Ngon Bondar i Tu Gadu i

"Markisar awal taon 70an, transportasi di Mandailing khususna di Mandailing Julu indape songon sannarion riburna, taretong do sanga piga kali iba mangida motor sasapoken, paling-paling mei ari Sabtu muda poken di Kotanopan atope saulak sadari lewat mai motor Sibualbuali. Dua kilometer nai sotolap tu tontang nibagas nami i mangkuling mei tuter nai maribo-ibo, ipainte kian mei di topi dalani marbaris mangaligi" ning Udak Jamangadang muse ma laos mamuloi carito. Ibalun ia ma timbako sagodang ni jari ibuat ia loting pak-pak pusako najolo. "Jadi na sering na nida waktu i padati maia, harana ido bahatan kendaraan ni halak pula ke to poken atope pula ke tu saba sanga tu kobun" ning udai lao patorus carito. Padati on banna hayu dei mangalingkar salampas niba ibalut dot bosi, namanarikna horbo, kadang ipake halak juo dei lombu. Tarsongon nai gambaron ma modelna, tai di ita an najolo martarup dei, ngoni itoru nai adong mei lampuna pala mardalan borngin. Pardalanan ni padati on, sian poken tupoken, maroban pisang, apea, eme, ato pe bahan kabutuhan na lainna. Pala ari Sabtu tu Kotanopan mei, pala ari Sinayan di Tamiang, pala ari Kamis di Muara Sipongi.

Disada kampung adongma tolu halak par padati, Si Jamarombus, Si Jamangampal dot si Japargayok. Si Jamarombus dot si Jamangampal madung markeluargado, madung rap adong bema pomparanna, tinggal si Japargayok doma naso adong induk ni apina alias sopo-sopo, eh poso-poso. Namun jaru songoni ulang ita ambang na danak dope si Japargayok on, umurna nadung 35 taon ma lobi, jadi Pemuda Jerman do (istilahna maso i). Maklum ma ita anggo najolo inda nadong istilah margandak songon sannari, jadi biarpe nadung marumur, anggo si Japargayok on Perjaka Ting-ting dope.

Alai natolu sering ma i sauduran, bope arian atope borngin, jadi molo di pardalanan ato pe pas dompak maradian dodasmai si Japargayok on irisak kalai harana baen naso marbagas i dope. Tai si Japargayok on inda naparyoyak, cuma tar parila, pala diida ia bujing-bujing munduk maia i, atope kadang-kadang masuk ia tu bagasan ni padati i so ulang tarida.

Pas disada maso ari Roba'a potang nai, marangkat muse ma halai natolu manuju Muara Sipongi markisar jam 9 borngin, marudur-udur diborngin niari i, tilcaakk, tilllcakk, monngggg, ning sora ni pangalapis ni roda nai tarbege sian bagas nami i.

Manopotkon Muara Sipongi, ari pe torangma, lopo pe muloi ma mar buka, tar paida ma di halai natolu sada bujing-bujing nadeges dompak manggoreng pisang. Mangalumpat si Japargayok tu bagasan ni Padati i, i intip ia ngon lubang nai, i ligi ia ma bujing na deges i, pes-pes doma baen lagakna, padahal biasona umak-umak dei dot ayah-ayah di lopoi, topek ma sakalion bujing-bujing nalanjang obuk dompak manggoreng pisang. Rupana boru pingitan do bujing-bujing on, salolot naon inda unjung kaluar baen na dibagas sajo do karejona inda ipatola orang tua nai kaluar. Mangompoti sakalion urang sehat umak nia jadi tarpaksa ia manggoreng manolongi ayah nia.

"Anggo on ma halakna, ra ma au marbagas, inda jaube na lajangon" ning roa nisi Japargayok dibagasan ni roa nia. Rupana inda na ia sajo namaligi dot marangan-angan, si Jamarombus pe dot si Jamangampal inda natanggung be ilala halai. Adong bage ma naget paduaon, mangaligi bujing-bujing nadeges i, lupa doma halai inang ni daganak dibagas dot daganak namarkalamotan.

"Sugari baya, sugari" ning roa ni halai sajoma.

