Silalat di Angkola,
Bulung Gadung di Mandailing
Ulang marmayam amang di na sikola
Anggo gara-gara ni bujing-bujing



Rabu, 21 Oktober 2009

Tuliskon Au (Tammat)

Saborngini bahat ma halak na so tarpodom painte-inte ari rayo, deba simbur di masojid apalagi daganak, sadebana antong di lopo, tai anggo Janaet ba pukul sabolas dope madung modom ma ia, harana mabiar ia tarlambat cogot sumbayang.
.
Pukul opat andostorangi, simbur musema takbir di masojid "Allohu akbar, Allohu Akbar, Allohu Akbar, Walillahil hamd". Maradu muse ma halak tu masojid takbir, bahat muse ma namangarar harana inda tahan mambege sora ni takbir i. Anak ni Janaet pe dohot-dohotan muse ma tangis tai ba inda baen na mambege takbir, rupa tardege Janaet pat nai lao masuk tu masojid. Inda saidia onok siani tarbege ma ribur sora ni induk-induk di balakang, rupana ina-ina paombang amak sumbayang so ulang iteken kalak non pala sumbayang Idul Fitri, dohot-dohotan muse na ibuat si Janaet, bahkan ia ma na sibukna. Iambang kalai roangku tola dei ikapling-kapling masojid i, padohal ise naparjolo masuk ia dei namar hak dijolo, tai anggo on ba ngada, marsipaombang amak sumbayangna be. Hum na salose dope sumbayang, marsurak ma na ibuat ni Janaet mandok umak si Boltak "He angkang, pala kedo lalu namanjalangi tu tuan guruntan, ulangko lupa da, Tuliskon Au" ningna ma. Iambang ia muse roangku porluan manjalang tu guruan sampado tu simatobang nia rongkon bou dot amang boru nia.
.
Mulak tingon masojid, daganak pe madung marngotan, songoni juo pinompar ni Janaet, madung simbur maridi, manombo madung marsuakan, manombo madung marbada, mocom soni karejona. Siap maridi rap marbaju nabaru ma sudena, mangkuling ma pinompar ni Janaet nagodangna, ima si Lukman nasikola di Purba.
"Adope ayah, umak, marlagut ma ita tu pantar tongai so rap manjalang, adope anggi-anggi sasudena marroan ma tuson" ningna ma.
"Ahana muse dope so marlagut, manjalang bage, nabahatan dope karejo bo" ning simatobang nia adaboru.
"Bo, tai ipasikola ayah au dot umak tu Purba, tontu angkon na ipake dei ilmu nai" ning si Lukman muse mulakan.
"Keta ni soni, paisar sotik" ning umak nia songon na mandemes lao mencelok Janaet.
.
Siap sude marlagut, mangkuling muse ma mulak si Lukman.
"Adope, mangido mohof umak tu ayah satontang kasalahan"
"Ahana muse dope so soni jabat, madung imohofkon ayahmu ma bai" ning umak nia songon namangukuri Janaet.
"Inda tola soni ba umak, ingkon na ilafalkon dei" ning si Lukman muse
Kasidunganna, mangido mohof juo umak si Lukman tu Janaet, bo renge ilu ni mata nia, inda sodar ia tangis ama nagogo, lao mangkaluk si Lukman baen jopna roa nia mida anak niai harana iajarai ia halai nasabagas tu dalan na denggan songon nai guruon niai i Purba.
.
Dung salose sumbayang Idul Fitri, kehe ma Janaet tu lopo minum kopi susu, lao marcarito di lopoi, :
"Au dongan, na tobang ma ulala, on dope na riangna mararirayo" ningna ma.
"Bo, aso idokon komu songoni?" ning Jaurimbang songon na cimburu
"Ondope boto hamu ra mangido mohof inang ni daganak i di au" ningia lao magombuskon timbus sigaret tu ginjang....
.
(Tamat)

Rabu, 14 Oktober 2009

Tuliskon Au (Lanjutan)

Masuk tu masojid, "Assalamu Alaikum" ning Janaet mandok Lobe Syafar, "Tuliskon Bapaki jolo" ningia muse antong. "Inda namanulis dope ba, iakadkon dei jolo sobaru ita tulis" ro alus ni Lobe Syafar.

