MARANGKA MARANGGI

Atia juguk sada-sada au di karosi nai jolo bagas tai ale dongan-dongan pangaranto, ima di ari ahad na solpu antargan so kotu magorib, inda binoto arani sanga aha, taringot au atia dompak menek di hita an. Maso i umurku lima taon dope, inda pe sikola, hum na marmayam sajo maia tohap niba manyogot na potang. Somal dei dohot dongan-dongan sapangkek niba rap mandehe di batang aek an, mambuat apundung atope manggis tu arang-karangan nai dolok, mardopang-dopang pake sinapang bulu pelorna mutik ni jambu, marbandol di toru-toru ni batang ni kojean, palanga marsimonjap di potang ni ari. Arani tagina na marmayam i rap dohot dongan-dongan, dodas dei lupa iba sumbayang kotu luhur dohot kotu asar. Umak niba pe pupu dei manjalak-jalaki iba tu jae-julu, oni dung pasuo matubek-bek mei arani sasadari iba na maor i. Ambaen milas ni roa ni umak niba, bolnang mei mata nia tu iba, oni i sibitkon ia muse mei iba, palanga i puloskon ia pusot niba, get menetek doma ilu niba manaonkon hancitna. Ulang ba nangkan binoto ayah niba muse na marmayam sajo iba sasadari, doseng muse mei lidi tu urut niba, alale … murmur markoti. Songonipeba, incogot na lupa mei iba i, na maor muse mei mulak karejo niba sasadari. Olodantong, petomantong si Lian alak Mandailing.

Muda ari Sabtu najopan roangku i, arana manyogot dope ari, romei ompungku marlereng sian huta asal nami mangalap au tu bagas nami sannari di Pasendeng. Dung maridi, juguk ma au i di tangga bagas nami i painte-inte ompungku. Bope nian maso i indape bahat kalak na marlereng di amian, taiba anggo sora ni kiring-kiring ni lereng ni ompungku muda ipalu ia marbeso do terbege dohot alak na lain. Dao dope sian bagas nami i, muda dung ubege sora ni kiring-kiring ni lereng ni ompungki, bulus jongjong ma au i: “Maro Ompung”, ninna mei dibagasan roangku. Manombo, ambaen ancitna ulala nai sibitkon ni umak i sajo atope arani i gusari ayah au muda adong salangku, bulus mangadu mei au tu ompungku. Indabeda, anggo ompungku pe na mangamuk mei, i tojankon ia bageng mei losung, oni irambankon ia muse mei indalu nai tu taruma bagas nami i. Sammpe sannari leng na uingot dope boto nai pardok ompungki muda dompak mangamuk: “Ulang se nai parkanciti amu anggingki !!!” Anggo ayah dohot umakku pe na monjap mei alai nadua i bilik ambaen biarna, indabe na barani alai kaluar bagas pasuo dohot ompungku. “Sada-sada !!!”, ima na ro obar dibagasan roangku, oni mikim muse aun’tong.

Dung tarpalan ilala ompungku, i ompa ia ma au i, dungi i pajuguk ia ma au i di boncengan ni lereng nia i. Dung i dorong lereng nia i dua-tolu langka, bulus i panaek ia ma lereng i salaos mangguncang na. Ami pe kehe ma marlereng marpalan-palan tu poken Hutanopan sian topi-topi ni dalan godang i. Lalu tu poken, songon na biaso, i pasahat ompungku mei lereng nia i di amangboru Jamarombun, na marjagal timbako dohot pusuk nai lambung parbantean na i lombang. Salose pasahat lereng, i togu-togu ompungku mei au lao tu dolok torus tu parjagalan ni Umak Umbik nai topi balerong i. Tolap tu si, i paido ompungku mantong pocal dua tapak, lomang opat korot, oni cendor dua mangkuk. Indape nai aumkon boto pocal dohot lomang i tu papangan niba, mudung ro mei ijur niba di bagasan baba niba, mariari tarsiak muse nida pocal i. Indabeda, dung abis tarpangan pocal dohot lomang i, oni minum cendor muse dungi, ompungku pe ngada tarantai ia be, na bulus torap ma ia ambaen butongna. Anggo au leng marpupu merdet monmonku arani siakna boto pocal ni Umak Umbik i. Dung salose namangankon i, i oban ompungku ma au maor di poken i, satongkin-satongkin maradian atia pasuo ompungku dohot koum-sisolkot nia, rap mangeceti oni sasakali rap mekkel, ra musengtong mangkair sasaulak.

Anggo ompungku da, asal do pasuo dohot sitandaan nia, inda na lupa ia patandaonsa bahaso au paompu nia: “Olo, on ma paompu na godang na, gorar na si Lomo !!”, ninna sajo mei mandok koum-sisolkot nia i patidaon godang ni roana.
Muda tu poken au dohot ompungku, adong sajo dei nai ida ni mata nia ambaen di au. Indape na malap-lap sipatu niba, na get i tabusi ia muse mei sipatu niba na baru. Imada so goyakna roa ni ayahku paida-ida ompungku: “Ulang na sai paenjeng ayah si Lian, sanga inda jadi alak ia saulak on !!!” Ning ayahku mei mandok ompungku. Ro ning ompungku: “Gorarna pe anggingku, roa-roangku songoni !!!” Ning ompungku muse mei. Muda tu umakku dodas dei ompungku mandok: “Ulang sei sibitkon paompungki, maen !!!”. “Olo amangboru !!!” Ning umakku songoni pamalum roa ni ompungku. “Olo ... olo ... olo ... ningmu maen, tai leng nai pisatkon ko juo do u ida, ligima pusot ni si Lomo leng na rata dope u ida !!!”. Ning ompungku muse. Sip tong umakku songoni, ipalalu ia karejo nia. “Goso jo isi bayo na muap tano !!!”, aropku tarsongon i ma na dong dibagasan roa ni umakku.

Allohu akbar ... Allohu akbar ... tarbege bahang sian masojid. Bo, magorib ma rupa. Dungi jonjong au sian jugukanki, torus lao marpalan-palan tu bulakang get manjawek. Dung salose manjawek leng na adong do boto na solot di bagasan roangku: ”Aso mei so songoni luai ke !!! Ayah ni ayahku udok ompung, sabalikna ompungku mandok au anggi, na marangka maranggi do au dohot ompungku luai ?!!”

Gandoang, 1 Juni 2009
by edi nasution

Di Pudi Ni Pintu

"Mangan dope au da!" ning si Sorngap mandok alak bagas nia

"Pala namangan, mangan ma, tai natalak do muloi nangkin". "Dung salose non tutup da, modom au parjolo!" ning alak bagas si Sorngap mandok puang nia na mangan didapur hira-hira pukul sambilan borngin.

"Ak dongan, tongkin nai ho modom le, copat iba mulak tingon lopo salana, tonga borngin iba mulak mur ma sala, adong pokatonta satongkin sugari" ning si sorngap muse mulakan mandok induk ni api nia.