Lalu tu poken, mar bungkar ma halai, torus ke tu lopo kopi mangan goreng pisang pake kotan sipulut. Marcarito ma halai natolu di lopoi, marsiradu angkon nadapotna bujing-bujing i. Kasidunganna martongkar kalai natolu get marbadai, untungma bahat kalak namanonton jadi inda sanga marbada.

Lao mulak, maradian muse ma halai ditontang ni lopoi kacuali si Japargayok, ke si Jamarombus dot si Jamangampal tusi, tai inda isi be bujing-bujing i. Soni ma satorusna hampir satiop mardalan tu Muara Sipongi salalu mai maradian kalai isi, sangajo purak-purak manabusi goreng atope minum kopi, hum si Japargayok maia naso ra dohot, ijagoi ia sajo mai di bagasan di padati niai.

Hinggo disada maso, pas di Japargayok dibarisan jolo, lewat ma halai disi, inda binoto sanga nasondia rupana isi dompak bujing-bujingi atiha manggoreng pisang muse. Mangambur si Japargayok ngon padati niai marjolong tu lopoi laos manggangguk tangis nasangat gogo, ikojar ia bujing-bujing i, ikaluk ia, i sanggo ia muse, laos tangis maribo ibo....."napasan ko anggi songon ibotongku nadung maninggal i", ningia leng totop mangkaluk bujing-bujing i. "Angkon sonon doma on carana so dapotan iba, anggo inda si Jamarombus mon sanga si Jamangampal nadapotan" ning roa nia dibagasan. Marlongangan halak nasolopoi mangida halai, bujing-bujingi pe inda bisa margorak ibaen si Japargayok, tarpaksa muse dohot umak nai dot ayah nai tangis laos marsikalukan halai na opat. "Naso labo dei si Japargayok" ning si Jamangampal adop si Jamarombus, "purak-purak inda giot, tai ngon bondari tu gadui" ning ia.

Walhasil sadari i, inda ke si Japargayok tu poken be, isi doma halai mardahan mangan. Dung loja mangeceti, akhirna mangkuling ma si Japargayok lao purak-purak maribo ibo. "Songonon ma batas dabo tulang, ning roangku dari pada jadi bahan tontonan ni alak sajo tongkin nai pala uida boru muyu on, ning roangku anggo na tola do ulamar ma soni boru muyu i" ning si Japargayok ma mamuloi obar. "Anggo i do da bere, si butet dei putona, anggo olo ningia ami pe olo dei Insya Allah" ning ayah nia. "Ate butet, sonjia do roamu?" ning umak nia manambai. "Anggo soni ning ayah dot umak, ra ma au" ning si Butet mangalus. "Daripada tiop lewat ia tongkin nai ison ilojong ia sajo tuson sangajo mangkaluk laos tangis tu iba, padahal roangku purak-purak nia dei baen naporna dei roa nia jau" ning roa si Butet dibagasan roa nia.

"Dung soni mamak?" ningku adop udak Jamangadang, "habis carito, mintop palito" ning udai mandok kami laos kehe tu Masojid sumbayang Isya.

Kobun ni si Jacekel (3) Tamat

Madung sapoken lobi, si Jacekel ke torus tu kobun tiop ari maroban lading dot rambas na tajom, sampe tu sada borngin marsapa adaborui disia :

Adaborui : "Madung piga pantak do sude na i rabi ni abangi, bisa mai ita tutung cogot?"

Jacekel : "Anggo uetong-etong nabolakan mabai"

Adaborui : "Anggo soni ro ma au cogot dung siap manyapsap"

Jacekel : "Ah, nangkon ko ro ba, loja hoi"

Adaborui : "Jiar ma loja soni dabo bang sasakali, kan baen rap di daganakta do"

Jacekel : "Nangkon ko ro, madung ukira-kira ma, inda piga ari nai siap mei"

Torang ari, songon nabiaso ipasiap adaborui juo obanon si Jacekel, muloi sian indahan soni dot sigaret dot gulo kopina. Marangkat juo si Jacekel tu kobun julu sonjia songon nabiaso, marpiul-piul di ginjang ni ayu painte male boltok dot get modom mata. Inda iboto ia rupana narodo adaborui mangintip sian balakang, harana penasaran ia aso inda ipatola si Jacekel ia ro. Itatap adaborui sian balik ni batang ayu ida ia si Jacekel marende mangiutkon lagu di radio, lao mangarsik Gudang Garam. Satompap pe inda nadong ikarejoon si Jacekel kobuni, hum na marangan-angan sajo do karejo nia di ginjang ni ayu. "On dei dabo giot mu", ning roa ni adaborui laos manyusun rencana mangalehen parsiajaran di alak lai niai.