"On pitarahku, on pitarah ni umak si Lancat, on pitarah si Benak, on pitarah si Muldop, on pitarah si Rapmaita, on pitarah si Nur Cahaya, utulak pitarah nawajib atas diri nami sataonon di Bapak i".
"Utarimo pitarhmuyu, Jazakalloh"
.....
Ari mur potang, halak pe mur masibuk di bagasna be, adong namancubo baju baru, adong na sibuk dope marmasak kue, adong muse antong na pamasak rondang dope harana baru ro dope tingon pasar. Daganak pe, nabiaso ribur dei di jolo ni masojid inda na adong be tarida.
Tung...tung...tung.... sora ni otuk di masojid, mandok marbuko salao mandok habis ma Ramadhan sataonon. Giot mangkardak doma ilala Janaet baen riangna, bo muloi incogot antong madung tola mulak mangidup arian, inda songon saonok naon. Bisa muse mai mulak manyirup kopi paet di lopoan sapala manyogot-nyogot.
"Songon namabungkas doma ulala dung lopeh napuaso on" ning Janaet mandok alak bagas nia atiha mangan. Rupana na tangis do baya alak bagas nia, maneteki ilu nai lao maroban rondang dohot lobi-lobi i sup na andostorangi.
"Bo, incgot ma ari rayo halak namar jop ni roa do, aso muse do tangis ko?" ning Janaet muse mangulaki.
"Botul mada nadi dokon ni abangi, tai nahancitan kulala na kehe on Romadhon on, ibulan i maia bisa ia maribadat nahum khusuk, isi maia nabisa martaraweh soni tu witirna, taon naro inda na adong jaminan sanga nadohot dope au sanga inda, ido baen na tangis au" ning alak bagas nia madung rara mata nai.
"Anggo i do dabo, itasorahkon tu Tuhan tai, mudah-mudan antong leng totop dilehen Tuhan tai dihita umur na lanjang boti rosoki nahalal, pot bisa ita mulak maribadah di Ramadhan nangkan ro, Insya Allah" ning Janaet songon namardakwah, on peba naompot do songoni ro tu bagasan niroa nia nangkan dokonon, pas do on songon takik sadari.
.
Halak pe muloi simbur muse mulak mangadopkon masojid, padohal muloi ma masuk lima bolas Ramadhan nadung longon do mulak songon nabiaso. Tobang-tobang umur lima pulu taon tu ginjang doma nataraweh, manombo antong daganak sada-sada. Tai baen na get ari rayo cogot nasimbur muse ma mulak alak lai adaboru. Deba antong sumbayang, sadebana manulak pitarah. Masuk kotu Isya pol muse ma mulak shaf ni barisan, dorung doma sora ni makmum nai sapala manca amin. Siap sumbayang kotu Isya, imuloan ma takbir...Allohu Akbar, Allohu Akbar, Allohu Akbar....., bahat namartangisan marasing-asing panyobobna. Adong antong sangajo baen na hancit roa nia marsarak dot Ramadhan on, adong antong baen naso mulak do pinompar nia sian ranto, adong muse baen nataringot ia disimatobang na nadung parjolo ato pe halak bagasna, adong muse baen na mantak martobat-tobat dohot donganna sementara on na giot ari rayo. Tai anggo na parpudion ba jarang doon, harana anggo halak kita antong gorarna jarang dei na putus asa gara-gara ni bujing-bujing.
.
.
Marsambung.

Selasa, 06 Oktober 2009

Tuliskon Au

Lak-lak di Ginjang Pintu
Singkoru di golom-golom
Tu Halak Ingkon Marsitutu
Tu Dirimu Papohom-pohom

