilaturrahmi tu bagas ta on.

Ison hami pajojor hata, marsantabi sapulu, sapulu noli marsantabi, ima ditaringot ni tulisan songoni carito na bahat namargalangan tar baen kami. I sude dongan inda baen naso ra hami palalu carito i, tai baen sibuk ni karejo do di saba nami on, tardok do muloi sian bulan puaso i santak sannari, hum na baru bisa dope monggak na marbabo on.

Baen hita sasudena na di bulan Syawal dope, jadi ning roangku inda sala hami mangucapkon

Salamat Idul Fitri 1431 H

Mangido Mohof Lahir Dot Bathin

Wassalam

FAS Nasution & Keluarga

Malim Mangompot

2010-08-20T10:00:00.003+07:00

................

Sapala naroa muyu hira-hira pukul lima nai juguk ma Jalambok di tangga ni bagas niai painte marbuko, inda natarpangkulingkon be, mata nai madung rara songon na get mangamuk sajo, daganak dohot inangna pe madung mardaoan harana mabiar kalai mangamuk Jalambok. Naso iambang-ambang roha muyu markakkauak manuk dilambung nia, sapala irambas polang ia manuk i...... (sobar jolo da mangkarangna dope)

Marsuop Ilu (Marhaban Ya Romadhon)

2010-07-29T10:24:00.009+07:00

Jungada dehe tarbayang mulak dihita sasudena dongan-dongan, atiha lahir hita najolo di ginjang tano ni Tuhan on, bulus tangis ma hita marsuop ilu. Sadebana mandok baen biarna hita di Janjinta dohot Tuhan tai, sadebana mandok baen sosalnya lahir tuginjang ni tano on harana angkan na marsalutap bustak ni Dosa ma cogot kaduan on. Sanga nadia pe nabotulna, Tuhan tai domai da namambotosa, nadung pasti dot jelas, dihita dei natangis dabo ale baya, anggo alak na balok (simatobang ta, sudaro-sudaronta na martata dei halai mangaligi hita natangis i) mur magogo tangista mur ma jop roa ni halai. Sibuk mur magodang, ilu per mur marsalutap, muloi sian mangido epeng di simatobang niba santak namarbada dohot dongan niba. Mur lanjut umur, muloi musema martamba marsalutap ilu ni mataon masalah ni sikola, apalagi dung muloi maposo dihita alak lai ataope di namarsiajar mabujing di adaboru na marsabur-sabur ma aek ni mata gara-gara na margorar "CINTA" muloi sian Pintu Angin Muara Sipongi, Parjegangan di Aek Godang, Adian Marangin di Maga bagi halak najolo, Aek Godang, Sampuraga Dano Marambe, Sampuraga, Lumpatan Babiat, madung bahat tempat di Madinaon inganan ni panyampak-nyampakan aek ni mata.

Sibuk mur magodang, kehe muse ma marhuta balian, ipabuat simatobang muse ma tu topi ni dalan an, sahinggo hampir satiop simpang di Madina madung inganan ni panyampakan ni aek mata ma on. Kandang Rapat di kantor ni ALS di Panyabungan, simpang tolu Jambatan Merah, simpang tolu Pasar Maga, Simpang Tolu pasar Sinonoan, simpang Tolu Laru, Duta Selera Kotanopan, simpang Tolu Muara Pungkut, Simpang Tolu Pakantan Muara Sipongi dohot simpang-simpang na asing-asingna.

Mulak tingon ranto, ijakan muse ma boru so adong dongan sabagas niba, maneteki muse ma ilu ni mataon maninggalkon maso poso-poso atope bujing-bujing di dadaboru. Resmi muse ma iba maninggalkon bagas simatobang niba harana madung "ibaen jiba", mandok ma simatobang niba tu iba nadua :

"Amang, inang, inda baen naso jop da roangku rap dibagason kita, tinggal lagi so iboto hamu nadua manjalaki na tu hamu antong, ning roangku mangasing ma hamu, harana adong do sopo-sopo ni ambeng na inda ipake be di balakang ni bagas taon. Mur marsuap ilu ma iba nadua oban danonna sasuat, pinggan dua, udon sada, kuali sada, sendok rap rongkon sodukna sadabe.

Pondok ni caritona, bahatma tangis i nadung hita tinggalkon, bahat muse dope nangkan naro mungkin nangkan hita tangiskon, tai ba i tangisan dunia doda sudei i. Hita tungkir majolo tu tangista satontang tugas dohot tanggung jawabta sebagai hambo ni Tuhan antong le baya gorarna. Jungada dehe ale dongan hita tangis gara-gara ni na tinggal sumbayangta, atope puasonta, atope harani dosa nadung tarlanjur hita karejohon dompak najolo? Inda uboto da dongan, rap dirinta maso soni roangku hita sapai. Lobi sumurung sononma bo hita sudena madung diujung ni bulan Sya'ban, pala panjang umur dilehen Tuhan tai dihita sasudena wakatu soni dohot kasempatan bo angkon na mangkarejohon puaso muse mahita sasudena.

Jadi tangis tai bahat mada ragamna, manombo baen jopna roa pe rado iba tangis i, manombo antong baen namalungun, manombo rajuo baen ancit ni sibuk, rajuo baen dompak suadana di tangan, isude mungkin jungada ma ita rasoi i. Naponting antong ulang tangis mangalangoi songon caritoi. Baen ro Jamanggutu sian Mokah na ilojong si Jarongit ma tubas nai, mangangguk nasangat gogo lao mangkaluk Jamanggutu salao manyapai, taro pangincot-coton doma sora nia natangis i :

"Tar ummah komu nian lae?" ningna ma salao tangis (maksudna Hajarol Aswad na di dinding ni Ka'bah i)

"Au anggo parkaro ummah-mangummah nadung biaso mai ipar, tai inda na i tujuan antong na Naik Haji i" ning Jamanggutu antong mangalus.

Rupana bulus mangarti Jamanggutu sanga aha maksud ni Jarongit so taru sai gogo tangisna, ipacopat ia ilehen ia saroben, lobe soni dohot tasbih sada, sip ompot boto hamu Jarongit, rupana i do baya tangisonkon niai mabiar ia inda dapotan. Sapala mancelok Jarongit tu lambung, hape sada ia maia natangis....

Sakadar tulisan do da donganon, maksudna baen naget puasoi do ita, adong juo dei natangis, manombo baen jopna roa nia baen namasuk bulan Ramadhan i, manombo inda iboto ia sanga tudia angkan mangan arian, sadebana taringot disimatobangna nadung pajolo tu Rakhmat ni Tuhan.....

Saima jolo dongan da, Insya Allah pala adong kasempatan boti wakatu ita sambung di bulan Ramadhan on, rap mandoah kita sasudena, mudah-mudahan dilehen Allah SWT dihita sasudena Umur nalanjang songoni rasoki nahalal, sahinggo sampe hita sasudena tu Ramadhan on, Amin ya Arhamarrohimin.

Hami sakeluarga mangucapkon

Marhaban Ya Ramadhan 1431 H

Mohon Maaf Lahir & Bathin

Diginjang ni sude Kasalahan dohot Kakhilafan

Keluarga

Fadhly Abadan Syakuro Nasution

Maturapak

2010-07-02T16:49:00.007+07:00

Marayak pukul tonga lima potang-potang i, udan marimbus asok mangagohon abu na tarantongkin habang ibaen kareta angin soni dot motor namarmolusan didalan godang i. Jamandehe nabaru mulak dope tingon masojid sumbayang kotu Ashar marundung-undung anduk, maradian ia dilopo ni halak si Sungkot i manabusi sigaret Gudang Garam dua batang, nasada ipatik ia, sabatang nai antong isolotkon ia disuping nia. Mardalan ma ia torus tu sopo jago na adong di kampung i, tarpaida disia daganak namarsiajar maposo marsisio di sopo jagoi, bulus iogar ia daganak i :

"Hey daganak, aso ison kamu marlugut, inda iboto hamu langa parlugutan ni tobang-tobang do on, naposoan ma ilala ho roangku tie?"

"Painte siang do dabo udan tongkin tobang" ning daganak i antong mangalusina

"Olope na painte siang udan, inda tola marlugut dot tobang-tobang, hum danon pe ngana pe na itandai homu maposo ma ilala homu, tako madung itandai hamu ma danon?" ning Jamandehe mulakan mandok daganaki.

"Nabontar" ning si Minsor

"Iponmu pe nabontar do, danon mai ipon mu i? ning Jamandehe muse

Kasidunganna markean daganaki, tinggal sasada Jamandehe juguk disopo jago i taro leng mangarsik sigaret. Inda sadia onok marmolusan ma inang-inang opat kalak na mulak ngon saba, taro marbaris laos marcarito mangkobari halak opat-opatna, inda dong namanangion.

"Bo, naso dong do uida hamu namanangion, rap marcarito homu na opat?" ning Jamandehe laos mangkardak

"Uruskon so ro nyaemu!!!" ning umak si Mansur lao marisar-isar

Inda sadia onok siani, ro musema Jamandurung tu sopo jagoi marpayung hodong ni pisang, taro marungut-ungut songon na mandemes. Marsapa ma Jamandehe :

"Tujuia sajo do hamu nanga, inda jungada tarida?"

"Tai ale on mabo, inang ni daganak kehe mangaligi namarhorja tu balikan, janjina dua ari do disi, madung opat ari inda pe na mulak, jadi tarpaksa turun tangan tu dapur, mangajari boruntai na kalas lima SD i mardahan jana manggule".

"Bo, awas-awas komu boto dongan, anta naso mulak be alai, kan alak balikan do ning kamu adi najolo dongan nia marrosu dompak bujing-bujing?"

"Na momo ma ilala ia antongan i, aupe malo do au i, cubo mantong uida inda ro santak ari Kamis, ujalaki gontina" ning Jamandurung mur maholas.

"Taringot nai dongan, indape namalo nangan mardahan boruntai?"

"Sondia mantong malona, angkon na ijagoan dope ba torus mangajarina, harana pala itinggalkan ra do botoho manombo gule sibodak doma urangna"

"Bo aso songkoni?"

"Tai dor jadi bubur, sapala manombo madung mata mekat, manggule pe soni juo, ra do manombo lamlam, jadi tarpaksa ipainte jolo santak masak baru bisa itinggalkon" ning Jamandurung, markerut doma boi nia namarcaritoi.

"Peto do bai, molo adong boru bujing di bagas, ingkon na ijarana dei mardahan manggule, soni dot manyapsap sasudena, harana pala dung tu bagas ni alak ia incogot kaduan ulang be homang ia manjama, lagi ulang ro tongkin nai songon carito ni halak kami an" ning Jamandehe laos manyambung sigaret.

"Songon jia nanga carito nai?" ning Jamandurung

Adong ma da sada boru bujing, natopet muse boru sisada-sada, bo rupa inda dong nabinotona satontang tu namar pak-pak didapur, pondok ni caritona maringanan ma boru bujingon tu huta luar. Disada maso marun ma amangboru nia jadi porroana mangan gule pira ni itik na ibul-ibul (ulang itapor harana sar-sar manombo pala itapor), jadi idokon ia di parumaen niaon so manggule pira itik jolo, icampur dot kantang soni asang muring. Sapala naroamu, dompak margulung-gulung amangboru nia di pantar tongai tarbege ma disia sora na Maturapak sian kuali i didapur, mangambur amang boru nia mangkojarsa iambang ia sanga na mangua, sapala tarpaida disia na igule ni parmaen nia do pira ni itik i dohot lampak nai, sip songkoni amang boru nia antong. Dung ro doma anak nia sian apeaan sobaru ipatidaon ia tu anak nia gule pira itik i. Ngaroamuyu antong napaila-ilaon dei?

"Ah, anggo hum songkoni do caritona, jebuan dope najolo carito na diamianan" ning Jamandurung inda ra talu.

"Bo, songkondia museng mai jabat carito nai?" ning Jamandehe sapa-sapa.

Songoni juo mada, inda malo bujing-bujing on marmasak rupana, topek dibulan puaso atiha mambaen parbuko onde-onde. Marsak roa ni anak boru on sanga songkon dia pamasuk gulo nai tu bagasan ni onde-ondei, ijalaki i suntik-suntik, icaer ia gulo bargot i di ayan-ayan, dung masak baru isuntik anak boru on sada-sada onde-onde i dohot aek ni gulo nangkinani, padohal saudon godang onde-onde i bahatna, nga roamu antong naloja manyuntikina i?

"Ah, takik sadari dei carito mon, inda cucek pado ulkel (indo cocok pado aqal), tai taringot nai na get puaso museng ma ita on tile"

"Olo ba, siap-siap kinanma mambaen parbuko" ning Jamandurung manutup carito......

Ahana Dei Di Kudo i?

2010-06-02T09:39:00.004+07:00

Maturesek angin marombus mangalaoskon hodong ni arambir rodop na adong di lambung ni bagas nami i, morgos bulung nai tu tarup seng nadung mangkatombuk baen honokna indape targonti. Tarsonggot au modom, uligi jom di dinding madung pukul dua bolas borngin. Tarbege muse ma sora ni udan mangarimbus, juguk au di ginjang ni podoman, upamanat-manati inang ni daganak nadung mungkor, songoni dohot daganak pe sude dung sinok do modom. Utarik ulos silian nadung marbalun di indora nia sude baen lasak ni parpodomna. Marsak soni roangku pabege-bege sora ni udani, iba baya cogot nagiot mangguris, anggo singgo por non udanon pasonangkon muse ma cogot harani maraek batang. Tarbege ma diau sora ni Umak si Garigit (ombar balokta) na disamping ni bagas tai, tarbege ma diau sora ni si Garigit tangis mangamuk tu simatobang nia adaboru.
“Antong indape get modom au ipaksa umak sajo” ning danaki
“Udokon do pala magorib ulang modom, kasidunganna inda raho modom be sannari, cogot na giot sikola” ning umak nia.
“Inda jau, umak jahatan, nabek-bekan, modom umak inda get modom au” ning si Garigit mangulaki lao tangis.
“Ulang ko durhako, dung bek-bek, dung jahat, au maia umakmu, inda unjung roangku icaritohon guru muyui jomu carito ni uting na lomlom i tie” ning umak nia mangalus.
“Songon jia dei carito nai umak?” ning si Longkop muse anak nia silitongai.
“Bole baya, hope inda namodom ko nanga?, madung tonga borngin ma botoho” ning umak nia mandok si Longkop.
“Jia mai tarpodom iba, anggo natangis sajo karejo si Garigit” ning si Silongkop muse antong
“Baen umak carito nangkinan” ningia muse mangulaki
“Ahana dei di tangis si Garigit tu podommu, biasona manyoro pe ronggur, ngana sodar ko, balik-balik ma sakalion inda tarpodom ko, orbomu do naso ra manangkok ahana dei di kudo i? ning umak nia songon namatubek-bek.
“Ahadope nanga?, anggo nadung modom dabo daganaki, romaho tuson dabo!” ning amang si Garigit sian bilik sabolah batuk-batuk baen ngali ni ari i.
“Jia dei namodom, namarbuncilakan do mata nai sada-sada ison bo” ning inang si Garigit muse antong mangalus.

......

Najolo ni najolo adong ma sada anak ni uting nabontar nasangat deges marbolang dot nalomlom, juguk tondo martungkol isang mamandang bulan na adong di ginjangan. Ipamanat-manati ia bulan na torangi, pas muse 15 ari bulan (Bulan Tula), ro targorak di bagasan roa nia marangan-angan giot manyapai bulani ampot ra jadi inang nia, harana inang nia uting nasangat lomlom, angkon na martata ma so tarida ipon nai pala borngin, ulang do masuk maghorib angkan na ipanaet ma lampu so tarida.

"Ra doho le bulan jadi umakku?" ning anak ni utingon marsapa di bulan

"Ra doba au i ale baya, tai biarpe idaho deges au, sapala ro naron ombun na golap, golap muse ma au i, jadi ning roangku ombuni ma parumak ulang au" ning bulani adop anak ni uting nangkinani.

"Olo'ntong baya", ning roa ni anak ni uting i muse sasada ia.

Inda sadia onok sangajo ro ma antong ombun na golap, mago ma bulani, marsapa muse ma anak ni utingi di ombun na golapi.

"Ho ale ombun radoho jadi umakku, inda ro roangku dabo di umakku, ama nalomlom" ning anak ni uting mandok ambun.

"Aso antong inda ra, radoba au i, tai so iboto ho boto sapala ro naron angin nagogo, terbang muse ma au i ibaen angini, jadi angin i ma parumak harana ia dei na hum gogo" ning ombun mulak mangalus.

"Jadima songkoni" ning anak ni uting i antong.

Inda sadia onok marsapa muse ma anak ni uting tu angin na gogo.

Marsunet

2010-05-04T09:55:00.004+07:00

"Adong dope dongan homu naso i-sunet ale? Pala adong dope, paisar komu ma dongan so isunet, ulang ro muse tongkin nai songon carito i" ning Japardamean mandok halak na marjugukan di lopo ni Jamangombak disada maso manyogot-nyogot.

"Aso do gaor komu lae, aha nipi muyu nanga borngini, inda iboto hamu nanga Mandailing do on, jia mai mungkin adong i banuantaon na marsunet dope?" ning Jamanggotap songon na manggotap obar ni Japardamean.

"Imada, najolo dabo na bahatan uti-utian ni halak satontang tu namarsunet on, manombo leng gidik roa olope dung tobang iba songon sannarion" ning Japardamean mandok Jamanggotap.
"Gorarna pe palain-lain doon sian huta na sada tu huta nasada, adong antong namandok marsunet, adong muse mandok martotak, adong juo mandok paiaskon, makasudna sarupo dei sude, rap mangkorot ujung ni tuk-tuk ni amporiki, tarsongon anak ni manuk nabaru itan-tan dei dabo, adong dei sotik iela di ujung ni tuk-tuk nai, ning kalak so momo manuduk, tinggal lagi ita antong inda manuk kita, halak do ita" ningia muse mulak patorus hobar.

"Aha muse mai jabat gidikna hum namarsunet?" ning Jamanggotap sapa-sapa.

"Bo, imada kele, so ita boto dabo ale dongan, namarsunet on olope gorarna 'namar-sunat' bahatan dei ulama mandokna nawajib, jadi baen harani imada so riburna urusan sunet-manyunet on sian na jolo. Anggo ompung-ompung tai antong najolo pandok ni halak (pandok ni halak do da dongan), dohot sambilu bage dei ibaen panggotapna, inda dong bius, inda dong ubat, sapala dung igotap ujung ni amporik i, na mocom dei ibaen pamantan ni mudar nai, adong na i salutapkon bulung-bulung, muloi sian bulung ni 'kalah nagori', bulung ni 'sirompaspara' ampe ulang bulung ni lasiak lamot pe, harana ampot non manyongkir na baru isunet i manyiak-nyiak" ning Japardamean mangkair kalak na salopoi.

Anggo atiha au antong najolo, madung adong ma mantari, tai inda songon na sannarionan momona murak, ra bage dei lobi sabulan, harana ubat-ubatna pe antong inda pe songon sannari degesna. Jadi pala marsunet ma iba biasona bulan puaso mai, harana najolo disido tempo panjang pala sikola. Sapoken nai so marsunet, na motar sajo ma iba i, harana sude halak dei pambiar-biari iba, nasodong dei na mandok na lidang, totop dei na mandok nasotontu sajo.

- "Pala isunet, igotap mai ulu nai" ning si Mungkap

- "Na ancitan i, apalagi dung abis bius nai" ning si Pungkor muse pabiar-biarkon

- "Ra dei bontan boto" ning si Sungkot muse dohot-dohotan

- "Ah, ngana mancit bai, tarsongon na idoit ni porkis maia i" ning dainang mai mandok iba so ulang mabiar.

Tolu ari nai so marsunet na marrondam sajo ma iba i di lubukan, ning kalak antong so dayuk koyokon, sanga peto sanga inda, ngadapot jiba bai be.

Ulang Jo, Ulang Jau

2010-04-19T11:08:00.014+07:00

Dung sidung sumbayang Ashar, di atiha rimbusan ni udan, ro ma Jaurimbang tu bagas ni Oji Makmun paulak epeng na i solang nia dua bulan nalewat baen modal mambuka kobun lasiak.

"Assalamu 'Alaikum"....

"Wa 'Alaikum Salam, bo homu dei masuk ma jolo" ning oji Makmun mandok Jaurimbang

"Isonbo oji epeng na hami injam narobi, tarimo kasi godang-godang mada, adong ison sotik lasiak bo, pinomat pandaian" ning Jaurimbang mandok oji i.

"Bo, madung adong ma nanga, anggo na porlu dabo pake hamu majolo" ning oji i mulakan. (Ro pe antong oji on ngana tanggung dengganna, na ra sajo anggo manolong. Inda songan dongan na deba, habis manolong get manolon).

"Inda ba oji, tongkin nai tarpake iba muse, ijia porlu sangandigan ro hami mulak" ning Jaurimbang antong

"Anggo soni, roa muyu ma da" ning oji i mandok Jaurimbang

"Roangku mulak ma hami jolo oji" ning Jaurimbang lao jongjong sian jugukan niai.

"Alaaa, tongki nai mada, na ro dope udan na mangarimbus bo, painte jolo siang, non mancit muse ulu muyu"

"Umak taing, baen jolo kopi dua" ning oji mandok alak bagas ni ibana

"Olo, roma" ning alak bagas ni oji i muse tingon dapuran

Inda sadia onok tong roma kopi susu dua galas godang tu ruar soni dot 'roti basumbu' (gadung na i tutung/bolgang), merdet doma ijur ni Jaurimbang midasa, biaso antong ale dongan kopi paet do inumon nia, angkon na ari poken ma so minum kopi manis ia.

"Ape minum komu udakna, tai tar milas dope roangku bo!" ning alak bagas ni oji i mandok Jaurimbang

"Deges do lasiak i nanga sakalion, songon nabahat uida na ioban muyui, olope ningkomu pandaian, anggo ning roangku inda nahabis kami sapoken i"

"Alhamdulillah boto hamu, songon na ra uida dompak sanoli on, ibape'ntong soni maia ilala usahona dot doahna"

"Songoni doba'ntong anggo namarusaho gorarna, angkon na sareto dei dot doah, harana karejo sajo pe iba anggo na so sareto do dot doah, sombong dei gorarna"."Manombo dabo nian iba dei na so sobar, harana biarpe sanga songondia doah niba i, lolot tibuna Insya Allah i kobulkon Tuhan tai dei, baik ia doah na geduk sumurung ma antong na lidang" ning oji i lao mamatik sigaret.

"Adong dei nanga doah nageduk oji?" ning Jaurimbang marsapa

"Bo bahat dobai, songon carito i ma" ning oji i muse lao manyirup kopi susu

"Songon dia dei carito na oji?" ning Jaurimbang mur penasaran

Halak Tadolok mada dongan sa sikola najolo gorarna Jalambok, halakna malim, ringgas mar karejo, rasokina pe rondo. Pinomparnape madung adong dua bangkiang, nagodangna marumur opat taon nameknai pitu bulan dope. Tai sonimada manombo panyakit ni alak kita on, ulang do marrasoki saotik, nabat ma na nidana, ro bagema naget palanjang roa. Pendek ni caritona, usaho ni Jalambok on antong muloi ma maningkat, aha sajope ijama ibana totop do namarhasil. Madung bisa ibana pajongjong bagas, manabusi kobun songoni dot saba, tartabusi ia juo sada honda. Jadi baen na dung adong on honda antong, na jarang doma ia dibagas, doran sajo doma haor tujae tu julu. Mangan pe jarang doma dibagas, totop do namangan dilopo sajo. Hinggo disada maso tumbuk mada roa nia di boru ni par rumah makan i, nakabotulan bujing-bujing dope. Ningroangku harani sunna ia mangan disi totop sajo bujing-bujingi mangaladenisa, jadi songon na adong dosir ilala ia di ate-ate nia mida danakon. Sindokoni, rarat-rarat boti mada, sampe alai nadua mardongan saro jita, tai indape adong namambotosa. Rope antong danakon taru na olo sajo, ning roangku baen na ida niai Jalambokon halak na maradong soni nadenggan roa. Aha sajo pe ipangido danakon totop itabusi Jalambok, manombo inda pe namangido danakon madung i tabusi Jalambok parjolo.

Ita papondok carito, walhasil marbagas juo Jalambok dohot danak on, olope bahat keluarga na mangorai, tai sondia dope baenon, angke Jalambok ngana tarorai. Najebuna ibaen Jalambok muse bagasna padonok-donok dohot na tobang nai, ngada bedabe.

Dung do paduaon Jalambok, najarang doma da adong keamanan di keluarga ni ibana, tiop ari marbada, tarantongkin martongkar, tarantogkin madung eruk.

"Alak lai ni alak mai na dapot ko" ning na tobang nai

"Ia dei na giot jau, ngana manyompo au tuson" ning naposo nai muse

Jadi tontonan ni ombar balok dohot halak sakampung sajo ma halai tiop ari. Jungada mai disada ari pas sidung Jumahat Jalambok, madung gaor di alaman ni bagas nia marbadai natobang nai dohot naposo nai. Margoso ma Jalambok manyarak namarbadai on, anggo halak madung rami manonton. Sondia dei antong ibaen kalak mangoraina, angke adaboru namarbadaon, tarpaksa ma Jalambok ditonga-tonga ni namarbadai i, sahinggo sar-sar abit karung Jalambok, mur simbur kalak partatai Jalambok nadung salang-salang inda marabit, baru mantak namarbada.

Anggo sanolion sangajo huk-kek ma ilala Jalambok, jale itinggalkon natobang nai, daganak disi dua, ja itinggalkon naposo nai, inda tanggung lagakna, mari-ari poso muse sibukna. Pasma lalu songon isitilah ni natobang-tobang najolo :

Songon na Mangan Pining Sisungkot Kola

Pinangan Mate Ama

So Pinangan Mate Ina

I ulum-ulum Mate Iba

Walhasil, mangiutkon sipaingot ni tobang-tobang, soni dohot dongan sakahanggi, boti muse hatobangon, ingkon na i oban doma halak bagas nia aduana tu Mokah. Pondok ni caritona marangkat ma halai natolu kehe mangarejohon Ibadah Haji tu Tanah Suci.

Songon dia na dung i dokon ni Rosulullah SAW antong dihita sasudena bahaso ibagasan na mandoah hita tu Tuhan adong na idokon waktu-waktu makbul, adong muse na didokon tempat na makbul. Nadidokon waktu makbul mandoah antong ima sepertiga malam pala dibagasan ni sadari saborngin, Ari Jumahat ibagasan ni sapoken khususna pala diantara ni dua katubah, bulan Romadhon di bagasan ni sataon. Pala na didokon tempat-tempat na makbul antong molo dihitaon tarutamo ma antong masojid, apalagi di Masjidil Harom di Mokah, sanga Masjidinnabawi di Madinah, atope Masjidil Aqsho di Palestina.

Jadi imada mur hita papendek carito, rap kehe ma halai natolu mangkarejohon Ibadah Haji tu Mokah, dung siap Tawaf di Masjidil Harom rap mandoah ma halai natolu (rap dibagasan roha ni halai), diantara ni doah ni halai ima :

Jalambok : "O Tuhanku lehen ma diau hasanah (kebaikan)"

Natobang Nai : "O Tuhanku, gorakkon tu roa ni alak laingkon so isirangkon ia alongkon (naposo nai)"

Naposonai : "O Tuhanku, gorakkon tu roa ni alak laingkon so isirangkon ia alongkon (natobang nai)".

Bo rupa rap mukobul doah ni alai na tolu, kasidunganna dung lalu mulak tu Mandailing, isirangkon Jalambok adaboru niai aduana, marbagas muse ia mulak dohot bujing-bujing umur sambilan bolas taon namargorar 'Hasanah' (pas songon doah niai, nalumobi deges muse dohot lumobi denggan tingon adaboru nia nadua naparjolo).

"Tarahim ma ubege dongan, abisi homu kopi muyui le so keta tu masojid" ning oji i mandok Jaurimbang.

"Sangajo Oji, aupe tu masojid sajo doma sumbayang on, binoto cogot kaduan mukobul pangidoan niba" ning Jaurimbang mandok oji i.

"Olo mada, tai ulang tiru-tiru homu ba carito nangkinan" ning oji i lao mambuat saroben nia nasangkot di dindingi.

Rupana carito ni alai i natarbege do di alak bagas ni oji i, lingo-lingo sian dapur, iambang ia naget paduaon muse oji i, isipakkon ia talam na adong dipantari, rentengggggggg..... tarbege sora ni namaturenteng sian dapur.

"Olo angkang, mulak ma hami!!!!" ning Jaurimbang tingon ruar.

Langka Matobang

2010-04-17T08:41:00.011+07:00

Painte-inte ro tukang Nasyid nai, ami jolo marsiajar naek tu Pentas

Au sada-sada aupe margambar ra doa au Pareban

Ya Robbi Barik, Ya Robbi Barik, wa athoni, hubbal ladzi.....dst

Mok-mok do au ida homu ale dongan?

Markhotom

Abisi bo ipar......

Marsipanaekan

2010-04-09T22:03:00.010+07:00

Bo, ibo roa ni Nasadai marhasil juo doba antong Lubuk Larangani, buktina pas atiha mambuka di Ari Rayonai, rongom doma jolma marsioban jala, lukah dot durung sian huta balian. Tardokon rap marrasoki do sude, paling remis ma lopeh modal, dapot juo mamanggang gulaen di Batang Gadisan. Torang ari nai margulaen muse ma sakampung mangarsik tahalak na adong di Batanggadisan, dapot juo gulaen na bahat, marbagi sahutai sasusuk be sa rumah tangga. Sidung i hira-hira dua hari, marpokatma sude masyarakat di alaman bolak sanga tu aha do baenon epeng sian hasil ni Lubuk Larangani. Marsidok nai dokna antong halak nabahat, tai dapot juo kaputusan bahaso Satonga hasil nai ibaen ma manabusi genset so marlistrik di kampungi pinomat pala borngin, Satonga nai ibaen ma marburu.

"Marburu aha muse dei pareban, carito ni aha muse do nangkinon?" ning Jamungkor na baru masuk tu lopo ni Jamangombak i lao juguk markombang sila sareto mangangkipi karipik-karipik ni goreng pisang na adong diginjang mejai, maksud nia roangku so ulang mambayar .

"Ima so ulang ijagoan sajo ibagasan da, lalu mai tongkina nai inda ibotoho sanga aha namuba di banuaon, bo...sanga aha mantong namangganggu suan-suanan i di hutai, pala dopot antong babi dua ribu saikur, pala herek saribu, kotok lima ratus" ning Tobang Jageduk sian jugukan niai.

"Oooo, soni do caritona nangkin, palalu hamu songkoni so manangion iba, baen komu jolo kopi paet le bae sendokna" ning Jamungkor lao mangkaluarkon gulo pasir sian cakuk nia (iambang ia rongku inda marjagal gulo pasir parlopoi so ioban ia gulo nia).

"Iba'ntong muloi sian najolo angke namarburu babi maia hobi dot tape niba, jadi najop mada roa niba na adongon acara marburu" ning Jageduk lao pature juguk nia. Ari sinayan nai marangkat ma hami pitu alak tu tor Napa-napa marburu babi. Rap marsioban anjingna be songoni dot "Sinapang Tunggu Dulu" sada be (nidok sinapang 'tunggu dulu' atiha paporangan i dei najolo, tarpaksa painteon jolo harana porlu pamasuk sabut, masiu, soni kip na padohal sinapang ni Bolandai 'bren" do, idok kalak juo dei sinapang "Jojal", adong juo mandokna sinapang "Sabut" baen napake sabut ni arambiri).

Aropku dabo tarsabatang pangidupan dope hami manangkok, mangkongkong ma anjing ki git mangkojar babi, upalua antong tali nai, soni juo dongan-dongan sasudena, manyarsar ma hami di arangani mangkopungna. Aupe markolit ma di batang ni tarutung na godang, ampot non lewat sian jolongku babi i ning roangku mada. Inda sadia onok siani, tarbege ma diau maturapak ro sian dolok, rupana botulmada babi nagodang namaranak poso mangadop tu au. Sapala naroa muyu ubingkaskon sinapang inda ra bingkas, padohal babi i madung mangarah tu au sareto mangalo harana madung mabugang pambaen ni anjing nami nabahat i. Upacopat usandang sinapang, uambur tu sada batang ni ayu torus upanaek tu ginjang. Anggo babi i namartaon dope di toru painte au mijur, sapala upareso sinapang "tunggu dulu'ngki" rupana baya na so upasang dope 'kip' nai. Dung hupasang, baru utembakkon.....pangggggggg.... bingkas sinapang. Dung ni dope so tumogar kulala sotik, harana pas tartembak au ulu nai.

Tai boto hamu songon na adong kulala naganjil, muloi sian pat santak tu tangan tarlumobi indorangku songon namanyiak kulala, sapala upareso madung mabarbar sude. Heran au sasada au diginjang ni dangka i. Sapala ning roa muyu dung hu pamanat-manati rupana baya batang ni "Dap-dap" do na upanaeki, pantasma so mangkabar-bar sibukku" ning tobang Jageduk lao mandabu pat nia sabariba (rupana baen asikna namarcaritoi nangkin, madung iginjang bangku ni lopoi ma pat nia aduana).

"Aupe boto hamu, i maia i na biarna au pala markarangan" ning Jamungkor muse manyambut carito ni Tobang Jageduk i. Poken nalewat boto hamu hami pe dohot inang ni daganak najebu ma dongan. Naroha moyu, dompak asik-asik mangguris kami nadua di Laing-laing an, sapala naso binoto-binoto mangalintas babi nagodang. Baen songgotna au, uambur tu batang ni hayu, unggal hayu nai, lao magulang au tu rura an, tarbege di supingku sora na mandoik, rupana baya inang ni daganak do natarpanaek au i baen biarna, bo rap magulang kami nadua 'ntong. Dung lalu tu ruraan indape habis biarku, uambur muse tu batang ni hayu, lupa au jabat inang ni daganak, sapala naroa muyu unggal juo hayu nai, rupana baya batang ni pisang karangan (pisang si uncim) do na upanaeki...

"Anggo i antong madung carito gabus mai ubege, inda mungkin naso tarbedaon ko nadia halak bagasmu, nadia pisang karangan, nadia batang ni hayu" ning Tobang Jageduk mandok Jamungkor

"Homu pe inda mungkin na so sodar komu i manaek batang ni dap-dap" ning Jamungkor muse songon na holas

"Ah, keta le dongan namarpokaton, roma katuai i sadun bo" ning Japardamean lao haruar sian lopo ni Jamangombak i torus manyarak Jamungkor dot Jageduk nadung get marsitanganan di lopoi.

Jala Marguru Marsapa Songoni Mangido Gogo

2010-04-06T09:40:00.007+07:00

Assalamu 'Alaikum WW,

Santabi sampulu tu adopan ni koumku di Bulunggadungon.

Baennadong do nasolot di roa nami..!, pade doroai amipadalan napurannamion...?, diamantong nangkinon di dalan nihata sosurdu burangirnami ima namanaringoti amimada na sian Barbaran namandung putus pokat dohot tahi bahaso ami nangkan pajongjong sada Masojid di Barbaran. Oni muse Parrumbukanon madung sampedo Ami topot halak Namalo Manggambar dohot mangatak ayu salaos mambilang sanga kira-kira sadiado biayana, roantong alusni ibana on tarjumalah doon lobi urang 1,3 Milyar dung uetong2 ningibana maradopkon kami.