Cogot nai dung torang ari ipasiap adaboru niai juo balanjo si Jacekel na get ke tu kobun, leng mesra sonjia nabiaso, mikim adaborui, loncop doma losung pipi nai baen manisna. Si Jacekel pe inda tanggung be semangatna naget ke mangarubat kobunon.

Dung lalu tu kobun sonjia nabiaso, manaek muse ma si Jacekel tu ginjang ni para-para niai laos marende soni marangan-angan. "On tu sadun sadari, on tuson satonga ari, itutung, baru isuanan", leng pupu ningia. Ari mur ginjang, male musema ilala si Jacekel, ibuat ia rantang ganan ni indahan sapala ibuka ia tano do ibagasan, ibuat ia termos inda nadong aek na. Mangambur si Jacekel ngon para-para niai mangamuk, ibuat ia lading marlojong tu huta get mangkoyok adaboru niai.

Dao dope madung ida adaborui si Jacekel tiop ladingna, motar adaborui, pucat mukonai, untungma leng dapot ia juo akal. "Ala... anggo tuson non sip doho i" ningia, ibuka ia jilbab nia, .... ...... ("nangkon icaritoon be dabo", ning namarcaritoi tu si Kakmang, donganku), ipa podom-podom adaborui iginjang ni podoman. Isipak si Jacekel pintu, langsung masuk tu kamar, iligi ia adaboru niai ....... ...... ...... iambungkon ia lading nia, "anggo sonon carana kalah dei iba on", ning si Jacekel lao manutup tingkap. Martata si Kakmang mambege caritoi, inda sodar ia sala incop ia sigaret, inda i incop ia filter nai, tai tarincop ia api nai baen gidik na.

Assalamu 'Alaikum WW,

Marhubung adong rencana nami get ke mardalanan Insya Allah muloi poken on sampe tu markisar partongaan ni bulan Juli, jadi ami inda bisa online. Tu koum-koum sasudena molo adong namarkunjung tu blog taon, ami mangido mohof harana inda bisa mengupdate sementara waktu.

Mare rap mandoah kita tu Tuhan tai Allah SWT mudah-mudahan ilen Ia di hita sasudena umur na lanjang dohot Ilmu namarmanfaat, so leng bisa hita sasudena marjuang di ginjang ni tano ni Tuhan on.

Terakhir, molo adong kasalahan nami, ami mangido moof na sagodang-godangna, Insya Allah pasuo hita mulak dilain kasempatan, Amin.

Wassalam.

Bulunggadung Na i Repus

Bulung gadung bisa juo dei irepus (Bahasa Mandailing Julu, di Mandailing Godang i dokon kalak juo dei Bulunggadung nai pelos atope bulunggadung nai pulos atope adong juo dei mandokonna bulunggadung nai puyu). Anggo bahanna sarupo dei dot bulunggadung nai duda, bedana antong pala bulunggadung nai duda madung jelas i tarpaksa iduda jolo dot losung pake indalu. Tai anggo nai repus, inda iduda, ipamasak lambar-lambar soni, cuma irepus sotik soulang sar-sar.

Ampot adong namalungun manggule bulung gadung nai pelos molo pas dipangarantoan (ampot madung lupa harana biaso mangan roti), sakadar mangingotkon porlu mai ita siapkon :

1. Bulunggadung naposo-poso nai, maksudna pusuk nai ulang baen pangkal nai, so ulang jogal.

2. Rimbang, Arias, Joring

3. Kantang, nasi-nasi (pala adong)

4. Arambir, lasiak, sira, bawang, unik

5. Ikan Sale pangaroncana

Cara pamasakna

1. Kuhur arambir, poro, masukkon santan nai tu uali, masukkon muse lasiak nadung igiling dot

hasaya naasing nai (bawang, unik), pagur-gur ma ulang lupa saok-saok.