Dung sidung mangan, marcarito ma si Sorngap :

"Adong nangkin sada toke, halak na sipit mata nai, ro tingon Medan, ningia porlu disia anggota get karejo pature dalan" ning si Sorngapma mamuloi kecek.

"Makasud ni abang songondia?"

"Anggo bolas do sugari parincoran,

mayup arambir marmago-mago,

anggo bolas do sugari pangidoan,

pinomat sakalion patola au mangaranto".

"Jadi tinggal ma hami dison?"

"Tai buat sementara waktu do, muda cocok tongkin nai, uoban komu tusadun, pala inda cocok tong mulak au mulak tuson" ning si Sorngap mangalus

"Muda kehe ho marbabo

Ulang tak-tak batangintai

Muda ingkon na kehe doho mangaranto

Ulang lupa ba di daganak tai"

*****

Sonjia mantong dongan namarkampung gorarna, angke ngajabat na aha karejo salain namangguris maia, marsaba, sasakali manggore pala dompak musim. Anggo namarboniaga dikampungi nataretong dei dot jari sanga piga nara, harana hum namanuliskon sajo dei non karejo, sidung ni i romai songon sudagar apundung, mago pangkal mago ujung.

Jadi anggo namanjalaki sinadonganma tehe tama dokonon tardokon do da aropku naborat dei, apalagi arga ni ape le inda narabe magodang, sementara kabutuhan na asing tiop tongkin magodang, indapedo anak sikola. Mandaek ma iba non ari Jumahat, ke marpoken ari Sabtu tu Kotanopan, tibo di ari Salasa namarutang muse mai mulak di lopo an. Sonima satorusna, sampe masuk muse non bulan puaso. Pala dung donok ari rayo namanjalaki gadison muse mai, manombo madung rante ni inang ni daganak malayang, manombo madung kurabu si Taing Habang.

*****

Jadi sonimada, singkat ni caritona marangkat juo si Sorngap tu Medan karejo dalan dot toke na ro mangalap kalai tu huta nialai i. Sadari-dua ari, torus ma karejo si Sorngap dohot ringgas ni na karejo. Maklum hita ma antong goararna pe nabaru karejo tontu inda na tanggung ringgasna be, ulang do ro tokei naso obanon nia pe iangkat ia mai, padiar susat tu bondari anggo isi tokei karejona pe ngana tanggung copatna. Tai ba dung ke non toke nai, na iupuntoling nia muse mai mangidup, dor mai jongang, apalagi pas adong muse boru-boru na lewat, suang mai ia mandorna.

Songoni ma satorusna, sabulan, dua bulan, kiriman tu huta pe lancar dope santak masuk patolu bulanna. Dung ni boto hamu muloi ma markerer kiriman si Sorngap, biasi songoni? Bo, rupa nadung diporsayai i Tokei do ia manjadi mondur. Jadi sian pandokon nia, angkon na irubah ma panampilan. Muloi ma si Sorngap manabusi baju nabaru, sipatu baru santak tu miak uskus.

Rupana baya disada maso disuru toke niai ia tu bagas mangalap bahan bangunan, bo tarpaida disia boru ni toke niai inda tanggung lagakna, bontarna mangalobi'i, sipit muse matana. "Inda dong di Mandailing nasonon bontarna on" ning roa si Sorngap dibagasan.

Pas disada ari, karejo ma halai inda sadia dao sian bagas ni toke niai, hira-hira saratus meter do, pature bondar ni dalan. Jadi rupana porlu ma di halai tali baen pangkobet ni profil, isuru toke i ma si sorngap tu bagas mangalap tali.

"Tolong kamu ke rumah dulu, minta tali sama nona!" ning toke niai mandok si Sorngap

"Baik toke, dimana talinya toke?" ning si Sorngap

"Ada di belakang pintu" ning toke niai antong mangalus

Marangkat si Sorngap mopop tu bagas ni toke niai, tai boto hamu di tongandalan sego niat si Sorngap. Dung lalu tu bagas, itok-tok ia pintu lao mandok, :

"Nona, nona!!!" ning si Sorngap manoktok pintu

"Iya, tunggu sebentar, ada apa bang?" ning boru ni Toke i lao ro sian kamar mandi maranduk-anduk.

Paida-ida namaranduk i, ibelokkon si Sorngap obar ni Toke niai.

"Nona, kata toke, sekali, dibelakang pintu!' ning si Sorngap, motar doma sorai

Mambege obar na songonian, tontu antong marsurak Nona i, sampe tarbege di tokei tu dalanan.

"Apa lagi???" ning toke i sian nadao

"Tidak dikasih Nona!" ning si Sorngap inda ra talu

"Nona, kasih!!!" ning toke i sian nadao

Jia ma mungkin antong ilehen Nona i, kasidunganna bele-bele marsurak kalai ro toke nai, langsung hona pecat si Sorngap sadari i, mantak karejo, mulak tu kampung, mangguris muse mulak songon na biaso.

Salapanjujar

ANGKAT MULAK DUNG MADABU

Adong dua anak boru na juguk di tangga bagas nadompak asik mangkobari halak, siaha ni siaha manga aha, salangia salangau salang-salang. Inda dong napade nida halai nadua halak namangolu diginjang ni tano ni Tuhan on, kayo halak mancit ulu nia, miskin kalak mabiar muse ia mangido tusia.
Asik-asik mangkobari, bahang Bilal di Masojid mandok masuk Kotu Isya.

Umak si Seno : "Ois da, ise muse pe nabahangi-i songon sora ni ambeng
na isarat doma binege"
Umak si Pinomat : "Tai angkang na di homui dei"
Umak si Seno : "Bo, malo muse do ia bahang dabo tie, tagi juo doba
binege sora nai, malo muse ia dabo malandung-
landungkon sora nia"
Umak si Pinomat : "&#%^)O)_))(*^%$

*****
UCOOOOPPPPP

Baen sun ni arun ni Jamanduda, madung bahat halak marsitungkir di bagas ni ibana, adong namaroban panganon, adong namaroban Imbako. Tai boto hamu hum gorarna sajo pe antong baya namarnyae, ahape ilehen ngana jabat na ihumkon nia.

Bele-bele soni roma Lobe Afdol manungkir, lao mangkuling tu si Jamanduda :

"Mangucop ma hamu jolo dabo lae"

(lao mangkusipkon tu suping nai, asok tai binege).
"Ucooooppppppp" ning Jamanduda antong mangalusi

*****

INDALE HAYU I DONGAN

Di hami an najolo dodas doi ro Halak Barat maradian manggambar 'bagas godang' songoni 'sopo godang' nadong di kampung nami i. Jadi disada maso ro muse mada halak barat nalampas-lampas manggambar bagas godangi, tarida di halak barat i si Jamintop dompak asik martukang kandang ni bagas, marsapa ma halak barat i tu si Jamintop :

"How Are You" ning halak barat i
"Inda ba le dongan hayu i, bulu dei" ning si Jamintop lao tiop tokokna

*****

JIA UM BAHAT?