Marningotimada koumku karejoon antong nasangat do godangnion, baen aranion antong jala marsapa do tukoum pot marlomo nirohado di hal karejo namion songoni marguru mangido gogo arana nada mampuamion manjama karejoon anggo hami sajo, di hal ningon mada soro ami manopothamu koumku solang sayang gari sere nalamot namandung tarkumpulkamion. Satontang pambangunan, Insya Allah haami dasorma hira-hira bulan opat (April) on.

Tarsongonon dope koumku nadapot usampeon hatana, hurang lobina mangido mohof, mudah2an satopot ni surat elektronik namion, tu sude koumku dalam lindungan ni Allah SWT, Amin Ya Robbal Alamin.

Sebagai penyaluran

No rekening bank Mesjid Alfalah Barbaran

Bank Sumut Cabang Panyabungan : 340.02.04.012973-1.

(Ato ligi hamu di blog nami na adong di toruon)

Wassalam,

Muhammad Husein Nasution

email : cucunaga111@gmail.com

Blog : http://pradatublogcom.blogspot.com/

Mangiutkon ma au soni

2010-03-23T10:14:00.013+07:00

“Ahado ibaen jomu lae?” ning parlopoi mandok Jamanungkanan nadung lobi satonga jom manonton TV.
“Baen kamu ma jolo susu coklat, palalu epeng itapak pake kuah” ning Jamanungkanan tong mandok parlopoi leng adop TV i.
“Napeto nai do dabo, ulang margiri, dompak margura-gura aek bo, tako naget manaru pasir do hamu tu lopongkon?” ning parlopoi mulakan marsapa
“Tes paet ma soni baen kamu jolo sakalion” ning Jamanungkanan asok tai tarbege, padohal saonok naon pe leng na tes paet maia inumon nia.
Hum na isirup nia dope tes paet i, mangompoti mintop mada lampu (PLN), padohal nangkin nadompak asik-asikna dope Jamanungkanan manonton na marbal antara PSMS Medan vs Madina FC (rap hita doahkon dongan jadi kenyataan marjaya sepakbola di Madina on). Baen milasna roa ni Jamanungkanan, ipas-pas ia doma marcarito.

"Lima taon na jolo dihamian" ningna ma dabo lao manyargut goreng pisang si raja. Atiha pas manopotkon bulan Rabiul Awal, disada ari dung sidung sumbayang Jumahat, jongjong ma katua i marpidato.

"Assalamu 'Alaikum WW, maradopkon kaum muslimin sasudena, tubarisan ni mora na toras, lalu tu hatobangon, songoni na ipatobang, torus tu na tobang-tobang, santak tu namatobang tu, inda tarmasuk Tobang julu Botung". Harana di maso on hita sasudena nadonokma tu bulan Rabiul Awal, ima bulan Maulud ni Nabinta, jadi adong sada dua tolu dongan na mangalehen usul tu hami, ima anggo setuju do dihita sasudena, disamping ni hita mangarayaon Maulud Nabi tongkin nai, rap hita adongkon ma jolo sada acara marmangan-mangan hita nasakampung. Godang haropan nami pinomat sakali sanoli ibagasan ni sataon rap markumpul kita so leng tarjalin silaturrahmi, sondia do dongan-dongan, setuju do hita luai on?"

"Setujuuuuu" ning halak nabahat, tarutamo Jamangupat, nadung tarkelong markusandar ditiang ni masojid i, rupana ujung nai maia natarbege disia 'mangan' nakabotulan muse nangkin lao marangkat Jumahat inda sompat ia mangan jabat, harana tarlambat ro mangguris. Ima so torus ia mandokon setuju, harana baen na ibege niai ujung nai 'mangan', iambang ia antong na adong na marontang malim torus mangan.

“Anggo na rap setuju do hita sude roangku, rap ita tunjuk ma Oji i sebagai katuana marangkap Bendahara, setuju do hita ale dongan?”
“Setujuuuuu” ning halak na rami muse.
“Jadi malom akad on, rap markumpul ma hita disikola Madarosahan, ulang lupa rap marsioban inang ni daganakna be, harana halai juo do tongkin nai on angkan na bahatna markarejo, pature panganon, dohot na asing-asingna” ning Katuai muse lao manutup pidato.

Hita papondok carito, tibo di malom Akad nai, marangkat ma oji i dung siap sumbayang Isya manuju Madarosah na adong di hutai ima di tajulu, sementara oji on antong tinggal di tajae do. Itongandalan pasuo ma diibana halak namarjugukan dilopo ni Jamangombak, iontang oji i antong namarjugukan nadisinan, marsidok na idokna soni alak na di lopoi.

"Pajolo hamu ma oji, ro au non parpudi" ning Jamonis ma pajolo-joloon

"Anggo nangkan naron do so ro hamu ba ale, leng na parpudi mai gorarna, inda mungkin parjolo hamu i" ning oji i antong songon namanyindir Jamonis.

"Hami mangiutkon ma hami songoni dabo" ning Jamamudun muse ma sian topi leng asik soni manonton TV.

"Keta ma ni, ro mau on" ning Jabontar lao manyirup kopi paet

Mardalan antong torus oji i dohot rombongan na ra dohot marpokat manuju Madarosahan, tarparogok muse di tongandalan dohot inang si Lokot, "keta le dongan namarpokaton" ning oji i muse.

"Ah, hami mangiutkon ma hami dabo roangku songkoni" ning umak si Lokot mangalus.

Mur hita papondok carito, sidung marlugut, marpokat ma halak di Madarosah i, tai boto tar satonga maia panduduk ni kampungi na hadir, nalaian nai absen do sude. Dapot juo ma kaputusanna saborngini bahasona mambayar iuran 10 ribu dohot danon sasuat par rumah tangga, setuju na hadir, tokok meja, salose pokat.

Torang ari nai, simbur ma halak sude tu usahona sonjia na biaso, songoni juo oji i pe marangkat ma tu saba. I tongandalan pasuo muse mulak dohot inang di Moncot rongkon inang si Dapot, marsapa ma halai nadua di oji i.

"Tarsondia do hasil ni pokat tai borngini oji?" ning umak si Moncot ma

"Bo, inda na ro hamu nanga borngini?" ning oji i antong purak-purak marsapa

"Get roma da hami borngini oji, tai le bele-bele papodom daganakta na menek nai, bo tarpodom muse au" ning inang si Moncot.

"Amang si Moncot aso inda ro?" ning oji i muse mulak marsapa

"Tai ima le, dung do salose sumbayang magorib, ipagulung ia i pantar tonga i, na mungkor muse ma ia, 'tor rura tu jae tu julu' na ning ungkor nai ma" ning umak si Moncot mangalus. "Jadi tarpaksa mangiutkon doma ami songkoni roangku" ningia muse mangulaki.

"Imada, Anggo sian parpokatan borngini, so bisa hita mangkoyok lombu antong pinomat, jadi rap mangalehen epeng ma hita 10 ribu par rumah tangga, torus antong danon sasuat, soban mar pitu tasir, kantang sakilo, lasiak sa ...." inda pe salose oji i mangecek, bulus burangkit ma inang si Dapot.

"Inang go inang ojiiiii, ijia dei baya i polukan i jabat sai bahaaaat?" ning na ma dabo

"Anggo masalah poluk-mamoluk ba dongan inda mangarti au i, tu amang si Dapot ma dokon komu ampot tarpoluk ia" ning oji i muse antong mangalusina. Torus muse ipalalu ia obar, "Ima dabo sakali nai inang, pala adong naget pokaton, ulang sai namangiutkon sajo iba, marusaho do iba dohot manghadirina, pala inda setuju iba i dokon di halak nabahati, on i ontang marpokat dor namangiutkon, salose pokat burangkit ko" ning oji i lao marisar-isar kehe, rupa songon na adong ilala ia namanyosak sian boltok nia muka belakang.

"Ison epengna bo ipar, goreng sada, kue bolu dua, kacang goreng sada, gudang garam sabatang, hurang nai padomu hamu jolo dohot natuarian, cogot domai ampot deges ari bisa mandaek!" ning Jamanungkanan lao jong-jong mambuat catur. Iambang na get ke maia tusaba, hape na get manjalaki alo muse ma marcatur.

***

Salamat Mamili Calon Bupati / Wakil Bupati Madina

Periode 2010 - 2015

Awas, Ulang Sai Na Mangiutkon Sajo Hita, Ulang Muse Sala Pili

Bo, Tongkin Nai Ronjom Kita...

Ba Duo Diateh Ban

2010-03-02T11:38:00.009+07:00

Jungada do ale dongan-dongan, koum-koum nami taringot hamu atiha ita najolo marsiajar mangaji dibagas ni guru mangaji? Di toru ni taon lapan puluan i, inda pe adong buku Iqra' songon na diparsiajaran ni daganak sannari. Jadi maso i, buku Omma dope gorarna (ibuat goar on ima sian Juz Amma. Amma on ima pangkal ni surah An-Naba' juz 30). Sampe diari sadarion tarutamo dikampung-kampung di Mandailing leng na ipake juo dope buku Omma on, olope sada-dua tolu sikola madung manggonti on dohot buku Iqra'. Maksudna sarupo do da on, rap marsiajar mangaji Qur'an, somalo muse sumbayang, dohot na asing-asingna.

.....

Songon dia na dung rap hita maklumi, khususna di Mandailing tardokon do roangku 95% na marugamo Islam do. Islam on ro na sian Arab, marbahasa Arab, jadi tontu antong angkon na iparsiajaran do bahasa Arab on, so malo iba mangaji, mangarti muse iba pala sumbayang sanga aha nadidokon i, songoni do ning apak Guru so denggan iba namarugamo on.

Taringot di parsiajaran Bahasa Arab atiha mar Juz Omma na jolo, i eja ma huruf Hijaiyah on sada-sada, iloguon muse, kira-kira songonon : Alif, Ba, Ta, Tsa.... sampe Ya. Sidung ni : Alif diateh A, Alif Dibawah I, Alif di Dopen U = A-I-U, Ba Diateh Ba, Ba di Bawah Bi, Ba di Dopen Bu = Ba-Bi-Bu... sampe muse tu Ya. Sidung Songkoni : Alif Duo Diateh An, Alif Duo Dibawah In, Alif Duo Di Dopen Un = An-In-Un, Ba Duo Diateh Ban, Ba Duo Dibawah Bin, Ba Duo Di Dopen Bun= Ban-Bin-Bun. Ido Anggo Aslina cara mangejana. Tinggal Lagi atiha dompak daganak iba najolo, ipotong-potong bahasa nai ipapendek so ummomo basaon, jadi songonon. Alif Date A, Alif Bawa I, Alif Dopen U = A-I-U, Ba Duo Date Ban, Ba Duo Bawa Bin, Ba Duo Dopen Bun = Ban-Bin-Bun.

Muloi sian daganak au najolo, ma dung heran ma au on sapetona, aso songoni mangejana, makasudna bahasa nai doda, harana pala sian Bahasa Arab antong sugari, songonon dei mangejana : Alif Fatah A, Alif Katsro I, Alif Domma U= A-I-U, Ba Fatahain Ban, Ba Katsrotain Bin, Ba Dommatain Bun=Ban-Bin-Bun. Anggo sian Bahasa Malayu (Indonesia), songonon muse dei sugari mangejana : Alif Diatas A, Alif Dibawah I, Alif di Depan U=A-I-U, Ba Dua Diatas Ban, Ba Dua Dibawah Bin, Ba Dua Di Depan Bun=Ban-Bin-Bun. Pala Sian bahasa Mandailing, sugari angkon songonon : Alif Diginjang A, Alif Di Toru I, Alif Di Jolo U=A-I-U, Ba Dua Diginjang Ban, Ba Dua Di Toru Bin, Ba Dua Di Jolo Bun=Ban-Bin-Bun.

Kasih Sayang Ni Ayah Umak

2010-02-08T11:30:00.001+07:00

Oleh : Syarifudin Siagian
Email : saripuddin.siagian@gmail.com
Web : http://aeksingepu.blogspot.com

Sasakali dongan mangaji ma jolo hita,ulang carito najolo sajo,marpupu lek mangkardak-kardak iba ,lupa tu kewajiban.di hari rayo i nabahatan halak natangis dung salose sumbayang hari rayo,usapai ma sada bayo nahum gogo tangisna nangkin waktu khutbah i."nasangat ma uida tangis ni udai,aha do na mangua" ningku marsapa.sambil mangapus mon-mon nia idokon ia ma bahaso dompak so puasoi ro berita tu sia namadung jumolo simatobang nia alak lai.inda bisa ia mulak harani sibukna karejo.tar sapoken nai so hari rayo ro busema telepon na madung jumolo buse simatobang nia dadaboru.bisa do nian gari mulak,tai inda dong tiket be,harana madung di boking halak.imada dongan na dua tolu dalan-dalanna so mungkap tulisan on.-

Di sada ari marwasiat ma Lukman tu anak nia " o amang ..ulang ko manyakutuon Allah,dohot tu kedua orang tuamu berbuat baik lah " ( Alqur'an )

"imada amang...sobinoto hamu hebatna orang tuantai tu hita" ...ning ayah i ma waktu marsiajar di purba baru.

"pala durhako iba amang tu ayah umak niba na santak godang dosana,syirik doma di ginjang ni i.lek ning ayahi ma waktu manorangkon tafsir jalalain.

anggo waktu i inda na tusi roa i sanga aha jabat tujuan dohot maksud ni obar ni ayahi.
nadenggan do au dohot ayah umakku,ningiba mei di bagasan roa niba.

dung sannari ma muloi taraso sanga aha nai torangkon ni ayahi. harana zaman on pe torus marputar songon roda ni padati,najolo atau sannari hita sebagai anak, sannari sanga pe aduan hita nangkan manjadi ayah atau pe umak. rupana na santak hebat holong ni orang tua niba i tu iba,ima sebabna so inda tola durhako tu alai.

UMAKTA

mulai sian hita dibagasan kandungan,ma mulai ijago dainangi panganon nia, parpodom nia,anso bisa hita tetap selamat lahir tu ginjang ni dunia on.

lahir kita tu diniaon,manetek doma ilu ni dainangi waktu mangalahirkon kita ,tai anggo dainangi tetap senyum, apalagi dung binege ia hita tangis,"ulang ko tangis amang ..ison do umak mu,ning dainangii ma sambil mangumma hita.pala ngot iba tonga borngin parjolo ma dainangi ngot pasusu hita dohot mangaligi sanga maraek do lampin nai.

dung malo ma hita mangecet,ro dainangi sian kobun sanga sian saba,kadang maroban panganon ataupe gulaen,ipamasak dainangi ma baru di payakkon dainangi di jolonta,

" aso inda ipangan umak.." ningiba ma.

" pangan ma amang ...butong dope ulala" ning dainangi ma sambil senyum.i paligi-ligi dainangi ma hita namangani sampe siap dohot inda lupa sasakali di lap ia ma hurum niba.pala dung siap iba mangan,baru ma mangan dainangi.

dung masuk iba sikola,ipasip dainangi ma sude sanga aha keperluan niba dompak so kehe sikola,dung berangkat iba,baru ma kehe dainangi tu kobun sanga pe tusaba.

tammat ma iba sikola,idokon ma tu dainangi bahaso hita nagiot kehe mangaranto. ise do parjolo natangis ??manetek ma ilu ni umak i,kehe ma ia maripas-ipas tu bilik anso ulang binoto ia natangis.

" indon amang hepeng simpan-simpananku salolot naon,on ma pake, pade -pade ho amang " ning dainangi ma sambil mangumma hita lao pabuatkon kita tu motori.

satiop sumbayang mando'a ma dainangi tuhita anso di lindungi tuhan hita di ranto ni halakan,satiop mangan...manetek ma ilu nia,borat mangaumkon indahan i harana tarbayang tu anak nia sanga na mangan do di ranto ni alakan.

dung sekian taon kita di ranto ni halak,mulak ma hita tu huta , hita tatap ma muko ni dainangi ma mulai matobang,muko nai pe ma mulai markerut,tai anggo senyum kasih sayang nai inda mago.

" bo...maro ho amang.." ning umak i ma sambil mangkaluk kita,itatap umak i buse ma hita sian ulu niba torus tu patniba." sehat do ho amang " ning umak i ma sambil mangapus ilu.

tar dua poken do hita di huta,berangkat buse ma hita tu ranto,senyum ma tarida umak i , bope ilu lek mardabuan sada-sada.

disada ari urang sehat ma umak i,manelepon ma hita tu huta manyapai kabar ni umak on.aha ma idokon umak ta.

" nangkon pola marsak roamu amang , madung ma songon na masehat kulala" ning umak ima tu hita.

hape tar tolu ari do dungi ro berita tu hita bahaso umak i madung di pio tuhan untuk selama-lamana.

AYAH TA

waktu menek kita..tarpaida ma dihita ombar tai marmayam sambil manulak motor-motor,

" ayah ..di au na songoninan " ningiba mai.

hape ayah i na baru mulak dope sian apea,namuap gota dope badan nai.senyum ma ayahi tu hita " incogot ita tabusi ti amang,hita daek jolo gotan tai " ning ayahi ma mangelehen semangat tu hita.

pala mulak ayahi sian kobun sanga pe sian saba,di suru ia ma umak i manjalaki hita anggo inda tarida hita di bagas.

dung masuk ma hita sikola ayah on pe inda lupa tetap mangelehen semangat tu hita.disada ari ro ma hita manopotkon ayah i.

" ayah ..tabusi ma jau sepeda " ningiba ma.

itabusi ayahi ma di hita sepeda, ipalua ia ma sasakali waktu marsiajar sepeda hita,pala madabu ma hita,mabarbari pat ni hita.

" inda pola bia amangi,i tandona na giot malo" ning ayahi buse ma mangelehn semangat,bo pe di roa nia mancemaskon hita,tai inda di patidaon ayahi.

akhirna dung malo ma hita,dohot perasaan bangga di palua ayahi ma hita.

di waktu pengumuman di sikola,inda kehe ayahi be mangguris sangape tu saba,kehema ayahi dohot tu sikola manangion pengumuman on,pada saat tarpio ma hita sebagai juara.inda sodar ayahi jongjong ia sian bangku niai,mangelehen tepuk tangan , dohot perasaan bangga di paibul ia doma tenju nia tu ginjang.

dung tammat ma hita sikola,hita dokon ma tu ayahi bahaso hita nagiot kehe mangaranto.dainangi lari tu bilik,anggo ayahi lek tetap do tenang tarida,padahal anggo di ate-ate nia marngot-ngot mamikirkon nagiot marsarak dohot anak on.

di tiop ayahi ma bahu niba lalu itampar-tampar ia " pade -pade ho amang di ranto ni halakan" ning ayahi ma lao pabuat kita tu motor i.padahal sabotulna na poran dei roa ni ayahi mangkaluk hita,tai inda di patidahon ia.

dung berangkat motori,kehe ma ayahi tu batang aek an,ibasu ia ma mukonia ulang tanda namanetek nangkin ilu nia.

di waktu mangan ma ayah umakta di bagas,marpupu ma umak i tangis. " na payah ma ilala hoda hum songoni dope " ning ayahi mei tu umak i,ia pe na lao jongjong mai ke he tu bilik mangapus ilu nia.

di atiha najolo, di tulis dainangi ma surat tu hita,dipataru tu kantor pos,anso lek malua lungun ni rohaon.

unjung dei le ita sapai sanga ise dei namanyuru umakta manulis surati? hape ayahta do manyuruna.

pala dung sannari, " telepon jolo si lian " ning ayahi mai tu umakta." tai hope mangkuling , au manangion pe au " ning ayahta buse mai.

pala dung siap umak i martelepon,langsung mei di sapai ayahi umakta sanga bia kabarta sanga sehat do hita.

dung dewasa hita,hita sampeon ma tu ayah umakta bahaso adong dadaboru namandung cocok di rohanta,giot marrencana ma hita patobang roa.

juguk ma hita di pelaminani,tangis ma dainangi sambil mangelehen nasehat tuhita.purak-purak ma ayahi manaili tu ginjang manaonkon aek ni mata nia ulang madabu.palan-palan di hapus ia ilu nia dohot induk tangan nia,sambil manyirik tu hita.

jop do amang roangku diho,holong do rohangku diho ,bangga do au di ho ninna ma di roha ni ayahi sambil mangapus muko nia na marrara manahan tangis.

tanpa hita sadari,di sada hari roma surat sanga pe telepon tuhita namandokon bahaso ayah umak tai madung mulak tu haribaan ni Allah swt.

MADUNG AHA LE NA BISA HITA LEHEN TU AYAH UMAK TA ???

jadi onpe dongan na dua tolu,pala hita na berada di ranto ni halak sannari,waktu sehat dope ayah umakta,telepon kamu alai,sapai kabar nialai,dompak so ro alak na lain mangelehen kabar di hita.

pala ayah umak tai madung parjolo tu adopan ni tuhan,hita do'a on kalai,mudah-mudahan di tarimo di sisi Allah swt dohot di tempatkon di tempat na sa deges-degesna.

Bulunggadung Na I Ompapkon

2010-02-05T08:42:00.006+07:00

Najolo ni narobi, dompak daganak dope iba, pala gule bulunggadung ma ibaen dainang dongan ni indahan, namarsak mai roa niba mangan.

"Alaaaaaa, madung bulunggadung muse antong i baen umak" na ningiba mai.

"Imaia na adong, pala get mangan natabo ho, kei jalaki tu batanggadisan, oban tuson so upamasak" ning dainang muse antong mangalusisa.

Muda hupikir-pikir sannari sangajo peto do dabo ale baya na idokon ni dainang i, anggo adong do i baluang i garing sanga lelan, bo jiama igule dainang i antong bulunggadung. Apalagi dung songonon iba pe matobang ma, taraso juo ma ilala songon na irasoan ni dainang i najolo. Caritona atiha dompak tinggal di Padang hami na jolo taon 90an i, dor mai ipamasak inang ni daganaki gulaen laut harana i maia na momona disi guleon (baen na itopi ni laut i).

"Gulaen sajo, gulaen sajo, inda mangan au" ning anakta siangkaan mai

"Ahado jo so mangan ko?" ning inang ni daganak marsapa songon na holas

"Bulunggadung na iduda do jau" ning daganaki muse ma mangalus

"Ijia do ijalakan ison losung pandudana?" ning inang ni daganak i muse lao manyirik au.

Walhasil i tuktuk inang ni daganak i juo bulunggadung nangkinani tu panggilingan i, dung masak, marsurak muse ma daganaki.

"Inda tabo, pake losung do pandudana" ning na muse ma.

.......

Tulisan on dongan sakadar manggonopi tulisan boti judul ni blog ta on do on, bulunggadung. Isamping ni bulunggadung na i duda, adong dope cara pamasak bulunggadung ima iompapkon.

Tu hamu ale sude inang-inang, pot songon na markurang ida hamu mangan ni amang ni daganaki, ulang dongan padiar-diar komu soni. Harana molo hurang godang jomakna, hurang muse mai naron gogona hurang muse mai angkat ni paculna. Pala hurang angkat ni paculna, alamatna angkan na marlambat mai so siap tohap i. Halak tongkin nai madung manyuan, iba na mambatangi dope, halak madung boltok emena, iba na lao manyuan dope, eme ni alak gumorsing, eme niba na boltok dope, halak siap manyabi, iba na mamuro dope. Tung-tung mai sudena amporik silopak dot lobe-lobe i tu saba ni bai, markoti mada i, inda pe balana na ro sian toru (monci) sidung mai non kaji-kaji. Paisar kamu ale inang-inang buat kamu ma aek di galas, oros tusi unik mar limangkoros, danon sanjomput, bonang sajongkal. Oban ma tu Datu Janggutan, padoahkon ma, ulang lupa nabau-bau so adong naron panulbasisa. Pala inda mampan juo non, pio hamu bidan na i lambung ni bagas i, buncilak dei non mata nia midasa. Tai ulang tinggalkon pala dompak paresona non bidani, itiopi ia muse non bidani, sae muse obaran ni halak. Harana uboto dei anggo amang ni daganaki, obuk dei namamontar, ipon dei manartaldusan, anggo parroa nalumobi dei posona. Tandona ari poken na lewat, na so unjung-unjung dei ia marsilua lopek sian pasar, mangompoti ma sakalion marsilua lopek ia dot katupek. Iambang inang ni daganak baen na mesrana rupana baya baen litakna do namarjagal lopek on.

....

Ahh dongan mur rarat ma naron on carito on.

Olope nadung rap tobang dabo, inda mangua i sasakali i ulakan mulak carito-carito najolo i, dompak martobat-tobat dohot amang ni daganak i. Pot pala tempo daganak i sikola, pala dompak pere muse karejo. Rap mar rami-rami tu sabaan, olope na manajak parsopoan non iparar mai. Papodom ma amang ni daganak i di sopoi, baen anggunanna, bue-bue ma... modom marulak-ulak maho ucoook... modom...modoooommm, balik dei antong tile. Maksudna daganak na menek nai do.

Pala dung marmodoman, get kotu ma ari, mardahan ma mar salapan takar. Painte-inte malampot, calong ma di topi durui so adong gulena non, ima bulunggadung na i ompapkon.

Bahan-bahanna :

1. Bulunggadung, pusuk-pusuk nai, ulang batang nai, muruk non amang ni daganak.

2. Torung (inda marimbar sanga torung aha) tola torung incor (torung tunjuk), torung bombom,

torung balanga (torung manggis).

3. Rimbang

4. Lasiak mar satonga kilo

5. Balanak gilingon (tutungon), pala inda dong ikan tori (macok, badar) tola juo

6. Sira

Cara pamasakna :

Pala get malampot ma indahan i, buat bulung pisang na poso sotik, baen iginjang nai. Bulunggadung, rimbang dot torung basu jolo, baen ma diginjang ni indahan i. Tutung ma balanak (arasak) gilingon i. Pipili lasiak i, torus gilingma dohot balanak nangkinani, ulang lupa manyiraina. ima na idokon i alak sambal tuktuk soro babiat.

Buat bulung pisang mar tolu hodong, paombang di tonga ni sopoi, sungkapkon indahani di tonga nai, ulang lupa pasimbah jolo bulunggadung na iompapkon nangkinani. Baen ma itopi nai dohot sambal tuktuki. Painte-inte ngali, ngoti ma amang ni daganaki, ontang sumbayang satongkin soni dohot daganaki. Dung salose non baru ma rap mangan. Pala indape kehe juo ida homu mangan amang ni daganak i, roangku dongan pade mai itulbas, boo... ampot natarsapo do dongan...

Kari Suleman (Takik Sadari)

2010-02-02T15:34:00.005+07:00

Oleh : Syarifudin Siagian

Email : saripuddin.siagian@gmail.com

Web : http://aeksingepu.blogspot.com

Carito on dongan sakadar carito do da on, ampot ngabinoto adong na hona gorarna ataupe kampungna inda nai sangajo i, tai na ituntun dei pandok ni angkangi FAS sian Panyabungan, maksudna di luar skenario dei pandok ni alak jaeyan.

Imada...taringot iba dabo pala adong di hitaan na marnikah, adong ma di tabalkon rajai sada gorar tu iba, gorar harajaon ninna. Gorar on pe martingkatan-tingkatan do on rupa, adong napake awalan, misalna :

JA, JA ULTOP

SUTAN, SUTAN MANGKUTUR

MALIM, MALIM MANONGA

KARI, KARI SULEMAN.

Marmocom-mocom sasue adat na adong di hutai.

Jadi adong mada sada bayo naipatobang adat ima namargorar si Jobbar. Sasue dohot adat na adong di hutai, si Jobbar onpe di baenma sada gorar harajaon ima gorarna KARI SULEMAN.

Tarsabulan kalai dung marnikah, ro ma surat ni uda ni alai sian Medan.

O..amang..anggo naso adong dope karejomu di huta romaho tuson, ning uda ni alai ma di surati.

Adopentong...ipasiap ma sanga aha-aha na porlu, harana alai giot pindah ma tu medan. Di atiha malam jum'at ikoyok ma manuk dohot di undang ma ombar balok songoni hatobangon, mangido izin songoni mangido maaf idia adong selama naon nasala di pangkuling dohot di panaili.

Hari ahad nai berangkat ma alai manengget motor Sampagul ima namanuju tu medan. manetek baya ilu nimata harani sedihna maninggalkon tano hasorangan i. Mandada ma si Kari Suleman dohot alak bagas nia sian motori lao mangapus ilu, motor pe marangkatma manuju tano pandaraman. Lek marangan-angan ma songoni Kari Suleman di bagasan motori, sanga tarsongon dia do kota Medan i.

Hira-hira pukul 2 subuh maradian ma motoron di sada rumah makan di daerah Siantar. marturunan mantong kalak sian motori termasuk ma Kari Suleman dohot alak bagas nia.

lek jongjong ma songoni alai na dua di samping motori songon namarnipi.

"anggo giot mangan ipari tu sadu ma bo " ning supir motori ma tu alai.

"bo..parmanganan do langa on,uambang madung sampe" ning roa ni kari suleman.

"olo lae.." ning kari suleman antong.

mardalan ma kari suleman dohot alak bagas nia tu lopoi.

sapala ibege ia alak mangecet-ecet inda na bahasa mandailing be,ma maruba tu bahasa indonesia.

" malo doho marbahasa indonesia.." ningiama tu alak bagas nia.

" sotik-sotik abang" ning alak bagas nia ntong.

dung juguk kalai di bagasan lopoi,ro mantong pelayan ni rumah makan on marsapa.

" mau makan pak...? ninna ma tu alai.

" olo...eee, iya..." ning kari suleman antong sambil mikim.harana gidik roa nia baen na marbahasa indonesia i ia.

"sayur nya apa pak...? ning pelayanon buse ma.

hop ning roa nia,aso iboto anak boruon sanga alak dia ami.antap tehe idokon dei gorar ni huta niba pala mangan di lopo songonon ning roa nia..

" SAYURNALAMPAS.." ningia buse ma tar kuat.marsiligi doma alak na dompak mangan disi.

"bukan itu pak... maksud saya Kari nya apa...? ning pelayan on busema.

ammang....gorarku pe binoto ia do rupa.langa baya giot mangan pe angkon naidokon juo dope gorar harajaon niba ning roa nia buse.

" KARI SULEMAN....! ningia buse tar gogo,sahinggo tarsonggot doma anak borui.

akhirna pelayan naipe marsak roa nia,ipio ia doma supir ni sampagul i.baru itorangkon parmotor sampagul i sanga aha do gule ni alai.

"ooo...." ning kari suleman."uambang antong angkon naidokon dei gorar ni huta niba dohot gorar harajaon niba anso tola mangan"ningia ma sambil mikim.

" iya maksudnya gulai nya apa?" ning pelayanon buse ma mulakkon sambil mikim juo.

" apa sajalah" ning kari suleman buse mangalus.harana pala idokon ia non mabiar buse ia sala.

akhirna ioban pelayan nai doma daftar menu na tu jolo ni alai,ilehen ia tu kari suleman.

"pilih aja pak yang mana yang suka" ning pelayanon ma sambil manyodorkon daftar menu nai.

ibaca kari suleman mantong sada-sada.

ikan goreng
ikan bakar
ikan gulai
ayam goreng
ayam bakar
ayam gulai
rendang
telor
DLL

"ho anggi nai dia do di ho " ningia ma adop alak bagas nia.

" abang ma songoni mamilina sarupo do mai " ning alak bagas nia buse mangalus sambil markuayam.

" na onan madung ma dor hita pangan,ning roangku on doma bo naso unjung hita pangan" ningia adop alak bagas nia."pinomat ulang jadi parcaritoan kita" ningiama manudu tulisan na paling toru.

di pio ia mantong pelayan nai,

" minta yang DLL dua piring ya..."ningiama sambil mangalehen daftar menu nai tu pelayan i.

giot mangkardak doma pelayan i manjagitna,itiop ia boltok nia sambil marlojong ia tu dapur idokon ia tu dongan nia i " kasih hidang dulu yang di sana " ningia lao marlojong tu kamar mandi.

inda sadia onok roma nasi dua piring dohot gule na adong lima bolas piring,inda lupa gule bulung gadung nai duda sa piring.

" ah..nahebat ma alakon" ning roa ni kari suleman ma dung di hidang di jolo nia.

"DLL do nai pangido ro na onan, anggo on na biaso do uida on sarupo dohot tulisan nai ginjangi nangkin..." ningiama adop alak bagas nia.

" aupe gari naporan dei roangku mandai na itudu ni abangi nangkin" ning alak bagas nia buse sambil mambuat indahan.

akhirna gule bulung gadung i doma ipangan kalai.

habis carito.
takik sadari do on hahahahaha.

Parmainan Waktu Daganak

2010-01-29T09:13:00.002+07:00

Oleh : Syarifudin Siagian
Email : saripuddin.siagian@gmail.com
Web : http://aeksingepu.blogspot.com

Dompak menek iba najolo nabahatan permainan-permainan khususna tu daganak , muloi sian na

MARKALEREN, sada parmainan manggunaon kaleren pake goba( tano nailubangan) alakna bisa duahalak sampe opat kalak,pala dung goba iba,hona tartembak iba kaleren ni dongan nibai,monang ma iba i , di iba ma kaleren ni alo nibai.

MARKATUJU, alatna koje ( karet gelang ) dohot lidi,alak na bisa dua halak sampe opat kalak. ibaen ma lidi na unduk,baru ipayakkon di ginjang nai koje,itembak ma sian jarak tertentu,pala hona iba madabu koje nai sian lidii torus inda dais be tu lidi nai,sanga sadia na madabui,i manjadi iba puna.

MARLUPIS, alat na bungkus ni sigaret dohot batu na tipis dungi hayu letter U , alakna bisa dua halak sampe opat kalak.di model ma bungkus ni sigaret i songon lupis,baru di payakkon di ginjang ni hayu letter U,baru di tembak sian jarak tertentu manggunaon batu na tipis ( batu ceper ),pala hona iba sar-sar ma bungkus sigaret i,manjadi iba puna.

MAR KATIPAK ( POTUK LELE ), alatna hayu sagodang ni induk pat dewasa,ginjangna tar saeto ima naidokon inangna,baru adong buse hayu lek sagodang ni induk pat nidewasa,ginjangna tarsajongkal ima na idokon anakna,alakna bisa dua pa dua,sanga pa tolu-tolu.ipasangma anak nai tu lubang namandung di desain khusus,baru ipotuk dohot inang nai,pala maninjal anak nai tu ginjang,ipotuk buse mai,sanga sadia dao ramban anak nai,saginjang ni anak naima di etong sampe tulubang nai.habisna maradu ipas tu etongan na mandung di setujui bersama.pala ise namonang,igendong sampe dua putaran namandung di setujui bersama.permainan on memerlukan kecerdasan dohot ketangkasan.

MARPORANG-PORANG, alatna hayu namadung imodel songon sinapang,on bisa marrami-rami.biasona ibaen on di harangan-karangan atau pe di toru ni kopi-kopi.cara manembakna pake sora.pala tarida ma alo nai " dor " ningiba mai.sanga ise nahumbahat mate.ima nakalah.di permainan on di uji kejujuran niba.

MAR YEYE, alatna koje na idandan.on biasona permainan ni dadaboru doon.di permainan on di uji kegesitan dohot kelincahan.

MARGASING, alatna hayu namandung di model,biasona batang ni jambu orsik sanga batang ni kopi.anggo permainan on hampirdo sude halak indonesia mamboto.

MARSIAYUP DI BATANG AEK, alatna inda dong,naponting malo marlange.

MARSIMONJAP, onpe inda dong alatna.biasona on di mainkon sampe dua puluh tu tolu puluh alak.