2. Partarikkon pusuk-pusuk ni bulunggadung, baru pelos sotik, bola dua rimbang, ubak kantang,

gotap-gotap.

3. Tuk-tuk joring tu panggilingan i, arias gotap-gotap, buat muse sotik nasi-nasi so manis non.

4. Pala dung gur-gur pati nai masukkon ma sudena

5. Pala get masak ma masukkon muse ikan sale i

6. Pasangek ma.

Mangan doma da, ulang lupa mar Bismillah, tinggalkon di amang ni daganak, non ro ia ngon lopo, inda dong gule buncut muse ia, harana amang ni daganak inda tanggung parbuncutna, pas adaboru.

Adong najolo lagu ni sada danak na dompak marorot :

Sip ko anggi, ro naron amanta isipak ia udoni.

Do'a Iftitah

On carito ni gurungku disada waktu dompak pangajian di kampung.

Disada lopo markisar-kisar jam 6 manyogot, martongkar situtu si Japangambe dot si Japanaili mangenai masalah ni do'a Iftitah pala sumbayang, inda binoto pangkal dot ujungna madung eruk kalai nadua dilopoi. Dor muse tambu aek, bontar doma kopi nisi Japangambe madung 3 kali manamba aek milas :

Japangambe : "Ima so udokon nangkin, inda tola tinggal do'a iftitah"

Japanaili : "Olo, tai itinggalkon pe inda mangua i, harana antong nasunat dei"

Japangambe : "Olope nasunat inda tola itinggalkon, baik ia sumbayang wajib atope sunat"

Japanaili : "Tai bahat dei alak namaninggalkonna, lagi di itaon dei napake Allohu Akbar Kabiro, anggo di tempat naasing Allohumma Bait dei bacaanna"

Japangambe : "Pokokna inda tola tinggal olope nasunat, pala itinggalkon makruh hukumna".

Japanaili : "Anggo namakruh do, bararti tola dei kacuali na haram".

Japanaili : "Inda tola"

Dompak asik kalai martongkar, ro gurungku tu lopoi manabusi sigaret harana get ke tusaba.

Japangambe : Nga purcaya ho, ta sapai gurui, "Kan soni do guru?"

Gurungku : "Aha muse nangkin carito nai"

Japangambe : "Udokon disi Japanaili nangkin, pala sumbayang iba angkon nai baca dei doa Iftitah, harana biarpe nasunat, makruh dei pala itinggalkon.

Gurungku : "Homu antong sonjia ibaen kamu manyogoti halak si Japanaili?"

Japanaili : "Au kabotulan inda sumbayang au nangkin guru, tai jaru sonipe binoto do jia nawajib jia nasunat"

Gurungku : "Homu Japangambe, ibaca homu do manyogoti doa Iftitah nai".

Japangambe : "Aupe inda sumbayang au kabotulan manyogoti guru, cuma antong hukumna soni do iparsiajaran najolo".

Inda ijawab gurungki antongbe, iape torus ma ke tusaba, tai mikim gurungki "Adong muse mon bahan mardakwah, martongkar dua halak mangenai bacaan ni doa Iftitah, tai dua-duana inda na sumbayang" ning roa nigurungki.

Kobun ni si Jacekel (2)

Pendek ni caritona madung lalu si Jacekel tu tonga ni arangan di kobun julu, ipandang ia antong madung pot-pot songoni madung godang-godang ayuna, muloi sian ayu sirih, kalah nagori, singkam atope monis-monis. "Maradian majolo tongkin" ning roa ni si Jacekel laos manjalaki batang monis-monis nagodang di untuk ni tor i. Rupana adong disi dua batang nadung godang, bol-bol muse bulungna "anggo on ntong petomon" ningia sasada ia. Igotap-gotap ia batang ni ayu sirih, manaek ia tuginjang ibaen ia para-para dibatang ni monis-monis na dua batang i, pas doma songon sopo.

Dung siap para-para, mamandangma si Jacekel ngon ginjang tu tonga ni aranganan, inda puas ilala ia ibuat ia sigaret Gudang Garam sabatang, ipatik ia loting, iarsik ia timbusnai. Ibuat ia kopi dot gulo, ibuat ia muse aek milas ngon termos. Mangidup dot minum kopi ma si Jacekel iginjang ni para-para i laos marangan-angan mamandang tu kobunan. Inda pe sonang roa nia, ibuat ia muse radio namenek ngon kadangan nia i, ijalaki ia siaran Medan tarbege ma disia lagu-lagu Mandailing,

Ulang ma tinggalkon au

Ulang hanciti rohangku

Di baen ko songon meyam-meyam....