Jiadole roa muyu bahatan na 'Tolunjujar' sampado 'Salapanjujar'?
Anggo ning roangku da dongan bahatan dei Tolunjujar, harana anggo Nasala Panjujar inda nadongi namadabu, nga antong roamuyu ipar?

Huling Kulingan Najolo

Dohot dope hamu dongan maruti-utian Huling Kulinganna Najolo? Anggo sannari ngana dong binege dabe huling-kulingan i, manombo dodasdo ro songon namalungun roa niba mulak tupudi dompak daganak iba najolo. Ijia sajo iba marsuo dohot dongan niba, nadung dodas mai Huling Kulingan on jadi buka dasar ni carito. Mula daganak dope halakna, huling kulinganna pe tontu antong huling-kulingan ni daganak, tai boto hamu muda dung muloi ma puber, adong mai non huling-kulingan na Sala Taram Mardosa.

Ita pareso deba huling-kulingan on da :

HULING-KULINGAN NI DAGANAK :

Ison ko amang, ison ko inang,

pala ro ranggas nalimai anta naso mulak be au be.

Dapotna botole baya : Rongit

Tak sikatuktak Tolu indegena

Dapotna : Halak Namangordang

Sabolak-bolak ni tobat ni inanta, lima maia gulaenna

Dapotna : Parbasuan

Iapus, Rata
Dapotna : Gundur

Mardahan inanta, diginjang korakna

Dapotna : (Mangido mohof) : Te ni Orbo

Madabu Bom manaek Mandera

Dapotna : (Mangido mohof juo) : Orbo namiting

Opat di urak sada, ro udan

Dapotna : (Mangido mohof juo dongan) Kong-kong na tuaek menek

SALA TARAM MARDOSA :

Apit maraek-aek

Dapotna : Sugi-sugi

Pangkal nai marabong, ujung nai igotap, munduk-unduk lao pamasukna

Dapotna : Same na isuan

Nabahatan dope huling-kulingani, tai ibape muloi ma marlupaan, harana molo pas dompak marlagut dohot daganak i, ibaenpe huling-kulingan, ngana i humkon kalai be.

"Baen ayah le Doraemon" ning daganaki

"Minto lampu, naron domai, marcarito ma ayah jolo soni, carito najolo" ningku mulaki

"Aha caritona?" ning daganakta marsapa

"Si Manuldang, do Si Manare" ningku songon na holas saotik.

Bo rupa, tarbege di inang ni daganak i, "Caritohon ma uida, anggo inda upulos non pusotmu ulang dokon gorarku si Lasniari" ningna ma songon namangogar au.

"Bole anggi, inda na iboto ho nanga antusan ni i?, tai Indalu dei dot Losung" ningku muse manjawab, harana leng namabiar juo do iba hona pulos non. Rupana baya inda namalo muse halak bagas na mar huling kulingan on be.

Mangilakkon Bustak Tardege Te

Anggo hum naronyang-ronyang saotik do pamatang muyu ale dongan na dua tolu, nangkon jabat manjalaki datu hamu mambaen ubat sapo-sapo sanga tu mantari suntik, ro sajo ma hamu tu lopo ni Jamananduk na di topi dalan godang an. Hodokan dei non pamatang baen ribur dot tata ni halak dilopoi. Hum gorar ni lopo nai pe ‘ntong “Lopo Gembira”, apalagi pas muse non dompak disi Jatarkotul, ia mai na dodasna jadi tukang carito.

Angke anggo inda ro alak bagas nia manaruon daganak non tu lopoan, inda na jongjong ia sian jugukan niai i. “Parorot daganakon, get ke au marbabo” ning alak bagas nia ma disada manyogot atiha marburas. Tarpaksa marorot boto hamu Jatarkotul sadari i.

Adong-adong sajo dei goraan nia non asal lewat kalak, inda porlu isia i, olope na tobang-tobang apalagi na tar danak, ina-ina pe asi.

“Ngon jia doon umak Pultak?” ningia ma adop ina-ina na lewat sian jolo ni lopoi
Sip antong umak si Pultak, inda i alusi ia, harana mabiar ia roncam non Jatarkotul.
“Alaaa, nasombong maho sannari da dung maraek supingmu, mangecek pe dor doma sasadaho” ning Jatarkotul muse mulak mangulaki.
“Ngon pudi get tu jolo” ning umak si Pultak tong mangalus, leam doma ilala Jatarkotul. Baen liana ilala ia, purak-purak ma ia marsapa dihalak narami dibagasan lopo i.

“Madung jungada ma ucaritohon di hamu carito na ikidik-kidik jadi-jadiani?“ Ningna muse ma mamangkal carito, ipalalu ia mambuat goreng dua di anak nia soulang bahat ulahna.
“Pardokoni ma soni, sakali mangaminkon ma hami non” ning Jamananduk parlopoi.
Di hamian najolo adong ma sada naposo bulung namargorar si Mulakmuli, karejona ba na pangangguran do, tai nalobi ganteng parroana, nalobi maradong ilalasa, na ia ma ilala ia na iana. Pala iontang tusaba, malomlom ma ningia, padohal pala ipelos umak nia pusot nia, leng na kehe do ba ia. Pala marcarito epeng kalak, epeng nia ma nabahatna, pala marcarito panganon kalak, panganon nia ma natabona, pala marcarito gandak muse halak, gandak nia ma na lagakna. Padohal santak di ari sadarion nasodong dope dapot ia dongan nia.

Singkat ni caritona, disada maso roma boru tulang nia sian huta balian ioban simatobangna giot patidaonna disi Mulakmuli. Tai boto hamu inda na haru godang roa nia, mangecek pe boru tulang niai alus soalus do ibaen ia. Padohal tardokon do anggo rupo inda jabat na kalah boru tulang niai sian halak kabahatan. Tai sonima rupa si Mulakmuli, sanga na gengsipe sanga na patidahonna dialak nabahat bahaso naso ra ia i jodohkon inda dapot jiba.

Hinggo disada maso, maridi ma Simulakmuli di Batanggadis potang-potang, dijulu ni tapian ni bujing-bujing di hutai. Rupana lao kehe ia nangkin maridi tarpaida disia udur si Rondang dohot simatobangna lao kehe juo tu tapian i maridi. Sabotulna dung dor do sapetona ikusip ia si Rondang on, tai santak tu ari sadarion naso dapot dope udutna. Tai ba anggo pancaritohon nia dihalak madung mardongan ma halai, nagiot marikah lari bage doma.
Jadi imada, gorarnape antong halak najolo, iayup si Mulakmuli ma ibagasan ni takar, Sitarak, Sitangkis, boti podom-podom. Antusanna dabo angan-angan nia, :

Dung hita sitarak
Jolo Sitangkis Baya Podom-podom
Dung do Hita baya Marsarak
Jolo Tangis do anso modom.