MARSARAT-SARAT, alatna odong ni pining sanga odong ni arambir namadung madabu.manaek ma sada halak tu ginjang nai baru isarat margonti-gonti.

MARSIMBAK, alatna batu namenek-menek.onpe permainan ni dadaboru doon.

MARPANGGELONG, inda uingot sanga songondia be,ma lupa au.

MARCONTENG ( MARBETENG-BETENG ) , alatna batu ni apea namadung madabu.ijolung mai tu arangan,apalagi sugari adong batu ni apea kulasi.iaduma antara batu
ni apea niba dohot alak puna sanga dia na hum beteng.onpe kadang adong doon na curang,di isi aspal na cair tubagasan anso kuat.

Nabahatan dope da naso hami boto parmaianan waktu daganak .mungkin adong tongkinnai usul sian dongan-dongan,kirim kamu anso hita tuliskon di son.anso ulang mago budayanta na sian hitaan khususna waktu daganak.

Batam, 02 Desember 2009

Palan Dabo Onyakkon

2010-01-02T11:57:00.003+07:00

Sabotulna dabo ale dongan na dua tolu adong tolu pantangan dihita na dapot au sian natobang-tobang najolo, na harus hita padao, na harus hita tinggalkon (bagi na ra doba dongan) :

- Markobun Padang

- Marmotor Naburuk

- Maradaboru Dua

Na imakasud markobun padang, ima pala manabusi tano iba padang sajo maia suan-suananna, nangkon bahat hita aropkon hasil sian i, kacuali tanonai itopi dalan pot tongkin nai magodang argana. Tai anggo hasil do ngajabat na adong isi i, porsaya ma dabo hamu dongan.

Napaduana marmotor naburuk. Pala manabusi motor dongan, lek degesan ma sugari nabaru (pala na adong doba dongan epengna), harana pala motor naburuk dor sego na, tiop tongkin angkon na igonti badakna songoni muse dot gincuna (ulang margiri dabo), ulang do manangkok sotik na morong ma, onok-onok siani mapuak mai cakuk.

Na Patolu na on, tarborat dokonon, harana yakin do ulala nabahatan do halak kita namangamalkon on, sadebana pandok ni alai (pandok ni alai doda dongan) tagi, tai bahatan do namandok di au umbahat do susahna umpado tagina.

"Batasan do maradaboru tolu" ning Jamarambit muse dohot-dohotan atiha marcarito Ompung Jamamoro dihami disada maso najolo.

Jadi imada dongan, adong ma sada donganku namargorar Japiul, halakna mokmok pondok, mukona pas songon muko ni daganak (baby face, pandok ni alak siborang). Bayo on naso jugada do on muruk ato pe goyak saro jita, nasalalu doon senyum-senyum olo pe dung tobang, apalagi muda tarpaida non disia bujing-bujing, na sude mai karejo nia. Disada maso adong mada bayo namarwarkon motor di si Japiul, motor naon SUZUKI pick up taon lapan pulu dua, sanga baen porna pe roa ni Japiul antong marmotor sanga baen na dung lobi epeng nia, inda hita boto. Namun na jelas cocok arga, itabusi Japiul ma motor on, ioban tubagas, pamer ma di ombar balok.

Boa-boa

2009-12-15T09:32:00.004+07:00

SELAMAT TAHUN BARU ISLAM

1 MUHARRAM 1431 HIJRIYAH

Mohon Maaf Lahir dan Bathin

FAS Nasution & Keluarga

Inda jabat na taraso madung di ujung ni Taon muse ma hita sasudena.
Salaku torang ari markais, potang ari masuk lobu (manuk dei antong tile...),
Manombo inda jabat tarida bincar ni mataniari,
Sapala sodar naget lusut muse doma.

Songonima rupana hangoluan diginjang ni Tano ni Tuhan on
Manombo pat jadi ulu, ulu jadi pat baen gosona namanjalaki nasuada on
Dodas muse manombo lupa iba jabat dalan Mulak tu Tuhan
Baen sibuk dot rerona hita di hangoluan on

Maradopkon Koum-koum sasudena namarsilaturrahmi di blog on.
Mudah-mudahan dilehen Tuhan tai dihita sasudena umur na Lanjang,
Rasoki na borkat dohot keadaan na lumobi denggan sian taon on
tu taon-taon nangkan na ro, bope ia masalah dunia,
Tarlobi-lobi muse ma nian masalah akhiratna

...... Amin Ya Arhamarrohimin.....

Na Ra Do Ia Ioban-oban Kalak

2009-11-18T08:21:00.006+07:00

Si Supir Motor do Halakna
Pas do Pira Manuk Di Ginjang Tanduk
Silop mata.....

"So iboto hamu inang, tolu maia Bung di Indonesiaon, Bung Karno, Bung Hatta dot Bung Lubis" salain ni i na Bung-bung domai sudena", sabaris lagu dohot lawak-lawak ni Bung Lubis atiha marjagal ubat cacing disada maso najolo di Kotanopan. Tai i carito najolo do dai, ita tinggal kon Bung Lubis, ita pareso sada carito di maso sannari di sada kampung di Mandailing.

Sondia nadung rap hita boto sasudena, di Mandailing on nabahatan usaho ni alak marmotor, baik ia sopir motor atope sitokar. Bahat nadung adong motor na, bahat juo hum na motor-motor dope sinadonganna (daganak). Pas songon logu i, sangajo dabo nalaku siparmotor on, najopan muse roa ni halak mardongan dot sopir nai. Najolo adong dei istilah "biar tambah ongkos, asal CC".

Sampe sannari pe leng natarsoni juo dei, inda pandang bulu, bujing-bujing, ina-ina, apalagi namarando, pala get masuk ma tu motor tambangan i, na isapai ni halai sajomai sopir nai sanga madung adong ijolo. "Madung marisi" pala ning sitokar nai non, 'i balakang ni sopir i masoni" ning na muse mai. Pokokna asal marmotor, apalagi motor bus pala pardalanan na dao, anggo giot ni adaborui angkon nai jolo sajo mai, minimalna di balakang sopir i.

Au donganku sasikola najolo, nabahatan dei jadi parmotor umpado jadi pegawe, harana pandokon ni halai tagian sadao do marmotor. Jungada juo dei najolo i taon sambilan pulu lapan i, dompak sego karejongku maso i (moneter), iontang dongan au karejo marmotor.

"Ah, joma i dongan na marmotor i, lalu mai tongkin nai tinggal adua-duana" ningku antong mangalus.

"Adua-duana sondia?" ning donganki muse antong

"Dunia inda dapot, akhirat na tinggal" ningku muse antong

Tai jaru songoni pe ba dongan, na jopan roangku baen na gok i donganku parmotor, harana madung jelas antong naron i inda mambayar ongkos. Dohot muse dope iba mangan di lopo "Duta Selera" di Kotanopan, pere muse.

Mulak tu pangkal carito, adong ma sada donganku sopir motor Antar Lintas Sumatera (ALS) tirip Medan Surabaya goarna Jamamonjal. Halak na inda pola na ganteng, tinggal lagi nadenggan rohana (apalagi tu bujing-bujing), inda naporlu isia i mapuak cakuk, asal mangido epeng bujing-bujing, na bulus ibuka nia mai dompet nia. Pendek ni caritona, disada maso atiha marangkat sian Medan juguk mada di CC sada bujing-bujing halak kitaan na tujuanna tu Mandailing. Mulo-mulo rap mangkehem, sidung i markenalan, singkat carito cocok pokat giot rap kehe langka matobang.

Utandai Doho Dabo Bayo

2009-11-11T08:55:00.010+07:00

Itandai homu do ale dongan-dongan sasudena Bange? Inda huta Bange na lewat Malintang ba. Bange na di maksud di son, sabangso tano do tai tano on tano panganon. Pandok ni halak najolo baen ubat, tai ba anggo roangku dongan baen suada ni panganon mada on najolo baen susahna ngolu waktu darurat i. Au sandiri pe jungada mada udai tano Bange on, ima didalan-dalan tu Patialo (adong kampung antara ni Siluak dot Usortolang, kampung nai marrambin tubariba baru manongkok tu dolokan). Daina capot-capot talmis, adong juo tar songon na manis.

Jadi imada koum-koum sasudena, najolo ni najolo, adong ma sada huta di Mandailing Julu namargorar Muara Bubus. Di Huta i adong Tano Bange inda sadia dao sian tapian ni dadaboru, jadi dodasma halak marsibuat tano bange dison olope manyogot ato arian sanga potang-potang. Rupana tano Bange on, inda namanyarsar di tanoi, tai marurat do mur tubagasan. Jadi mur maonok, mur tu bagasan do mangkali na, pangabisanna angkan na imasukkon doma satonga sibuk niba sapala mambuatna (ngon pusot santak tu ulu).

Disabolah ni Hutai (hira-hira tolu kilometer siani) adong muse sada huta namargorar Muara Sorpak. Dihutaon adong ma sada bayo parkipek balom namargoar Jamanggutu, bayo on tarulah doon, tinggal lagi tarparholas saotik halakna. Tardok do dabo sangajo on mai usaho ni bayo on, harana di maso i susah dope parusahoan atope karejo manjalak-jalaki duru ni halak songon sannari. Pala marrasoki itukarkon ibana mai tu danon, dapot mai non mar dua tu na tolu tekong sada balom.

Kurkkk..kutuuuu....tuuuu, kurrrr....kutuuuu....tuuuuu, prepek...preeekkk puuuuttt...ning balom ni Jamanggutu muse ma sian cangkak parpikek nai, dor muse i potek Jamanggutu sian toru ni dangkai, mur ma situtu 'ntong sora ni balom on i cangkak i. Tai soni ma rupana paruntungan ni Jamanggutu sadari, madung get pukul dua arian leng naso dong juo dope dapot. Kasidunganna ioban ia cangkak sian i get mulak tu kampung. Tai di tongandalan taringot Jamanggutu bahasona adong di Huta Muara Bubus tano bange. Jadi marniat tong Jamanggutu giot mambuat na baen simpan-sipanon pot cogot kaduan adong porluna, lagina daripada landang inda maroban sanga aha non tu bagas.

Mamotong ma Jamanggutu sian arangan-karangani torus tu kampung Muara Bubus torus tu topi ni hutai. Sanga baen na ariani pe antong so longon, inda ita boto, tai na jelas longon halak dompak di tapiani soni muse di pambuatan ni tano bange i. Tai boto songon na tarsonggot Jamanggutu, harana tarpaida disia sian nadao songon na itutupan pambuatan tano bange on dohot marikin (salin maridi). Jadi songon na holas mada Jamanggutu "hum sonon dope tanona, taru na itutupan ma dohot salin, iambang kalak kampungon roangku tano ni halai on, inda iboto halai tano ni Tuhan do on" ningia ma dibasan roa nia songon na holas. Mur ipadonok Jamanggutu antog tu lubang ni tano bange on, isintakkon ia salin maridi i sagogo nia lao holas..... "oooiiiiiiiii..... ise deiiiiii" ning na ma dabo ro sora sian bagasan.... rupana baya Inang si Muliadong do dompak unggil mambuat bange disi dung siap maridi nangkin, rupana leng marsalin maridi dope inda marbaju. Baen na halak najolo antong ale gorarna jadi sibukna pe tarcoklat-coklat songon rupo ni tanoi, mari ari muse parnidaan ni Jamanggutu on pe songon na muloi ma markurang.

Jadi mangalumpat doma da Jamanggutu tu rompo-rompoi lao marlojong tiop cangkak na dohot tangan siambirang, tangan siamun ni ibana maniop balutan ni abit karung nia so ulang sar-sar, ipamereng ia muse tudung pandan panutupi muko nia so ulang itandaan. Rope umak si Muliadong antong baen nadung maila parasaan nia inda iboto ia sanga aha dokononbe, leng manudu-nudu ma songoni adop bayoi salao mandok ..... "Utandaiiiii doho dabo Bayo, Tudung Pandan Kupiahmu, belek-belek parsalapaanmu, kotak-kotak ragi ni abit karungmu" ning umak si Muliadong sajo ma marulak-ulak lao manjalaki salin maridi nia nadung sangkot di batang ni lancat taroban si Jamanggutu.

***

Apit Katubah

2009-11-05T08:43:00.004+07:00

Bulan Dzulqo’dah (Dzul Ka’edah) didok halak dihitaan Apit Katubah atope bulan Pangapit. Aso luai didok songoni? Makasudna dabo le baya dongan baen na apit i sabulan i dintara dua Ari Rayo (Idul Fitri dohot Idul Adha), apit diantara dua Katubah ima Katubah Idul Fitri dohot Idul Adha.

Aha muse mai luai hubunganna dohot Tulisanon? Oooo, sonon dabo koum-koum, Najolo dihitaan pala adong nagiot Maringanan (marbagas, langka matobang) biasona muloi sian partongaan ni ari rayo Idul Fitri mai santak abis ari rayoi. Pala inda juo dapot kaputusan di Idul Fitri i, biasona dung ari rayo oji domai i palalu. Aupe sangajo naheran do au i, aso songon na ipantangkon ni halak najolo maringanan di bulan Dzulqaedah (Pangapit).

Tai ba dongan carito najolo do on, anggo sannari ngana adong na ipantangkon ni dongan be, bulan puaso (Romadhon) pe asi, nga ale roamuyu najebu i kahanggi?. Arian puaso, borngin nai papuaskon (mangosom mangan dot minum doda makasudna).

Gorarna pe antong Jolma nasobegu (manusia), tontu leng na penasaran juo do iba, aso ipantangkon halak najolo maringanan di bulan Pangapit, leng adong juo do sada dua halak na isapai satontang tusi :

“Harana pala madung masuk bulan Pangapit, biasona martopi mai epeng” ning Jamananduk (Parbodat).

“Leng na degesan ma antong di bulan ari rayo” ning Jamanggutu (Panjala)

Adong muse dope nagadukna, “Pala dibulan Pangapit, Apit sajo mei” ning Jatungkir (Parpikek Balom), lao mangkair.

Ah, au dongan naso uboto do lalu sanga na jia na petona. Tulisan on pe ubaen, baen suada ni tulisan doon, dompak inda sompat mangkarang dabo le baya. Bahat dope carito dabo nian, tai sindokoni namancubona dope ipature so ulang roncam sajo isina. Gorarna pentong carito lopo, carito disopo saba bagenando, jadi marragam-ragam mada.

Ompung... Inda Ilehen Ia

2009-11-03T14:57:00.005+07:00

Kiriman : Shohib Syarifuddin Siagian
Email : saripuddin.siagian@gmail.com

Anggo on ise pe halak na anggo nasian hitaan mamboto do caritoon, harana waktu di Purba na lewati tarmasuk ma on sada carito na terkenalna, selain ni Mantik dohot Bayan Balagoh. Baen di blog on antong carito dohot kenangan masa lalu, jadi ita ungkap mulak anso lek rap riang be hita, rap mantata, minimal senyum-senyum sambil karejo.

Najolo antong inda dong dope taliphone, apalagi handphone. Anggo na binoto na adong pon-pon na motor sampagul ma ia dohot sibual-buali.

Pala giot mangalehen kabar iba tu huta, di tulis ma surat baru di lehen to parmotor nalewat, tolong jolo uda dabuon surat kon di sadu ningiba mai, idokon gorar ni huta nai. Pala di ingot supir nai antong tibu lalu surat nibai, pala lupa do ia ra bage do sabulan so sampe.

Hamu antong madung tagido hamu sannari ning tobang-tobangi ma tu iba i, pas do hamu songon mangan pisang namandung iubak, inda hona gota naibe. Anggo hami baya najolo, itoru di bodil ni bolandoi do, boltok madung male, giot mangan pe mabiar.

Imada..baen susahna najolo informasi dohot komunikasi, sering dei manombo sala pasampe tu nai tuju ning tulangima si Ibrahim (gorar aspal do daon) kalas pitu di purba lao mangiris kantang baen sambal sapoken.

"Adong langa tulang na sompat kajadian?" ning si Jobbar ma lao juguk di lambung nai.

"Imada...adong na mamanfaatkonna tu na asing" ning tulangi antong.

"Tar songon dia buse dei carito ni i tulang?"ning si Jobbar ma dohot si Kadir.

"Anggo songoni giling majolo bere lasiak i so udokon carito nai!" ning tulangima.
.....
Adong disada huta najolo, tinggal ma sada anak gadis dohot ompung nia. Anak gadis on na patuh mar ompung, sanga aha ning ompung nia, inda unjung i bantah ia. Rupana anak gadis on inda tanggung degesna, obukna lanjang, semampai pandok ni alak sannari, marlosung pipi hurum nai, pala minum ia ning halak songon natarida doma mangalir aek i di tolonan nia baen bontarna, pala mikim ia ra dei kalom mata niari i. Pokokna nasantak...!ning tulangi ma si Ibrahim senyum-senyum mamuloi carito.
Anak gadis on jarang doon kaluar sian bagas, paling ma pala kehe manyapsap tu aek sanga lao sumbayang tu suro na di tapian an. Inda songon anak gadis sannari, manombo inda binoto sanga idia bagasna. Tai soboto hamu, bo pe inda unjung ia kaluar sian bagas, anggo bunga melati i dabo isimpan pe lek na uskus dei.

"A..ah ise madongan gorar nii tulang?" ...nasantak ma ulalai, ning si Jobbar ma lao maradian na manggiling on.

Alaaa..imada bere, lupa au manyapai gorar nia sakalii, tai ita baen ma songoni si FATIMAH...ning tulangi antong.

"Palalu tulang e!"...nangkon sei tangion ia, naron igiling ia buse tangan nia ning si Kadir busema sian lambung ni kompori.

Imada...ma bahat poso-poso naro manyapai, anggo namarhusip antong ulang sapai hamu be, ias doma di toru ni tingkap ni alak si Fatimah i torus tu taruma nai songon parkaisan ni manuk, tai boto hamu bope songoni naso dong dope namartarimo di si Fatimah.

"Aha do tulang marhusip?" ning si jobbar busema.

"Ah..nabahat mantong sapaionmuda" ning si Kadir buse songon namanyonggak.

"Padiarma..saulaknai u caritoon pe carito marhusip sanga aha dei", ning tulangi buse antong.

Madung na bahatan alak lai na patah hati pamasang nisi Fatimah...adong bagema namangkuling-kuling sada-sada ia :

Sian parsabolas baya tu sigalangan
Maradian mai di padang matinggi
Sugari bolas baya pangidoan
Nangkan na hodo baenon induk ni api

Painte jolo tongkin tulang...utulis jolo nabaru idokon ni tulangi ning si Kadirma sambil mambuat pentak dohot buku.

"Tuuuueeehhh....!!!" pu pu idokon ko iba na santak...padahal ho dope nasantakna "ondekkang" ning si Jobbar sian samping, kaluar sompat bahasa Padang Bolak niai.

Marayak puaso antong marmulakan ma dabo par sikola Purba, lek tarbege juo ma tusuping ni alai mengenai si fatimah on. "Ima bahat na hamu dongan di hutaon inda lalu hamu, sadalak pe inda dong na sangkot", ning pokir on ma.

borngin dabo berangkat ma pokir on giot marusaho mandapotkan bunga desa on.

"Assalamu Alaikum"..ninna ma asok sian samping tingkap i, inda dong mangalusi, "amang dongan na tangkang on", ning pokir on ma di bagasan roa nia. Sampe tolu borngin di ulaki ia, inda dong juo namangalus. "Pala nasongoni, painte ho tolu-tolu ari on" ning roa ni pokir on ma.

Di sada ari, jam-jam sappulu manyogot, ro ma pokir on tu bagas nisi fatimah an. Adong antong kobun jegang ni ompung si Fatimah di samping bagasi. Itopotkon pokir on ma ompung nisi fatimah atiha manyalang-nyalangi duhut-duhut ma disi.

"Assalamu alaikum.."

"Alaikum salam..bo ho dei anggi, tudia doho?" ning ompung si fatimah antong.

Imada ompung..giot kehe manolongi alak ayah tu saba, tarida diau kobun jegang ni ompungon, na deges mantong i ning roangku. Pokir on pe asik ma marcarito-carito dohot ompung si Fatimah...tai ba dongan anggo Pokir on na marakal sajoma sanga songon dia carana so bisa marsuo dohot si Fatimah.

"Awas ompung.....!!!!" ning pokiron ma dabo marsurak. Sahinggo tarsonggot doma ompung i, hape giot tardege ompungi kaco.

"Aso do langa inda marsolop ompung, ima bahatna ison kaco" ning Pokir on ma.

"Imada anggi...dung lalu do au tuson baru uingot natinggal solopku, madung malosok kulala mangalapna" ning ompung si Fatimah antong.

"Pala dabo ualap tongkin ompung, naron bo tardege ompung kaco sanga paku bia dei..." adong do alak di bagasan??..."ning pokiron ma mamuloi rencana.

"Anggo ringgas roamu anggi, tolong majolo alapkon, isi do si Fatimah"ning ompung on buse antong.

Marangkat ma pokir on tu bagasan, lalu di alaman ni bagasi "Assalamu Alaikum" ningia ma langsung.

"Alaikum Salam" ninna mangalus sian bagasan lao mambuka pintu.

Pas dabo nida pokiron mungkap si Fatimah di pintui, humitir ma tot nia, ro hodok nia padohal nangali do ari, inda binoto ia sanga aha dokonon, dor doma manolon ijur, anggo matai antong bolnang sajo doma songon na itampar begu.

"Bo..abang do lakna i, ahadei luai abang...?" ning si Fatimah ma dabo mamuloi obar.

Anggo Pokir on, "ser gadubuk.... ser gadubuk" na ninna sajo do ma jantung nia, botul do langa baya na idokon ni alaki ning roa nia sajo ma dibagasan roa nia.

"Oo ee..., ooo...eee..." songon na mogap Pokir on mangalusina, "na isuru ni ompung do au nangkin tuson" ningia leng humotar.

"Aha dei roai abang?"...ning si Fatimah songon na penasaran.

"I'..i'..i'...Isuru ompung u tiop tanganmu" ning Pokir on ma dabo leng gogap.

"Oiiiii..inda jau ba abangi, ngana botul i, gabus ni abang dei roangku i" ning si Fatimah marrara muko nai.

"Inda purcaya ho dabo hu dokon, " tangion da so usapai....!!!!

"OMPUUUUUUNG...!!!!!" INDA I LEHEN IA.

"LEHEN ANGGI...!!! NA USURU DEI...!" ning ompung si Fatimah sian balik, ning roa ni ompung i antong solop do naso ilehen ni si Fatimah.

"Biado...kan madung ibege ho...!" ning Pokir on ma adop si Fatimah.

Pendek ni carita, dohot tarpaksa ilehen si Fatimah ma tangan nia sabariba di Pokir on, bo.. langsung antong itiop Pokir on antong tangan nai...anggo si Fatimah songon udang nai bolgang doma mukoi, marrara songon jambu erang, harana naso unjung dope ia dais tu alak lai.

Inda pe puas ilala Pokir on, giot itarik ia buse dope tangan si Fatimah sada nai, inda ra antong si Fatimah be.

"OMPUUUUUNG ....!!!!" SABARIBA DO ILEHEN IA ning pokir on buse ma dabo.

"LEHEN DUA-DUA ANGGI.....!" ning ompung si fatimah buse antong, ning roa ni ompungi...lek solop niai dope.

Akhirna itiop pokir on tangan nai dua-duana, nga roamuyu antong namaruntung mai Pokir on dongan?.

"Sugari adong handfone, kan bisa di hp jolo, sanga di sms" ning tulangima si Ibrahim lao martata.

"Astagfirullahalazim....!!!!!!!!!" ning si Jobbar ma marsurak....

"Ahado namangua he?" ning si Kadir buse tarsonggot.

"Mapistak batu ni lasiak tu matangku"..ning ia lao manjalaki aek.

"Imada ulang bolnang sajo mata niba pala marcarito alak" ning si Kadir busema lao manyuopi si Jobbar. Akhirna lupa doma alai carito, harana ma mangangguk-angguk sajo si Jobbar harana manyiak-nyiak mata nai.

Saima jolo dongan-dongan nadua tolu tie, Insya Allah ita baen muse mulak carito sanga andigan.

Batam, 03 Nopember 2009

Au Arambir Nai Pe Tabo Do Ulala

2009-11-02T09:22:00.007+07:00

Kiriman : Shohib Syarifuddin Siagian

Email : saripuddin.siagian@gmail.com

On da dongan carito di purba doon, harana dabo nabahaton do disi carito, tai manombo inda tartuliskon, harana mabiar iba ibaca inang ni daganak, mungkap buse non somor nia ..."nasongoni do langa abang dompak di Purba" ningia buse tongkinnai tu iba. Bo tarida ma antong roa muyu cokian niba, boti buse alai inda na sian purba.

Najolo, pala topet ma ari Sinayan waktu di Purba, nahurang sosak sajo ma ilala mulak sikola, pala tarbegema bahang sian musojid pukul dua bolas lewat, "madung bahang ayah.." ningiba mei tu gurui anso tibu ipamulak, harana mulak na jam sada do. Namilas sajo ma ilala bemper belakangi painte tu jam sada.

Borngin nai markumpul mei marsibaen acarana, adong na mambubur, mardahan mangan, adong buse antong namardobol monjap-monjap hahaha...harana mabiar ona razia, pala tardapot angkon na ipangan dei kartu dobol nai so baru salose hukuman.

Hami pe'ntong markumpul ma hami, mulo-mulo nai markombur, malapat-lapat sanga tudia-dia caritoi, mulai sian timur santak tu barat, taiba nangge dong kesimpulan ni on. Hum gorarna pe namarsidokon naidokonna do.

Jadi...dung bagas borngin ari, muloi ma boltok marngaok. "Ahama ita pamasak? madung male ulala" ning si Jobbar ma, baen ia tuan rumahna.

"Mambubur mada ita roangku jolo" rap ninna be ma mangalusi.

"Ah tiop malom Salasa dongan mambubur, naso bosan ma hamu i" ning si Kadir buse ma. "Malom Salasa na lewat ma paet sira, na lewat nai buse marhimpal-himpal gulo nai, na asing ma jolo dongan" ningia muse palalu obar.

"Aha doma tulang ita pamasak?" ning kalaima mangadop si Lobe. Baen ia disi nahum gincat kalasna, disia doma keputusan.

" Ningroangku anso tampil beda sabornginon "onde-onde majolo ita pamasak" ning si Lobe. Baenna usul on sian kalas pitu nai, rap marsipan ma hami songoni mangaminkonna.

"Adope..kei tabusi gulo, ho sadia ngen ko!" ningna ma. Dung ma rap ipakumpul rap ikarejoan ma lao marcarito.

Inda sadia onok antong masak ma onde-onde on, ibaenma tu tonga, lao namarkombur sambil ma ipangan onde-onde on.

"Memang tabo do pamasakmu ba", ning si Kadir ma mandokon si Jobbar, "Sugari adaboru ho, hodo ubaen parumaen ni dainang".

Lek marpupu ma songoni marsibuat sada be.

Jadi terakhir nai timbul mada masalah, onde-onde tinggal dua nai doma, hape alakna opat nai.

"Ho ma piga diho?"..ning si Lobe ma adop si Jobbar.

"Opat dope...tulang..."

"Ho..?" ninna buse ma adop au.

"Opat.... tulang.."

"Ho Kadir....?"

"Aupe opat dope ba tulang..." ning si Kadir buse antong.

"Aupe opat dope..., idia dua nai, aso hurang dua...?" ning si Lobe.

"Ning roangku tulang waktu mandai sira nai dei si Jobbar, bo itolonkon ia dua" ning si Kadir ma.

"Namalo mahoda tie, hodo uida nangkin namorgos-orgos di lambung ni kompori" ning si Jobbar busema inda ra kalah.

Marsisulahaan ma songoni mangan onde-onde naduaon, harana pala ibuat naron, adong ma dua halak nai naso dapotan.

Markombur pe jalan torus, inda binoto sanga aha namangua, mintop mada lampu camporong. Ibuat si Jobbar mantong korek api, serrr.. ningia isertek ia, pala tarida ma tangan ma di pinggani tolu, ima tanganku, tangan sikadir dohot tangan Silobe.

Au 'ntong ma utiop onde-onde nai sada, si Lobe pe songoni juo, ro mada si Kadir madung songon namaila, harana ma tarlambat ia manjomputna. I hais-kais ia ma songoni arambir nai, lalu mangaligi tu hami, "AU ARAMBIR NAI PE TABO DO ULALA" ningia lao mandilati tangan nia.

Batam, 01 Nopember 2009

Mahraini

2009-10-29T09:36:00.007+07:00

Di ingot ko dope dongan
Atiha au kalas dua di SMP Kotanopan
Dompak ho kalas sada di SKKP Singengu
Marjanji ita baya rap tu jae rap tujulu

Disada borngin pas malom Akad, dompak
tempo ho dongan sikola. Juguk hita nadua disada tangga di Tadolok
Marcarito sikola songoni tunamar dalan-dalan
Atiha ho painte dongan, atiha au painte siang udan
Songon nai sampakkon doma obarku marcarito,

pas songon por ni udan na madabu sian langit saborngini
Songon namarnipi doma hulala atiha au mandok Cinta
Bo sindokoni, itarimo ho juo cintangku satongkini

Muloi ma sian ari saborngini
Jojot ma baya au inda tarpodom
Marangan-angan boti mur mapohom
Mamikirkon ho baya dilambungki
Harana hita nadua rap Cinta Pertama

Taringot dope au dongan
Atiha Pas di Ari Sinayan
Huida ho tangis atiha rap hita marangkat Sikola tu Kotanopan
Por roangku mangapus ilumi dohot tanganku
Por muse roangku mangapus mon-monmu dohot bajungku
Tai maila au baya di dongan-dongan

Mahraini,.....
Landit ni na mandurung, sude dot salak hubarbari
Hancit ni namalungun, Sude do halak husapai
Mula mandurung ko anggi mandurung
Durung ma jolo ditoru ni Robung
Pot anggi malungun ko baya malungun
Ingot ma hita dompak rap di Taoulbung
Ima pantunku waktu i....

Santak sannari madung duapulu lima taon
Manombo boto dongan leng narodo ho diangan-angan
Leng naro doho dinipingku atiha modom
Tai biama baenon, waktu madung rap manyarak hita nadua
Ho anggi madung maringanan, Au pe madung bahat daganakna

Markisar dua taon nalewat, jungada au pasuo dot
nantulang nadi homui di bagasan motor, ucubo juo marsapa.
"Ijia si Mahraini sannari nantulang?"
"Madung marbagas ma ia" ro alus ni nantulang
(Roangku mabiar nantulang u ganggu ho, bo jiama ra iba i, nadung rap tobang be ma).

Ampot tong ngabinoto ibasa ho tulisan kon,
anggap ma on Anggi gonti ni diringku
Mudah-mudahan di Lehen Tuhan dihita umur na lanjang
Nga binoto pot pasuo ita sanga andigan,
pinomat baya marsijalangan

Tu Alak Bagas namian di Panyabungan
Mangido Tolong dongan ulang baca tulisanon
Bo, incogot hona pelos muse iba.......

Diginjang ni motor Sampagul
Antara ni Kotanopan - Muara Sipongi
Oktober 2009

Tuliskon Au (Tammat)

2009-10-21T13:52:00.004+07:00

Saborngini bahat ma halak na so tarpodom painte-inte ari rayo, deba simbur di masojid apalagi daganak, sadebana antong di lopo, tai anggo Janaet ba pukul sabolas dope madung modom ma ia, harana mabiar ia tarlambat cogot sumbayang.

Pukul opat andostorangi, simbur musema takbir di masojid "Allohu akbar, Allohu Akbar, Allohu Akbar, Walillahil hamd". Maradu muse ma halak tu masojid takbir, bahat muse ma namangarar harana inda tahan mambege sora ni takbir i. Anak ni Janaet pe dohot-dohotan muse ma tangis tai ba inda baen na mambege takbir, rupa tardege Janaet pat nai lao masuk tu masojid. Inda saidia onok siani tarbege ma ribur sora ni induk-induk di balakang, rupana ina-ina paombang amak sumbayang so ulang iteken kalak non pala sumbayang Idul Fitri, dohot-dohotan muse na ibuat si Janaet, bahkan ia ma na sibukna. Iambang kalai roangku tola dei ikapling-kapling masojid i, padohal ise naparjolo masuk ia dei namar hak dijolo, tai anggo on ba ngada, marsipaombang amak sumbayangna be. Hum na salose dope sumbayang, marsurak ma na ibuat ni Janaet mandok umak si Boltak "He angkang, pala kedo lalu namanjalangi tu tuan guruntan, ulangko lupa da, Tuliskon Au" ningna ma. Iambang ia muse roangku porluan manjalang tu guruan sampado tu simatobang nia rongkon bou dot amang boru nia.

Mulak tingon masojid, daganak pe madung marngotan, songoni juo pinompar ni Janaet, madung simbur maridi, manombo madung marsuakan, manombo madung marbada, mocom soni karejona. Siap maridi rap marbaju nabaru ma sudena, mangkuling ma pinompar ni Janaet nagodangna, ima si Lukman nasikola di Purba.

"Adope ayah, umak, marlagut ma ita tu pantar tongai so rap manjalang, adope anggi-anggi sasudena marroan ma tuson" ningna ma.

"Ahana muse dope so marlagut, manjalang bage, nabahatan dope karejo bo" ning simatobang nia adaboru.

"Bo, tai ipasikola ayah au dot umak tu Purba, tontu angkon na ipake dei ilmu nai" ning si Lukman muse mulakan.

"Keta ni soni, paisar sotik" ning umak nia songon na mandemes lao mencelok Janaet.

Siap sude marlagut, mangkuling muse ma mulak si Lukman.

"Adope, mangido mohof umak tu ayah satontang kasalahan"

"Ahana muse dope so soni jabat, madung imohofkon ayahmu ma bai" ning umak nia songon namangukuri Janaet.

"Inda tola soni ba umak, ingkon na ilafalkon dei" ning si Lukman muse

Kasidunganna, mangido mohof juo umak si Lukman tu Janaet, bo renge ilu ni mata nia, inda sodar ia tangis ama nagogo, lao mangkaluk si Lukman baen jopna roa nia mida anak niai harana iajarai ia halai nasabagas tu dalan na denggan songon nai guruon niai i Purba.

Dung salose sumbayang Idul Fitri, kehe ma Janaet tu lopo minum kopi susu, lao marcarito di lopoi, :

"Au dongan, na tobang ma ulala, on dope na riangna mararirayo" ningna ma.

"Bo, aso idokon komu songoni?" ning Jaurimbang songon na cimburu

"Ondope boto hamu ra mangido mohof inang ni daganak i di au" ningia lao magombuskon timbus sigaret tu ginjang....

(Tamat)

Tuliskon Au (Lanjutan)

2009-10-14T08:38:00.005+07:00

Masuk tu masojid, "Assalamu Alaikum" ning Janaet mandok Lobe Syafar, "Tuliskon Bapaki jolo" ningia muse antong. "Inda namanulis dope ba, iakadkon dei jolo sobaru ita tulis" ro alus ni Lobe Syafar.

"On pitarahku, on pitarah ni umak si Lancat, on pitarah si Benak, on pitarah si Muldop, on pitarah si Rapmaita, on pitarah si Nur Cahaya, utulak pitarah nawajib atas diri nami sataonon di Bapak i".

"Utarimo pitarhmuyu, Jazakalloh"

.....

Ari mur potang, halak pe mur masibuk di bagasna be, adong namancubo baju baru, adong na sibuk dope marmasak kue, adong muse antong na pamasak rondang dope harana baru ro dope tingon pasar. Daganak pe, nabiaso ribur dei di jolo ni masojid inda na adong be tarida.