Ari madung pukul sada borngin, anggo Janaet dohot halak bagas nia naso modom dope, leng na di dapur dope mangkatai lao pamasak Sup nabaru itabusan nia di hutai. Rupana adong disi na baru mangkoyok lombu na giot gadison incogot tu Pasar Kotanopan (Poken bante, ning kalak). Sabornginon ma malom terakhir sahur, ima so inda pe modom Janaet. Sanga baen nasotarpodom pe antong, sanga baen na painte masak sup i masak, inda ita boto.
.
"Bolgang kian non daging na sada satonga kilo i da, cogot arian mangarondang sajo doma" ningna ma mangalehen porentah sian karosi pucako i. "Lomang ulang lupa ipature kinan, lomang itak dua tumba lomang biaso onom tumba, tangguli ulang lupa tabusi tu alak si Japanaekan incogot, alaman tai sapu jolo, marnambur doma pat niba pala manyogot, taruma paias, gok teni manuk disi, abit karung na barui ulang lupa pamenekna so pas pala sumbayang ari rayo, " ningia muse palalu obar lao manyargut alame na dipamasak ariani.
.
"Olo dabole amang ni si Lancat, sada-sada mada parentahna ulang rap rung-rung songon udan na por, bo jia do angkon jamaonku parjolo?" ning alak bagas nia antong songon namandemes. "Parjolo ma dabo modom, non payah muse ingotan pala andostorang" ningna muse antong, tai ba anggo dibagasan ni roha na, "singgo modom konon, aupe upuntoling modom, iambang ko do robot au dison".
.
Inda sadia onok sian i antong sangajo tarpodom Janaet didapur, mungkor dohur-dohur, "tor rura tujae tuju" ning sora ni ungkor nai. Merdet ijur bari nai maneteki tu pantari, inda sodar ia nadung masak sup, padohal nangkin angan-angan nia mangan sup do jolo so baru modom. Sip polngit antong soni alak bagas nia, inda ingotina, harana pala ngot non nalobi bahat parentahna.
Sapala ingotina namandokon mangan sahur doma, ipe hira-hira satonga jom nai doma waktu sahur. Rap mangan ma halai di sahur napangabisan di bulan Ramadhan na sataoni, cup cap doma sora ni kuah sup i ilotap Janaet, manombo madung marregep bage binege, sapala manombo maturapak pas manyargut oli-oli ni sup i, untungma na tarposo lombu nai, anggo inda matolpang ipon.
.
Siap sumbayang Subuh, modom antong mulak Janaet songon nabiaso. Alak bagas nia doma namargas-gas di dapur, muloi sian pamasak lomang, mangarondang, manyapu dohot na asing-asing na. Halak pe simbur ma tu poken, manabusi baju nabaru, sadebana antong sangajo giot mar balanjo, tai sadebana inda na balanjo ba. Naget marsompit-sompit do ia tu pasaran, maklum ma hita antong, gorarna sajope poken pangabisan, idok kalak juo dei "Poken Ogos". Aso antong inda mogos? Tai ngana tanggung-tanggung sompitna di pasaran, angkon na dor mogosna, manombo boto hamu makruh doma puaso niba. Adong bage dei non namangarar harana madung mago epengna, au dongan dor mai huida apalagi pala poken pangabisan di Panyabungan.
.
Ari mur potang, halak pe mur masimbur tai inda ipasaran be, sannari mangadop tu masojid, ima manulak pitarah. Janaet pe inda ra katinggalan, nasounjung markupiah, ipasang ia kupiah, mereng muse tusamping, jingjing danonna onom baul-baul lao maroban na tu masojid. Itongandalan pasuo ia dot inang si Lokot, mantan nia najolo. Unduk antong soni Janaet purak-purak so nida ia, tai rupana tarpaida juo di inang si Lokot, bo irisakna Janaet.
.
"Ammanggg,.... namalim dongan angkangon, anggo uboto nasongonon angkangi malimna inda na giot au gari di ayah si Lokot i najolo!"
"Tai on mabo, giot manulak pitarah le tu masojid" ning Janaet antong leng unduk adop toru".
"Haaaa, manulak?, Mula ita nanga marsitulakan bia?" ning umak si Lokot lao mangkair.
"Ulang ko roncam dongan le iba napuso" ning Janaet songon namambela diri
"Ise na roncam?","Maksudku dabo, tulak pitarahmu tu au, utulak muse non pitarahku tuho, songoni do maksudku" ning umak silokot muse antong leng martata
"Ah, nabahat ma na binotomu da, inda na ahli zakat ko" ning Janaet muse lao torus tu masojid lao maroban pitarah boti manogu-nogu pinompar nia si Lancat.
.
.
Marsambung

Jumat, 02 Oktober 2009

Turut Berduka Cita

Rabu, tanggal 11 Syawal 1430 H, Hum Na Salose Hita Mangarayahon Ari Rayo Ari Kamonangan, martepatan dohot tanggal 30 September pukul 17.20 WIB (potang-potang), Sudaro-sudaronta na adong di Sumatera Barat, Padang Pariaman Khususna dilanda gempa.
Sekian ratus halak na maninggal, sekian ratus bagas muse na hancur, indape harto dohot na asing-asingna.
.
Hami mangucapkon "Turut Berduka Cita", mudah-mudahan dibalik ni Musibah on, dilehen Allah SWT kebaikan, baik ia di na madung parjolo sian hita atope sudaro-sudaro na itinggalkon, Amin Ya Robbal Alamin.
.
Maradopkon koum-koum Sasudena, ami manghimbau, pot adong kakuatan dihita (Harto, Tenaga dot Pikiran), ita bantu Saudaro-saudarontai dongan, pinomat manyumbayangkon ghoib sian tempatta masing-masing.
.
.
.
FAS Nasution