I sajo maia na iboto nia ba, tai jaru songoni, madung pohom mai si Rondang bahaso nagiot mangkusip muse si Mulakmuli naron borngin. Tai boto hamu, rupana umak si Rondang do namandapot surat ayup-ayup si Mulakmuli on, harana si Rondang nangkin parjolo mulak tu bagas.

Borngin nai antong ro muse ma si Mulakmuli mangkusip tu bagas ni halak si Rondangi, bo rupa nasala kusip do si Mulakmuli, tarkusip ia umak si Rondang. Harana si Rondang kehe martandang saborngini tubagas ni etekna na hurang sehat. Dung ipalu uyup-uyup, muloi muse ma marpantun si Mulakmuli santak habis kamus nia. Rupana na isambut umak si Rondang muse do pantun si Mulakmuli on sian bagas, asok-asok tai tarbege. Songon na dosir mulak tong mudar ni Umak si Rondang mambegesa, harani nadung onok ia ditinggalkon alaklaina nadung parjolo dipio Tuhan tai.

Jadi imada, margoso halai nadua marsibalos-balosan, bo rupa ro jadi-jadian sian pudi mangkidik-kidik si Mulakmuli.
“Ah, soho ale, halak na dompak marusaho” ningia inda manalion tupudi.
Inda sadia onok, ikidik jadi-jadian i muse mulak, “Aha donanga?, sigaret?” ningia muse lao mangalehen sigaret, tai inda pe namanaili. Mur dor ikidik-kidik jadi-jadiani, kasidunganna holas si Mulakmuli. “Ma udokon tong ulang mangganggu, naso adong male di saotik pe pangartianmu?” ning si Mulakmuli lao manaili tupudi. Huuuuuuaaaaaaaaaa, Rondaaaaaang, buka tingkaaaaap!!!” ning si Mulakmuli mandoik tingon toru. Tarsonggot umak si Rondang, ibuka ia tingkap, mangambur si Mulakmuli tu bagas, marroan muse halak sabanjar baen riburna. Dapot halak nabahat ma si Mulakmuli madung dibagas nihalak si Rondang salao mangkaluk umak nia, bontar doma ipon nai baen biarna.

Dung rami di bagasi, torang muse harani marsioban colokna, ro muse katuai manungkir. Rapat punya rapat angkon na ikawinkon doma si Mulakmuli dohot umak si Rondang harani masuk ia tubagas. Rupa soni undang-undang dihutai, ise natardapot masuk bagas sapala mangkusip, inikahkon. Mangecek ma katuai.

“Harana dung sonon antong kajadianna, tarpaksa di nikahkon doma hamu nadua” ning Katua i
“Si Rondang dei na ukusip i Katua, inda umak nia” ning si Mulakmuli sogon namanyosal
“Tai on ma buktina bo, umak nia do nangkin mangkaol ko, baen biarna ho” ning katuai mangulaki
“Olo Katua, baen na ikidik-kidik ni jadi-jadian do au i, so masuk au tubagas, lagipe sakalion dope au ro mangkusip tuson” ning si Mulakmuli get mangilak harana tarpaksa marikah dot namarando, tobang-tobang muse marumur 40 taon.
“Ah, jadi-jadian ni ahamu dei, sangajo na giot masuk ko tu bagas” ning Katuai muse
“Ijia mai sakali, nasaborngin per ro doho tuson” ning umak si Rondang muse songon na pakokoh obar ni Katuai, harana ia pe antong por roa nia dapot perjaka ting-ting umur 27 taon.
“Olo, tarok dua kali”, ning si Mulakmuli muse mangalus
“Napoken nalewat?” Ning umak si Rondang muse mulaki
“Tarok tolu kali” ning si Mulakmuli muse mulak tong
Ah, na ma dor tu domai tarokna” ning katuai muse antong

Walhasil marikah kalai saborngini, tai boto hamu santak tu sadarion ubege leng ne rukun do halai nadua, madung sanga dua daganakna.

Tinggal lagi antong ulang sei nagiot mapili tu iba, ulang sanga “Di ilakkon bustak Tardege te” ning Jatarkotul lao manjalaki solop nia sabariba. Rupa madung adong mangonjapkonna.

Sada-sada Parmainan

Pangkudu Pamarai
Ilombang ni si Alogo
Marguru homu dongan Manyapai
Pala iba naso umboto

“Imada sipaingot ni natobang-tobang najolo dihita anso rap ringgas be marguru, rap ringgas be manjalaki elmu, tarutamo nangkinondi elmu ugamo”, ning ompung Lobe ma dihami songon namarsipaingot. “Ulang songon Jabondar dot Jagadu” ningia muse mulak palalu obar.

Nadua halak on tardokon do namardongan rosu, olo pe’ntong inda namardongan rosu botul. Tai nadung biaso mai halai nadua marsiarsakan apalagi atiha marburas di lopo ni Jamarsuan an, margonti-gonti doi non hona arsak. Gorarna pe’ntong namarsiarsakan do, ngada jungada ba halai nadua marbada jabat ibaensa, paling-paling mai non mulo kalah si Jabondar, purak-purak maia mulak tubagas. Manombo idokonsa na pio-pio inang ni daganak, manombo idokonsa na giot kehe tusaba, sapala manombo idokonsa muse nagiot kehe sumbayang tu masojid, pokokna adong-adong sajo mai non alasan nia.

Disada maso kalah arsak muse mada boto hamu Jabondar,
“Naron doma dongan ita palalu da, sumbayang jolo tongkin” ning Jabondar ma mandok Jagadu nadung rara mukona harana ipartatai halak nasalopoi ambaen sontingna pangarsak ni Jagadu. “Anggo sakalion, inda sobar au on be”, ningia muse ibagasan roa nia. Torus antong kehe ia tu masojid giot sumbayang Ashar. Bo, rupa na di ihutkon si Jagadu muse do sian pudi, harana ia pe giot sumbayang. Rap manjawek ma halai nadua di pancur masojid i maradu sip, dung ni rap masuk muse tubagasan masojid nangkinani.
Harana tarpaida disi Jagadu nadung holas sajo di Jabondar, rupana marhajat ia dibagasan roa nia rap sumbayang halai nadua marjamaah (tai ba ngana binoto sanga ulah nia pe sanga na botul makasud nia i). Jadi pas Jabondar langka tuginjang sajadah i, torus ipaisar Jagadu muse tulambung nai sabolah siamun, torus ma ia qomat.
Inda pe salose qomat, ipanenju Jabondar mada Jagadu, salao mandok :
“Aha do maksudmu nanga?”, “Nalayasan huida roamu jau, baen iboto ho inda sanggup au jadi imom, qomat maho” ning Jabondar.
“Na denggan do dongan niatku, rap sumbayang jamaah hita nadua, mangalo doho antong, ulang ma oban nai lopoan tu masojid on da, inda iboto ho nanga bagas ni Tuhan do on” ning Jagadu muse antong mangalus, tai ba inda nabarani ia mambalos, urum nia do na itiop nia bokas na ipanenju si Jabondar i. “Pala nga sanggup ko jadi imom dokon, au imomna, ulang mangalo” ningia muse songon na mangalap-alapi.
“Ibuktihon dei antong jolo”, ro ning Jabondar dibagasan roa nia
***
Ari margonti ari, bulan margonti bulan, disada maso muse atiha ke Jabondar tu masojid get maridi, tarpaida disia si Jagadu dompak sumbayang kotu Lhuhur. Inda lalu Jabondar maridi, tai ipaisar-isar ia muse manjawek, torus masuk tu masojid i. Rupana si Jagadu dompak khusuk sumbayang, palan angkatna, deges tuma’ninahna, binege muse sora nai sapala pindah sian rukun nasada tu nasada, topek muse dua rokaat dope sumbayang nai.