Tung...tung...tung.... sora ni otuk di masojid, mandok marbuko salao mandok habis ma Ramadhan sataonon. Giot mangkardak doma ilala Janaet baen riangna, bo muloi incogot antong madung tola mulak mangidup arian, inda songon saonok naon. Bisa muse mai mulak manyirup kopi paet di lopoan sapala manyogot-nyogot.

"Songon namabungkas doma ulala dung lopeh napuaso on" ning Janaet mandok alak bagas nia atiha mangan. Rupana na tangis do baya alak bagas nia, maneteki ilu nai lao maroban rondang dohot lobi-lobi i sup na andostorangi.

"Bo, incgot ma ari rayo halak namar jop ni roa do, aso muse do tangis ko?" ning Janaet muse mangulaki.

"Botul mada nadi dokon ni abangi, tai nahancitan kulala na kehe on Romadhon on, ibulan i maia bisa ia maribadat nahum khusuk, isi maia nabisa martaraweh soni tu witirna, taon naro inda na adong jaminan sanga nadohot dope au sanga inda, ido baen na tangis au" ning alak bagas nia madung rara mata nai.

"Anggo i do dabo, itasorahkon tu Tuhan tai, mudah-mudan antong leng totop dilehen Tuhan tai dihita umur na lanjang boti rosoki nahalal, pot bisa ita mulak maribadah di Ramadhan nangkan ro, Insya Allah" ning Janaet songon namardakwah, on peba naompot do songoni ro tu bagasan niroa nia nangkan dokonon, pas do on songon takik sadari.

Halak pe muloi simbur muse mulak mangadopkon masojid, padohal muloi ma masuk lima bolas Ramadhan nadung longon do mulak songon nabiaso. Tobang-tobang umur lima pulu taon tu ginjang doma nataraweh, manombo antong daganak sada-sada. Tai baen na get ari rayo cogot nasimbur muse ma mulak alak lai adaboru. Deba antong sumbayang, sadebana manulak pitarah. Masuk kotu Isya pol muse ma mulak shaf ni barisan, dorung doma sora ni makmum nai sapala manca amin. Siap sumbayang kotu Isya, imuloan ma takbir...Allohu Akbar, Allohu Akbar, Allohu Akbar....., bahat namartangisan marasing-asing panyobobna. Adong antong sangajo baen na hancit roa nia marsarak dot Ramadhan on, adong antong baen naso mulak do pinompar nia sian ranto, adong muse baen nataringot ia disimatobang na nadung parjolo ato pe halak bagasna, adong muse baen na mantak martobat-tobat dohot donganna sementara on na giot ari rayo. Tai anggo na parpudion ba jarang doon, harana anggo halak kita antong gorarna jarang dei na putus asa gara-gara ni bujing-bujing.

Marsambung.

Tuliskon Au

2009-10-06T21:18:00.008+07:00

Lak-lak di Ginjang Pintu

Singkoru di golom-golom

Tu Halak Ingkon Marsitutu

Tu Dirimu Papohom-pohom

Ari madung pukul sada borngin, anggo Janaet dohot halak bagas nia naso modom dope, leng na di dapur dope mangkatai lao pamasak Sup nabaru itabusan nia di hutai. Rupana adong disi na baru mangkoyok lombu na giot gadison incogot tu Pasar Kotanopan (Poken bante, ning kalak). Sabornginon ma malom terakhir sahur, ima so inda pe modom Janaet. Sanga baen nasotarpodom pe antong, sanga baen na painte masak sup i masak, inda ita boto.

"Bolgang kian non daging na sada satonga kilo i da, cogot arian mangarondang sajo doma" ningna ma mangalehen porentah sian karosi pucako i. "Lomang ulang lupa ipature kinan, lomang itak dua tumba lomang biaso onom tumba, tangguli ulang lupa tabusi tu alak si Japanaekan incogot, alaman tai sapu jolo, marnambur doma pat niba pala manyogot, taruma paias, gok teni manuk disi, abit karung na barui ulang lupa pamenekna so pas pala sumbayang ari rayo, " ningia muse palalu obar lao manyargut alame na dipamasak ariani.

"Olo dabole amang ni si Lancat, sada-sada mada parentahna ulang rap rung-rung songon udan na por, bo jia do angkon jamaonku parjolo?" ning alak bagas nia antong songon namandemes. "Parjolo ma dabo modom, non payah muse ingotan pala andostorang" ningna muse antong, tai ba anggo dibagasan ni roha na, "singgo modom konon, aupe upuntoling modom, iambang ko do robot au dison".

Inda sadia onok sian i antong sangajo tarpodom Janaet didapur, mungkor dohur-dohur, "tor rura tujae tuju" ning sora ni ungkor nai. Merdet ijur bari nai maneteki tu pantari, inda sodar ia nadung masak sup, padohal nangkin angan-angan nia mangan sup do jolo so baru modom. Sip polngit antong soni alak bagas nia, inda ingotina, harana pala ngot non nalobi bahat parentahna.

Sapala ingotina namandokon mangan sahur doma, ipe hira-hira satonga jom nai doma waktu sahur. Rap mangan ma halai di sahur napangabisan di bulan Ramadhan na sataoni, cup cap doma sora ni kuah sup i ilotap Janaet, manombo madung marregep bage binege, sapala manombo maturapak pas manyargut oli-oli ni sup i, untungma na tarposo lombu nai, anggo inda matolpang ipon.

Siap sumbayang Subuh, modom antong mulak Janaet songon nabiaso. Alak bagas nia doma namargas-gas di dapur, muloi sian pamasak lomang, mangarondang, manyapu dohot na asing-asing na. Halak pe simbur ma tu poken, manabusi baju nabaru, sadebana antong sangajo giot mar balanjo, tai sadebana inda na balanjo ba. Naget marsompit-sompit do ia tu pasaran, maklum ma hita antong, gorarna sajope poken pangabisan, idok kalak juo dei "Poken Ogos". Aso antong inda mogos? Tai ngana tanggung-tanggung sompitna di pasaran, angkon na dor mogosna, manombo boto hamu makruh doma puaso niba. Adong bage dei non namangarar harana madung mago epengna, au dongan dor mai huida apalagi pala poken pangabisan di Panyabungan.

Ari mur potang, halak pe mur masimbur tai inda ipasaran be, sannari mangadop tu masojid, ima manulak pitarah. Janaet pe inda ra katinggalan, nasounjung markupiah, ipasang ia kupiah, mereng muse tusamping, jingjing danonna onom baul-baul lao maroban na tu masojid. Itongandalan pasuo ia dot inang si Lokot, mantan nia najolo. Unduk antong soni Janaet purak-purak so nida ia, tai rupana tarpaida juo di inang si Lokot, bo irisakna Janaet.

"Ammanggg,.... namalim dongan angkangon, anggo uboto nasongonon angkangi malimna inda na giot au gari di ayah si Lokot i najolo!"

"Tai on mabo, giot manulak pitarah le tu masojid" ning Janaet antong leng unduk adop toru".

"Haaaa, manulak?, Mula ita nanga marsitulakan bia?" ning umak si Lokot lao mangkair.

"Ulang ko roncam dongan le iba napuso" ning Janaet songon namambela diri

"Ise na roncam?","Maksudku dabo, tulak pitarahmu tu au, utulak muse non pitarahku tuho, songoni do maksudku" ning umak silokot muse antong leng martata

"Ah, nabahat ma na binotomu da, inda na ahli zakat ko" ning Janaet muse lao torus tu masojid lao maroban pitarah boti manogu-nogu pinompar nia si Lancat.

Marsambung

Turut Berduka Cita

2009-10-02T08:57:00.002+07:00

Rabu, tanggal 11 Syawal 1430 H, Hum Na Salose Hita Mangarayahon Ari Rayo Ari Kamonangan, martepatan dohot tanggal 30 September pukul 17.20 WIB (potang-potang), Sudaro-sudaronta na adong di Sumatera Barat, Padang Pariaman Khususna dilanda gempa.

Sekian ratus halak na maninggal, sekian ratus bagas muse na hancur, indape harto dohot na asing-asingna.

Hami mangucapkon "Turut Berduka Cita", mudah-mudahan dibalik ni Musibah on, dilehen Allah SWT kebaikan, baik ia di na madung parjolo sian hita atope sudaro-sudaro na itinggalkon, Amin Ya Robbal Alamin.

Maradopkon koum-koum Sasudena, ami manghimbau, pot adong kakuatan dihita (Harto, Tenaga dot Pikiran), ita bantu Saudaro-saudarontai dongan, pinomat manyumbayangkon ghoib sian tempatta masing-masing.

FAS Nasution

BOA - BOA

2009-09-15T13:33:00.004+07:00

Assalamu 'Alaikum WW

Tu barisan ni Mora boti Kahanggi, songoni muse tu barisan ni Anak Boru torus tusasudena dongan-dongan songoni koum-koum na ro mar silaturrahmi di blog on.

Sadarion, tanggal 15 September 2009 ato martepatan dohot tanggal 25 Ramadhan 1430 H. Jadi opat ari nai doma hita na di bulan Ramadhan taon on. Mudah-mudahan nian salalu di lehen Allah SWT dihita sasudena umur na lanjang boti dohot rasoki na halal anso leng totop dohot kita marjuang di ginjang ni tano on. Jadi aupe koum-koum inda na marlanjang hata be, harana incogot pala inda dong halanganna na mulak muse ma au tu kampung. Jadi untuk sementara waktu hami mungkin inda bisa online, harana rap maklum ma hita pala na giot ari rayo apalagi namarkampung antong tele gorarna tama dokonon, nalobi bahat karejo dohot urusan. Taringot adong dope tulisan nami nagalang, Insya Allah dung Ari Rayo doma hita palalu, harana sabulan puaso on pe na onokan do hami di kampung, jadi inda sompat manulis.

Itaba batang ni Apundung

Ilombang ni Manggis dohot Arambir

Mula homu ale inda mulak tu kampung

Ulang tangis dongan pala pas takbir

Taqobballallohu Minna Wa Minkum, Syiamana, Wa Syiamakum

Selamat Hari Raya Idul Fitri

1 Syawal 1430 H, Mohon Maaf Lahir dan Bathin

Fadhly Abadan Syakuro Nasution & Keluarga

Sada Marbanding Tolu

2009-09-02T16:33:00.003+07:00

Sapetona dabo ale dongan, anggo ustad on inda jabat naadong goriton anggo sian pangalangkana, aso songoni? Tai hum gorarna pe madung ustad, jadi guru dinaso umboto, jadi sulu di nagolap, jadi panutan di halak nabahat. Sian kampung nasada tu kampung nasada, manjojori pangajian soni masojid, mangalehen sipaingot Agama sian maso tu maso. Inda marimbar arina asal leng sehat ustad on, inda jungada i ibana manulak asal i pataon dongan mangajai di hutana. Ustad Mukhlis, ima gorar namohot di ibana, Guru Na Ikhlas hira-hira saro jitana.

Tai ba antong dongan gorarnape manusia, biarpe sanga songon jia pasti adong doi kakuranganna, ijia ma? Ima kira-kira dua taon nalewat santak tu sannari on guru on rupana hona panyakit maag. Ulang do tarlambat mangan, margolap-golap ma pandangan ni ibana. Jadi muda kehe mardakwah tuhuta luar, salalu do ustad on maroban parsiapan olope indahan sanga roti, pot taraso boltok marngaok iganjal jolo parjolo dohot parsioram na ioban ni ibanaon.

Pendek ni caritona, dipuaso taon na lewat iundang halak juo ustad on mardakwah tu huta luar lao painte-inte marbuko bersama na iadongkon di hutai. Sabotulna atiha ro halak hutai manyapai ustad na giot mardakwahi, madung do ipajojor ustad on bahasona ia na marpanyakit maag, jadi inda na puaso ibana be madung dua taonon, namambayar fidiyah sajo doma.

Papotang-potang Ari

2009-08-27T08:48:00.009+07:00

Ari marayak pukul lima potang, lopo pe muloi ma sada-sada marbuka, tai ba ulang pangido homu kopi, inda na ilehen ni parlopoi dope i. Maksudna so marbuka, baen parsiapan marbuko do naron, ampot adong dongan na giot namabusi toge, sarabi, kolak pisang, dohot na asing-asing na. Jamanindos pe muloi sian pukul satonga lima nangkin madung ibuka ia juo ma lopo niai. Halak pe antong ro-ro sada ma tu lopoi marjugukan, songon sindokoni adong antong namanabusi parbuko, adong antong hum namarjuguk-juguk, papotang-potang ari ning dongan gorarna. Muda iangkat alak bagas si Jamanindos kue bongko tu tonga ni mejai, merdet doma ijur si Burhan mangidasa.

"Inda tarpacopat uda jom i i?" ningia ma mandok Jamanindos lao mangaligi jom di dinding ni lopoi.

"Bisa dobai mang, anggo baen jo" ning Jamanindos muse antong songon namargiri.

Jabat do potang-potang songonon, sangajo dabo marpucatan doma nida muko ni jolma i, sojia mantong dongan, gorarna pe namarkampung. Angke ngana jabat sajia parbedaanna dohot ari-ari biaso anggo na marusaho do antong ale gorarna. Manyogot leng na ke do mangguris, arian tusaba, potang doma so ro, aso antong le roa muyu inda poucat muko nai.

Inda sadia onok roma boru bujing ni Jamanindos nasikola di Medan maroban kolak pisang diginjang talam, torus ipatibalna antong di ginjang mejai. Ro pe antong danakon sangajo na Gaul parroana, inda porlu isia nabulan puaso, anggo pamakena totop songon pakean ari-ari di kota Medan, marsaraor pontong marbaju yu ken si. Buncilak mata si Burhan mangidasa, songon nalupa ia napuaso, lao mangkuling adop Jamanggutu.

"Imada uda baru parbuko da" ningna ma

"Parbuko ni ahamu dehe i, madung pukul lima sannari bo, tako naget makoruh do puasomu?" ning Jamanggutu muse lao mancelok boru ni Jamanindos sian pudi, rupana iape inda na tarorom nia na so mangaligi.

Inda sadia onok roma Jamanganggun tu lopoi, dohot semangat na get mardakwah. "Pala, bulan puaso dabo, inda tola sei modom sajo, karejo do iba songon dia nabiaso, marusaho do iba, inda nangkan ra i mijur udan sere tingon langit anggo naso sajo ina dilopo-on" ningna ma mamuloi kecek. "Ulang sai ipa lomah-lomah sajo iba niba, tai totop do ingkon nasemangat marusaho, harana biarpe sanga songondia duniaon pe porlu do ijalakan, harana anggo inda dapot dunia, susah juo dei iba get maribadah". Ijia ibuat ko panabusi ni parbuko, aha panabusi baju ari rayo, aha panabusi ni papah?". "Ulang dabo hita tiru-tiru songon si Burhan on bo, pucat songon mayat doma muko nia na puasoi, antong ngara ho ro tubagas so uajari ho naiparguruon najoloi" ning Jamangganggun muse palalu obar.

"Ah au apak jiarma soni pucat mukongku, daripada parguru apak i" ning si Burhan muse antong inda ra talu

"Bo, aso idokon ko songoni?" ning Jamanganggun marsapa songon na tarsinggung

"Aso antong inda cikar apak i, tai inda na puaso apak" ning si Burhan mangalus

"Mangua ning babamu?", "Ulang ko marsianyang da, natobang ma au, silop au non di ho marmara ho" ning Jamangganggun muse

"Ijia idaho au naso puaso ?" ningia muse palalu hobar

"Inda baen na jungada ba huida apak i mangan, cuma adong kuida sada indahan solot di janggut ni apak i, ngoni muse marmiak bibir ni apak, yakin kulala nabaru mangan dope apak" ning si Burhan lao manudu janggut ni Jamanganggun.

"Ah, ngadong bai", ning Jamanggun lao kaluar sian lopoi sareto mangapus janggut dot bibir nia.

***

TUNG-TUNG

2009-08-25T08:38:00.001+07:00

Oleh : Syarifuddin Siagian
Email : saripuddin.siagian@gmail.com

Tungtung ibaen sian hayu bulat na ilubangi satonga,hampirdo di setiap musojid di daerah tapsel-madina adong do on.

pala inda itandai hamu dope,mulak ma hamu jolo tu hita an,kehe hamu tu masojid,ligi hamuma di sudut ni musojid i.pala adong nida hamu disi gantung hayu nagodang,ningroangku tungtung mai,anggo gulung do nida hamu dursat disi,inda tungtung i,bedug dei ningkalai gorarna.taiba dongan marjanji do ulang tokok kamu apalagi pas waktu arian di bulan puaso.ra dei ikojar halak sakampungi.

baen hita sannari madung di partongaan bulan sa'ban,inda onokbe nangkan na masuk ma hita tu bulan suci Ramadhan,taringot mada au tu tungtung na adong di musojid nami i di huta.

bia langa jabat dongan tungtung nai ?.

imada...pala masuk ma bulan puaso ibo ma roangku paida-ida tungtung i.harana nangkan na modar maia baenon selama bulan puasoon.
anggo di bulan na asing,jarang do ia di tokok,angkon na adong ma musibah baru itokok ia.anggo di bulan puaso naingotan kalak disia,apalagi mandonokkon marbuko.

disada maso najolo, mandonokkon bulan puaso,marpokat ma hami poso-poso di hutai,nangkan na ami makmurkon musojid i selama bulan puasoon.

"madeges amang i...au mandukung sepenuhna" ning amang boruima,kapala desa di hutai.

malam pertama sumbayang taraweh,dohot semangat 45 berangkat ma sude tumusojid an,lalu tusi madung bahat tobang-tobang di bagasan,jadi di suru ma bagian poso-poso dohot daganak di belakang.adong bagema namanggantung di teras ni musojid i harana habis tempat.

dung salose ma sumbayang taraweh,mulai ma martadarus,di buka alim ulama di hutai ma sebagai tanda martadarus di mulai.

saborngin,dua borngin lancar dope torus na sumbayang taraweh dohot tadarus on sampe tu malam sappulu na.harana anggo inda ro iba,ra dei idokon dongan namurtad.

malam pa sabolas na,mulai ma dongan-dongan on manyirik-nyirik tu balik ni tendai( pembatas ni dadaboru dohot alak lai ).

"sumbayang do nida hamu kawan si fatimah"....ning si ALI ma.

"sumbayang ..indu bo di baris paduana, patoluon sian pinggir" ning si umar mangalus.

"marjanji ami dabo nagiot marsuo naron habis taraweh di partadarusan ni nauli bulungan"...ning si ali .

"giot do ia langa di ho i" ning si umar busema songon na mangalap -alapi.

"nalayas ma roamu diau,bope kawan songonon nida ho au,nabahatan dei umak-umak namar nazar so au jadi babere nialai".ning si ali busema.

"olo ..uboto madai..aha nazar ni umak-umak i.bunuh diri sanga pindah sian hutaon",ning si umar busema inda tanggung pangarisakna.

salose sumbayang taraweh, sip-sip ma si ali kaluar sian musojid i torus mambelok arah tu parwudu'an an,baru mamintas tu topi dalanan.
lek gobak ma songoni abit karung na,lalu ma ia tu partadarusan ni nauli bulung an.

"e eh...udak ...giot tu dia do udak i",ning si maryam ma....harana tarparogok kalai di gang ni bagasi.

"mangaligi etekmu...disi do ia nida ho"...ning si ali ma laos pature-ture abit karung nia.

"inda pe ro udak"...ning si maryam ma dung ipareso ia tu bagasan.

juguk ma songoni si ali di golap-golapi painte si fatimah.

sian musojid an tarbegema madung mulai alak martadarus,nauli bulung pe mulai ma martadarus.

anggo si fatimah inda pe na mungkap mukona.ma marsak sajo roa nisi ali.

kehe au naron tu musojid an,aha ma udokon disi umar,ning roa nia sajo ma.

sampe tonga borngin ipainte ia,anggo si fatimah inda na marnaro.

akhirna mulak ia tu masojid an.ipa podom-podom ia ma di teras ni musojid i.

kira -kira jam 2 tonga borngin,mulai ma markumpul tu lambung tungtung on giot manokokna.

tibo ma waktuna sahur get itokok ma tungtung,mamago tokok-tokok na.
ijalakan-ijalakan inda tarida.madung adong bage nagiot mambuat batu giot baenon panokokna.
akhirna tarpaida ma , hape nai parbantal nisi ali do tokok-tokok nai.

indabedabe.....baen goyakna roa ni halaki,di angkatma si ali tu keranda ( tempat ni alak na mate ) na adong di sudut ni musojid i.
di tutup halai ma paten-paten dohot sajadah.

sekitar jam tolu mulai ma i tokok tungtung on.inda tanggung simburna,itarik bage dei mik ni musojid i ipadonok tu tungtung on anso martamba kuat sora na.
adopentong...mulaima marsibalosan dohot musojid naibaribai songoni juo musojid nai jului.madung satonga jom anggo tungtung on na torus dope i dakdak.

imantong ributna halak disi,anggo si ali umpe tarsonggot.

sodar ia, baen na sumbayang subuh do alak,iambang ia namanyumbayangkon ia.
golap songoni nida ia,taiba perasaan nia di bagasan musojid i do ia.iligi ia tu kanan sompit,iligi ia tu kiri sompit,akhirna iangkat ia tangan nia tu gincat,bo mangkat antong tutup ni kerandai.

baen songgotna roa nia,sanga aha so dibagasan kerandai ia,mangangguk doma ia lao mangalumpat siani.

bo rupa alak nagiot sumbayang di musojid i pe tarsonggot buse.iambang kalai na adong disi namate mangolu mulak.marlojongi buse sian musojid i.

adong bayo nagiot bahang ,ma mambaca innalloha wamalaikatahuyusolluna alannabi , irambankon ia mik nai ,terbang ia sian i.

bo... baen na rap tarsonggoti antong,akhirna itokok buse tungtung.

heran kalak...nabaru itokok dope waktu subuhi,ma mangkuling buse,marroan kalak tu musojid an.

keuntunganna.....inda tanggung rami ni halak nasumbayang subuh waktui.

akhirna rap mar sipantataan ma songoni dung habis sumbayang subuh.

SELAMAT MEMASUKI BULAN SUCI RAMADHAN 1430 H.SEMOGA KITA MENJADI HAMBA YANG MENDAPAT RAHMAT,MAGFIROH SERTA ITKUMMINANNAR.AMIN.

Marhaban Ya Ramadhan (Satorusna)

2009-08-25T08:30:00.002+07:00

Tu Koum-koum sasudena, olope na songon natarlambat, hami mangucapkon "Marhaban Ya Ramadhan 1430 H,

Mangido Mohof Lahir Dot Bathin

Mudah-mudahan ilehen Tuhan tai dihita sasudena Umur, Kekuatan, Songoni Rasoki na Halal untuk bisa hita mar amal-ibadat di bulan na Muliaon, Amin Ya Robbal Alamin.

FAS Nasution & Keluarga

Marhaban Ya Ramadhan (Lanjutan)

2009-08-10T09:36:00.007+07:00

MARPANGIR

Danau Aek Godang Panyabungan

Ning Rosulullah SAW (Saro jitana) : "Sugari Iboto Ummatki Sanga Aha Na Adong di Bulan Romadhoni, Pasti Giot ni Ummat ki Sugari Angkon na Romadhon Dei Ari-arion".

Ita tindo jolo carito najolo on :

"Atiha di Mandailing Julu najolo dompak daganak iba markisar taon pitu puluan i" ning Japardamen muse ma mamangkal carito. Pala donok ma bulan Puaso (markisar sapoken nai doma), nabahatan mai karejo ni halak di kampung. Naso unjung mangontang anak yatim mangan pala bulan-bulan naasingna, mangompoti bage mai mangontang mangan anak yatim, iambang kalak najolo i roangku bulan puaso maia na porlu mangan natabo anak yatim i dot di bulan ari rayo. Padohal di ari-ari naasing pe salain ni i, leng namale do baya anak yatim i. Tai ba dongan marsitorang do, onpe nadung nadegesan mon, harana ipadaion pancarian niba saton i di anak yatim olope nasakali mangan maia tai margule tatak (manuk / pandok ni daganak), nga ale roa muyu antong koum-koum?.

Mur donok bulan puaso, mur ma ribur muse mai di kampung, naso unjung-unjung manyapu alaman, mangompoti mai isapu santak tu taruma, diar tokok ulu di tiang tongai, pokokna taruma angkon na isapu so ias. Padohal Pala ari-ari biaso, marnambur bage doma pat niba pala get ke tubagas baen pot-potna dot jarangnya isapu. Tai boto hamu anggo sakalion likek doma alaman ni bagas i baen iasna. Songoni juo dibagas, muloi sian tataring santak tu tonga an na licin mai ibaen, isalutapkon muse mai tu pantari katapang so marmiak, itamba muse dope dot lilin. Singgo longang iba dibagas, tarsulandit pala mardalan.

Pala di alak si partani antong, na ipaspas juo mai karejo so salose karejo sude, biasona mangordang mai disaba manyuan kacang goreng. Markisar dua poken tongkin nai puaso, marbabo kacang mai disaba torus modom di sopo sabai painte-inte potang ari. Pala mangguris antong na i tonggor mai (ari-arion iguris sobahat aekna), harana pala masuk bulan puaso, ra dei mar tolu ari maradian dei jolo di kampung pasonang-sonangkon torus maribadat.

Anggo donganku si Caman na asik musei mai pature Arsikan*) nia di muara ni Aek Lilian an, so adong siloon pala dung siap taraweh, biaso dapot mai incor, sulum, aporas, dot siduri (siating) imai gule pala mangan andostorang.

Markisar opat ari nai so puaso, sada-sada marroan mai halak sian ranto. Pala binege ma tuter ni Sibualbuali i sian nadao sanga kalakson ni ABS i, ilojong mai tu dalanan manyambut na ro sian ranto, dapotan mai non iba roti olope nasangkoping maia. Icubo muse mai parsiajaran na disikola Rindangan ima marbahasa Malayu.

"Aku mangan cabek aku da, ciak-ciak lala aku, dapat aku-aku" ning si Mardin mai mandok babere nia naro sian ranto na sabaya dot ia.

"Mamam indannya!" ning iba muse mai mandok anak si Muldop na haor marmayam di alaman i ikojar kojar umak nai. Ning roangku songon na bebas ilala daganak i baen lapangna parlojong-lojongan di kampung inda songon di Medan antong sompit.

Tolu ari nai so puaso santak tu cogot ma puaso, marrami-rami muse mai halak kehe ziarah kubur, muloi ma sian margotong-royong halak sakampung hinggo sada-sada keluarga manopoti simatobangna sanga ompungna atope koum kahanggi nadung parjolo tu adopan ni Tuhan tai. Mambaca Yasin, mar takhlil mai halak dikuburanan ari-arion, inda dong mantakna, parkuburan i pe sude ias mai isapu.

Poken pangabisan di Kotanopan (pandok ni halak najolo doda dongan), manabusi bante mai di lombang, ioban mai tu huta. Manombo antong marpantak di kampungi, ikoyok mai sada lombu sanga orbo so adong gule andostorang tongkin nai. Muloi muse mai muap ombu-ombu na isaok sian bagas nasada tu bagas nasada, merdet mei ijur niba baen malena.

Ro muse mai pangumuman sian musojid mandok gotong-royong, ipaias mai musojid muloi sian bagasan santak tu kakus, ipasang mai gaba-gaba di pintu gerbang di kampungi, torus ikobetkon mai abit namartulisan "Marhaban Ya Ramadhan, Hormatilah Orang-orang Yang Berpuasa".

Cogot ma puaso, sadarion bahat mai na kehe marmangan-mangan. Deba antong mardahan di topi ni Batanggadisan, sadebana antong ioban indahan sian bagas tu jambatan na diginjang aekan. Mangan mai marrami-rami, lao mar tata lao margiri.

Get masuk ma Kotu Ashar, marrami rami mai bujing-bujing dot inang-inang, marpangir di Batanggadisan. Gorarna peantong halak najolo, ngana dong dope antong baya sampo masoi, ibaen halak mai sian arambir, topung, pandan musang, bungo-bungo, dohot na lain-lainna. Aupe inda na aru mangarti au ba dongan, harana najolo antong karejo ni adaboru dei. Mar si irpaskon obukna mai, iporo dot salin maridi, mar sianggoan obuk muse mai bujing-bujingi sanga pangir nise na uskusna.

Dung pindah kami tu Mandailing Godang taon lapan puluan i, jarang doma tarpaida diau namarpangir nasononan, tai asing muse do cara marpangir dison. Alak lai adaboru marrami-rami mai tu Parjek (Parjegangan) najolo di Aek Godang, marmangan-mangan torus marpangir alak lai adaboru. Anggo amang ni danak dot inang ni daganak marsipangiran, antong nabiaso dei, madung sundatna mai. Tai anggo on ba ngada, bujing-bujing rap poso-poso marpangir, sanga baen namalosok pe ayah ni bujing-bujingi mamangir boru niai antong inda uboto. Sanga nadung ipaido izinkon di poso-posoi pe di amang ni bujing-bujingi so ia mamangir boru nai, inda mangarti iba.

"Alaaa, tai homu pe najolo ioban komu do boru ni Ompung Jalumpat tu Tobat Marambe marpangir, aso nga diaek musojid ipangir komu, songon naso unjung sajo homu maposo" ning si Rumbuk mandok Japardamean.

"Ah, inda uingot bai be, lupa-lupa ingot ma au i" ning Japardammean lao jongjong sian jugukan niai, roangku ila roa nia.

***

*) Di Mandailing Julu adong sada cara manangkup gulaen idokon arsikan. Pala adong tano na hadaratan, tai bisa do imasukkon tusi aek Batanggadisi, i tobot mai, ilata paten dot durame naget bucuk. Isusun batu pandindingna sabariba, igonang mai, baru irompoan diginjang nai dot bulung karangbir, durame, soni dot bulung ni tiolu na ioban sian aranganan. Muara pas dei adop batanggadisan. Pas tonga borngin pala bulan puaso sanga manyogot iarsik mai, itaon lokah ngon muara nai so ulang lari gulaen i.

Marhaban Ya Ramadhan

2009-08-03T15:12:00.011+07:00

Marngaok

...

Ari hira-hira pukul pitu (pitu) dope manyogot, Jamanombeng madung juguk tondo martungkol isang di pantil-pantil ni lopo ni alak si Gundur i. Pahae-pahulu mata nia mamandang motor namarlewatan, manombo ngangang bage songon naso manyodar. Sanga namangetong motor na lewat pe Jamanombeng sanga baen naso jungada mangida motor inda binoto. Bele-bele asyik songoni, roma Jabolbol tu lopoi, tarpaida disia juguk tondo Jamanombeng, torus marsapa ma ibana :

"Aso do bongak-bongak ko Jamanombeng?", "non mamolus naso nida ho muse patureon ni dongan"

"Inda na bongak au da ale dongan, Sadarion sabolas Sya'ban ma, inda jabat tolu poken nai puaso muse ma hita, songon na taraso ma ulala angin-angin ni puaso i dabo"

"Bo, tai isajoma painteon ta namangoluon, bulan puaso, bulan na paling mulio ibagasan sataon, bulan na spesial bulan maribadat, tambana bulan na patabo-tabo'on, ubege-bege caritona nagiot mambungkas muse ma on tobat godang, so adong tongkin nai gulaen di poken pala dung masuk bulan puaso.

"Imada, iba pe binoto do dabo satontang tusi, tai biama, on songon namarngaok-ngaok muse ma ulala boltokku, mungkap muse ma maagku, padohal anggo bulan-bulan na lain inda na unjung marngaok".

"Inda get puaso au ningmu nanga, so jelas!!!" ning Jabolbol mandok Jamanombeng songon na tar holas.

"Baen jolo kopi paet dua umak Gundur!!!" ning Jabolbol muse mandok parlopoi.

"Kopi susu ma langa dongan pangido, mur martamba mungkap muse ma naron i maagku on" ning Jamanombeng mandok Jabolbol.

"Madung ra au antong manggarari kopi paetmu, mangido susu doho, tai di bagasan adong do roangku susu, inda manyusu ho nanga borngini".

"Iambang kodo ambeng au 'ntong manyusu, ulang ko se roncam dongan le, madung rap tobang be ma ita, gaor kopi mi so minum kita, inda pake sigaret dongan on, pinomat Gudang Garam sabatang?".

"Aha do so igaor kopi paet?, pusuk dot imbako mu madung habis nanga?"

"Ah, anggo timbako pusuk api-api nadung ayam-ayam dei sian najolo, cuma pala Gudang Garam pot non mur soring soraon" ning Jamanombeng lao pature juguk nia.

"Manombo dabo sangajo madung maila ma ilala, paompu ale madung dua sian anakta nagodang nai, on nagiot ro muse ma parumaen, iba na leng songonon dope jungalna" ning Jamanombeng. Ibalun ia muse timbako nia torus ipatik ia pangidupan, iombuskon tu ginjang torus isirup kopi dua tolunsirup, isandanrkon ia ulu nia lao manatap tu nadao, torus ipalalu ia muse ma marcarito.

Dia Aek Saba dabo najolo marbuka dei lopo olope bulan puaso, lopo ni umak Bustak di topi ni aek an, tai sannari ngana dong ubege be harana adong parjanjian, : "Ise-ise namambuka lopo dibulan puaso, inda itarimo nasunatna".

"Ngoni, taringot di lopo namarbuka nangkin, sonjia muse dei ibaen antong manutupna?, na piga meter muse dei ijalakan palastik panutup ni lopo nibai i? ning Jabolbol lao marngkardak.

"Marjagal do maksudna dabo, inda itutup dot palastik, na bongak maho ale" ning Jamanombeng

"Inda itarimo nasunatna nangkin songonjia muse?" ning Jabolbol songon na penasaran

"Pala mate iba, inda ro halak pas martolong, hum na wajibna sajo maia na ro halak, misalna, paridi iba, manyumbayangkon iba torus dot mangkuburna. Songoni juo pala pabagaskon iba, hum namarikahkonna maia naro halak".

Pala poken di Panyabungan, ibalakang beskop Tapanuli najolo bise dei marbuko iba arian, anggo sannari ngana bisa be. Isada maso jungada mai songoni di Pasar Bawah Kotanopan, ibalakang ni Parbantean i, utungkus sate dot lomang songoni dot cendor, upas-pas sada-sada au disi, bo rupa ro polisi manangkup kami, amang.... naila mada, ibaris mantong hami roamu di tonga pasar i, itonton kalak lao mangankon. Di Panyabungan bulan puaso nalewat jungada juo mei songoni, uida mai. Adong sada anak boru mangan sate di balerong i (mungkin na marhalangan), bo rupa tarpaida juo di Polisi, hona gusar anak borui, naila ma uida roa ni anak boru i.

Ah, au dongan na dao juo ma ulala ujajok tano di ginjang duniaon, muloi sian Medan, Padang, Pakanbaru, Jakarta, torus tu Batam, inda adong daerah songon di ita on ketatna na mar agama, on mai naidokon ni halaki roangku "Madina Yang Madani".

"Pala tu sabaan iba le ke ari-arion, curiga muse mai halak, ibagas ale nga bisa marbuko harana daganak na puaso do sude, aropku sataonon ipaksa doma jolo puaso on, nga ale roa muyu Jabolbol?" ning Jamanombeng lao mangaligi tu samping.