"Ala, tai ngana au maninggalkon ko Saleha, hodo baya naso giot di au, baen ro ngon Jakarta namanyapai ho, mangambur maho" ning si Jacekel songon namanyosali nasib nia. "Anggo on ngon bondari mon tu gadui" ning ia mambege lagu dot mangarsik sigaret.

"On tusadun mangarabi sadari, on tusadun satonga ari, on tusadun dua ari, pala dung hiang tongkin nai baru itutung" ning roa nia sajoma. "Pala dung itutung tongkin nai, baru ipaias, baru muse isuanan lasiak songoni dot tomat sanga torung, aturanna dabo targan so magodang lasiak bisa mei iba manyalong ranti, sodong gadison ni umak si Pinomat tu pasar" leng pupu ning roa nia.

Inda sodar ia namarangan-angan i, ari pe madung jam 11, harana madung lewat kapal terbang na sian Padang tu Medan (maso i, imei tandona, pala lewat kapal terbang berarti madung pukul 11 arian). "Ah, naron doma soni dung kotu iba karejo" ning roa si Jacekel sasada ia. Markisar jam 12 mangan si Jacekel diginjang ayui, dungi ke ia tu rura an, laos mangalap aek soni manjawek get sumbayang kotu luhur. Sumbayang ma si Jacekel diginjang ayui nakabotulan pas muse adop kiblat para-para niai.

Siap sumbayang, markuayam si Jacekel, "huuuuaaaahhhh" ning ia, "ah, modom majolo tongkin marsatonga jom so ulang borat mata on" ningia. Modom ma ia di ginjang ni ayui, mungkor dot merdet doma ijur bari nia baen sinokna.

Marsambung......

Sada Dua Tolu

Najolo baen susahna dot miskinna ita namar negaraon, pala ke tusikola inda namaroban buku tulis dot buku paket songon na sannari on i, tai maroban gerep dei dot batu tule (batu tulis), pala tar kayo alak nai dua mai batu tule na, pala na paspasan do antong sada batu tule sada muse gerep. Jadi isikolaan parsiajaran pala dung itulis batu tulei, porlu muse non manulis na asing, tarpaksa mai ibasu batu tulis i. Ima so pintar-pintarna halak najolo, harana maradu copat mangapil, pala inda copat sasa mei non batu tule i. Jadi iajaran mai disikola marlogu, songonon :

Sada dua tolu

Ningna ning gurui

Opat lima onom

Mangiut sipitui

Roma Si Salapan

Dohot Sambilan i

Gonop Ma Bilangan

Dung Ro Sapului

Kehe Tusikola

Pincuri Gerep mi

Oban ma Botolmu

Marisi Aek i

Ulang Ditijuran

Batu Tulis i

Dumenggan ma dibasu

Dot aek tawari

Atiha au sikola najolo, inda dong be batu tulis on, tai bokas-bokasna bahat dope pasuo olopentong taporan ni batu tule atope gerep namatipul. Jadi atiha au i madung kaluar buku jegang gorarna, isina 12 lambar, pala targogo iba manulisna lantas dei ngon alaman 1 torus tu balakangan. Pakean seragam pe indape adong, jadi ima pakean dibagas, imusema tu sikola (inda songon gambar nadi ginjang ba, anggo i antong daganak sannari dei TK dope sonima pakeanna). Anggo iba najolo marsaraor na matombuk, markaco mata dua dibalakang, inda muse marsolop, mancakukkon pining mei so adong naron panganon atiha main-main sikola. "Adong pe piningmu?, jia jolo saparopat e", ning si Canan mei adop au. "Inda dong be", paido isi Jenab" ningku mangalus. Ibuat si Jenab mei pining ngon saraor nia nai kobet nia dot koje bokas panyargutan muse, ....."Alaleeeeeeee capoooot" ning si Canan.

Kobun ni si Jacekel (1)

Ari madung jam 1.00 tonga borngin, si Jacekel nabaru mulak dope ngon lopo manonton Parobala, eh Parabola.