Sapala dungi, ijontik Jabondar abara ni Jagadu, maksudna so rap marjamaah. Tai boto hamu naso iambang-ambang, tup-tap soni Jagadu nasumbayang i, songon manuk namanuduk atiha manangko jombur marisar-isar. Inda binege sorana sapala pindah sian rukun nasada tu rukun nasada be, inda muse mar tuma’ninah be.

Dung salose sumbayang mambori solom, mamatai ma Jagadu tu pudi, rupana Jabondar do na manjadi makmum niai. Kasidunganna dung rap mijur sian masojid i, martata ma halai nadua, : “Sada-sada parmainan da” ning Jabondar lao kehe mulak tupancur masojid i torus maridi.

Malungun - Mandurung

Itandai hamu do le dongan Durung Pongkar, Durung godang na ibaen sian bonang, martangkil markisar dua meter parsitiopanna. Muda dung mombur ma aek Batang Gadis najolo pala ro udan, mandurung ma iba ia dot dongan di udan-udani dohot Durung Pongkar nangkinani. Dapot mai non aporas dot sulum songoni muse udang. Dung lalu tu bagas igoreng mai udang i sanga isambal karambir, rara doma, dosir ijur niba mulak mangingotna.

.....

Dompak daganak iba, dung salose mangguris, manaek ma iba i tu batang ni jambu di untuk ni tor napa-napa, imuloan mai marende.

Ancit ni namandurung leeeeee

Sada-sada incor di batu

Ancit ni namalungun le

Sada-sada baya ilu madabu

"Porkon udan, inda sira au, anak so boru parkayaonkon" ning donganku mai sian sabolah, lao palidang-lidang aek ni apea sian polan (sitirip) nai tu takari. Padohal baen lungunna do ilala dikoum-koum niba boti sudao na adong diranto, inda dong na ra ro manungkir. Koum-koum ni dongan marmulakan sian ranto, apalagi mula masuk bulan puaso.

Dung binotoma ma poso, dapot muse ma dongan (calon ni inang ni daganaki, tai inda lalu) maruba muse sora di namandurung i.

Mandurung ko mandurung

Mayup sanggar di batang gadis

Muda malungkun ko malungun

Dokon gorarku ulangko tangis

Landit ni namandurung

Ditoru hayu dot batu nalomlom

Ancit ni namalungun

Arian borngin inda tarpodom

(Padohal anak boru namungkor do di halaian, iba do namargoso).

Dung kehe iba mangaranto, mur masantak muse ma sora ni namandurung.

Pala mandurung ko angki mandurung

Tolong durung di toru ni jambatan

Pala malungun ko anggi malungun

Kirim surat tu kota Medan.

Dung matobang iba sannari, daganak pe madung bahat, tai boto anggo namandurung on namur masantak do.

Landit ni namandurung

Unte manis mardagul-dagul

Hancit ni namalungun

Aek nimata pe marsabur-sabur.

Harana inda inang ni daganak sajo antong lungunonkon, daganak bage dope. "Nga ale roamuyu pareban?".

"Pokokna, pala mandurung, mamoyom" ning si Dapdap muse songon namar istilah

Boa-boa

Tu : Kahanggi i si Ifran

On ma gambar Masojid Raya Madina na dibangun di Aek Godang - Panyabungan, phisikna markisar2 40%, rap mandoah ma hita mudah2an copat salose anso rap sumbayang kita tongkinai disi, Insya Allah.

On dope so tar update, mangido mohof da kahanggi.

Salam

Opat Pat Ni Manuk

by : edi nasution

Di sada borngin, adong mada opat poso-poso na dompak marjuguk-juguk salaos mangecek-ecek di sopo jago na i topi dalan godang an. Ahama carito ni alai di si, ima taringot tu paramangboruon ni si Dame na dung mangalap boru dua poken na solpu tu Padang Bulan. Boru na sian huta ruar i na santak bagak, suangkon do alak India: ginjang godang boti manis muse, ima nangkan jadi bouk ni si Dame pala dung i patobang. Arani i dodas do dongan-dongan ni si Dame mangarisak ibana, tarlobi-lobi dung do lopeh horja Haroan Boru na tuari di ari minggu.

“Biado Dame, aso do tondo ho, inda langa jop roamu marbouk na bagak?” Ro sapa-sapa ni si Lindung.
“Olo, songon na pohom u ida dongan taon sapoken on, inda dapot obarna!” Ning si Tomu na juguk i lambung ni si Dame.
“Ulang be, marbouk baru mantong !!” I tambai si Laung muse.
“Ala … na lage mamu da, inda dabo i na tarsirok di roangku. Marnyae dabo angkang na i Bogor, parwarung i, madang sapoken lolotna!” Ning si Dame.
“Songonjia langa nyae ni angkang tai?” Marsapa si Lindung.
Ro alus ni si Dame: “Sian surat nadi tongoskon kakak i poken na lewat, ning ia masuk rumah sakit do jabat, gulung tolu ari di si. I mada na mambaen marsak ami sabagas!”
”Pangidoanta tu na Sada i nian ipas ma iras mulak angkang i!” Ning si Laung.
Dungi, sip polngit santongkin.