Bo, rupa inda na disi Jabolbol be, nadung ke maia tu bagasan lopoi manonton tipi, na sado-sado Jamanombeng do rupa namarcaritoi, gakku ingoran ia carito ni Jamanombengi. Sapala mangaligi ia tupudi, mangkair kalak nasalopoi paida-ida Jamanombeng.

***

Si Sakban Lahirna di bulan Sya'ban

2009-07-23T14:54:00.004+07:00

Masojid Musthofawiyah Purbabaru

Gorarna pe Mandailing (MADINA), inganan ni Pasantren na marbaris muloi sian Siabu santak tu Muara Sipongi. Halakna pe 90% na marugamo Islam, tontu saotik bahatna muloi sian gorar torus tu bahasa nadung bahat do iangkat sian Arab khususnya na mar bau Islam. Jadi nangkon jabat heran, anggo manjalaki halak kita tardokon do namomoan anggo di ranto. Umumna gorarna marbahasa Arab itamba marga di balakang nai.

Jadi umbaen ni i, muloi sian gorar-gorar ni Nabi santak tu gorar ni bulan santak muse gorar ni ari na sian Arab madung dodasdo ipake halak Mandailing jadi gorar ni parkaisonna (pinomparna).

Si Sakban, bararti na lahir di bulan Sya'ban mai, songon bulan na sannarionan. Torus tu si Romodhon (mudah-mudahan sampe ita sude tu bulan i da), torus muse tu si Syawal. Manombo ibaen kalak Syawaluddin (makasudna Agama na di bulan Syawal mai). Tai boto hamu dongan, manombo ibaen kalak juo parsianyangan, i simbilkon dongan jadi Sawaluting. Ah dongan, roangku da baen naso iboto nia dei artina. Dzul Qo'dah pala lahir di bulan Pangapit, Dzulhijah pala dibulan Oji, manombo ibaen kalak bage si Arofah pala pas ari nai halak wukuf di Padang Arofah. Muharram, madung jelas antong i pala lahir di pangkal ni taon. Pala lahirna dibulan Syafar dibaen kalak juo mai gorarna si Syafar, inda Syafaruting ba. Rabiul Awal dot Rabi'ul Akhir, biasona ibaen kalak gorara si Maulud, harana baen na bulan Maulud i. Jumadil Awal dot Jumadil Akhir pe dodas juo dei ipake dongan, apalagi antong pala lahir di bulan Rajab, nadung pasti mai ibaen kalak gorarna si Rajab.
Gorar-gorar ni ari pe soni juo, sian Arab dei asalna : Akad, Sinayan, Salasa, Roba'a, Kamis' Jumahat, Sabtu. Pala Ari Akad poken di Malintang, Ari Sinayan Poken di Maga, Ari Salasa Poken di Kayu Laut, Ari Roba'a poken di Laru, Ari Kamis poken Panyabungan dot Muara Sipongi, Ari Jumahat Poken dijia? Ari Sabtu di Kotanopan.
Muda goar ni Nabi antong, ulang be madung pasti mai ipake sude muloi sian Ompungta Nabi Adam AS santak tu junjunganta Nabi Muhammad SAW, na i pake ni dongan mai sude mambaen gorar ni pinomparna.
Olo'ntong tehe, deges madai, harana antong Gorar on doah do dai. Muda ibaen ia gorar ni anak nia si Yusuf, doahna antong so ganteng mai songon nabi Yusuf. Anggo baen na kotak mukona antong madung surat-suratan dei sian najolo, na ponting mandoah. Songoni juo pala ibaen gorarni pomparanna si Mukmin, anggo baen na karejona mangkaremuti, mungkin baen na so makbul dope doah nai. Pot cogot kaduan ibalikkon Tuhan tai tu roa nia tu dalan na denggan ise na sanggup manghalangina? Nga ale roa muyu koum koum?.

*****

Isra' Mi'raj (Na i dokon Hamba Allah)

2009-07-21T10:52:00.006+07:00

Maha suci Allah, yang telah memperjalankan hamba-Nya pada suatu malam dari Al Masjidil Haram ke Al Masjidil Aqsha yang telah Kami berkahi sekelilingnya agar Kami perlihatkan kepadanya sebagian dari tanda-tanda (kebesaran) Kami. Sesungguhnya Dia adalah Maha mendengar lagi Maha mengetahui. (Surah Bani Isroil ayat 1).

Jadi, na i maksud hamba Allah na didokon di surah Bani Isroil na di ginjang ima junjunganta nabi Muhammad SAW, na ipardalankon dohot jasad songoni ruh ni ibana muloi sian Mokah santak tu Palestina, santak muse manaek tu langit.

Tai hita on sasudena pe didokon juo dei Hamba Allah asal cukup syaratna, songon pandokon ni Ulama adong boto hamu sambilan (9) syaratna, :

Menundukkan Kepala. Muda mardalan diginjang ni duniaon, suang songon halak na mijur sian tangga na lampas, pala dung mijur suang muse tano na idegon on tano namar gelombang. Jadi angkon na adop toru do so ulang susat, soulang muse tarsoltu pat niba. Totop unduk adop toru, inda logang tujae tujulu, inda muse jongang suang songon na hona sibongang. Sonon ma pardalan na i contohkon ni Nabinta Muhammad SAW tu hita.

Bersikap Lemah Lembut. Ulang sai naget purpar obar niba, ulang sai na giot goyak sajo roa di halak, ipabahat sobar di ginjang tano ni Tuhanon. Disada maso, ro sada halak masu tu Masojin ni nabinta (Masjid Nabawi) di Madinah, bo rupa marsitijur bayoi tu tiang ni masojid i, goyak roa ni sahabat, tai ro Rasulullah halak na muliaon, ipaias ia dot tungkot nia, iapuskon ia muse miyak uskus tu tiang i, hinggo sampe sadarion adong isi sada tiang na salalu iapuskon halak miyak uskus.

Sholat Tahajjud. Anggo on sangajo tarpayah dalanonkon bagi halak naso ra, apalagi angon nangot tonga borngin, borat mada mata niba. Ibaen le beker, ipamate dei mulak pala dung mangkuling, tai on ba targan so biaso do'on, anggo jabat do dung somal Insya Allah na tarsonggot dei dohot sendirina. On ma dabo sada amalan na godangna disamping ni sholat Maktubah. Muda hita ligi Rasulullah SAW, pala ngot ibana tonga borngin, ipir-pirkon ia mai aek tu muko ni 'Aisah so ngot modom, so rap sumbayang. On pe dongan patut doda ita tiru on bagi hita alak lai. Tai bagi hamu adaboru dongan anggo naso iboto hamu dope sanga songondia parroha ni amang ni daganak ni ulang dongan baen soni, non muruk ia tu hamu. Jadi sondia doma carana muda iba nadung markeluarga? Mungkin songon pandokon ni gurungki ma soni, ibaen parjanjian lao modom, sanga ise naso ra ngot, i pir-pirkon aek tu muko nai.
Selalu mengingat akan mati
Sederhana Membelanjakan Harta
Menjauhkan diri dari yang menyekutukan Allah
Menjauhkan diri dari Perkataan Yang Bohong
Mau Menerima Pengajaran dari siapapun
Selalu Berdo'a kepada Allah SWT

Muda dung cukup na sambilan i, bisa juo mai hita on sasudena di dokon Hamba Allah, tai pala urang dope Makhluk Allah dope gorarna i.

Manindo Tu Jolo

2009-07-13T10:19:00.004+07:00

Malapat lapat baya ria-ria
Naompas tu batang koje
Ulang lalat dongan manjalaki dunia
Pikirkon do sibuk ingkon namate

Layang layang terbang melayang
Ditoru nai alak namanyabi
Muda masuk dongan waktu sumbayang
Tinggalkon majolo karejo mi

Panyabungan tu Kotanopan
Antara nai Purba Lamo
Duniaon porlu iparsitiopan
Akhiratna antong Ulang sanga Mago

Bulu Parapat Baen Tulila
Bulu Tolang di bagasan Kadangan
Muda lalat kita baya manjalaki dunia
Pasti manyosal di adopan ni Tuhan

Muda maragat di tonga harangan
Ulang lupa maroban Taguk
Muda lalat kita baya manjalaki sinadongan
Inda dong ubana ita nasongon namartanduk

Manangkok baya pasar di laru
Manuat dalan tu Tambangan
Inda dong sudena nangkan nalalu
Anggo lalat marangan-angan

Unte Manis Baya Di Kayu Laut
Obanon Tu Batunadua
Pala Ro Baya Si Malaikal Maut
Inda tardokon naget maradaboru dua

Manangkok tu Roburan
Tarpaida Sorik Marapi
Dung Lalu Dope Saulakon Tu Kuburan
So baru Taraso Milas Ni Api

*****

Na Muapan Do Ulala

2009-07-02T07:44:00.007+07:00

"Pala sompat ko non kei jolo tu sabantan da, simprot jolo emei, ro au non parpudi, palalu tabusi ubat na non di lopo ni alak si Porngasan!", ning ompung Jamanduda mandok si Bundong di lopo na di topi dalanan disada maso manyogot-nyogot.

"Jiarma ompung, mangan jolo satongkin tu bagas, so marangkat au!" alus si Bundong lao manggarari kopi nia salao kaluar sian lopoi.

Dung salose mangan, ibuat si Bundong simprot, ibuat ia muse epeng, torus marangkat tu lopo ni alak si Porngas manabusi ubat ni eme, soni sigaret sabungkus.

Di hutai dabo sangajo si Bundong sajo mai na dodasna isuru-suru halak pala adong karejo natarborat, imaia i pangomoan nia, muloi sian manajak, manaru eme, manyangkul, manyimprot dot na asing-asing na. Si Bundong on halakna na togos, songoni na ringgas, ima so jopna roa ni halak manyuru ibana.

Taringot di Ompung Jamanduda, ibana on dung lobi ma opat taon nadung bariba tangan do, tai sondia hangoluan di namar kampung, angkon na leng markais juo do baya so bisa manuduk. Jadi biarpe nadung tobang ompungon, leng na marsaba juo dope soni tu na mangguris. Tarlobi-lobi muse saba dot gurisonna nadaon sian hutai.

Jadi imada, marangkat juo si Bundong maroban pompa soni ubat ni eme, marpalan-palan manangkok, manuat, mangarereng tu saba ni Ompung Jamanduda an. Mulbas kodok si Bundong satangandalan dope pardalanan, natangkok pe simulak anjing, rupana tangkokan dope dalan tu saba ni ompungi, tai bia bahenon, madung di olo'on nangkin, tarpaksa juo marangkat.

Markisar dua jom, lalu ma si Bundong tu saba ni Ompung Jamanduda, maradian 'ntong si Bundong di sopoi marongok satongkin baen lojana didalan. Siap mangidup sabatang, muloi ma manyimprot eme si Bundong di sabai. Habis satonga teng (tangki), inda tahan be ilala si bundong lojana, kasidunganna dapot ia akal. Iboja-boja ia sabai so pas songon nabaru karejo manyimprot, siap dung i, isimprot si Bundong dinding ni sopoi ni ompung Jamanduda i, baru i puntoling ia modom painte-inte ro umpungi sian huta. Mungkor dot merdet doma ijur bari nia di las ni ari i baen sinok ni namodom, sampe inda sodar ia madung kotu ari.

Inda sadia onok tong roma ompung Jamanduda tusabaan, tarida disia madung modom si Bundong di pantil-pantil ni sopoi, torus ingoti ia:

"Madung siap do nanga simproton i mang?"

"Madung ompung"

"Bo, na isar doho manyimprot tie?"

"Uompot nangkin ompung, dompak so las ari i"

"Ooo, imada, naisar ulala, ubatna pe nadegesan roangku, namuapan do ulala torus tu sopo on".

Aso'ntong nga muap, angke isimprot si Bundong sopo ni ompungi, hum naget paoto-oto'on halak sajo, apalagi sonon, ompung-ompung, ulang dongan ita tiru on.

Mandehe

2009-06-10T13:56:00.002+07:00

Oleh : Saripuddin Siagian
email : saripuddin.siagian@gmail.com

binoto hamu do kawan mandehe? harana inda uboto sanga aha bahasa indonesiana.tai mendekati tu kata-kata MERABA.mencari ikan di sungai dengan mempergunakan tangan.

pala libur najolo sian purba,baik ia partongaan taon sanga pe marayak puaso,anggo mandehe on jarang do di lewatkon.harana inda tanggung asyik na.songon pandok ni tobang-tobang SANTAMPUL DUA LANCIM.

dapot gulaen,maias buse kotoran nimata.

aso songoni?. harana dabo di hamian nangge dong kamar mandi,jadi anggo giot manyapsap sangape giot maridi angkon na tubatang aek an do.

pala inda silop au sekitar kalas lima ( sederajat kelas 2 smu ) di purba,merayap ( libur) ma hami sikola dua minggu dung salose ujian partongaan taon.

jadi songon dia namandung tradisi di purba,pala libur sikola,mulak kampung ma sude,baik ia POKIR na ataupe PATAYATNA.

jadi pala mulak ma hami sian purba,ami doma penguasa di hutai,harana poso-poso nadisian manopi sude,harana mabiar kalai, di pardongan dor kalah saing,di alo inda taralo harana adong cilekna,manggombal pe kala,harana adong ningkalai pelet na pala nasian purbai.

jadi selama dua minggu, par purba doma penguasa di hutai.

tar tolu ari dung di huta,di pio dongan-dongan ma mar mangan-mangan tu saba an.

" bo..ita do,..ahama gulena?" ning si mujur ma.

" gule dontong arsakmu,ita jala tu aekan" ning si bachan buse mangalusi.

rap ipakumpul ma sanga aha na porlu,mulai sian pariuk,kuali,dahanon dan lain-lain.

sekitar jam sappulu manyogot turunma hami tu aekan adong onom kalak.

sambil donganon manjala adong buse ma dua halak na mandehe,harana anggo na ditoru ni galogai sanga di toru ni apari( hayu na marumbak tu aeki ) inda tarjala.jadi tarpaksa idehe anso kaluar gulaen nai.

lagi asik na na manjalaon, marbisik ma dabo si bachan.

" na pas ma dongan na indunan songon Hemamalini "obuk na ginjang,bontar buse" ningia lao pa monyong papangan nia adop nai dokon nia i.

"anggo ho da..unjung langa nida ho hemamalini sian pudi dompak songoni" ning si mujur busema lao mangaligi.

rupana adong anak boru najuguk di batang aek i.

"sannari dabo,inda baen na unjung tarida,tai sakirona ipatidaon ia ningroangku inda aru dao bedana" ning si bachan buse mambela diri.

" anggo iba songonidei,idia-dia pe anggo adaboru tarsarupo dei,bla bla bla" ning si mujur ma songon na ceramah.

rap mangkardak doma ami pabege-begena.

" marsipan kamu dongan...inda dong dapot namandehen on bo " ning si bopek ma songon na holas.

" dia mantong adong dapot ko i,matamupe adop adun do" ning si rohmat busema sambil manjala.

" pala dabo... tar itapadonok tusi saotik,harana sada-sada ia do di si" ningku buse mantong,songon na penasaran sanga ise dei.

sambil torus manjala dohot mandehe,sambilma hami padonok tu tapian on.

" maison na godangan..." ning si bopek madabo marsurak.

" BITISKU DEI...." ning si bachan tarsonggot.

" angkentong..... tangan tu dia mata tu dia..." ning si mujur buse ma uyom-uyom.

dung donok ma tu tapian on , anggo si bachan na bolnang sajo ma mata nia,harana anggo manurut pandapot nia inda dong ubana songon bintang film idola niai hemamalini.

" aso do langa so sain ribut kamu daganak",ning anak boru i ma lao manaili tu belakang.

" ALLALE BAYAAA...OMPUNG NISI LEMAN DO RUPA" rap ninna be lao erer mandao sian i.

" angkentong udokon do..." ning si mujur ma lao senyum-senyum pura-pura lao paias jala.

" manungkiri homu daganak tie " ning ompung si leman ma dung nida ia hami giot kehe mandao.

" painte so udokon tu inanta muyu da " ningia buse songon na mangancam.

"inda ba ompung " biasona di lambung batui nagodangi bo nabahatan ikan siruan" ning si bopek ma lao maripas-ipas kehe.

" imada ulang sala niat pala mangkarejoon sanga aha" ning si mujur buse ma mulakkon dung dao sian i.

" imada ...pas do rupa songon nai dok ni rosul tai ", innamal a'malu binniat.ningku busema patopek obari.

akhirna rap marsipan ma songoni , sampe lalu tusabaan.

" IAMBANG LE BAYA HEMAMALINI,AMPENGAN OMPUNG SI LEMAN"

rap ninna be ma lao mangaum indahan sambil martata.

sekian.

MANANGKO LANCAT

2009-06-09T09:08:00.002+07:00

Oleh : Saripuddin Siagian
e-mail : saripuddin.siagian@gmail.com

Disekitar taon 80 an marningot ma iba pala musim buah-buahan inda tanggung simburna,hampir sarupo dohot na musim manyabi isaba.

harana pada waktui adong bagedo idokon tobang-tobangi gorarna taon godang.pala topek ma waktu i , simburan doma halak di kobun daripada di huta.

Sannari inda unjung be ubege,apakah harana iba nadao sian huta,sanga buah-buahani inda ra be mardanon,ataupe mago buahi harana halak inda marsyukur tu tuhan.wallohu a'lam.
najelas madung nalolotan inda unjung be ubege adong taon godang di hitaan.

anggo inda sala au,najolo pala topekma taon godang,hampir sude tanam-tanaman marbuah,mulai sian tarutung,rambutan lancat,manggis,manombo marsak doba iba sanga dia nagiot panganon.

halak pe simburma marjago di kobun,adong na marjago tarutung,mambaen lampu ni lancat,mambaen otor ni rambutan,dohot manjagoi alak namarjago.

ningroangku anggo masalah carito marsyukur tu tuhan,ustadz tai ma pa topekna,au judul na diginjangima songoni bagianku.

pas najolo taon godang di hamian,mardanon mantong lancat,tarutung ,manggis dohot rambutan.jadi baen waktui iba apaoranna,nahum taboando mangan buah naitangko daripada naipangido,imada ningroangku sibolis nai.

disada maso atiha marjuguk-juguk di jambatan,inda binoto sanga ide nise parjolo,tiba-tiba masalose parpokatan nagiot manangko buah saborngini.

"pala tu tarutungan kita kehe,adongdo disi alak namarjago,lagi pula tarutung nape si dingkil dei" ning si BOPEK ma mamulai rencana.

"pala tuparrambutanan,adong disi anjing,lagi pula rambutanna nadao-daoan tu ujung,naron manabu ita,bonggal sahuta".ning si PAETbusema manamba usul.

"inda songoni be, tulancat nai baribai ma ita kehe, taiba angkon na hati-hati do,harana di belakang bagas ni amang borui dei,dungi nai duriandei batang naii,dungi tarbahat porkisna,harana baen namanisi lancat nai,ningku busema".

akhirna sekitar jam sambilan borngin putus ma parpokatan nagiot manangko lancat tubaribai.

palan-palan mantong kami lao manopotkon batang nai.

"nabahatando kawan durina ning sibopek ma lao manjama duri ni salak nai pakuon di batang nai".

"ja tanda do naroni,anggo inda duri nai marapu,tangan niba,ning si paet musema pa beteng -betengkon".

jadi baen au waktu i nahummenek dohot si bopek,ijulang si paet ma ami lao manjata dangka ni lancaton.

dapot si bopek mantong parjolo dangkanai,baru ro buse au di pudi nai,anggo si paet, tinggal ma ia di toru mangaligi-ligi halak.

"mabahat dapotko..." ningsi bopek ma tuau

"saotikan dope,inda aru uida dabo sanga dia nahum lamun,nagolapan".ningku antong.

"ah..ondei tusibo,ningsi bopekma lao mambuat lampu nilancati.itarik ia sumbu nai,bo torang antong".

ampe baen sibukna nangkin namanarik sumbu ni lampui , ma tardege ia sarang ni ararongga.inda bedabe...sarsar porkis,tup tap tu pati.pupu manampari.

ligi jolo ucok sanga ise do nadi belakangi "ning amang borui ma uge".

"turun kamu....! roma ompungi ning si paet ma dabo.

"ise dei...??? madung ning ipari buse sian bagas".

harani biarna tardapot.maradu ipas ma hami turun dohot si bopek,dung lalu tu toru rap marlojongma tu jambatanan.osa-osa be doma.selamat..rap ninna mantong.

ancogot nai, ro ma ipari tu bagas.

"o lae, ro hamu jolo tuson adong dokononku ning ipari mantong".

"bo aha do na masa,tumben kamu ro tuson manyogot ni ari on,ningku antong".

"imada,borngini dabo adong manaek lancatta nadi belakang bagasi".
"a ah nabarani alak nai i , dungi inda dapot ko alak nai,gari ikatapelko dei".ningku mantong,sebagai bentuk prihatin.

"imada lae...lalu au tusi mamarlojong kalak nai,jadi inda uida jabat".

"cuma....ning iparima asok.

"ahadei ...ningku busema pura-pura serius.

dapot au solop nai ditoru nilancati,dung upareso pas kuida songon solop muyui ning ipari ma lao pakaluar solop sian tas niai.

INANG GOINANG,INDA TANGGUNG ILANA.

MARANGKA MARANGGI

2009-06-03T08:07:00.005+07:00

Atia juguk sada-sada au di karosi nai jolo bagas tai ale dongan-dongan pangaranto, ima di ari ahad na solpu antargan so kotu magorib, inda binoto arani sanga aha, taringot au atia dompak menek di hita an. Maso i umurku lima taon dope, inda pe sikola, hum na marmayam sajo maia tohap niba manyogot na potang. Somal dei dohot dongan-dongan sapangkek niba rap mandehe di batang aek an, mambuat apundung atope manggis tu arang-karangan nai dolok, mardopang-dopang pake sinapang bulu pelorna mutik ni jambu, marbandol di toru-toru ni batang ni kojean, palanga marsimonjap di potang ni ari. Arani tagina na marmayam i rap dohot dongan-dongan, dodas dei lupa iba sumbayang kotu luhur dohot kotu asar. Umak niba pe pupu dei manjalak-jalaki iba tu jae-julu, oni dung pasuo matubek-bek mei arani sasadari iba na maor i. Ambaen milas ni roa ni umak niba, bolnang mei mata nia tu iba, oni i sibitkon ia muse mei iba, palanga i puloskon ia pusot niba, get menetek doma ilu niba manaonkon hancitna. Ulang ba nangkan binoto ayah niba muse na marmayam sajo iba sasadari, doseng muse mei lidi tu urut niba, alale … murmur markoti. Songonipeba, incogot na lupa mei iba i, na maor muse mei mulak karejo niba sasadari. Olodantong, petomantong si Lian alak Mandailing.

Muda ari Sabtu najopan roangku i, arana manyogot dope ari, romei ompungku marlereng sian huta asal nami mangalap au tu bagas nami sannari di Pasendeng. Dung maridi, juguk ma au i di tangga bagas nami i painte-inte ompungku. Bope nian maso i indape bahat kalak na marlereng di amian, taiba anggo sora ni kiring-kiring ni lereng ni ompungku muda ipalu ia marbeso do terbege dohot alak na lain. Dao dope sian bagas nami i, muda dung ubege sora ni kiring-kiring ni lereng ni ompungki, bulus jongjong ma au i: “Maro Ompung”, ninna mei dibagasan roangku. Manombo, ambaen ancitna ulala nai sibitkon ni umak i sajo atope arani i gusari ayah au muda adong salangku, bulus mangadu mei au tu ompungku. Indabeda, anggo ompungku pe na mangamuk mei, i tojankon ia bageng mei losung, oni irambankon ia muse mei indalu nai tu taruma bagas nami i. Sammpe sannari leng na uingot dope boto nai pardok ompungki muda dompak mangamuk: “Ulang se nai parkanciti amu anggingki !!!” Anggo ayah dohot umakku pe na monjap mei alai nadua i bilik ambaen biarna, indabe na barani alai kaluar bagas pasuo dohot ompungku. “Sada-sada !!!”, ima na ro obar dibagasan roangku, oni mikim muse aun’tong.

Dung tarpalan ilala ompungku, i ompa ia ma au i, dungi i pajuguk ia ma au i di boncengan ni lereng nia i. Dung i dorong lereng nia i dua-tolu langka, bulus i panaek ia ma lereng i salaos mangguncang na. Ami pe kehe ma marlereng marpalan-palan tu poken Hutanopan sian topi-topi ni dalan godang i. Lalu tu poken, songon na biaso, i pasahat ompungku mei lereng nia i di amangboru Jamarombun, na marjagal timbako dohot pusuk nai lambung parbantean na i lombang. Salose pasahat lereng, i togu-togu ompungku mei au lao tu dolok torus tu parjagalan ni Umak Umbik nai topi balerong i. Tolap tu si, i paido ompungku mantong pocal dua tapak, lomang opat korot, oni cendor dua mangkuk. Indape nai aumkon boto pocal dohot lomang i tu papangan niba, mudung ro mei ijur niba di bagasan baba niba, mariari tarsiak muse nida pocal i. Indabeda, dung abis tarpangan pocal dohot lomang i, oni minum cendor muse dungi, ompungku pe ngada tarantai ia be, na bulus torap ma ia ambaen butongna. Anggo au leng marpupu merdet monmonku arani siakna boto pocal ni Umak Umbik i. Dung salose namangankon i, i oban ompungku ma au maor di poken i, satongkin-satongkin maradian atia pasuo ompungku dohot koum-sisolkot nia, rap mangeceti oni sasakali rap mekkel, ra musengtong mangkair sasaulak.

Anggo ompungku da, asal do pasuo dohot sitandaan nia, inda na lupa ia patandaonsa bahaso au paompu nia: “Olo, on ma paompu na godang na, gorar na si Lomo !!”, ninna sajo mei mandok koum-sisolkot nia i patidaon godang ni roana.
Muda tu poken au dohot ompungku, adong sajo dei nai ida ni mata nia ambaen di au. Indape na malap-lap sipatu niba, na get i tabusi ia muse mei sipatu niba na baru. Imada so goyakna roa ni ayahku paida-ida ompungku: “Ulang na sai paenjeng ayah si Lian, sanga inda jadi alak ia saulak on !!!” Ning ayahku mei mandok ompungku. Ro ning ompungku: “Gorarna pe anggingku, roa-roangku songoni !!!” Ning ompungku muse mei. Muda tu umakku dodas dei ompungku mandok: “Ulang sei sibitkon paompungki, maen !!!”. “Olo amangboru !!!” Ning umakku songoni pamalum roa ni ompungku. “Olo ... olo ... olo ... ningmu maen, tai leng nai pisatkon ko juo do u ida, ligima pusot ni si Lomo leng na rata dope u ida !!!”. Ning ompungku muse. Sip tong umakku songoni, ipalalu ia karejo nia. “Goso jo isi bayo na muap tano !!!”, aropku tarsongon i ma na dong dibagasan roa ni umakku.

Allohu akbar ... Allohu akbar ... tarbege bahang sian masojid. Bo, magorib ma rupa. Dungi jonjong au sian jugukanki, torus lao marpalan-palan tu bulakang get manjawek. Dung salose manjawek leng na adong do boto na solot di bagasan roangku: ”Aso mei so songoni luai ke !!! Ayah ni ayahku udok ompung, sabalikna ompungku mandok au anggi, na marangka maranggi do au dohot ompungku luai ?!!”

Gandoang, 1 Juni 2009
by edi nasution

Di Pudi Ni Pintu

2009-06-02T20:41:00.006+07:00

"Mangan dope au da!" ning si Sorngap mandok alak bagas nia

"Pala namangan, mangan ma, tai natalak do muloi nangkin". "Dung salose non tutup da, modom au parjolo!" ning alak bagas si Sorngap mandok puang nia na mangan didapur hira-hira pukul sambilan borngin.

"Ak dongan, tongkin nai ho modom le, copat iba mulak tingon lopo salana, tonga borngin iba mulak mur ma sala, adong pokatonta satongkin sugari" ning si sorngap muse mulakan mandok induk ni api nia.

Dung sidung mangan, marcarito ma si Sorngap :

"Adong nangkin sada toke, halak na sipit mata nai, ro tingon Medan, ningia porlu disia anggota get karejo pature dalan" ning si Sorngapma mamuloi kecek.

"Makasud ni abang songondia?"

"Anggo bolas do sugari parincoran,

mayup arambir marmago-mago,

anggo bolas do sugari pangidoan,

pinomat sakalion patola au mangaranto".

"Jadi tinggal ma hami dison?"

"Tai buat sementara waktu do, muda cocok tongkin nai, uoban komu tusadun, pala inda cocok tong mulak au mulak tuson" ning si Sorngap mangalus

"Muda kehe ho marbabo

Ulang tak-tak batangintai

Muda ingkon na kehe doho mangaranto

Ulang lupa ba di daganak tai"

*****

Sonjia mantong dongan namarkampung gorarna, angke ngajabat na aha karejo salain namangguris maia, marsaba, sasakali manggore pala dompak musim. Anggo namarboniaga dikampungi nataretong dei dot jari sanga piga nara, harana hum namanuliskon sajo dei non karejo, sidung ni i romai songon sudagar apundung, mago pangkal mago ujung.

Jadi anggo namanjalaki sinadonganma tehe tama dokonon tardokon do da aropku naborat dei, apalagi arga ni ape le inda narabe magodang, sementara kabutuhan na asing tiop tongkin magodang, indapedo anak sikola. Mandaek ma iba non ari Jumahat, ke marpoken ari Sabtu tu Kotanopan, tibo di ari Salasa namarutang muse mai mulak di lopo an. Sonima satorusna, sampe masuk muse non bulan puaso. Pala dung donok ari rayo namanjalaki gadison muse mai, manombo madung rante ni inang ni daganak malayang, manombo madung kurabu si Taing Habang.

*****

Jadi sonimada, singkat ni caritona marangkat juo si Sorngap tu Medan karejo dalan dot toke na ro mangalap kalai tu huta nialai i. Sadari-dua ari, torus ma karejo si Sorngap dohot ringgas ni na karejo. Maklum hita ma antong goararna pe nabaru karejo tontu inda na tanggung ringgasna be, ulang do ro tokei naso obanon nia pe iangkat ia mai, padiar susat tu bondari anggo isi tokei karejona pe ngana tanggung copatna. Tai ba dung ke non toke nai, na iupuntoling nia muse mai mangidup, dor mai jongang, apalagi pas adong muse boru-boru na lewat, suang mai ia mandorna.

Songoni ma satorusna, sabulan, dua bulan, kiriman tu huta pe lancar dope santak masuk patolu bulanna. Dung ni boto hamu muloi ma markerer kiriman si Sorngap, biasi songoni? Bo, rupa nadung diporsayai i Tokei do ia manjadi mondur. Jadi sian pandokon nia, angkon na irubah ma panampilan. Muloi ma si Sorngap manabusi baju nabaru, sipatu baru santak tu miak uskus.

Rupana baya disada maso disuru toke niai ia tu bagas mangalap bahan bangunan, bo tarpaida disia boru ni toke niai inda tanggung lagakna, bontarna mangalobi'i, sipit muse matana. "Inda dong di Mandailing nasonon bontarna on" ning roa si Sorngap dibagasan.

Pas disada ari, karejo ma halai inda sadia dao sian bagas ni toke niai, hira-hira saratus meter do, pature bondar ni dalan. Jadi rupana porlu ma di halai tali baen pangkobet ni profil, isuru toke i ma si sorngap tu bagas mangalap tali.

"Tolong kamu ke rumah dulu, minta tali sama nona!" ning toke niai mandok si Sorngap

"Baik toke, dimana talinya toke?" ning si Sorngap

"Ada di belakang pintu" ning toke niai antong mangalus

Marangkat si Sorngap mopop tu bagas ni toke niai, tai boto hamu di tongandalan sego niat si Sorngap. Dung lalu tu bagas, itok-tok ia pintu lao mandok, :

"Nona, nona!!!" ning si Sorngap manoktok pintu

"Iya, tunggu sebentar, ada apa bang?" ning boru ni Toke i lao ro sian kamar mandi maranduk-anduk.

Paida-ida namaranduk i, ibelokkon si Sorngap obar ni Toke niai.

"Nona, kata toke, sekali, dibelakang pintu!' ning si Sorngap, motar doma sorai

Mambege obar na songonian, tontu antong marsurak Nona i, sampe tarbege di tokei tu dalanan.

"Apa lagi???" ning toke i sian nadao

"Tidak dikasih Nona!" ning si Sorngap inda ra talu

"Nona, kasih!!!" ning toke i sian nadao

Jia ma mungkin antong ilehen Nona i, kasidunganna bele-bele marsurak kalai ro toke nai, langsung hona pecat si Sorngap sadari i, mantak karejo, mulak tu kampung, mangguris muse mulak songon na biaso.

Salapanjujar

2009-06-01T08:18:00.003+07:00

ANGKAT MULAK DUNG MADABU

Adong dua anak boru na juguk di tangga bagas nadompak asik mangkobari halak, siaha ni siaha manga aha, salangia salangau salang-salang. Inda dong napade nida halai nadua halak namangolu diginjang ni tano ni Tuhan on, kayo halak mancit ulu nia, miskin kalak mabiar muse ia mangido tusia.
Asik-asik mangkobari, bahang Bilal di Masojid mandok masuk Kotu Isya.

Umak si Seno : "Ois da, ise muse pe nabahangi-i songon sora ni ambeng
na isarat doma binege"
Umak si Pinomat : "Tai angkang na di homui dei"
Umak si Seno : "Bo, malo muse do ia bahang dabo tie, tagi juo doba
binege sora nai, malo muse ia dabo malandung-
landungkon sora nia"
Umak si Pinomat : "&#%^)O)_))(*^%$

*****
UCOOOOPPPPP

Baen sun ni arun ni Jamanduda, madung bahat halak marsitungkir di bagas ni ibana, adong namaroban panganon, adong namaroban Imbako. Tai boto hamu hum gorarna sajo pe antong baya namarnyae, ahape ilehen ngana jabat na ihumkon nia.

Bele-bele soni roma Lobe Afdol manungkir, lao mangkuling tu si Jamanduda :

"Mangucop ma hamu jolo dabo lae"

(lao mangkusipkon tu suping nai, asok tai binege).
"Ucooooppppppp" ning Jamanduda antong mangalusi

*****

INDALE HAYU I DONGAN

Di hami an najolo dodas doi ro Halak Barat maradian manggambar 'bagas godang' songoni 'sopo godang' nadong di kampung nami i. Jadi disada maso ro muse mada halak barat nalampas-lampas manggambar bagas godangi, tarida di halak barat i si Jamintop dompak asik martukang kandang ni bagas, marsapa ma halak barat i tu si Jamintop :

"How Are You" ning halak barat i
"Inda ba le dongan hayu i, bulu dei" ning si Jamintop lao tiop tokokna

*****

JIA UM BAHAT?

Jiadole roa muyu bahatan na 'Tolunjujar' sampado 'Salapanjujar'?
Anggo ning roangku da dongan bahatan dei Tolunjujar, harana anggo Nasala Panjujar inda nadongi namadabu, nga antong roamuyu ipar?

Huling Kulingan Najolo

2009-05-28T11:04:00.004+07:00

Dohot dope hamu dongan maruti-utian Huling Kulinganna Najolo? Anggo sannari ngana dong binege dabe huling-kulingan i, manombo dodasdo ro songon namalungun roa niba mulak tupudi dompak daganak iba najolo. Ijia sajo iba marsuo dohot dongan niba, nadung dodas mai Huling Kulingan on jadi buka dasar ni carito. Mula daganak dope halakna, huling kulinganna pe tontu antong huling-kulingan ni daganak, tai boto hamu muda dung muloi ma puber, adong mai non huling-kulingan na Sala Taram Mardosa.