"Assalamu 'Alaikum" ningia lao manoktok pintu bagas.

"Alaikum Salam, Jagoi itorui" ning adaboru niai lao mambuka pintu.

"Ulang soni dabo, ibege alak non maila iba" ning si Jacekel manjawab.

"Olo antong, nabaru tarpodom dope iba madung igurdakan" ning adaborui muse.

Dung masuk tubagas, mangkuling muse si Jacekel,

"Adong pe indahan, madung male ulala, buat jolo e", ningia.

"Keima dabo ligi tu dapur, get modom kulala" ning adaborui.

"Ala.. buat ma dabo jolo ntong" ning si Jacekel lao manyibit hurum ni adaboru niai. Tarpaksa juo ibuat adaborui indahan dot gule tu panci i di dapur, inda ipatola si Jacekel muse ke adaborui modom, angkon nai painte muse do si Jacekel mangan.

"Sonjia doma ita abang on?" ning adaborui

"Maksudmu" ning si Jacekel

"Sonon mantongbo, arga-arga madung magodang gara-gara ni BBM namagodang, padahal ahadei hubungannya dot arga" ning adaborui mangalus lao markuayam "huuuuaaaahhh" ningna doma sora nai.

"Sonjia mei jabat, sonon ma soni" ning si Jacekel laos manjungkit ipon, rupana solot di ipon nia bulunggadung nai repus i.

"Botul do dabo abang, daganak marsikolaan, arga-arga magodang, anggo sonon sajo da payah ma ita on" ning adaboru nia laos gulung di arumpang si Jacekel.

"Sonjia dopen antong uboto ita baen, tai usaho nadung cukup do, soni ma dompak rasokina, isuan tobu ale tubu galoga, isuan ancimun daganak do namur martamba" ning si Jacekel laos martata (mikim muse doma namambaca tulisan on sada-sada ia jabat ibaenna, untungma indadong namangidana).

"Maksudku dabo abang inda soni, arangan nai kobun julu kan adong mei dua taon tinggal, pala ibuka abang langa mulak so tasuan lasiak ning roangku cocok dei, argana pe mulai ma deges, ngoni pala manyuan dot marbabo tongkin nai tartolongi au dei abang" ning adaborui laos pasolkot ulunia tu boltok ni si Jacekel.

"Cocok doba sugari i, aupe por ma roangku markobun lasiak kita, puaso pe donok ma, tongkin nai baru ita suani apea di samping nai" ning si Jacekel laos mangombuskon timbus sigaret adop loteng (padahal bagas i inda namarloteng).

Kasidunganna cocok pokat ni alai saborngini naget manyuan lasiak dot manyuan apea di kobun julu.

Torang ari marangkat ma si Jacekel tu tonga ni Tombak Situmalun (arangan dei maksudna dabo, hum soni pe inda mangarti ho), maroban kadangan songoni lading dot rambas na baru igarut.

Marsambung...

Istilah Ni Natobang-tobang

Pala Singkam tungkona,
Singkam mei tunasna
Maksudna : Pala Ustad ayahna, Insya Allah Ustad juo mei anakna

Andor Soayu
Maksudna, Ibaen pangkobet inda bisa, ibaen soban inda naet.

Bulung singkut, bulung dongdong
Naso mangirput naso mangordong
Biaso pala goyak roa ni umak nai tu boru bujing niai hara ni paorna, songoni mai idokon ia panggoyakina.

Lumindak Laut ulang get dot longko-longko
Maksudna : Mula marmotor nabaru halak, ulang ko cimburu, sukuri ma pala adong karetamu, harana nalainna na dalan pat dope

Pala dung untung ni pege lambang
Dot sira sude burburon
Maksudna : Madung madabu, itinggang tangga dope, ehhh apit muse

Pala sonang pangarohai, bulung botik mardai mera
Maksudna : Bulung botik nai, irondang pake uling-kuling. Cubo ma ita pangan bulung botik namata, anggo nga capot i.

Marlampak ni Ampolu
Biasona pala tanggal muda, ato pe baru mandaek apea, madung martimbang, jadi epeng nai marlapis-lapis mei.... olopentong nabahatan tukaran 1000.