Sian dolok, marroan muse dua-tolu poso-poso. Na parjolo tolap tu sopo jago i si Bania. Bulus i pajuguk ia, dungi mandok : “Angkang Laung, lalu do ita na get marsulu i?”
Ro ning si Laung : “Pokat na do, anggo au ra, madang sapoken bo na so mandai aruting nai gule rata, siak muse, manetek ma dongdongku bo!!”
“I mada angkang so roa mi tu son, so binoto sanga na lalu ato inda ita na marsulu i!” Ning si Adian.
“Pos ma roa mu ale, anggo marsulu gulaen, tape-tape nia dei, borang na!” Ning si Tomu.
“Oni songonjia dia do, ami pasiapma lampu tarongkeng na?” Ro muse sapa-sapa ni si Bania.
“Pasiap kamu ma, ulang lupa maroban baluang, oni layan tajom goluk nangkan obanon!” Ning si Lindung.
“Sada nai, marsioban danon na be, sadalak tolu takar!!” Ning si Dame.
”Inang gois nang, nabahat tong, palalu le sasuat be, so mosor-mosor dung mangan!!” Jauk-jauk si Koje sian bagasan ni sopo jago i.
”Ala ... songon na so binoto isi ni boltok mu, sadangdang pe abis ko!!!” Ning si Bania.
”Olo, songon na antulaparon, lupa ia na muta-uta ambaen butongna dompak marmangan-mangan bulan na lewat !!” I tambai si Adian muse.
”Marpalan doba sotik papangan mi mangkuling, Jalandit!! Ho dope na gaorna muda marmangan-mangan, tarik tu adop, gulaen na tabo-tabo nai ibaenko di jolomu, ho pe naso mangirput do ho!!!” Ning si Koje arani milasna roa nia.
”Madungme daboi, marsipan kamu, indape na karejo madung martongkari, madao rasoki, adope marsiapma so keta na marsulu i!!! Ning si Laung.

Urang-lobina sajom dungi, sian parlopoan ni poso-poso nai lambung bagas ni si Tagor, alai poso-poso na get marsulu gulaen i, rap marangkat marudur tu batang aek an. Adong na sandang baluangna, dua halak maroban lampu tarongkeng na dung i pagara, lima halak maroban goluk, oni adong juontong na maniop-niop ayu ambaen rambas-rambas. Tolap kalai tu batang aek an madung bagas borngin, indadong be tarbege sora ni urindik atope na lain nai, hum sora ni asak doma na dosak-dosak sian batang aek i. Di muloi alai ma marsulu sian tapian ni dadaboru nai lambung suro na i jae. Isi aek na pajat satambiul ni pat, nida muse tangkas gulaen na pae-paulu: adong aporas, sulum, lelan, garing, oni sada-dua aruting atope tingkalang. Jop boto nida roa ni gulaen pae-paulu di tapian ni dadaboru i arani bahatna sipanganon di si, tardokdo sude tola-tola dina mangan misalna indahan na sayang.

”I si bo tingkalang na godang, tampul bo Kedan !!” Mangkuling si Retuk targogo.
”U ida dei, ulang ko se retuk, marlojongan non gulaen i, sip ko, pamatai songon i, palan-palan angkatmu!!” Ning si Kedan menggusari si Retuk.
”Padonok lampu i tu son, patibu bo, so u tampul !!” Ning ia muse.
“Jab” tarbege sora ni goluk nai tampulkon tu bagasan ni aek. Dungi, tarida sada tingkalang na get bola dua, margepor-gepor muse mardaro-daro, panggodang na hira-hira tar sa botohon.
Ro ning si Lindung : “Jomput bo Retuk, pamasuk tu baluang i !!”
”Olo angkang. Pamatai angkang i jolo tar tu jae saotik, adong kuida na lomlom ginjang i tonga-tonga batu na dua i”, ning si Retuk.
”So ho i si”, ning si Lindung palan salaos mandao tu jae.
“Jab” tarbege muse sora ni goluk na i tampulkon si Lindung.
“Mai son aruting na sabitis i da, alap bo Retuk !! Pio-pio si Lindung.
“Amang, na godang mei aruting nai ke. Inda tampil ba i di baluang ta on”, ro alus ni si Retuk.
“Susuk songon i”, ning si Kedan.
Inda sadia lolot, madung gok gulaen di bagasan baluang nai sandang si Retuk i, adong muse dope nai jinjing nia lima ihur tingkalang dohot aruting.
”Maradian ma ita, cukup mai gakku guleonta, marlobi-lobi inda pade, goyak naron na Sada i. I tamba muse dope na dapot uduran ni alak angkangi si Laung. Topotkon kalai jolo Kedan, so rap mulak kita”, ning si Lindung.
”Yabo angkang”, dialusi si Kedan salaos kehe tu maripas-ipas tu julu.
”Biado angkang Laung, ra do ?”, marsapa si Kedan.
“Adong juo saotik, amu biado ?, ning angkangi si Laung.
“Imada, pandok ni angkangi si Lindung rap mulak ma ita tu huta, arana cukup mai ning ia guleonta”, ning si Kedan.
“Olo anggo songon i”, ning angkangi si Laung salaos rap mardalan kalai tu jae manopotkon dongan-donganna.

Dung i paias kalai gulaen i di topi aek i, alaipe udur mulak tu huta. Tolap tu sopo jago i, alaipe rap marsibaen karejonabe: adong na mangombus api, manggiling lasiak, mangkuhur arambir, mambasu danon dohot na asing-asing nai. Urang-lobi sajom lolotna, dung masak sude alaipe rap mangan marsitutu arani malena di borngin na ngali i.

“Ise do na giot dohot mangalapor tu lombang, manyosak ma alai bo !!! Ning angkangi si Laung.
“Angkangi pe da, takok mabiar angkangi, so i donganan”, jauk-jauk si Kedan.
“Aha muse dei biarku di banua on. Jihin pe pe ro tu jolongku, u cipakkon dei !!! Ning angkangi si Laung targogo sora nia.
“Ala … songon na so amu borngin na tuari u ida maripas-ipas i toru ni marapolom an !!! Ning si Retuk salaos mikim-mikim.
Ro alus ni angkangi si Laung : “Imada muda dao iba sian lonceng, inda binoto sanga aha na muba. So i boto ho Jaretuk, atia i get sorang dabo danak ni angkanta Japagaran. I ma so maripas-ipas au tu lombang mangalap ompung Kiyah !!!
Sip tong si Retuk. Moni mangkuling muse angkangi si Laung : ”Takok martaru do ita jolo sanga ise na tahansa modom sajom di parobanan nai musojid nai dolok !!!
”Pade do bai so bonoto sanga ise do sabotulna si parbiar. Biadontong angkang Retuk, olo do ?!! marsapa si Kedan.
“Sip babamu Kedan !!! Ke majolo mangoroi tu aekan, ulang se na muntut sajo tohapmu dung butong mangan, bauan kalak dibaensa”, murmamilas roa ni angkangi si Retuk.
“Ala ... keta le angkang tu lombang”, ontang-ontang si Kedan.
Ro alus ni angkangi si Laung : ”Keta, tai jia jolo sabatang sigaretmi so hum onak na mangayup on !!!
Dungi alai na dua kehe maripas-ipas tu topi aekan.