Ita pareso deba huling-kulingan on da :

HULING-KULINGAN NI DAGANAK :

Ison ko amang, ison ko inang,

pala ro ranggas nalimai anta naso mulak be au be.

Dapotna botole baya : Rongit

Tak sikatuktak Tolu indegena

Dapotna : Halak Namangordang

Sabolak-bolak ni tobat ni inanta, lima maia gulaenna

Dapotna : Parbasuan

Iapus, Rata
Dapotna : Gundur

Mardahan inanta, diginjang korakna

Dapotna : (Mangido mohof) : Te ni Orbo

Madabu Bom manaek Mandera

Dapotna : (Mangido mohof juo) : Orbo namiting

Opat di urak sada, ro udan

Dapotna : (Mangido mohof juo dongan) Kong-kong na tuaek menek

SALA TARAM MARDOSA :

Apit maraek-aek

Dapotna : Sugi-sugi

Pangkal nai marabong, ujung nai igotap, munduk-unduk lao pamasukna

Dapotna : Same na isuan

Nabahatan dope huling-kulingani, tai ibape muloi ma marlupaan, harana molo pas dompak marlagut dohot daganak i, ibaenpe huling-kulingan, ngana i humkon kalai be.

"Baen ayah le Doraemon" ning daganaki

"Minto lampu, naron domai, marcarito ma ayah jolo soni, carito najolo" ningku mulaki

"Aha caritona?" ning daganakta marsapa

"Si Manuldang, do Si Manare" ningku songon na holas saotik.

Bo rupa, tarbege di inang ni daganak i, "Caritohon ma uida, anggo inda upulos non pusotmu ulang dokon gorarku si Lasniari" ningna ma songon namangogar au.

"Bole anggi, inda na iboto ho nanga antusan ni i?, tai Indalu dei dot Losung" ningku muse manjawab, harana leng namabiar juo do iba hona pulos non. Rupana baya inda namalo muse halak bagas na mar huling kulingan on be.

Mangilakkon Bustak Tardege Te

2009-05-02T22:02:00.003+07:00

Anggo hum naronyang-ronyang saotik do pamatang muyu ale dongan na dua tolu, nangkon jabat manjalaki datu hamu mambaen ubat sapo-sapo sanga tu mantari suntik, ro sajo ma hamu tu lopo ni Jamananduk na di topi dalan godang an. Hodokan dei non pamatang baen ribur dot tata ni halak dilopoi. Hum gorar ni lopo nai pe ‘ntong “Lopo Gembira”, apalagi pas muse non dompak disi Jatarkotul, ia mai na dodasna jadi tukang carito.

Angke anggo inda ro alak bagas nia manaruon daganak non tu lopoan, inda na jongjong ia sian jugukan niai i. “Parorot daganakon, get ke au marbabo” ning alak bagas nia ma disada manyogot atiha marburas. Tarpaksa marorot boto hamu Jatarkotul sadari i.

Adong-adong sajo dei goraan nia non asal lewat kalak, inda porlu isia i, olope na tobang-tobang apalagi na tar danak, ina-ina pe asi.

“Ngon jia doon umak Pultak?” ningia ma adop ina-ina na lewat sian jolo ni lopoi
Sip antong umak si Pultak, inda i alusi ia, harana mabiar ia roncam non Jatarkotul.
“Alaaa, nasombong maho sannari da dung maraek supingmu, mangecek pe dor doma sasadaho” ning Jatarkotul muse mulak mangulaki.
“Ngon pudi get tu jolo” ning umak si Pultak tong mangalus, leam doma ilala Jatarkotul. Baen liana ilala ia, purak-purak ma ia marsapa dihalak narami dibagasan lopo i.

“Madung jungada ma ucaritohon di hamu carito na ikidik-kidik jadi-jadiani?“ Ningna muse ma mamangkal carito, ipalalu ia mambuat goreng dua di anak nia soulang bahat ulahna.
“Pardokoni ma soni, sakali mangaminkon ma hami non” ning Jamananduk parlopoi.
Di hamian najolo adong ma sada naposo bulung namargorar si Mulakmuli, karejona ba na pangangguran do, tai nalobi ganteng parroana, nalobi maradong ilalasa, na ia ma ilala ia na iana. Pala iontang tusaba, malomlom ma ningia, padohal pala ipelos umak nia pusot nia, leng na kehe do ba ia. Pala marcarito epeng kalak, epeng nia ma nabahatna, pala marcarito panganon kalak, panganon nia ma natabona, pala marcarito gandak muse halak, gandak nia ma na lagakna. Padohal santak di ari sadarion nasodong dope dapot ia dongan nia.

Singkat ni caritona, disada maso roma boru tulang nia sian huta balian ioban simatobangna giot patidaonna disi Mulakmuli. Tai boto hamu inda na haru godang roa nia, mangecek pe boru tulang niai alus soalus do ibaen ia. Padohal tardokon do anggo rupo inda jabat na kalah boru tulang niai sian halak kabahatan. Tai sonima rupa si Mulakmuli, sanga na gengsipe sanga na patidahonna dialak nabahat bahaso naso ra ia i jodohkon inda dapot jiba.

Hinggo disada maso, maridi ma Simulakmuli di Batanggadis potang-potang, dijulu ni tapian ni bujing-bujing di hutai. Rupana lao kehe ia nangkin maridi tarpaida disia udur si Rondang dohot simatobangna lao kehe juo tu tapian i maridi. Sabotulna dung dor do sapetona ikusip ia si Rondang on, tai santak tu ari sadarion naso dapot dope udutna. Tai ba anggo pancaritohon nia dihalak madung mardongan ma halai, nagiot marikah lari bage doma.
Jadi imada, gorarnape antong halak najolo, iayup si Mulakmuli ma ibagasan ni takar, Sitarak, Sitangkis, boti podom-podom. Antusanna dabo angan-angan nia, :

Dung hita sitarak
Jolo Sitangkis Baya Podom-podom
Dung do Hita baya Marsarak
Jolo Tangis do anso modom.

I sajo maia na iboto nia ba, tai jaru songoni, madung pohom mai si Rondang bahaso nagiot mangkusip muse si Mulakmuli naron borngin. Tai boto hamu, rupana umak si Rondang do namandapot surat ayup-ayup si Mulakmuli on, harana si Rondang nangkin parjolo mulak tu bagas.

Borngin nai antong ro muse ma si Mulakmuli mangkusip tu bagas ni halak si Rondangi, bo rupa nasala kusip do si Mulakmuli, tarkusip ia umak si Rondang. Harana si Rondang kehe martandang saborngini tubagas ni etekna na hurang sehat. Dung ipalu uyup-uyup, muloi muse ma marpantun si Mulakmuli santak habis kamus nia. Rupana na isambut umak si Rondang muse do pantun si Mulakmuli on sian bagas, asok-asok tai tarbege. Songon na dosir mulak tong mudar ni Umak si Rondang mambegesa, harani nadung onok ia ditinggalkon alaklaina nadung parjolo dipio Tuhan tai.

Jadi imada, margoso halai nadua marsibalos-balosan, bo rupa ro jadi-jadian sian pudi mangkidik-kidik si Mulakmuli.
“Ah, soho ale, halak na dompak marusaho” ningia inda manalion tupudi.
Inda sadia onok, ikidik jadi-jadian i muse mulak, “Aha donanga?, sigaret?” ningia muse lao mangalehen sigaret, tai inda pe namanaili. Mur dor ikidik-kidik jadi-jadiani, kasidunganna holas si Mulakmuli. “Ma udokon tong ulang mangganggu, naso adong male di saotik pe pangartianmu?” ning si Mulakmuli lao manaili tupudi. Huuuuuuaaaaaaaaaa, Rondaaaaaang, buka tingkaaaaap!!!” ning si Mulakmuli mandoik tingon toru. Tarsonggot umak si Rondang, ibuka ia tingkap, mangambur si Mulakmuli tu bagas, marroan muse halak sabanjar baen riburna. Dapot halak nabahat ma si Mulakmuli madung dibagas nihalak si Rondang salao mangkaluk umak nia, bontar doma ipon nai baen biarna.

Dung rami di bagasi, torang muse harani marsioban colokna, ro muse katuai manungkir. Rapat punya rapat angkon na ikawinkon doma si Mulakmuli dohot umak si Rondang harani masuk ia tubagas. Rupa soni undang-undang dihutai, ise natardapot masuk bagas sapala mangkusip, inikahkon. Mangecek ma katuai.

“Harana dung sonon antong kajadianna, tarpaksa di nikahkon doma hamu nadua” ning Katua i
“Si Rondang dei na ukusip i Katua, inda umak nia” ning si Mulakmuli sogon namanyosal
“Tai on ma buktina bo, umak nia do nangkin mangkaol ko, baen biarna ho” ning katuai mangulaki
“Olo Katua, baen na ikidik-kidik ni jadi-jadian do au i, so masuk au tubagas, lagipe sakalion dope au ro mangkusip tuson” ning si Mulakmuli get mangilak harana tarpaksa marikah dot namarando, tobang-tobang muse marumur 40 taon.
“Ah, jadi-jadian ni ahamu dei, sangajo na giot masuk ko tu bagas” ning Katuai muse
“Ijia mai sakali, nasaborngin per ro doho tuson” ning umak si Rondang muse songon na pakokoh obar ni Katuai, harana ia pe antong por roa nia dapot perjaka ting-ting umur 27 taon.
“Olo, tarok dua kali”, ning si Mulakmuli muse mangalus
“Napoken nalewat?” Ning umak si Rondang muse mulaki
“Tarok tolu kali” ning si Mulakmuli muse mulak tong
Ah, na ma dor tu domai tarokna” ning katuai muse antong

Walhasil marikah kalai saborngini, tai boto hamu santak tu sadarion ubege leng ne rukun do halai nadua, madung sanga dua daganakna.

Tinggal lagi antong ulang sei nagiot mapili tu iba, ulang sanga “Di ilakkon bustak Tardege te” ning Jatarkotul lao manjalaki solop nia sabariba. Rupa madung adong mangonjapkonna.

Sada-sada Parmainan

2009-04-29T21:09:00.003+07:00

Pangkudu Pamarai
Ilombang ni si Alogo
Marguru homu dongan Manyapai
Pala iba naso umboto

“Imada sipaingot ni natobang-tobang najolo dihita anso rap ringgas be marguru, rap ringgas be manjalaki elmu, tarutamo nangkinondi elmu ugamo”, ning ompung Lobe ma dihami songon namarsipaingot. “Ulang songon Jabondar dot Jagadu” ningia muse mulak palalu obar.

Nadua halak on tardokon do namardongan rosu, olo pe’ntong inda namardongan rosu botul. Tai nadung biaso mai halai nadua marsiarsakan apalagi atiha marburas di lopo ni Jamarsuan an, margonti-gonti doi non hona arsak. Gorarna pe’ntong namarsiarsakan do, ngada jungada ba halai nadua marbada jabat ibaensa, paling-paling mai non mulo kalah si Jabondar, purak-purak maia mulak tubagas. Manombo idokonsa na pio-pio inang ni daganak, manombo idokonsa na giot kehe tusaba, sapala manombo idokonsa muse nagiot kehe sumbayang tu masojid, pokokna adong-adong sajo mai non alasan nia.

Disada maso kalah arsak muse mada boto hamu Jabondar,
“Naron doma dongan ita palalu da, sumbayang jolo tongkin” ning Jabondar ma mandok Jagadu nadung rara mukona harana ipartatai halak nasalopoi ambaen sontingna pangarsak ni Jagadu. “Anggo sakalion, inda sobar au on be”, ningia muse ibagasan roa nia. Torus antong kehe ia tu masojid giot sumbayang Ashar. Bo, rupa na di ihutkon si Jagadu muse do sian pudi, harana ia pe giot sumbayang. Rap manjawek ma halai nadua di pancur masojid i maradu sip, dung ni rap masuk muse tubagasan masojid nangkinani.
Harana tarpaida disi Jagadu nadung holas sajo di Jabondar, rupana marhajat ia dibagasan roa nia rap sumbayang halai nadua marjamaah (tai ba ngana binoto sanga ulah nia pe sanga na botul makasud nia i). Jadi pas Jabondar langka tuginjang sajadah i, torus ipaisar Jagadu muse tulambung nai sabolah siamun, torus ma ia qomat.
Inda pe salose qomat, ipanenju Jabondar mada Jagadu, salao mandok :
“Aha do maksudmu nanga?”, “Nalayasan huida roamu jau, baen iboto ho inda sanggup au jadi imom, qomat maho” ning Jabondar.
“Na denggan do dongan niatku, rap sumbayang jamaah hita nadua, mangalo doho antong, ulang ma oban nai lopoan tu masojid on da, inda iboto ho nanga bagas ni Tuhan do on” ning Jagadu muse antong mangalus, tai ba inda nabarani ia mambalos, urum nia do na itiop nia bokas na ipanenju si Jabondar i. “Pala nga sanggup ko jadi imom dokon, au imomna, ulang mangalo” ningia muse songon na mangalap-alapi.
“Ibuktihon dei antong jolo”, ro ning Jabondar dibagasan roa nia
***
Ari margonti ari, bulan margonti bulan, disada maso muse atiha ke Jabondar tu masojid get maridi, tarpaida disia si Jagadu dompak sumbayang kotu Lhuhur. Inda lalu Jabondar maridi, tai ipaisar-isar ia muse manjawek, torus masuk tu masojid i. Rupana si Jagadu dompak khusuk sumbayang, palan angkatna, deges tuma’ninahna, binege muse sora nai sapala pindah sian rukun nasada tu nasada, topek muse dua rokaat dope sumbayang nai.

Sapala dungi, ijontik Jabondar abara ni Jagadu, maksudna so rap marjamaah. Tai boto hamu naso iambang-ambang, tup-tap soni Jagadu nasumbayang i, songon manuk namanuduk atiha manangko jombur marisar-isar. Inda binege sorana sapala pindah sian rukun nasada tu rukun nasada be, inda muse mar tuma’ninah be.

Dung salose sumbayang mambori solom, mamatai ma Jagadu tu pudi, rupana Jabondar do na manjadi makmum niai. Kasidunganna dung rap mijur sian masojid i, martata ma halai nadua, : “Sada-sada parmainan da” ning Jabondar lao kehe mulak tupancur masojid i torus maridi.

Malungun - Mandurung

2009-04-23T10:52:00.004+07:00

Itandai hamu do le dongan Durung Pongkar, Durung godang na ibaen sian bonang, martangkil markisar dua meter parsitiopanna. Muda dung mombur ma aek Batang Gadis najolo pala ro udan, mandurung ma iba ia dot dongan di udan-udani dohot Durung Pongkar nangkinani. Dapot mai non aporas dot sulum songoni muse udang. Dung lalu tu bagas igoreng mai udang i sanga isambal karambir, rara doma, dosir ijur niba mulak mangingotna.

.....

Dompak daganak iba, dung salose mangguris, manaek ma iba i tu batang ni jambu di untuk ni tor napa-napa, imuloan mai marende.

Ancit ni namandurung leeeeee

Sada-sada incor di batu

Ancit ni namalungun le

Sada-sada baya ilu madabu

"Porkon udan, inda sira au, anak so boru parkayaonkon" ning donganku mai sian sabolah, lao palidang-lidang aek ni apea sian polan (sitirip) nai tu takari. Padohal baen lungunna do ilala dikoum-koum niba boti sudao na adong diranto, inda dong na ra ro manungkir. Koum-koum ni dongan marmulakan sian ranto, apalagi mula masuk bulan puaso.

Dung binotoma ma poso, dapot muse ma dongan (calon ni inang ni daganaki, tai inda lalu) maruba muse sora di namandurung i.

Mandurung ko mandurung

Mayup sanggar di batang gadis

Muda malungkun ko malungun

Dokon gorarku ulangko tangis

Landit ni namandurung

Ditoru hayu dot batu nalomlom

Ancit ni namalungun

Arian borngin inda tarpodom

(Padohal anak boru namungkor do di halaian, iba do namargoso).

Dung kehe iba mangaranto, mur masantak muse ma sora ni namandurung.

Pala mandurung ko angki mandurung

Tolong durung di toru ni jambatan

Pala malungun ko anggi malungun

Kirim surat tu kota Medan.

Dung matobang iba sannari, daganak pe madung bahat, tai boto anggo namandurung on namur masantak do.

Landit ni namandurung

Unte manis mardagul-dagul

Hancit ni namalungun

Aek nimata pe marsabur-sabur.

Harana inda inang ni daganak sajo antong lungunonkon, daganak bage dope. "Nga ale roamuyu pareban?".

"Pokokna, pala mandurung, mamoyom" ning si Dapdap muse songon namar istilah

Boa-boa

2009-04-16T11:58:00.003+07:00

Tu : Kahanggi i si Ifran

On ma gambar Masojid Raya Madina na dibangun di Aek Godang - Panyabungan, phisikna markisar2 40%, rap mandoah ma hita mudah2an copat salose anso rap sumbayang kita tongkinai disi, Insya Allah.

On dope so tar update, mangido mohof da kahanggi.

Salam

Opat Pat Ni Manuk

2009-04-15T17:21:00.000+07:00

by : edi nasution

Di sada borngin, adong mada opat poso-poso na dompak marjuguk-juguk salaos mangecek-ecek di sopo jago na i topi dalan godang an. Ahama carito ni alai di si, ima taringot tu paramangboruon ni si Dame na dung mangalap boru dua poken na solpu tu Padang Bulan. Boru na sian huta ruar i na santak bagak, suangkon do alak India: ginjang godang boti manis muse, ima nangkan jadi bouk ni si Dame pala dung i patobang. Arani i dodas do dongan-dongan ni si Dame mangarisak ibana, tarlobi-lobi dung do lopeh horja Haroan Boru na tuari di ari minggu.

“Biado Dame, aso do tondo ho, inda langa jop roamu marbouk na bagak?” Ro sapa-sapa ni si Lindung.
“Olo, songon na pohom u ida dongan taon sapoken on, inda dapot obarna!” Ning si Tomu na juguk i lambung ni si Dame.
“Ulang be, marbouk baru mantong !!” I tambai si Laung muse.
“Ala … na lage mamu da, inda dabo i na tarsirok di roangku. Marnyae dabo angkang na i Bogor, parwarung i, madang sapoken lolotna!” Ning si Dame.
“Songonjia langa nyae ni angkang tai?” Marsapa si Lindung.
Ro alus ni si Dame: “Sian surat nadi tongoskon kakak i poken na lewat, ning ia masuk rumah sakit do jabat, gulung tolu ari di si. I mada na mambaen marsak ami sabagas!”
”Pangidoanta tu na Sada i nian ipas ma iras mulak angkang i!” Ning si Laung.
Dungi, sip polngit santongkin.

Sian dolok, marroan muse dua-tolu poso-poso. Na parjolo tolap tu sopo jago i si Bania. Bulus i pajuguk ia, dungi mandok : “Angkang Laung, lalu do ita na get marsulu i?”
Ro ning si Laung : “Pokat na do, anggo au ra, madang sapoken bo na so mandai aruting nai gule rata, siak muse, manetek ma dongdongku bo!!”
“I mada angkang so roa mi tu son, so binoto sanga na lalu ato inda ita na marsulu i!” Ning si Adian.
“Pos ma roa mu ale, anggo marsulu gulaen, tape-tape nia dei, borang na!” Ning si Tomu.
“Oni songonjia dia do, ami pasiapma lampu tarongkeng na?” Ro muse sapa-sapa ni si Bania.
“Pasiap kamu ma, ulang lupa maroban baluang, oni layan tajom goluk nangkan obanon!” Ning si Lindung.
“Sada nai, marsioban danon na be, sadalak tolu takar!!” Ning si Dame.
”Inang gois nang, nabahat tong, palalu le sasuat be, so mosor-mosor dung mangan!!” Jauk-jauk si Koje sian bagasan ni sopo jago i.
”Ala ... songon na so binoto isi ni boltok mu, sadangdang pe abis ko!!!” Ning si Bania.
”Olo, songon na antulaparon, lupa ia na muta-uta ambaen butongna dompak marmangan-mangan bulan na lewat !!” I tambai si Adian muse.
”Marpalan doba sotik papangan mi mangkuling, Jalandit!! Ho dope na gaorna muda marmangan-mangan, tarik tu adop, gulaen na tabo-tabo nai ibaenko di jolomu, ho pe naso mangirput do ho!!!” Ning si Koje arani milasna roa nia.
”Madungme daboi, marsipan kamu, indape na karejo madung martongkari, madao rasoki, adope marsiapma so keta na marsulu i!!! Ning si Laung.

Urang-lobina sajom dungi, sian parlopoan ni poso-poso nai lambung bagas ni si Tagor, alai poso-poso na get marsulu gulaen i, rap marangkat marudur tu batang aek an. Adong na sandang baluangna, dua halak maroban lampu tarongkeng na dung i pagara, lima halak maroban goluk, oni adong juontong na maniop-niop ayu ambaen rambas-rambas. Tolap kalai tu batang aek an madung bagas borngin, indadong be tarbege sora ni urindik atope na lain nai, hum sora ni asak doma na dosak-dosak sian batang aek i. Di muloi alai ma marsulu sian tapian ni dadaboru nai lambung suro na i jae. Isi aek na pajat satambiul ni pat, nida muse tangkas gulaen na pae-paulu: adong aporas, sulum, lelan, garing, oni sada-dua aruting atope tingkalang. Jop boto nida roa ni gulaen pae-paulu di tapian ni dadaboru i arani bahatna sipanganon di si, tardokdo sude tola-tola dina mangan misalna indahan na sayang.

”I si bo tingkalang na godang, tampul bo Kedan !!” Mangkuling si Retuk targogo.
”U ida dei, ulang ko se retuk, marlojongan non gulaen i, sip ko, pamatai songon i, palan-palan angkatmu!!” Ning si Kedan menggusari si Retuk.
”Padonok lampu i tu son, patibu bo, so u tampul !!” Ning ia muse.
“Jab” tarbege sora ni goluk nai tampulkon tu bagasan ni aek. Dungi, tarida sada tingkalang na get bola dua, margepor-gepor muse mardaro-daro, panggodang na hira-hira tar sa botohon.
Ro ning si Lindung : “Jomput bo Retuk, pamasuk tu baluang i !!”
”Olo angkang. Pamatai angkang i jolo tar tu jae saotik, adong kuida na lomlom ginjang i tonga-tonga batu na dua i”, ning si Retuk.
”So ho i si”, ning si Lindung palan salaos mandao tu jae.
“Jab” tarbege muse sora ni goluk na i tampulkon si Lindung.
“Mai son aruting na sabitis i da, alap bo Retuk !! Pio-pio si Lindung.
“Amang, na godang mei aruting nai ke. Inda tampil ba i di baluang ta on”, ro alus ni si Retuk.
“Susuk songon i”, ning si Kedan.
Inda sadia lolot, madung gok gulaen di bagasan baluang nai sandang si Retuk i, adong muse dope nai jinjing nia lima ihur tingkalang dohot aruting.
”Maradian ma ita, cukup mai gakku guleonta, marlobi-lobi inda pade, goyak naron na Sada i. I tamba muse dope na dapot uduran ni alak angkangi si Laung. Topotkon kalai jolo Kedan, so rap mulak kita”, ning si Lindung.
”Yabo angkang”, dialusi si Kedan salaos kehe tu maripas-ipas tu julu.
”Biado angkang Laung, ra do ?”, marsapa si Kedan.
“Adong juo saotik, amu biado ?, ning angkangi si Laung.
“Imada, pandok ni angkangi si Lindung rap mulak ma ita tu huta, arana cukup mai ning ia guleonta”, ning si Kedan.
“Olo anggo songon i”, ning angkangi si Laung salaos rap mardalan kalai tu jae manopotkon dongan-donganna.

Dung i paias kalai gulaen i di topi aek i, alaipe udur mulak tu huta. Tolap tu sopo jago i, alaipe rap marsibaen karejonabe: adong na mangombus api, manggiling lasiak, mangkuhur arambir, mambasu danon dohot na asing-asing nai. Urang-lobi sajom lolotna, dung masak sude alaipe rap mangan marsitutu arani malena di borngin na ngali i.

“Ise do na giot dohot mangalapor tu lombang, manyosak ma alai bo !!! Ning angkangi si Laung.
“Angkangi pe da, takok mabiar angkangi, so i donganan”, jauk-jauk si Kedan.
“Aha muse dei biarku di banua on. Jihin pe pe ro tu jolongku, u cipakkon dei !!! Ning angkangi si Laung targogo sora nia.
“Ala … songon na so amu borngin na tuari u ida maripas-ipas i toru ni marapolom an !!! Ning si Retuk salaos mikim-mikim.
Ro alus ni angkangi si Laung : “Imada muda dao iba sian lonceng, inda binoto sanga aha na muba. So i boto ho Jaretuk, atia i get sorang dabo danak ni angkanta Japagaran. I ma so maripas-ipas au tu lombang mangalap ompung Kiyah !!!
Sip tong si Retuk. Moni mangkuling muse angkangi si Laung : ”Takok martaru do ita jolo sanga ise na tahansa modom sajom di parobanan nai musojid nai dolok !!!
”Pade do bai so bonoto sanga ise do sabotulna si parbiar. Biadontong angkang Retuk, olo do ?!! marsapa si Kedan.
“Sip babamu Kedan !!! Ke majolo mangoroi tu aekan, ulang se na muntut sajo tohapmu dung butong mangan, bauan kalak dibaensa”, murmamilas roa ni angkangi si Retuk.
“Ala ... keta le angkang tu lombang”, ontang-ontang si Kedan.
Ro alus ni angkangi si Laung : ”Keta, tai jia jolo sabatang sigaretmi so hum onak na mangayup on !!!
Dungi alai na dua kehe maripas-ipas tu topi aekan.

”Adong dope sigaretta i si, Dame ?!! Marsapa angkangi si Retuk.
“Adong angkang, taiba sabatang nai doma tinggal, oni ngada targotap dua ba !!! Ning si Dame.
“Kha ... ka ... kak”, mantata angkangi si Lindung salaos mandok obar : “Na denggan ma roamu di si Retuk, muda u paido nangkin indadong ningmu”, leng pupu ia mantata.
“Amang ... na lantamma ilala ho !!! I ambangko muse do na masa-masa i angkangmon !!! Murgusar tarida angkangi si Retuk.
“U panenju ho naon, amu saudon pe alongku inda mabiar au”, ning si Retuk muse.
Dungi jongjong ia salaos paibul tenju-tenju tu jolo ni igung ni si Dame.
Ro ning si Dame : “Inda sianyang dabo angkang, o ison bo sigaret na sabatang i”, i buat ia sigaret sabatang sian cakuk nia patidaonsa di angkangi si Retuk.
Dungi, ngada be dong obar. Angkangi si Retuk bulus kehe tu dolok manopotkon poso-poso na marjuguk-juguk di tangga simin ni bagas ni si Tagor i.

Dung morot angkangi si retuk, tinggal lima alak nai doma di sopo jago i. Na tobangna angkangi si Lindung dohot si Golom, na tolu nai ima si Dame, Si Torkis dohot si Jalupis. Anggo alai poso-poso na sapangkek madung pohom do alai tabiat ni si Jalupis. Bope antong bayo on tarpohom, taiba anggo panaili nia leng na asing do nida muda mamatai bujing-bujing. Ninna, dompak menek si Jalupis on na congokan mangan lupis. Muda dung muli umak nia siab poken, na parjolo gareon nia di bagasan adangan ni umak nia i manjalaki lupis. Ulang do lupa umak nia manabusi lupis, angkan na mangarar ma ia i tangis-tangis santak tu potang ni ari. Imada so mohot gorar nia si Jalupis sian na menek sampe magodang jadi poso-poso.

Inda lolot dung angkangi si Retuk morot sian sopo jago i, jongjong musema si Jalupis get kehe muse. Rontong sapa-sapa ni dongan nia si Torkis : “Get tudia do ho le, ima golap ni ari ?!!
“Tu suro nai dolok. Nangkin u tinggalkon abit karungku di si, na tondikan kulala. Oni adong dope sigaretku satonga bungkus nai u balutkon di abit karungki. U alap jolo so dong iduponta !!! Ning si Jalupis.
”Pademei, alapma. Au pe macom doma ulala babangkon, indape na marbual sian nangkin”, ning angkangi si Lindung.
”Jai angkang !!! Ning si Jalupis salaos mangalangka torus mardalan tu dolok.

Dung kehe antong si Jalupis, i patorus kalai na opat mangecek-ecek di sopo jago i. Indape piga arsik i Dame mangidup, ro musema si Adian dohot si Bania tu si.
”Tudia damu dung mangan nangkin, jalak-jalak iba, inda dong be idupon”, mangkuling angkangi si Lindung.
”Imada angkang, sigaret nami pe na so dong do, ima so kehe ami nangkin tu jae ampot adong sigaret di si, so mangido jolo”, dialusi si Adian.
”Sabatang maia dapot kami, ima so inda taroban tu son”, i tambai si Bania.
“Si Tomu maidia, gakku adong dei sigaret nia”, ning si Adian.
“Bayo i pe mago dung mangan, mago-mago sada do amu sude u ida”, tarholas nida ilala angkangi si Lindung, indadong ida ia na marroa dongan-donganna.
“Onpe si Jalupis inda na marnaro. Ningia mangalap sigaret, madung sajom i painte-inte indape na tarida bohi nia”, murmagogo sora ni angkangi. Tarlobi-lobi muse paida-ida lagak ni si Retuk na ro tu sopo jago i salaos mangidup marbual-bual songon pangidup ni parkoboi, sian babana timbus kaluar maribul-ibul, dungi mandotok muse dope baba nia pasabas-sabaskon.
“Aropku dabo angkang nang lilu dei Si Jalupis, ato sanga na dung mungkor do ia di suro an. Keta le ita pareso jolo !!! Ro ontang-ontang ni si Bania.
“Si Jalupis do ?!! Posma roa muyu di bayo i, na tarsimbil-simbil dei pangaroai na !!! I tambai si Adian muse.
“Simbil-simbil songonjia ?!! Ro muse sapa-sapa ni angkangi si Lindung, purak-purak na so i boto ia parange ni si Jalupis.
“Bo ... ulang do nida ia urum na manis, ulang-ulang ma jolo paida-ida pardalan ni bujing-bujing na megol-egol songon itik surati, anggo ia pe naron jama tot jama ulu mei dibaensa. Sidungna, mandok pisang pe picak domei non didoksa !!! Muripatangkas si Adian.
Mangkuling muse si Torkis : “Dodas dei angkang u ida ia di kobun-kobun pisang nai bariba, purak-purak manastasi bulung ni pisang na malos, naso kobun ni alai so. Taiba, anggota mata nia leng bilak tu paridian ni dadaboru nai julu !!!
“Songon i do ke. Bania, biado ning roamu, ita ligi do Jalupis tu suro nai dolok !!! Marsapa angkangi si Lindung.
“Pokatna do angkang, anggo ami rap olo do !!! Dialusi si Bania.
“Ning roangku ita na dua pe kehe paresosa, nalain nai leng di son”, ning angkangi si Lindung.
“Songon i pe jadima”, ning sadebana rap-rap.

Tolap tu suro nai dolok, inda na adong diida alai si Jalupis di si, bope abit karungna. Anggo lampu colok leng gara di bagasan ni suro i.
“Manida angkangi, inda nai si ia !!!” Ning si Bania.
“Olo u ida, tu diama ita jalaki ?!! Ro sapa-sapa ni angkangi si Lindung.
“Bia angkang muda ita ligi tartudolok sotik, donokkon pancur nai topi saba i !!! Ro alus ni si Bania.
“Aso angkon na tu si ?!! Marsapa mulak angkangi si Lindung.
“Arana dibagas na paduaon sian pancuri, adong na baru-baru, kan adi baru maringanan amangboru ni si Dame ?!! Ning si Bania.
“Olo ke, tapareso tu si pe jadi”, ning angkangi si Lindung.

Dung mardalan kalai na dua ira-ira tolu tonggak tartudolok, inda dao sian pancur i, ida alai adong na margorak-gorak i dinding bagas ni amangboru si Dame i. Murdonok kalai mardalan palan-palan, murmatangkas sanga aha na margorak-gorak i. Ma pasti alak dei, uluna i sanggopi abit karung, ima abit karung na somal i pake si Jalupis ambaen ulos modom di sopo podomanna. Paida-ida bayo nasoture i, murmilas ulu ni angkangi si Lindung. I jolo i ia sada batu panggodangna tarsa marapolom. Dungi irambankon ia sagogonia tu si Jalupis : “Puk”, tarbege sora ni batu ona dinding ni bagas i, ira-ira saeto diginjang ulu ni si Jalupis.
“Mamarmara”, ima obar naro dibagasan roa nia, salaos get marlojong sian i. Atia i lupa ia na dompak jongjong di ginjang ni losung. Arani i, bulus singgalak ia tu pudi, dungi tombom muse urut nia tu batu-batu nai pamispisan ni bagas i, untung ma inda mabangkir ulu nia.
Dung bisa ia jongjong mulak, ia pe marlojong saipas-ipasna tu julu mamota-mota saba. Tarsatonggak dungi, i lojong ia muse tu lombang. Sampe tu suro nai topi aekan, i basu ia muko, tangan dohot patnia. Dungi palan-palan ia maardalan tu jae manopotkon dongan-dongan na marlagut di sopo jago i.

Atia si Torkis mangida si Jalupis ro sian julu mandonok tu sopo jago i, bulus mangkuling ia : “Ngondia dei si Jalupis roa i ?!!”.
Si Jalupis pe murmurdonok tu sopo jago i. Ro sapa-sapa ni si Adian : “Tudia sajo damu, jalak-jalak angkangi si Lindung ?!!
“Olo, mauobanma sigaret ambaen di angkangi, ison bo”, ningia salaos patidaonsa.
“Aso do lolotna namangalapna maia tu suro nai dolok ?!! Marsapa angkangi si Retuk.
Indape i alusi si Jalupis, ma ro obar ni angkangi si Lindung na baru sampe tu sopo jago i : “Opat pat ni manuk ke Jalupis ?!!
“O ... o ... o ... lo ... ang ... kang !!! Opat pat ... opat pat ... ni ... ma ... ma ... nuknuk,” rorap si Jalupis mangalusisa arani tartomos boti biarna paida-ida aangkangi si Lindung na jobos-jobos ro tu jolo nia.
“Ala angkang, andigan do unjung opat pat ni manuk. Atia sihim pe panganon ni kudo santak tu ari saborngin on, leng na dua dei pat ni manuk, nga jungada boto opat patna”, murisurkut si Torkis.
”Kha ... ka ... kak ..., gakku adong dabo manuk na opat patna di lobu nai bagas ni amangboru si Dame i”, itambai angkangi si Retuk muse.
”Dungmei Retuk !!! Jalupis, dongani jolo au mambasu pat tu musojid nai julu”, ning angkangi si Lindung.
”Jai angkang”, dialusi si Jalupis salaos mengihutkon langka ni angkangi si Lindung sian balakang.