”Adong dope sigaretta i si, Dame ?!! Marsapa angkangi si Retuk.
“Adong angkang, taiba sabatang nai doma tinggal, oni ngada targotap dua ba !!! Ning si Dame.
“Kha ... ka ... kak”, mantata angkangi si Lindung salaos mandok obar : “Na denggan ma roamu di si Retuk, muda u paido nangkin indadong ningmu”, leng pupu ia mantata.
“Amang ... na lantamma ilala ho !!! I ambangko muse do na masa-masa i angkangmon !!! Murgusar tarida angkangi si Retuk.
“U panenju ho naon, amu saudon pe alongku inda mabiar au”, ning si Retuk muse.
Dungi jongjong ia salaos paibul tenju-tenju tu jolo ni igung ni si Dame.
Ro ning si Dame : “Inda sianyang dabo angkang, o ison bo sigaret na sabatang i”, i buat ia sigaret sabatang sian cakuk nia patidaonsa di angkangi si Retuk.
Dungi, ngada be dong obar. Angkangi si Retuk bulus kehe tu dolok manopotkon poso-poso na marjuguk-juguk di tangga simin ni bagas ni si Tagor i.

Dung morot angkangi si retuk, tinggal lima alak nai doma di sopo jago i. Na tobangna angkangi si Lindung dohot si Golom, na tolu nai ima si Dame, Si Torkis dohot si Jalupis. Anggo alai poso-poso na sapangkek madung pohom do alai tabiat ni si Jalupis. Bope antong bayo on tarpohom, taiba anggo panaili nia leng na asing do nida muda mamatai bujing-bujing. Ninna, dompak menek si Jalupis on na congokan mangan lupis. Muda dung muli umak nia siab poken, na parjolo gareon nia di bagasan adangan ni umak nia i manjalaki lupis. Ulang do lupa umak nia manabusi lupis, angkan na mangarar ma ia i tangis-tangis santak tu potang ni ari. Imada so mohot gorar nia si Jalupis sian na menek sampe magodang jadi poso-poso.

Inda lolot dung angkangi si Retuk morot sian sopo jago i, jongjong musema si Jalupis get kehe muse. Rontong sapa-sapa ni dongan nia si Torkis : “Get tudia do ho le, ima golap ni ari ?!!
“Tu suro nai dolok. Nangkin u tinggalkon abit karungku di si, na tondikan kulala. Oni adong dope sigaretku satonga bungkus nai u balutkon di abit karungki. U alap jolo so dong iduponta !!! Ning si Jalupis.
”Pademei, alapma. Au pe macom doma ulala babangkon, indape na marbual sian nangkin”, ning angkangi si Lindung.
”Jai angkang !!! Ning si Jalupis salaos mangalangka torus mardalan tu dolok.

Dung kehe antong si Jalupis, i patorus kalai na opat mangecek-ecek di sopo jago i. Indape piga arsik i Dame mangidup, ro musema si Adian dohot si Bania tu si.
”Tudia damu dung mangan nangkin, jalak-jalak iba, inda dong be idupon”, mangkuling angkangi si Lindung.
”Imada angkang, sigaret nami pe na so dong do, ima so kehe ami nangkin tu jae ampot adong sigaret di si, so mangido jolo”, dialusi si Adian.
”Sabatang maia dapot kami, ima so inda taroban tu son”, i tambai si Bania.
“Si Tomu maidia, gakku adong dei sigaret nia”, ning si Adian.
“Bayo i pe mago dung mangan, mago-mago sada do amu sude u ida”, tarholas nida ilala angkangi si Lindung, indadong ida ia na marroa dongan-donganna.
“Onpe si Jalupis inda na marnaro. Ningia mangalap sigaret, madung sajom i painte-inte indape na tarida bohi nia”, murmagogo sora ni angkangi. Tarlobi-lobi muse paida-ida lagak ni si Retuk na ro tu sopo jago i salaos mangidup marbual-bual songon pangidup ni parkoboi, sian babana timbus kaluar maribul-ibul, dungi mandotok muse dope baba nia pasabas-sabaskon.
“Aropku dabo angkang nang lilu dei Si Jalupis, ato sanga na dung mungkor do ia di suro an. Keta le ita pareso jolo !!! Ro ontang-ontang ni si Bania.
“Si Jalupis do ?!! Posma roa muyu di bayo i, na tarsimbil-simbil dei pangaroai na !!! I tambai si Adian muse.
“Simbil-simbil songonjia ?!! Ro muse sapa-sapa ni angkangi si Lindung, purak-purak na so i boto ia parange ni si Jalupis.
“Bo ... ulang do nida ia urum na manis, ulang-ulang ma jolo paida-ida pardalan ni bujing-bujing na megol-egol songon itik surati, anggo ia pe naron jama tot jama ulu mei dibaensa. Sidungna, mandok pisang pe picak domei non didoksa !!! Muripatangkas si Adian.
Mangkuling muse si Torkis : “Dodas dei angkang u ida ia di kobun-kobun pisang nai bariba, purak-purak manastasi bulung ni pisang na malos, naso kobun ni alai so. Taiba, anggota mata nia leng bilak tu paridian ni dadaboru nai julu !!!
“Songon i do ke. Bania, biado ning roamu, ita ligi do Jalupis tu suro nai dolok !!! Marsapa angkangi si Lindung.
“Pokatna do angkang, anggo ami rap olo do !!! Dialusi si Bania.
“Ning roangku ita na dua pe kehe paresosa, nalain nai leng di son”, ning angkangi si Lindung.
“Songon i pe jadima”, ning sadebana rap-rap.

Tolap tu suro nai dolok, inda na adong diida alai si Jalupis di si, bope abit karungna. Anggo lampu colok leng gara di bagasan ni suro i.
“Manida angkangi, inda nai si ia !!!” Ning si Bania.
“Olo u ida, tu diama ita jalaki ?!! Ro sapa-sapa ni angkangi si Lindung.
“Bia angkang muda ita ligi tartudolok sotik, donokkon pancur nai topi saba i !!! Ro alus ni si Bania.
“Aso angkon na tu si ?!! Marsapa mulak angkangi si Lindung.
“Arana dibagas na paduaon sian pancuri, adong na baru-baru, kan adi baru maringanan amangboru ni si Dame ?!! Ning si Bania.
“Olo ke, tapareso tu si pe jadi”, ning angkangi si Lindung.

Dung mardalan kalai na dua ira-ira tolu tonggak tartudolok, inda dao sian pancur i, ida alai adong na margorak-gorak i dinding bagas ni amangboru si Dame i. Murdonok kalai mardalan palan-palan, murmatangkas sanga aha na margorak-gorak i. Ma pasti alak dei, uluna i sanggopi abit karung, ima abit karung na somal i pake si Jalupis ambaen ulos modom di sopo podomanna. Paida-ida bayo nasoture i, murmilas ulu ni angkangi si Lindung. I jolo i ia sada batu panggodangna tarsa marapolom. Dungi irambankon ia sagogonia tu si Jalupis : “Puk”, tarbege sora ni batu ona dinding ni bagas i, ira-ira saeto diginjang ulu ni si Jalupis.
“Mamarmara”, ima obar naro dibagasan roa nia, salaos get marlojong sian i. Atia i lupa ia na dompak jongjong di ginjang ni losung. Arani i, bulus singgalak ia tu pudi, dungi tombom muse urut nia tu batu-batu nai pamispisan ni bagas i, untung ma inda mabangkir ulu nia.
Dung bisa ia jongjong mulak, ia pe marlojong saipas-ipasna tu julu mamota-mota saba. Tarsatonggak dungi, i lojong ia muse tu lombang. Sampe tu suro nai topi aekan, i basu ia muko, tangan dohot patnia. Dungi palan-palan ia maardalan tu jae manopotkon dongan-dongan na marlagut di sopo jago i.

Atia si Torkis mangida si Jalupis ro sian julu mandonok tu sopo jago i, bulus mangkuling ia : “Ngondia dei si Jalupis roa i ?!!”.
Si Jalupis pe murmurdonok tu sopo jago i. Ro sapa-sapa ni si Adian : “Tudia sajo damu, jalak-jalak angkangi si Lindung ?!!
“Olo, mauobanma sigaret ambaen di angkangi, ison bo”, ningia salaos patidaonsa.
“Aso do lolotna namangalapna maia tu suro nai dolok ?!! Marsapa angkangi si Retuk.
Indape i alusi si Jalupis, ma ro obar ni angkangi si Lindung na baru sampe tu sopo jago i : “Opat pat ni manuk ke Jalupis ?!!
“O ... o ... o ... lo ... ang ... kang !!! Opat pat ... opat pat ... ni ... ma ... ma ... nuknuk,” rorap si Jalupis mangalusisa arani tartomos boti biarna paida-ida aangkangi si Lindung na jobos-jobos ro tu jolo nia.
“Ala angkang, andigan do unjung opat pat ni manuk. Atia sihim pe panganon ni kudo santak tu ari saborngin on, leng na dua dei pat ni manuk, nga jungada boto opat patna”, murisurkut si Torkis.
”Kha ... ka ... kak ..., gakku adong dabo manuk na opat patna di lobu nai bagas ni amangboru si Dame i”, itambai angkangi si Retuk muse.
”Dungmei Retuk !!! Jalupis, dongani jolo au mambasu pat tu musojid nai julu”, ning angkangi si Lindung.
”Jai angkang”, dialusi si Jalupis salaos mengihutkon langka ni angkangi si Lindung sian balakang.

Dung tolap kalai nadua tu musojid nai julu, salaos mambasy pat di pancur nadong di kulak i, marsapa angkangi si Lindung tu si Jalupis : ”Aha do karejomu nangkin di lambung ni lobu manuk nai bagas ni amangboru si Dame i ?!!
”Inda unjung au tu si, mari-ari bagas borngin songonon mabiar dau i, angkang”, dialusi si Jalupis.
“Jadi ise dei bayo na liput sian i nangkin dung u topo dot batu ?!! Marsapa muse angkang i si Lindung.
“Inda uboto ba angkang, na miting dau di bondar nai lambung ni suro nai dolok”, ning si Jalupis.
“Ulangko margabus !!! Ho ma ia na ampuna abit karung na marcorak na songon i di huta on. I ambangko muse do au na rabun-rabun manuk. Akuma, muda inda, u darap ko naon !!! Murbolnang mata ni angkangi si Lindung.
“Sumpah angkang, inda au i”, ning si Jalupis.
“Amang ... marsumpah museng dope ho !!!” Ning angkangi si Lindung salaos mandarap-darapkon muko ni si Jalupis : “Pak ... pak ... pak”, tarbege sora ni darap-darap tolu kali.
“Ulang be angkang, mancit kulala”, ning si Jalupis get tangis.
“Ho dei kan ?!!” Marsapa mulak angkangi si Lindung.
“Inda angkang, na sala mata dei angkang i”, ning si Jalupis leng martidak.
“Amman ... leng na inda pe mangaku. Takok u pio do si Torkis tu son, na rap tangkas ami ida ho liput sian bagas ni amangboru si Dame i nangkin, bodat do ho !!! Murmuruk angkangi si Lindung. Dungi, i panenju ia boltok ni si Jalupis, i cipakkon ia muse urut nai. Murmurmarkoti doma ilala si Jalupis, get manetek doma ilu ni mata nia arani ancitna nai dakdak angkangi si Lindung.
”Ampun ... angkang, olo au deiiiii”, mangaku si Jalupis asok.
”Jadima songoni, i ulai ho dope parangemi na solabo i ?!! Murmagogo obar ni angkangi si Lindung.
“Indabe angkang, losi mau, inda ubaen be”, mangkuling asok si Jalupis set robak ilunia.
“Pade anggo songoni”, marasok mulak sora ni angkangi si Lindung. Dungi mangkuling muse ia mulak : “Adong dope sigaretmi, jia jolo sabatang !!!
“Isonbo ... angkang”, dialusi si Jalupis salaos manyurduon sigaret dohot kayapina.
Dung i pagara ia sigaret idupon i, i arsik ia muse tarlolot saotik, baru i pakaluar ia timbus sian baba dohot lubang ni igung nia margonti-gonti. “Tok”, tarbege sora dotok sian baba ni angkangi si Lindung arani sabasna ilala ia.
“Ketale mulak tu sopo jago an, inte-intean kalai non dita !!!” Ning angkangi si Lindung salaos mardalan murudur padua si Jalupis i balakang nia.

“Songon na marbosar u ida ulumu sian siambirang, Jalupis ?!!” Mangkuling si Kedan dung lalu alai nadua tu sopo jago i. I tambai si Kedan muse : “Na mangua dei luai, takok tokok ulumu tu batang ni ayu ?!!
“Indaba ... nai tinggang ni indalu dei ulu nia. Angkentong na porluan ilala ia get mangaligi manuk na opat patna di lobu manuk ni amangboru si Dame i”, muririsak si Adian muse.
“Olo ... anggo manuk na opat patna di itaon maia na dong i, anggo di alak na balokan, leng na dua dei patna, nga songoni Dame ?!! I ompas ia hata tu si Dame.
Ro alus ni si Dame : “Tarsongoni dei dabo bagian ni alak na marraja di ulu totna, ira-ira tarsongon te na hiang, murmalolot murmabau”, ben milasna roa nia paida-ida si Jalupis.
Pabege-bage risak ni dongan-donganna, mangkuling angkangi si Lindung : “Marsipan baba muyu !!! Adope marmodoman !!!

Dung gusar angkangi si Lindung, alai sude rap sip, oni markean sada-sada tu sopo podomanna be. Na tinggal di sopo jago i, ima angkangi si Lindung, si Dame, si Adian dohot si Bania. Inda sajia lolot dungi, sian sopo jago i tarbege ungkor na dohur-dohur : “Hhhzzzgghhhhooooooggggggggrrrrrrrhhhhhh ................”.

Gandoang, 12 April 2009

Boa-boa:
Mangido mohop ale ami perjolo muda adong gorar ni koum-sisolkot nami na sarupo dot gorar-gorar na adong di bagasan ni carito on, inda na i sangajo. Carito on dibaen sian parbinotoan nami satontang tu angoloan ni poso-poso sadebana di hitaan.