Dung tolap kalai nadua tu musojid nai julu, salaos mambasy pat di pancur nadong di kulak i, marsapa angkangi si Lindung tu si Jalupis : ”Aha do karejomu nangkin di lambung ni lobu manuk nai bagas ni amangboru si Dame i ?!!
”Inda unjung au tu si, mari-ari bagas borngin songonon mabiar dau i, angkang”, dialusi si Jalupis.
“Jadi ise dei bayo na liput sian i nangkin dung u topo dot batu ?!! Marsapa muse angkang i si Lindung.
“Inda uboto ba angkang, na miting dau di bondar nai lambung ni suro nai dolok”, ning si Jalupis.
“Ulangko margabus !!! Ho ma ia na ampuna abit karung na marcorak na songon i di huta on. I ambangko muse do au na rabun-rabun manuk. Akuma, muda inda, u darap ko naon !!! Murbolnang mata ni angkangi si Lindung.
“Sumpah angkang, inda au i”, ning si Jalupis.
“Amang ... marsumpah museng dope ho !!!” Ning angkangi si Lindung salaos mandarap-darapkon muko ni si Jalupis : “Pak ... pak ... pak”, tarbege sora ni darap-darap tolu kali.
“Ulang be angkang, mancit kulala”, ning si Jalupis get tangis.
“Ho dei kan ?!!” Marsapa mulak angkangi si Lindung.
“Inda angkang, na sala mata dei angkang i”, ning si Jalupis leng martidak.
“Amman ... leng na inda pe mangaku. Takok u pio do si Torkis tu son, na rap tangkas ami ida ho liput sian bagas ni amangboru si Dame i nangkin, bodat do ho !!! Murmuruk angkangi si Lindung. Dungi, i panenju ia boltok ni si Jalupis, i cipakkon ia muse urut nai. Murmurmarkoti doma ilala si Jalupis, get manetek doma ilu ni mata nia arani ancitna nai dakdak angkangi si Lindung.
”Ampun ... angkang, olo au deiiiii”, mangaku si Jalupis asok.
”Jadima songoni, i ulai ho dope parangemi na solabo i ?!! Murmagogo obar ni angkangi si Lindung.
“Indabe angkang, losi mau, inda ubaen be”, mangkuling asok si Jalupis set robak ilunia.
“Pade anggo songoni”, marasok mulak sora ni angkangi si Lindung. Dungi mangkuling muse ia mulak : “Adong dope sigaretmi, jia jolo sabatang !!!
“Isonbo ... angkang”, dialusi si Jalupis salaos manyurduon sigaret dohot kayapina.
Dung i pagara ia sigaret idupon i, i arsik ia muse tarlolot saotik, baru i pakaluar ia timbus sian baba dohot lubang ni igung nia margonti-gonti. “Tok”, tarbege sora dotok sian baba ni angkangi si Lindung arani sabasna ilala ia.
“Ketale mulak tu sopo jago an, inte-intean kalai non dita !!!” Ning angkangi si Lindung salaos mardalan murudur padua si Jalupis i balakang nia.

“Songon na marbosar u ida ulumu sian siambirang, Jalupis ?!!” Mangkuling si Kedan dung lalu alai nadua tu sopo jago i. I tambai si Kedan muse : “Na mangua dei luai, takok tokok ulumu tu batang ni ayu ?!!
“Indaba ... nai tinggang ni indalu dei ulu nia. Angkentong na porluan ilala ia get mangaligi manuk na opat patna di lobu manuk ni amangboru si Dame i”, muririsak si Adian muse.
“Olo ... anggo manuk na opat patna di itaon maia na dong i, anggo di alak na balokan, leng na dua dei patna, nga songoni Dame ?!! I ompas ia hata tu si Dame.
Ro alus ni si Dame : “Tarsongoni dei dabo bagian ni alak na marraja di ulu totna, ira-ira tarsongon te na hiang, murmalolot murmabau”, ben milasna roa nia paida-ida si Jalupis.
Pabege-bage risak ni dongan-donganna, mangkuling angkangi si Lindung : “Marsipan baba muyu !!! Adope marmodoman !!!

Dung gusar angkangi si Lindung, alai sude rap sip, oni markean sada-sada tu sopo podomanna be. Na tinggal di sopo jago i, ima angkangi si Lindung, si Dame, si Adian dohot si Bania. Inda sajia lolot dungi, sian sopo jago i tarbege ungkor na dohur-dohur : “Hhhzzzgghhhhooooooggggggggrrrrrrrhhhhhh ................”.

Gandoang, 12 April 2009

Boa-boa:
Mangido mohop ale ami perjolo muda adong gorar ni koum-sisolkot nami na sarupo dot gorar-gorar na adong di bagasan ni carito on, inda na i sangajo. Carito on dibaen sian parbinotoan nami satontang tu angoloan ni poso-poso sadebana di hitaan.

Boa-boa

2009-04-15T17:17:00.002+07:00

ASSALAMU ALAIKUM WW,

TU SUDE KOUM-KOUM NAMI NA RO MARSILATURRAHMI TU BLOG ON,

MANGIDO MOHOF HAMI NASAGODANG2NA, ON DOPE SO BISA ONLINE HARANA SEGO WIRELESS DI SABA NAMION, DISAMPING NI I TARSIBUK SOTIK KAREJO (INDA BAEN NA DOHOT KUMPANYE BA), MOHON MAKLUM MADA KOUM2 NAMI.

WASSALAM

FADHLY ABADAN SYAKURO NASUTION

Sirangrang Torus

2009-03-23T13:44:00.001+07:00

Muloi ma marningot au, taon pitu pulu lima najolo, santak tu marsiajar maposo iba taon lapan puluan i, bujing-bujing songoni tu inang-inang di hitaan, khususna di Mandailing, salalu dei marbaju kurung dot mar singgulu. Pala kehe iba tu pasar Kotanopan, tanda dei alak kita dot alak pandatang, harana halak kita totop dei marbaju kurung muda bujing-bujing dohot marsinggulu pala madung inang-inang.

Udon Tano ni Parbodat

2009-02-28T09:37:00.005+07:00

Disada hadist ni Rasulullah SAW adong didok Ibana di hita na kira-kira bahasa Mandailing na songon on " Tuntut hamu ale ilmu i olo pe tu Negeri Cina". Harana dimaso i negeri Cina tarmasuk ma sada Negeri nadung bahat kemajuanna, khususna dibidang ilmu keduniaan.

Disada maso atiha dot au pangajian, pas atiha kaji tasawuf, idokon guru nami i ma di hami bahaso Manuntut ilmu tarmasuk ma sada kewajiban di hita sasudena, baik ia ilmu dunia tarlobi-lobi antong ilmu akhirat. Jadi, sampe tudia ato sabatas aha kewajiban dihita manuntut ilmu? Jawabna sabatas kaporluan dihita mantong, porlu dihita mar Tauhid, wajib hukumna mamparsiajari ilmu Tauhid, diwajibkon muse dihita sumbayang, wajib muse mada hukumna mamparsiajari ilmu sumbayang, puaso, zakat (pala dung sampe ukuranna), soni muse satorusna.

Carito on, inda dong maksudna untuk parjat-jati halak kita da on, cuma sekedar parsiajaran ma dihita on, ulang nian tu pudi niari adong keluarganta nasongonon, gorarna pe carito najolo do on.

Disada kampung di Mandailing Julu namargorar Kampung Tupudi, adong ma sada bayo namargorar harajaan Jalampas, karejona marbodat, maksudna paijur arambir ni halak pake bodat. Pala adong naget paijur arambir kalak, ijaki halai mai si Jalampas paijurna. Parbagianna antong sapulu dua, maksudna pala sapulu arambiri lapan di nampuna nai, dua bagian si Jalampas.
"Hayo, naik..... pilih, jatuhkan, lagi, turun!!!" ningna sajoma mandok bodat niai. I muse ma dabo bodat di Mandailing, angkon namar bahasa Malayu do so mangarti bodat i. Sampe sannari pe uida pala adong parbodat, leng namar bahasa Malayu ma i tu bodat i, padohal pala mangecek ia dot alak naro ngon Medan ba inda namangarti ia bahasa Medan (Malayu), tai balik-balik boto hamu anggo mangecek dot bodat niai madung rap mangarti ma halai i bahasa Medan (Melayu). Nalawak mai tie?.

Pendek ni caritona marrasoki Jalampas, marniat ma ia marjagal tu Medan, ima marjagal Udon Tano.
Dung lalu tu Medan, dapot Jalampas ma sada parjagalan na sian hayu martaruma muse, muloi ma ia marjagal kira-kira pukul 8 manyogot-nyogot. Adope, marroan juo ma halak antong tu pasar marbalanjo.
“Berapa satu?” ning sada bayo ma mandok Jalampas
“Naik!” ning Jalampas antong mandok bayoi, manaek muse antong bayoi tu parjagalan ni Jalampas i.
“Ini berapa?” ning bayoi muse mulak marsapa
“Pilih!” ning Jalampas mangalus
“Iya, sudah dipilih yang ini, berapa harganya?” ning bayoi
“Jatuhkan!” ning Jalampas muse
Idabuon bayoi udon tanoi, iambang ia baen na tahan banting, rupana sarsar dipantar ni parjagalani.
“Lagi, lagi!!!” ning Jalampas muse mulak
Mur idabuon bayoi udon tano ni Jalampas, mur sar-sar muse udon i, sampe akhirna marbadai halai. Untung ma boto hamu adong disi Polisi (halak kita muse) ima mandameon na.

Marsiradu Kue Lapis

2009-01-21T14:09:00.005+07:00

Dung do salose sumbayang subuh namanyogoti, Jamangombak pe nasibuk sajoma di dapur, manggoreng pisang si Raja. Songoni juo alak bagas nia pamasak sipulut get bae kotan dongan ni goreng pisang i ma naron. Boru bujing niai pe si Karlina madung dot muse marlapu itak dot gadung mambaen godok-godok.

Halak pe muloi ma marroan tu lopo niai, get minum kopi lao mangan kotan sipulut pake goreng.

"Baen jolo kopi satonga da, gok aek na, palalu oban kotan sipulut nai!" ning Jalumpat ma mandok umak si Karlina lao manjama-jama piso guris nia na itabusan tuari.
"Sobar santongkin da udakna, get masak ma goreng nai, torangan ari dabo nangkin, tarahim ma halak di masojid so tarsonggot au" ning umak si Karlina muse antong mangalus.

"Aha muse mai so torangan ari homu i?" ning Jalumpat muse mulak marsapa.

"Alak mai dabo, sanga naget mangua, anggo homu pe da reban, adong-adong sajo sapaon muyu" ning Jaombak lao jongjong mangangkat goreng pisang sian kuali i.

Inda sadia onok ro musema Jabandol dot Jadomu, marsipaido pangidoanna ma halai di lopoi, muloi muse ma marcarito muloi sian carito najolo atiha jaman Bolandai santak tu carito sannari jaman gombal-gambul on. Apalagi dung ro Jaterter, na giot tu siambirang bagema caritona, inda porlu isia halak na bahat namarbaso dilopoi, arambir dua, pisang sabatang, madung ningna bage.

Asyik-asyik marcarito halai dilopi, ro ma umak si Sundut maroban kue lapis tu lopoi.

"Bo, dung butong iba, baru ro hamu!" ning Jaterter ma mandok umak di Sundut

"Ala, pangan dabo soni sada, so irasoi ho mada na upamasak!" ning umak si sundut muse inda ra talu.

"Ah, tai najolo dor do upangan nai pamasakmu, baen na ke au mangaranto, inda tar painte hobe, mangalumpat maho tu ayah si Sundut!" ning Jaterter muse mangalus lao mangan kue lapis na rara, bencut adop samping.

"Najolo dabo najolo dei, sannari madung rap tobang be ma, uamu nanga ibe" ning umak si Sundut songon na mambela diri.

"Cubo dabo warna na lainnai, asing muse dei non rasona" ning Jabondar mandok Jaterter.

"Ah, au muloi sian najolo leng na rara maia jiotku i, gorarnape Panganon Dung Isya" ning Jaterter muse antong manjawab.

"Anggo au ba ngada, najolo nagorsing najopan roangku i, anggo sannari degenan dau Panganon Karupuk Sambal, siak-siak capot" ning Jabondar songon na bangga.

"Anggo au boto hamu leng narata do, Panganon Pala Potang" ning Jamangombak muse sian dapur.

marsambung....

Aek Namartubi

2009-01-10T11:45:00.004+07:00

Adong sada carito najolo (inda carito nasabotulna), Adong muse ma sada bayo namargorar Jaombak (inda gorar nasabotulna). Disada maso (inda maso nasabotulna) kehe ma Jaombak mangulangi tu Batang Natal mangaligi paoumpu nia sian boru.

Maso i antong indape adong kendaraan songon sannari (Nabana Tour, Aek Mais dll). Kendaraan maso i "Tilcak-tilcak mong" dope alias "padati". Jadi, pendek ni caritona marangkat ma Jaombak sian Mandailing Godang tu Natal marpadati, kadang pala pas tangkok dalan nai isorong ma padati on sian pudi manolongi horboi. Markisar dua ari lalu ma Jaombak tu Batang Natal, torus ma mangaligi paompu nia panggoraran sian boru nagodangna.

Gorarna pe antong namangaligi paoumpu lao mardalan-dalan, kehe juo Jaombak tu topi ni laut di Batang Natal mangaligi namangaligi. Bo rupa, dung lalu di topi ni laut i tarida ma disia aek namarombak margulung-gulung doma, dor muse manyampak sampe tu lambung nia, marpikir ma Jaombak sada-sada ia.

"Nasantak muse antong baya ison, adong muse "Aek Namartubi" leng pupu di roa nia. "Pade do on sugari ioban tu Mandailing, so adong ligi-ligion ni dongan tongkin nai gonti-gonti ni silua" ning ro ni Jaombak ma sada-sada ia.

Dung onok marpikir-pikir, dapot ia ju akal, ibuat ia ma aek "Namartubi on" sabotol godang, itutup ma dohot abit karung, ipamsuk Jaombak muse ma tu padati niai.

Markisar sapoken dung ni, mulak ma Jaombak tu Mandailing Godang leng marpadati. Dung lalu tu Mandailing marcarito ma Jaombak tu halak sakampung bahaso ia maroban "Aek Namartubi" sian Batang Natal. Mambege carito on, marroan ma halak na bahat tu bagas ni Jaombak mangaligi "aek namartubi" on. Ibuat Jaombak ma ayan ganan ni aek i, iparumar ia aek nai botol i tu ayan, lao mangkuling ma Jaombak, :

"Adope, tubi, tubi, tubi" ningia sajo ma mandok aek i

Tai so iboto hamu inda muit aek na isuru niai namartubi i, maila ma Jaombak di halak narami i. Tai Inda Jaombak gorarna anggo kahabisan akal, dapot ia juo alasan.

"Sonon ma dabo koum-nami, ning roangku baen lojana do aek on, muloi sian Batang Natal santak tu itaon, idei so inda ra martubi" ning Jaombak ma adop kalak narami i.

"Imadabo so adong di hita an carito ni aek namartubi, santak sannari pe pala get kehe marmayam tu Sibolga sanga tu Batang Natal atope sanga tujia sajo namangaligi laut idokon kalak mai nagiot mangaligi aek namartubi" ning Ompung Jadurung ma adop kami manutup carito.

"Adong muse dope sada nai, carito ni "Peti Badendang" ning Ompung i mulak adop kami.

"Sonjia caritona ompung?" ning ku marsapa

"Sobar mada, sada-sada do dabo!" ning ompungi mulak adop kami.

Marpiul Nalobangon

2009-01-06T11:13:00.008+07:00

Dompak daganak iba najolo, pala mar huling-kulingan dohot dongan niba na sabaya, ibaen sajo mai parjolo huling-kulingan na lawak :

"Huling kulinganna" ningiba mai

"Anna" ning dongan nibai ma mangalus

"Marpiul Nalobangon?" ningiba muse mulak marsapa

"Halak na (mangido mohof) buang angin!" ning dongan niba mai lao rap martata iba nadua

Marcarito najolo muse ma Amangboru Jamandurung disada maso najolo dompak ro udan, di suro-suro Aek Julu. Ibuat ia timbako sek dohot karotes pambalun, ibalun ia ma imbako sagodang ni induk tangan lao i tutung ia dot loting pak-pak. "Disada kampung, adong ma sada bayo na sangat ulah namargorar Jagidik" ning amangboru Jamandurung palalu Carito.

Disada ari, marjuguk-juguk ma Jagidik di lopo kopi na adong di kampung i. Inda naminum ba Jadgidik, harana inda dong epeng nia panuori ni kopi. Get marutang mabiar ia goyak roa ni umak si Kobet (nampuna lopoi), harana utang na poken nalewat pe naso iangsur dope, maklum ma dompak parudan sannari, maraek batang, jadi inda bisa mangguris.

Asik-asik marangan-angan ia, roma tu lopoi daganak na marsiajar poso-poso opat kalak, manabusi goreng.

"On do baru can" ning roa Jagidik dibagasan roa nia

"Hei daganak, bisa hamu dei marpiul lao manggosok ipon?" ning Jagidik ma adop daganak i. "Pala bisa homu, utabusi jomu goreng dua be sadalak" ningia muse adop daganak i.

"Peto do ompung?" ning daganak i mandok Jagidik

"Peto, cubo hamu ma!" ning Jagidik mangalus.

Marlojong si Porkot tu bagas ni alaian mangalap gosok ipon dot ubatna. Dung lalu ia mulak tu lopoi, margonti ma daganak i manggosok ipon lao marpiul di jolo ni lopoi. Tai boto, inda dong na bisana, hum na "dopes" sajo maia sorana, sampe loja halai na opat margonti.

Akhirna mangecek ma si Pultak adop Jagidik, :

"Pala ompung nanga bisa ompung marpiul lao manggosok ipon?" ning si Pultak

"Bisa" ning Jagidik

"Inda yakin au i" ning si Pultak

"Aha ilen komu jau pala bisa au?" ning Jagidik

"Hami tuori non kopi ni ompung i!" ning kalai naopat

"Baen kopi jolo umak Kobet!" ning Jagidik adop parlopoi, "Palalu oban Gudang Garam sabatang!" ningia muse.

Dung isirup Jagidik kopi, ipangan ia goreng pisang siraja sada, ibuat ia gosok ipon, i ela ia muse ipon palsu nia ngon baba nia, muloi ma ia manggosok ipon palsu niai lao marpiul ma Jagidik torus mangutur tot.

"Ah, napaoto-otoon do ompung!" ning daganaki lao manggarari kopi ni Jagidik.

Boa-boa

2008-12-23T08:35:00.004+07:00

Assalamu 'Alaikum WW,

Tu barisan ni Hatobangon, songoni na i patobang, tu barisan ni mora boti kahanggi, boti muse tu barisan i anak boru.

Inda taraso, madung di ujung ni taon muse hita sasudena. Sadarion, tanggal 25 Dzulhijjah 1429 H, bararti markisar 5 ari nai na masuk muse ma hita tu Taon Baru 1430 H. Hum nabaru dope ari rayo, madung ari rayo muse, hum nabaru dope puaso, naget puaso muse ma. Secara sadar atope inda, tiop ari, tiop jom, tiop minit, bahkah tiop detik nadung urak muse mada jatahta namangolu di ginjang ni tano ni Tuhan on.

Jadi harani i, inda sala da roa nami molo hita evaluasi muse jolo dirinta sasudena, sanga nadung cukup do bohal atope nangkan obanonta ampot cogot kaduan on, ipio Tuhan tai ita mulak tu Rakhmat nia. Mudah-mudahan di taon nangkan naro sampe satorusna jadi ma hita halak na salalu pature diri, baik ia untuk hangoluan di ginjang ni tano on, tarutamo muse incogot on di adopan ni Tuhan ta, Amin Ya Arhamarrohimin.

Tarsaima jolo sian hami, harana na tempo panjang muse ma, jadi mungkin juo hami untuk sementara waktu inda Online, untuk i hami haropkon kamakluman ni koum-koum na markunjung di blog on. Insya Allah pasuo hita mulak di taon nangkan naro 1430 H.

Rasulullah SAW bersabda :

"Barangsiapa yang tahun ini (amal ibadahnya) lebih baik dari tahun sebelumnya, maka ia adalah orang yang beruntung. Dan barangsiapa yang tahun ini sama saja dengan tahun kemarin, adalah ia orang yang tertipu. Dan barangsiapa yang tahun ini lebih buruk dari tahun kemarin, maka ia adalah orang yang terkutuk".

SELAMAT TAHUN BARU ISLAM

1 MUHARRAM 1430 HIJIRIYAH

Fadhly Abadan Syakuro Nasution & Keluarga

Madina - Minangkabau

2008-12-14T09:51:00.010+07:00

SABARIBA DI HOMU SABARIBA DI AU

Di Rimbo Panti adong sada carito legenda antara ni halak Mandailing dohot halak Minang, songon on :

Adong ma dua halak namardongan, sada halak Mandailing sada nai halak Minang, kehe marburu ursa tu Rimbo Panti i. Singkat carito dapot kalai nadua ma sada Ursa di arangani, isarat kalai antong ursai tu untuk ni tor i, adong disi na napa disi ma halai giot marbagi.

"Sabariba jomu sabariba jau, ulu nai ita bagi dua" ning halak Mandailing i antong

"Indak bisa bantuak itu do, satangah di den satangah lai di ang, kapalonyo awak bagi duo" ning alak Minang i muse inda ra talu. Walhasil inda dong dapot kaputusanna, ipanenju alak Minang i alak Mandailing on.

"Ulang dongan" ning kalak Mandailing i

Iambang alak Minang on baen na tahan tenju alak Mandailing i so idokonna "ulang", ipanenju ia muse sakali nai.

"Madung udokon antong "ulang", leng ipupu bituamu" ning ia lao mambalos

Kasidunganna martenju halai nadua di arangani, inda dong namagoraina, inda dong muse namambotona, sampe "Is Death" kalai nadua.

BABIAK BATANG KAPEAK TU

Sutan Parinding, alak Minang na ro mangaranto tu Mandailing karejona mangguris apea. Disada maso kehe ma Sutan Parinding mangguris, kabotulan ro udan borngin nai, jadi dung lalu tu apea an, ida ia "Maraek Batang" mulak ia mulak tu huta. Ditongandalan pas di tekongan, pasuo ma Sutan Parinding dohot Japambiar, marsapa ma Japambiar :

"Aso mulak komu?" ning Japambiar

"Babiak (Maraek) Batang Kapeak Tu" ning Sutan Parinding

"Haaaaa, Babiaaaat????" ning Japambiar lao marlojong tu huta

Iambang Sutan Parinding sanga adong namangua, marlojong muse ia mangkojar si Japambiar, kasidunganna marsitulusan kalai nadua. Tarparogok muse ma halai nadua namarsikojaran i dohot Jando si Mungkir na get ke tu saba marbabo kacang, :

"Aha do namagua heeee" ning Jando si Mungkir pucat baen songgotna

"Adong babiat di apea-an ning Sutan Parinding" ning Japambiar torus marlojong.

Dohot muse marlojong Jando si Mungkir lao mandoik baen biarna, sar-sar doma abit jiak nia inda sodar ia.

Dung get lalu ma tu huta kira-kira dung aman baru marsipatorangan kalai natolu, untung ma Jando si Mungkir mangarti sotik-sotik bahasa Minang.

"Ijia Babiat?" ning Jando si Mungkir

"Di Apea an ning Sutan Parinding" ning Japambiar lao manutup mata nia rangkak

"Babiak, Indak Babiat Do, Maraek Batang" ning Sutan Parinding muse lao manutup mata nia dot jari-jari nia rangkak muse.

"Babiak nimu antong, inda Maraek Batang" ning Japambiar muse mangalus

"Oni, aso itutup komu mata muyu?" ning Jando si Mungkir muse marsapa dihalai nadua

"Pature jolo abitmu" ning Japambiar mandok Jando si Mungkir, rupana nadung sar-sar do abit nia na dohot-dohotan marlojongi, ban dalam nai sajo doma antong natinggal.

Jolo Surat-suratan Dei So Baru Ipon (Dua Bolas) Tamat

2008-12-11T10:08:00.004+07:00

Tanggal sapulu Dzulhijjah nai dung kotu, marangkat ma Jasobaruddin dohot rombongan mangalutar Jumroh Aqobah di Mina. Halak marsosot inda tanggung bahatna, tai inda boto nataraso ilala Jasobaruddin. Dung lalu tu pilar nai, mangalutar ma Jasobaruddin pitu batu, "Bismillah Allohu Akbar" ning Jasobaruddin ma lao mangaramban tiangi sampe abis batu na pitu i. Inda puas ilala ia, irambankon ia muse saroben nia, hurang jou dope puasna irambankon ia muse solop nia. Get irambankon ia muse ma ikat pinggang nia, untung ma copat ia sodar, anggo inda madung sar-sar abit.

Di ari na paduana pe (Hari Tasyrik na partama) mangalutar muse ma Jasobaruddin dohot rombongan muloi sian Jumrotul Ula, Wustho dohot Aqobah. Soni muse ari Tasyrik napaduana dohot napatoluna, torus ma markurban Jasobaruddin di Mina sada Unto.

Dung habis hari Tasyrik potang nai targan so bonom mataniari, marangkat ma Jasobaruddin mulak tu Mokah malaksananaon Tawaf Ifadhoh torus sa'i, baru Tahallul Tsani (dung Tahallul Awal di Mina). Ibotak Jasobaruddin muse ma mulak obuk nia na baru tubui, licin muse mulak songon nabaru salose umroh i. Ilokotkon Pambimbing ni Halai i ma gorar Oji ni Jasobaruddin manjadi "Haji Abdurrahman Bin Abdul Malik".

"Mangan kita oji?" ning Malim Wahab ma mangarisak Jasobaruddin atiha margeler mangan di hotel mangida Jasobaruddin madung Marjubah nabontar, marlobe boti marsaroben di ulu, sada nai isalempangkon ia di abara nia.

"Tafadhdhol, Syukron" ning Jasobaruddin margaya bahasa Arab muse lao maniop-niop Tasbih.

Dua ari nai so marangat tu Jeddah so mulak tu Tanah Air, isompatkon Jasobaruddin juo dope Umroh marmiqot sian Tan'im, 15 rial do antong ongkosna. Marheranan jabat alak nabahat mangida Jasobaruddin baen asyikna na mar ibadah i.

"Tawaf satiop waktu, Umroh dor, Nasantak ma ho namaribadati" ning malim Wahab muse ma

"Ison maia dabo nabisa tawaf dot umroh on guru, jabat dung lalu tu Mandailing marlapu muse mon dot bustak" ning Jasobaruddin lao mikim.

.....

Dung salose mangan di ari napatoluna di Mokah manyogot-nyogot, mangkuling ma ketua rombongan tu sude jamaah anso rap marsiapma barang-barang dohot silua, harana naron angkan namarangkat ma tu Jeddah dung salose sumbayang Dzuhur. Sibuk muse ma Jasobaruddin marbalanjo baen silua, muloi sian tasbih, busayan, miyak wangi, tamar dohot na asing-asingna sampe donok ma waktu Dzuhur. Bahang di Masjidil Harom nasangat gogo, tarsonggot Jasobaruddin, taraso ma ilala ia bahaso nangkan namaninggalkon Mokah ma sadarion. Marangkat ma Jasobaruddin tu Masjidil Harom, ipaksa ia marsosot tu jolo ni Ka'bah i harana dung salose non sumbayang Dzuhur natorus ma Tawaf Wada' (Tawaf Perpisahan). targan so masuk Dzhuhur, tawaf sunat juo Jasobaruddin sakali nai sampe Muazzin Qomat, dapot ia ma pas di samping ni Hijril Ismail, torus ma sumbayang Dzuhur disi.

Dung siap sumbayang Dhuhur, mamutar ma Jasobaruddin tu Rukun Yamani torus tu Rukun Hajarol Aswad mamuloi Tawaf Wada'. Sian putaran napasadana santak salose, natangis sajoma Jasobaruddin harana mur so tartinggalkon ia ilala ia Masjidil Harom be, lobi songon na hamatean doma ilala ia ancitna. Dung Siap Tawaf, sumbayang sunat di Balakang ni Maqom Ibrahim, margese ma Jasobaruddin tu samping palan-palan maninggalkon Ka'bah, lao sasakali mangaligi Ka'bah torus tangis santak tu pintu sada torus kaluar sian masojid i, leng mangaligi juo Jasobaruddin tubalakang sampe bongkak doma mata nia natangis i sajo.

.....

Dung lalu tu Hotel, mangan arian, torus ma marsiap mijur tu toru harana madung isi kian ma motor painte rombongan na giot marangkat tu Jeddah. Markisar sajom dung ni marangkatma rombongan ni Jasobaruddin tu Jeddah. Anggo Jasobaruddin natangis sajo ma ia lao manaili tu pudi mangaligi sude Gurun Pasir dohot Mokah na itinggalkon i. Markisar tolu jom lalu ma tu Jeddah, dison maradian muse dope rombongan sumbayang Azhar lalu marmayam satongkin tu Laut Merah di Masojid Terapung painte borngin non markisar pukul sambilan so marangkat Pesawat tu Indonesia.

.....

Pukul salapan borngin marangkat muse ma rombongan tu Bandara King Abdul Aziz. Jasobaruddin baen nadung mangarti, inda be na canggung ia, olope halak namargoso mangurus tiket, pareso paspor sagalo macam, anggo Jasobaruddin madung santai sajo. Pendek ni carito madung di pesawat i Jasobaruddin dohot rombongan nangkan manuju tu Medan - Indonesia. Marangan-angan ma Jasobaruddin dibagasan roa nia, :

"Muloi antong sian Madinah santak tu Mokah, Arofah, Muzdalifah, Mina, mulak mulak tu Mokah, Insya Allah inda dong da ibaen waktu niba kacuali namaribadah sajo do, songoni juo aek na di inum inda nadong salain air Zam-zam". "Samantara pala dung lalu tu Mandailing tongkin nai minum aek Batang Gadis muse mon baya, ulang sugari maruba nian Tuhanku pangalangka niba dung tu Mandailing". "Gorar niba pe madung oji, otik bahatna nangkan jadi panutan ni halak mon, borat pe parjuangan salamo di Mokah, boratan muse dope tongkin nai mampartahankon gorar on, ulang sanga mardosa halak gara-gara niba". "Sumbayang niba angkon na totop mon diwaktuna, tingkah laku niba dohot pandangan niba angkon nai jago mon, obar niba ulang sai purpar be songon najolo, angkon namarsiajar agama muse mon mulak dung tu kampung, tongkin nai isuru halak iba mandoah sanga jadi imom inda bisa ia, maila mon" ning Jasobaruddin sajo ma dibagasan roa nia.

"Apalagi dung lalu muse tongkin nai tu Mandailing, inda songon nai Mokah be napasuo dohot iba, na mamutar dei saratus lapan pulu darajat napasuo jiba di Mokah dohot di Mandailing, sobar angkon nai pabahat mon, so jadi oji nibaon Haji Mabrur songon na idokon di Rasulullah SAW i".

.....

Tarpodom Jasobaruddin namarangan-angan i, tarsonggot ia madung maradian di Polonia Medan, inda na sodar ia be marlewatan pe pramugari ni pesawat i atiha songon naparjolo marangkati. Dung Kaluar sian Bandara torus ma marangkat tu Hotel, painte marangkat cogot tu Mandailing, tano nadung itinggalkon Jasobaruddin lobi opat pulu ari.

.....

Satonga kilo meter nai sian kampung ni Jasobaruddin, madung inte halak nabahat manyambut Jasobaruddin naro sian Mokah. I arak halak nabat ma Jasobaruddin tu Masojid sumbayang lao sujud syukur ma ia disi bahaso nadung siap sude mangkarejoho Rukun Islam na palaimana ima manuneon Ibadah Haji. Torus muse ma tu bagas ipataru halak nabahat, tarsonggot Jasobaruddin harana madung disi umak si Taing dohot si Taing manyambut Jasobaruddin. Dung siap ipagugut dohot sira, i upa-upa dohot danon, juguk ma Jasobaruddin diginjang ni amak lampisan lao marcarito lao mambagi-bagi silua di halak nabahat.

"Adope, kei Taing tu ampuan ni Pak Haji" ning alak bagasnia ma mandok si Taing lao mikim

"Olo, naron borngin ma bagian mu" ning Jasobaruddin ibagasan roa nia lao mikimmuse adop toru.....

TAMMAT

Jolo Surat-suratan Dei So Baru Ipon (Sabolas)

2008-12-05T09:06:00.007+07:00

Madung sapoken lobi Jasobaruddin dohot rombongan di Mokah, madung dor Jasobaruddin tawaf sunat dohot umroh, harana mura do angkosna tu Tan'im mambuat miqot ni umroh. Di sakitar ni Masjidil Harom pe mur martamba ari mur sompit harana mur marami muse halak namarroan sian sude penjuru dunia. Tai anggo Jasobaruddin ba inda na porlu disia, rami-sorami sarupo do ilala Jasobaruddin sude, pokokna tiop masuk waktu madung di balakang ni Maqom Ibarohim ma ia, kadang muse madung di jolo ni Hijir Ismail.

Tanggal salapan Dzulqaidah (Hari Tarwiah), rombongan pe marangsur-angsur marangkat ma tu Arofah, soni juo Jasobaruddin dohot rombongan madung lalu di Arofah potang-potang nai. Dung sumbayang sunat ihrom di hotel, marangkat ma Jasobaruddin la mangompatas na godang namarbontuk rangsel lao manaek tu motor namardalan-so mardalan baen ramina. Rupana nadung lengkap do sude iparsiapkon Jasobaruddin di Mokah, itabusi ia rangsel, igoki ia air zam-zam 3 deriken, itabusi ia muse kue-kue parsiapan ampot tarlambat ro jatah.

Markumpul ma sude disi jamaah haji markisar tolu juta halak, nabontar doma sude, laik ma so indokon kalak on ma sebagai Padang Mahsyar Kecil di duniaon. Jasobaruddin madung masuk tu tenda, juguk ma ia disi marzikir inda tanggung khusukna. Maneteki ilu ni mata nia taringot dosa nadung salpu na dung tarlanjur dikarejohon. Ibuat ia Qur'an, mangaji ma ia disi dung salose kotu Isya sampe tonga borngin.

Subuh, sumbayang ma Jasobaruddin tu masojid Namiroh di Arofah, torus mulak tu tenda sarapan soni mangulaki mulak marzikir, sumbayang sunat dohot na lain-lainna. Dung masun waktu sumbayang Lhuhur, mur marsitutu muse ma halak maramal di tenda masing-masing, harana on ma muloina na idokon wukuf di Padang Arofah. Sora ni natangis sajo doma na binege sian tenda tu tenda manyosali sude kasalahan di waktu na lewat.

Santak masuk waktu Azhar, Jasobaruddin dohot rombongan nasibuk sajo dope marzikir di bagasan ni tenda sampe masuk waktu magorib. Dung sumbayang Magorib, marsiradu muse ma jamaah nabahat tu Jabal Rohmah (Parsuoan ni Nabi Adam dot Siti Hawa, inganan ni Rasulullah SAW marhutbah di Haji Wadak). Manaek Jasobaruddin tu ginjangan marisar-isar inda sodar baen asyikna nagiot maribadah i, dung lalu dope tuginjang so baru lomos ia mangida halak nabahat i mamontar doma ditoruan. Mandoah ma Jasobaruddin lao mamandang adop langit, mangido ampun soni mangido partolongan tu Tuhan tai ulang nian sugari tubalakang tongkin nai be marbalut dohot bustak ni dosa.

Dung puas ilala ia, mijur ma ia sian Jabal Rahmah, mulak manjalaki rombongan harana marangkat muse ma tu Muzdalifah (Mabit / Bermalam). Iambang Jasobaruddin nadao sian Arofah, rupana baya nadonokan do, cuma antong baen rami ni halak soni inda apil dalan harana ni tenda nasarupo ido so marmotor kalai tu Musdalifah. Mardalan so mardalan juo kendaraan manuju Musdalifah baen ramina, tonga borngin doma so lalu.

Ison Jasobaruddin dohot rombongan maradian musema marmalam lao manjalaki karekel nangkan ipake Malutar Jamroh.

"Denggan ligi, tarjoloki honon te ni ambeng!" ning Malim Wahab adob Jasobaruddin lao margiri

"Inda mangua i, so losi setan i, ulang dot batu sajo iramban, sasakali so iboto setan i na bau" ning Jasobaruddin lao manjalaki karekel di topi dalan i.

Isi ma sude Rombongan saborngini marmalam, modom marpakean umroh inda martenda. Tai antong hum gorarna do namarmalam, anggo Jasobaruddin inda namodom, harana leng urang puas jou ilala ia namarzikir i, jadi tiopma tasbihna lao gulung marbantal tas lao mangan-mangan roti soni lao minum air zam-zam na dioban nia sian Mokah.

Dung salose sumbayang Subuh Torang ari nai (10 Dzulhijjah), marsiap muse mardalan tu Mina get Malutar Jumroh. Targan so i, kehe muse ma marrami-rami tu Masy'aril Harom rap madoah soni mar taubah, torus ma arah tumina. Marlojong saotik di tontang ni Wadi Mahsyar (Tempat turunna Bala ni Tuhan tai) tu tentara Bergajah na ro sian Yaman nagiot manghancurkon Ka'bah.

Dung lalu tu Mina ribur muse jolo Jasobaruddin manjalaki tenda dohot dongan-dongan nadung marmagoan inda binoto sanga tudia, untungma bahat disi peta sanga didia lokasi ni kemah na sian Indonesiaon. Ijalaki muse kemah nasian Mandailing, dung marloja-loja baru marsuo.

Marsambung....

Uyup-uyup Bulu Parupuk

2008-12-01T13:46:00.008+07:00

Uyup-uyup Bulu Parupuk

Nasolot Disopo Saba

Oli-oli Madung Mapukpuk

Na i opkop aha suada

"Carito on ulang hita tiru harana inda na contohon on!" ning udak Jamangampal ma mandok hami disada maso atiha daganak dope iba najolo.

.....

"Disana huta adong ma dua halak namardongan akrab, sada gorarna Jalandit sada nai Jabolut. Nadua halak on inda nadong karejona salain na get manjalak-jalaki nasimbil sajo (manangko)". "Ahado namusim di kampungi i madung dot kalai nampunana, padahal inda na unjung dot kalai manyuanna. Mardanon unte, mangan unte halai, mardanon rambutan maroban rambutan muse halai tubagas, mardanon lancat madung alai puna muse lancat ni halak" ning udak Jamangampal lao pature juguk nia markombangsila di tangga ni bagas godang atiha ro udan namanyimbur marayak pukul sambilan borngin.

Baen sannari musim parudan, buah-buahan pe tardokon madung mardanon sudena muloi sian Tarutung, Lancat, Manggis, Jambu Jambak (Boll), Rambutan dohot nalain-lainna. Si Jalandit dot Jabaolut pe madung sibuk muse mangintip-intip sanga didia naadong suan-sunan naso ijago, manombo madung modom bage halai dipadang-padangi painte mulak nampuna kobuni tuhuta so ibuat kalai non danon ni suan-suanani.

.....

Disada ari pas ari Jumahat, marniat ma halai nadua manangko Tarutung ni Ompung Londuk na kabotulan muse tarutungna tarutung Sijantung nagodang-godang boti tabo muse isina, menek-menek batuna. Pala ro ompung Londuk tu huta maroban tarutung merdet doma ijur si Jalandit dot si Jabolut mangidana, tai bia baenon, get mangankon inda dong epeng panabusina.

Dung lalu halai nadua tu kobun i, rupana na isi dope ompungi marjago tarutung painte adong namadabu. Ibaen ompungi rupana antong isi sopo-sopo nia nalampas martarup bulung ni salak, isi sajo maia marjago tarutung tiop ari. Pehhhaakk, pehhhaaak, koaaaakkk ning batuk matobang ni ompungi tarbege dialai nadua sian nadao. Leng juguk ma halai nadua di padang-padangi painte ompungi mulak arian sumbayang Jumahat, sampe tarpodom bage doma halai di las ni ari i.

Markisar jam sabolas antong mulak ma ompungi tu huta maroban tarutung boti get sumbayang Jumahat. Dung tarbege di Jalandit dot Jabolut nadung mulak ompungi tu huta, kaluar ma halai sian padang-padangi juguk ditopi ni kobuni painte adong tarutung na manampuk.

.....

Lobi sajom kalai nadua painteon inda dong juo namadabu, padahal ari madung get pukul sada. "Rapaakkkkkkk,....bummmm" rupana manampuk sada tarutungi ngon batang nai. Ijalakai halai nadua inda pasuo, rupana solot di rumpun ni salak. Dung onok dope so ida halai, bahaso nasolot do tarutung i pas di odong nai. Tarutungna ama nagodang, uskusna jadi, dosir ijur niba ibaen muap nai.

Marasok-asok ma Jalandit tu rumpun ni salaki so ulang tarduri pat nia, i ihutkon si Jabolut tingon pudi. Icubo Jalandit manjatana, inda dapot ia harana salakon na sosotan batangna songoni hodong nai. Leng marsitune-tunean ma halai nadua sanga songon jia pambuatna, ijalakan pe hayu baek houk-kouk inda dong. Asik-asik mambuatna halai nadua, tarbege ma dihalai batuk matobang ni ompung Londuk di rura-an lao ro, "pehhhhaaakkk, pehhhaaakkkk, koaaakkkk" ningna sajoma sora ni batuk nai di rura an lao manangkok.

Tarsonggot Jalandit lao curut tu balakang get lari, tai malang do harana susuk sijuguk-jugukan nia (mangido mohof : bumper nai na ngon balakang) tu duri ni salak. Mandoik Jalandit lao marlojong marsitulusan dohot si Jabolut.

....

Tibo di padang-padangi maradian ma halai nadua, madung mingis-ingis sajo Jalandit harana duri ni salak mangkatipul di balakang nia.

"Tolong jolo dongan jungkit e" ning Jalandit mandok Jabolut lao mambuka saraor nia unggil adop Jabolut.

"Ahhhhhhhh, iunggili ho au, Dot aha do i jungkit?" ning Jabolut

"Dohot Kotuk Gambo i mada!" ning Jalandit

Ijungkit Jabolut ma duri i sian sijuguk-jugukan nisi Jalandit, ".......puuuuuuuutttttt" ning sora ni angin si Jalandit lao mingis-ingis baen ancitna.

"Ahhhh dongan, madung ra iba manjungkitna i buang angin dope" ning Jabolut

"Mangido mohof dongan baen ancitna dei" ning Jalandit lao mingis maneteki ilu nai.

Tinggal sada nai doma duri i, pas i lambung buangan ni kanalpot si Jalandit, sapala ijungkit Jabolut, "puuuuuuutttttt" ning na muse sora nai, sakalion inda hum angin sajo nakaluar tai rupa mangalaoskon.

.....

"Mangalaoskon aha do uda?" ning si Pinomat muse dope adop uda Jamangampal namarcaritoi

"Mangalaoskon mada, hum soni pe inda iboto ho" ning udai antong adop si pinomat

"Manaonkon kalai nadua kasidunganna, tarutung ale inda dapot susuk muse dope balakangi tu duri". "Madung antong inda sumbayang Jumahat manangko muse dope" ning udai lao kehe tu lopo manadingkon kami namarjugukan lao martata.

Jolo Surat-suratan Dei So Baru Ipon (Sapulu)

2008-11-29T20:24:00.007+07:00

Tarpaida ma Jasobaruddin pintu masuk kota Makkah, inda sodar muse ia madung manetek aek ni mata nia, torus ma Jasobaruddin mambaca Doah Masuk Kota Makkah.

Lalu tu Mokkah markisar pukul 10 ma borngin, rombongan torus manuju Hotel manaruon tas dohot na lain-lainna. Ison mur ma rami muse ma sakamar, pala di Madinah salapan kalak do, dung tu Mokah lobi sapulu halak sakamar. Namun jaru songoni Jasobaruddin na santai sajo do, anggo ia nasibuk sajo ma naget maribadah apalagi inda suman ilala ia dope namarpakean Ihromi, get sosak sajo ilala ia tu Masjidil Harom mangaligi musojid i torus mangarejohon rukun ni Umroh so baru non Tahallul.

Lobi sa jom mangaturna sude so baru salose rombongan mangurus kamar ni hotel dot pakean na iparobanan sian Mandailing. Dung salose sude marangkat ma rombongan mardalan pat sian Maktab tu Masjidil Harom namarjarak kira-kira 500 meter sian Maktab ni alak Jasobaruddin. Dao dope tarida ma di Jasobaruddin halak nadung rami, padahal iambang ia nangkin nadung longon kalak baen nadung bagas borngini rupana namartamba rami do. Anggo dialaian antong jabat dung salose sumbayang Isya nadung ikunci mai masojid, anggo di Mokah rupana siang malam nasodongdo longonna. Tarpaida ma di Jasobaruddin pintu ni Masjidil Harom sian arah Misfalah ima pintu sada (Malik Abdul Aziz) mambaca doah ma ia, masuk torus lewat pintu sadai, imasukkon solop tu tas, mangalangka dot pat siamun mambaca doah musema Jasobaruddin dot rombongan. Mijur anak tangga torus mandatar, tarida ma di Jasobaruddin Ka'bah i, kiblat nai pake saonok naon pala sumbayang lima wakotu. Tangis ma Jasobaruddin nasangat gogo torus mambaca doah mangida ka'bah. Mijur anak tangga sakali nai, torus ma tu par tawafan i, ima lurusan ni Rukun Yamani. Jadi mardalan sotik nai pasuo ma dot rukun Hajarol Aswad, isima Jasobaruddin dot rombongan marniat tawaf "Bismillahi Allohu Akbar" lao mangisyaratkonna i ummah dot dua tangan niba, torusma mamutar mangiutkon pambimbing nai lao mambaca zikir, mangalintasi tontang ni Multazam, Pintu Ka'bah, Maqom Ibrohim, rukun Iraqi, Al-Hateem (Hijir Ismail), rukun Syami, torus tu rukun Yamani (iangkat muse tangan siamun lao mambaca "Bismillahi Allahu Akbar), lalu muse mulak tu Rukun Hajarol Aswad, ibaca muse ma mulak songon nangkinani torus muse mulak marzikir.

Muloi nangkin tawaf sian topi do, tai mur-margeser tu tonga, harana soni nai parsiajari ni Jasobaruddin atiha manasik, target nia get mancium Hajarol Aswad mada. Salose tawaf pitu kali, namamutar sajo dope Jasobaruddin, inda baen natawaf ia, tai inda bisa kaluar, madung mogap ilala ia ditonga ni alak nabahat i. Kasidunganna dohot muse Jasobaruddin marsosot di dinding ni Ka'bah i, mandoah ia tu Tuhan tai so ilehen disia kamudahan, Alhamdulillah dapot ia juo di Multazam i, ibaen ia dua tangan nia soni indora nia sonjia na iajarkon ni Rasulullah SAW. Mandoah maia disi "Ya Allah, inda bahat pangidoanku, Salamatkon kami sian milas ni Narako dunia dohot Narako Akhirat, Amin".

Asik-asik mandoah, inda sodar ia madung ilampisi bayo nagodang muse Jasobaruddin dibalakang nia, mogap doma ilala ia, margeser ia tu siamun tu pintu ni ka'bah i, itombeng anak boru muse Jasobaruddin, inda lalu dope dapot ia Hajarol Aswad i.

"Insya Allah lapang dope waktu" ning roa nia lao dohot muse mulak mamutar marusaho kaluar sian galombang ni tawaf i lao margeser sotik-sotik tu siamun. Hampir muse dua putaran so baru bisa Jasobaruddin kaluar. Sapala Sodar ia madung tontang ni panjawean air zam-zam i. Ilotap ia minum jolo satongkin, isiramkon ia muse tu ulunia air zam-zam i, inda puas ilala ia iparbaharui ia muse mulak wuduk nia so litak sude ibaen air zam-zami. "Cogot uoban doma jerigen so uparidion air zam-zam on, dompak sonon maia on" ning roa Jasobaruddin sasada ia. Manaek Jasobaruddin tuginjang tontangan ni Maqom Ibarohim ilambung ni tiang masojid i, isi ma ia Sumbayang Sunat Tawaf.

Dung salose sumbayang sunat tawaf, ijalak-jalaki ia pintu tu Sa'i, inda iboto ia sanga ijia.

Syukurnai ma adong polisi, marsapa ma Jasobaruddin pake bahasa Arab na hurang lancar.

"Ustad, ustad, Babul Sa'i, Babul Sa'i?" ning Jasobaruddin ma adop polisi i

"Hadza Babul Sa'i" ning polisi i lao manyarat Jasobaruddin tu si, rupana tar tolu meter do sian lambung nia.

"Syukron, Syukron" ning Jasobaruddin lao mangapus-apus janggut ni polisi i salao mangkalukna baen jopna roa nia.

Masuk ma Jasobaruddin di tonga ni halak nabahat i tu sabolah kanan, manaek sotik tu ginjang (Bukit Sofa), marniat sai lao mandoah tu Tuhan tai so ilehen juo disia kamudahan. Mardalan ma Jasobaruddin marisar-isar, pas tontang ni Pilar Hijau (lampu Hijau) marlojong ma Jasobaruddin lao mambaca doah. Torus muse tu Marwah, manaek saotik tuginjang, mulak muse mulak tu Sofa. Soni ma satorusna sampe pitu kali, juguk ma Jasobaruddin di Marwah disudut ni bukiti paite ampot adong na itandaan get margunting obuk tandona nadung salose Umroh (Tahallul). Tarida ma disia dongan sarombongan na sa'i dope, "Alhamdulillah, madung salose au" ning roa nia dibagasan. Markisar sajom markumpul ma sude rombongan di Marwah, margunting obuk ma disi.

Rombongan pe mulak ma tu Hotel, tai Jasobaruddin inda napuas dope ilala ia, ilambung ni Hotel Hilton i tarida disia adong parpangkasan. Masuk ia tusi, "botak, botak" ningia adop tukang cukur i, obotak kalai muse limus ulu ni Jasobaruddin, lalu tu hotel bahat doma naso manandai ia.

"Madung ibotak kuida, aha muse doma tongkin nai i cukuron pala Tahallul muse di Mina?" ning Malim Wahab ma mangarisak.

"Insya Allah tubu dei mulak, na onokan dope waktuna" ning Jasobaruddin lao martata.

Soni sajoma karejo ni Jasobaruddin salamo di Mokah, Manyogot targan so masuk subuh Tawaf sunat ia jolo, madung Azan bilal nai natawaf dope ia sampe i suruon polisi i manopi. Purak-purak Jasobaruddin manopi, mamutar muse ia mulak. Manombo di jolo ni ka'bahi botul doma ia sumbayang. Siap sumbayang subuh, tawaf muse mulak sakali nai, soni juo non sumbayang Luhur, Ashar, Magorib dohot Isya.

"Ison maia nabisa tawaf on, inda bisa di Mandailing on", ning Jasobaruddin sajo ma ibagasan roa nia. Sampe disada maso, pas masuk qomat pas Jasobaruddin dilambung ni Hajarol Aswad i. Siap mambori solom marlojong Jasobaruddin tu Hajarol Aswad i, i ummah ia lao tangis, baen nai tarik ni alak doma ulu nia ngon balakang so morot ia, "Alhamdulillah dapot juo mangummah Hajarol Aswad on" ning Jasobaruddin sasada ia.

Soni ma torus karejo Jasobaruddin di Mokah painte masuk Hari Tarwiyah (8 Dzulhijjah) so ibarangkatkon tu Padang Arofah.

Marsambung....

Bondar Nada Gadu

2008-11-29T10:42:00.008+07:00

Pangarang : Gozali
Judul : Bondar Nada Gadu
Editing : FAS Nasution

Disada huta najolo di Mandailing adong ma tolu halak namardongan sauduran, halai natolu on inda nadong namarkarejo, jadi na pengangguran do atoluna. Nasada margorar si Badu, nasada margorar si Batu, nasadanai margorar Jarundut. Gorarnape antong naso markarejo, ulang majolo angkon namanabusi baju nabaru, hum panabusi sigaret pe inda adong.

"Ua ni alak mai naso karejo, lalu mai tongkin nai mangan so mangan iba" ning si Murni ma disada maso mandok si Badu atiha si Badu mangepek-epek ia. Tar sabulan do antong dung ni marikah lari ma si Murni tu kampung sabolah, tinggal ma si Badu rongit-rongitan.

Asing muse si Batu, si Miskah giot do sugari disia, tai si Batu ama na lobi gombal ilalana. "Giot pe ho dabo anggi diau, mabiar au mangan takar ko di hamian incogoton, idahoma sanga songon jia parkancitan nami" ningia ma disada maso atiha mangkusip.
"Anggo mangan takar ba inda ra au" ning si Miskah muse antong manjawab, dampor doma ilala si Batu. Markisar dua poken muse sian i, ro muse ma manyapai ia na ngon Medan, tinggal muse ma si Batu manatap langit. Manombo nadung mangecek bage do ia sada-sada ia, mekel muse ia pala gidik ilala ia (inda ba sianyang dei, atiha mar telephon do da maksudna).
Jarundut antong lain muse, nalobi lakuna ilalana, padahal inda nadong nadapot nia, baen ro si Karlina tubagas ni halai i disada waktu manyapai pining, idokon-dokon iama tu si Badu dot si Batu na giot si Karlina disia.
.....

Ari Sinayani, marpokat ma halai natolu get ke mangkail tu Batang Gadis. Jadi marangkat ma halai sian huta rap maroban kail na boti dohot pamoranna. Ditongandalan maradian ma halai disopo si Jamangupat na kabaotulan mulak tu huta balanjo. "Get mangkail pe inda dong sigaret" ning si Badu ma lao manjalak-jalaki sanggak ni manuk ampot adong namarpira, angan-angan nia na get manangko pira nai ma get gadison so adong panabusi sigaret. Dapot ia ma manuk nadompak disanggak nai, ikahap ia ma sanga adong pirana, bo rupana inda na marpira manukon, namangaranga-rangai sajo do. Leng ikahap ia juo, bo rupa tarjama ia te ni manuki na sogodang ni induk pat.

"Adong do?" ning si Batu marsapa.

"Adong, inda tarbuat au, i turbing inang nai au" ning si Badu

Kehe muse si Batu mangkahap na, ikahap ia muse te ni manuki, muap tolupulu pitu doma tangan nia. "Ulang iba sajo na hona" ningia ma ibagasan roa nia.

"Kei jolo kahap!, inda dapot au, nalampasan sanggak nai" ning si Batu ma mandok Jarundut

Ikahap Jarundut ma sanggak nai, marlapu muse tangan nia dot te ni manuki. "Naso labo ma hamu nadua da" ning Jarundut ma mandok si Badu dot si Batu lao manganggo tangan nia. Madung iboto ia do na bau te ni manuk, ianggo ia muse dope tangan nia.

....

Dung lalu tu Batang Gadis, marsijalaki ganannabema pangkailan, juguk ma Jarundut diginjang ni batu nagodang tai indape na mangkail dope ia, ahamuse mai jabat karejona anggo inda marende.

Bondar Baya Nada Gadu
Naisuan di rodang-rodang
Pala Bonggal Baya Nada Lalu
Nada tartontang mata ni dongan

.....

Bondar Baya Nada Gadu

Panyiborangan Ni Siri-siri

Pala Bonggal Ale baya Karlina Nada Lalu

Alamat ni Badan manggantung diri......

"Anggo gombal ngana tanggung, tai mangida adaborupe namabiar doho" ning si Badu lao mamasang goya tu kail niai.

"Iambang ia roangku na tagi namatei" ning si Batu muse lao manyambung pamoran bulu mario na ioban nia ngon kobun na tuari sada.

Jolo Surat-suratan Dei So Baru Ipon (Sambilan)

2008-11-26T18:56:00.007+07:00

Hita tinggalkon ma jolo Jasobaruddin nadung asyik maribadat di Masojid Nabawi di Madinah, nadung matondik bage do ia di masojid i baen ngali ni AC nai padahal pandokon ni alak sian on inda tanggung milasna disadun, ita tungkir jolo alak bagas nia di balikan.

.....

Rupana dung naro Jasobaruddin pangabisan ari rayoi, jungada dungni isangajo umak si Taing ro tu Pasar Kotanopan manyapai halak dongan sahuta ni Jasobaruddin sanga nabotul do sanga inda na kehe Jasobaruddin tu Mokah.

"Adong mei roangku tolu poken dung marangkat" ning umak si Kobet ma mandok umak Sitaing.

Indabedabe manyosal godang ilala umak si Taing dibagasan roa nia, marniat muse ma ia get ro mulak manopotkon Jasobaruddin.

"Anggo uoban si Taing inda tarbaen ia i na so ra" ningna sajoma dibagasan roa nia.

....

Pendek ni caritona marangkat muse ma umak si Taing dohot si Taing mulak tu napa-napaon tubagas ni halai nadung onok di tinggalkon kalai nadua. Dung lalu tu huta, bahat muse ma carito ni halak, goararna pe antong namarkampung, bolang ni halak dei nanida anggo bolang niba inda jungada i ipareso.

"Oiii, pado uamu be ro mulak ibe, anggo au sugari ngajauibe!" ning jando si Tumbur muse ma mulak songon na cimburu.

"Sonjia mantong ibaen, angke danak ison bo" ning umak si Taing antong songon namambela diri.

"Bo, danak i sajo itaruon, ijakalan mulak poso-poso" ning jando si Tumbur muse ma mangalap-alapi, padahal iape madung lima taon marando inda nadapot nia poso-poso. Ulang majolo poso-poso, nadung mabalu pe inda pe na unjung ro manyapai ia.

"Ise muse ma nagiot jiba nadung markerut" ning umak si Taing antong.

"Lagi antong hodo najolo nalari" ning jando si Tumbur muse nasangat mangharop Jasobaruddin giot disia.

"Mangalehen pangajaran dei so ra ia marusaho, buktina onmabo Alhamdulillah madung marhasil, olope antong naso dohot iba tu Mokah" ning umak si Taing lao masuk tu bagas dung dapot ia kunci ni bagas di ombari.

.....

Keta mulak tu Madinah ita pareso muse Jasobaruddin nadung sapulu ari disadun, tibo ma waktu na get marangkat tu Mokah mangarejohon Umroh dohot Haji. Dung siap mangarejohon Arba'in, disada waktu dung sumbayang Lhuhur, ziarah Wada' musema rombongan sudena tu Makam ni Rasulullah SAW, madoah ma Jasobaruddin lao lewat di makam i, mudah-mudahan bisa mulak pasuo dohot makam ni Rasulullah pinomat sakali nai, soni muse incogoton pala di akhirat, jadima sugari iba tarmasuk sada halak nadilehen safaat ni Rasulullah.

Dung lalu tu Hotel, margonti ma maridi Ihrom torus marpaen Ihrom boti mangurus obanon muloi sian pakean santak tu silua nadung ditabusan. Gorarna pe sakali on dope pakean Ihrom, rundut doma da pamasang ni Jasobaruddin untungma na pake ikat pinggang, anggo inda madung sar-sar abit ni Jasobaruddin. Motor madung inte, rombongan pe masukma sada-sada tu motor manuju Dzulhulaifah (Bir Ali) mambuat miqot ni Umroh.

....

Dung lalu tu Bir Ali, sumbayang sunat ma dua rokaat, sumbayang ihrom torus marniat "Labbaik Allohumma Umroh" torus manaek motor. Muloi ma mar talbiyah rombongan digijang motor i marrami-rami, lao tangis palan-palan Jasobaruddin pe dohot juo ma martalbiah, "Labbaik, Allohumma Labbaik, Labbaika Lasyarikalaka Labbaik, Innal hamd, wanni'matalaka walmulk, lasyarika laka" dst. Muloi muse ma mamandang Jasobaruddin tuluar, tarbayang muse ma disia Rasulullah SAW najolo atiha mambolus padang pasir na tandusi.

Marsambung.....

Mandailing Julu - Mandailing Godang (Lubis - Nasution)

2008-11-26T09:51:00.009+07:00

Olo pe na rap mar gorar Mandailing, tai sabotulna bahat juo doda parbedaan ni Bahasa nai, olope antong na leng mangarti iba, cuma pala pas baru idope binege, kadang ganjil juo di suping niba. Tai on ba inda namangua on, tando na dei baen kayo na hita, harana inda na Bahasa Mandailing sajo di hita an. Bahatdo Bahasa na lain, contona : Bahasa Muara Sipongi (leng namangarti do halai i bahasa Mandailing, iba dei naso mangarti bahasa ni halai), Bahasa Siladang / Aek Banir pe soni juo, Bahasa di Natal dot Batahan donok tu Bahasa Minang, soni muse tu Bahasa Jawa nadung onok tinggal di hitaon misalna Aek Galoga Panyabungan, Sidojadi Malintang, Trans Sinunukan dohot nalainna.

"Copek sakotik!" ning kalak Muara Sipongi

"Kacapik Sakatik!" ning kalak Siladang

"Paisar ale!" ning kalak Mandailing Julu

"Paipas sotik!" ning kalak Mandailing Godang

"Cepeten Sitik" ning kalak Jawa muse mai

.....

"Adong Sikekmu?" ning kalak Mandailing Julu

"Adong Surimu?" ning kalak Mandailing Godang

.....

"Pataing au" ning kalak Mandailing Julu

"Painte au" ning kalak Mandailing Godang

.....

"Ulang retuk!" ning kalak Mandailing julu

"Ulang marsurak" ning kalak Mandailing Godang

.....

Na anehna pala dung marmutik suan-suanani, di Mandailing julu idokon kalak mai Marbatu, pala di Mandailing Godang didokon kalak Mardanon. Ning roangku inda adong na pas nadua2 on, harana pala Marbatu Lancat-i, inda mungkin tarpangan baen pirna (Batu), soni juo pala Mardanon, inda mungkin juo tubu eme (Danon) di batang ni lancat i. Jadi pala get ipadonok tu Bahasa Indonesia, ning roangku dongan degenan mai ita baen Marbuah (ibuat sian Berbuah), biado ale, cocok do roa muyu?

.....

Baru-baru pindah kami sian Mandailing Julu tu Mandailing Godang, dodas mai irisak kalak au, "Hei Iken (ucok), Pataing Au Naon Ditoru Ni Batang Aponji i!" ningna mai mangarisak. Bo, ujawab muse antong "Monga do langa Lian?, Kei majolo Tetek darat tu lambung ni Ciak-Ciaki!" ningku mai mambalos, rap martata ma hami i. Ciak-ciak di Mandailing julu antong Sangge-Sangge dei gorarna. Tetek di Mandailing Godang (maaf miting), di Mandailing julu adong dei kampung nasotola mandok tetek sumbarangan harana naroncam dei, Eh rupana pula Bahasa Indonesia na lai muse dei artina.

.....
Aaahhhhhh Madina Yang Madani

Jolo Surat-suratan Dei So Baru Ipon (Salapan)

2008-11-20T16:29:00.005+07:00

Jam tonga tolu andostorang tarsonggot ma Jasobaruddin modom, torus maridi, manjawek marangkat ma halai marrami-rami tu Masjidinnabawi namarjarak markisar 300 meter sian hotel i. Saratus meter nai manonpotkon Masojid tarpaida ma di Jasobaruddin Kubah Hijau i, taringot ma ia dikaji atiha manasik di kampung bahasona di toru nai mai Jasad ni Rasulullah SAW, inda tarbaen Jasobaruddin juo antong naso tangis torus-torusan mamandang tu Kubah i, tarbayang ma disia sude sejarah ni Rasulullah SAW nai parsiajari najolo atiha sikola.

.....

Masuk ma rombongan sian pintu Babus Salam, marsosot harana ni baen rami ni halak. Tarpaida ma di Jasobaruddin halak namarsosot, get marsituling-tulingan doma, marsapa Jasaobaruddin di Pambimbing ni halai, itorangkaon adun ma bahaso i mai na idokon Roudhah. Mambege Roudhah, marisar-isar muse Jasobaruddin tusadun, harana ingot ia kaji atiha Manasik bahaso Roudhah on tempat na mukobul sagalo pangidoan. Tarpaida ma disia bahaso warna ni karpet nai narata, lain sian warna ni karpet di tempat na asing. Dung sampe Jasobaruddin tu si, inda nadapotan inganan ia be harana baen rami ni halak. Asyik-asyik longang Jasobaruddin, hona tulingkon ia tingon balakang, bo rupa unggal tu Karpet na ratai, akhirna dapot bagian juo Jasobaruddin sumbayang di Roudhah, muloi sian sumbayang sunat sampe sumbayang subuh torus mandoah sapuas-puasna ilala ia.

.....

Dung salose sumbayang subuh, mardalan ma Jasobaruddin mangihutkon jamaah na lain, mangalewati makam ni Rasulullah SAW, atiha marsosot disi mambori solom ma Jasobaruddin.

Assalamu Alaika Ya Rosullah, Assalamu Alaika Ya Habiballoh....torus muse tu sahabat Abu Bakar Assiddiq, soni juo tu Umar Bin Khattab, tangis muse ma Jasobaruddin nalobi gogo, lao mandoah.

"Haji, haji, hadza qiblat!" ning polisi mandok Jasobaruddin lao manudu tu Kiblat, rupana nangkin mandoah Jasobaruddin adop makam i, tarpaida di polisi.

Dung puas ialal ia mandoah soni mamandang di makam i, kaluar ma Jasobaruddin sian Pintu Babul Baqi' torus manjalaki rombongan nia get siarah tu Baqi' (kuburan ni para Sahabat). Dung salose ngon Baqi' mulak ma rombongan tu Hotel sarapan lao mangaso.

.....

Torang ari nai, rombongan siarah ma tu tempat-tempat na marsejarah na adong di Madinah dimuloi ma sian Masjid Quba' (musojid na parjolo-jolo i bangun Rosulullah SAW). Masuk ma sude rombongan tu son, dung salose manjawek torus sumbayang tahiyatul masjid boti dohot iktikaf santongkin.

Dung ni, mardalan muse ma rombongan tu Masojid Qiblatain (Dua Kiblat, di Masojid on ma Rasulullah dapot wahyu mamindahkon Kiblat sian Masjid Masjid Aqso di Palestina tu Masjidil Haram Makkah).

Pardalanan torus manuju Gunung Uhud, tempat paporangan na paduana na dohot Rasulullah SAW disada tor na idokon Jabal Rumat, inda tahan Jasobaruddin antong baya naso tangis, tarbayang ma disia sude parjuangan ni Rasulullah SAW najolo atiha matipul jabat ipon ni ibana harana pasukan pamanah na ditempatkon dibukit i mijur marsiradu Ghonimah (harto rampasan porang).

Sidung ni, mardlan muse ma rombongan tu Khondaq (Parit na i bangun ni Rasulullah dohot sahabat untuk manangkis serangan ni kaum kafir Quraish Makkah). Dung siap mangaligi-ligi, sumbayangma rombongan di Masojid Tujuh Khandaq.

....

Rombongan mulak tu Hotel torus tu Masjidinnabawi, mangalanjutkon sumbayang 40 waktu marjamaah sampe tibo waktuna dibarangkatkon tu Mokah. Soni juoma karejo Jasobaruddin tiop ari, hampir muse satiop salose sumbayang balanjo muse ma ia baen silua di luar ni masojid i, muloi sian tasbih, tintin, jom, baju jubah, saroben, siwak, dohot na lain-lainna. Inda lupa muse ia mambuat qur'an na adong diluar baen wakaf di masojid.

Marsambung.....

Jolo Surat-suratan Dei So Baru Ipon (Pitu)

2008-11-19T08:36:00.006+07:00

Dung salose sumbayang manjamak di Bandara King Abdul Aziz di Jeddah, markisar dua jom dungi roma angkutan ni Jasobaruddin dohot rombongan manuju Madinah. Sapanjang pardalanan olope nadung loja boti nahurang podom, mamandang-mandang sajoma Jasobaruddin sapanjang di pardalanani. Tarbayang ma disia Nabinta Muhammad Rasulullah SAW najolo dompak hijrah ngon Mokah tu Madinah mardalan pat, mangalewati gurun pasir nalobi milas naso marsuan-suanan, paling-paling mai adong tarida tarsongon sihirput gaja di hita an, salobina padang pasir doma, manombo adong juo sotik-sotik kobun tamar dohot unto sanga kibas namardalan. Maneteki ilu ni Jasobaruddin mamandang on sasudena, sonima Cinta boti sayangna Rasulullah di ummat niaon, rela ia marjuang manghadopi on sasudena bahkan kadang inda hum na manetekkon aek ni mata, dohot manetekkon mudar pe itaonkon Rasulullah do.

"Na tinggal na mangaumkon sajo doma agamaon, leng payah sajo ilala ho pala get maribadat!" ning Jasobaruddin lao manampar-nampar pat nia.

"Ligi majolo na dijolo mon, hamparan ni pasir do sudena, gunung pe batu do, ison ma Rasulullah najolo marjuang". "Anggo ho di hamuan asal ma na ra marusaho, Tano Sere do, Batang Gadis mangalir sian Gunung Kulabu, rura gok diantara ni tor tu tor, hayu bahat, arangan bolak, saba mambontang saluas mata mamandang, anggo inda baen na mancit ko naso iboto hodo namarsyukur tu Tuhan Tai!" ning Jasobaruddin muse songon napaingot diri nia.

Halak asik marmodoman, anggo Jasobaruddin leng mamandang sapanjang di pardalanan, inda sodar ia madung lombom mata nia natangis i sajo, baen na unggal doma Malim Wahab tu abara nia so sodar ia.

Markisar-kisar lima jom pardalanan, iumumkon Pambimbing nai ma sian joloan bahaso Madinah nadung donok, motar boto hamu taroktok ni Jasobaruddin sai na sosakna roa nia na get mangaligi Madinah i, manombo jongjong bage ia manindo tuluar.

Motor nai tompangi ni halai i masuk ma tu Madinah, mulak tangis muse Jasobaruddin sampe tu Hotel Pamondokan ni Jamaah Haji. Tibo di pamondokan i ari pe madung bagas borngin, tai na antri muse dope dohot jamaah nasian luat na asing, on dope tarpaida di Jasobaruddin ribur ni halak mangalobi'i, rap sibuk sude dohot urusanna masing-masing.

Dung ibuat tas marangkat ma sude marpisah tu kamar panginapanna be, inda tarcaritoon be riburna Jasobaruddin atiha mangalewati lift soni atiha masuk kamar, dor longang, dor tarsoltu patnia asik-asik mangaligi-ligi.

....

Kabotulan salapan kalak kalai na sakamari, jadi rap marsompit ma soni, tai boto hamu anggo Jasobaruddin inda jabat namangua ilala ia, harana antong baya atiha dikampung pe nadung biaso do marsompit dibagas apalagi pala dompak adong tamu, manombo maradu pat, manombo maradu ulu. Di Hotel on na pake AC do olope na salapan kalak, podomanna pe sada be do, jadi anggo Jasobaruddin na hepi sajo ma ilala ia.

Painte di barangkatkon muse mulak tu Mokah, di Madinah ma rombongan samantara waktu markisar sambilan ari harana mambuat Arba'in (sumbayang marjamaah di Masjidinnabawi opat pulu waktu).

.....

Marsambung