Selasa, 15 September 2009

BOA - BOA

Assalamu 'Alaikum WW

Tu barisan ni Mora boti Kahanggi, songoni muse tu barisan ni Anak Boru torus tusasudena dongan-dongan songoni koum-koum na ro mar silaturrahmi di blog on.

Sadarion, tanggal 15 September 2009 ato martepatan dohot tanggal 25 Ramadhan 1430 H. Jadi opat ari nai doma hita na di bulan Ramadhan taon on. Mudah-mudahan nian salalu di lehen Allah SWT dihita sasudena umur na lanjang boti dohot rasoki na halal anso leng totop dohot kita marjuang di ginjang ni tano on. Jadi aupe koum-koum inda na marlanjang hata be, harana incogot pala inda dong halanganna na mulak muse ma au tu kampung. Jadi untuk sementara waktu hami mungkin inda bisa online, harana rap maklum ma hita pala na giot ari rayo apalagi namarkampung antong tele gorarna tama dokonon, nalobi bahat karejo dohot urusan. Taringot adong dope tulisan nami nagalang, Insya Allah dung Ari Rayo doma hita palalu, harana sabulan puaso on pe na onokan do hami di kampung, jadi inda sompat manulis.


Itaba batang ni Apundung
Ilombang ni Manggis dohot Arambir
Mula homu ale inda mulak tu kampung
Ulang tangis dongan pala pas takbir

Taqobballallohu Minna Wa Minkum, Syiamana, Wa Syiamakum
Selamat Hari Raya Idul Fitri
1 Syawal 1430 H, Mohon Maaf Lahir dan Bathin





Fadhly Abadan Syakuro Nasution & Keluarga

Rabu, 02 September 2009

Sada Marbanding Tolu

Sapetona dabo ale dongan, anggo ustad on inda jabat naadong goriton anggo sian pangalangkana, aso songoni? Tai hum gorarna pe madung ustad, jadi guru dinaso umboto, jadi sulu di nagolap, jadi panutan di halak nabahat. Sian kampung nasada tu kampung nasada, manjojori pangajian soni masojid, mangalehen sipaingot Agama sian maso tu maso. Inda marimbar arina asal leng sehat ustad on, inda jungada i ibana manulak asal i pataon dongan mangajai di hutana. Ustad Mukhlis, ima gorar namohot di ibana, Guru Na Ikhlas hira-hira saro jitana.
Tai ba antong dongan gorarnape manusia, biarpe sanga songon jia pasti adong doi kakuranganna, ijia ma? Ima kira-kira dua taon nalewat santak tu sannari on guru on rupana hona panyakit maag. Ulang do tarlambat mangan, margolap-golap ma pandangan ni ibana. Jadi muda kehe mardakwah tuhuta luar, salalu do ustad on maroban parsiapan olope indahan sanga roti, pot taraso boltok marngaok iganjal jolo parjolo dohot parsioram na ioban ni ibanaon.
Pendek ni caritona, dipuaso taon na lewat iundang halak juo ustad on mardakwah tu huta luar lao painte-inte marbuko bersama na iadongkon di hutai. Sabotulna atiha ro halak hutai manyapai ustad na giot mardakwahi, madung do ipajojor ustad on bahasona ia na marpanyakit maag, jadi inda na puaso ibana be madung dua taonon, namambayar fidiyah sajo doma.

Kamis, 27 Agustus 2009

Papotang-potang Ari


Ari marayak pukul lima potang, lopo pe muloi ma sada-sada marbuka, tai ba ulang pangido homu kopi, inda na ilehen ni parlopoi dope i. Maksudna so marbuka, baen parsiapan marbuko do naron, ampot adong dongan na giot namabusi toge, sarabi, kolak pisang, dohot na asing-asing na. Jamanindos pe muloi sian pukul satonga lima nangkin madung ibuka ia juo ma lopo niai. Halak pe antong ro-ro sada ma tu lopoi marjugukan, songon sindokoni adong antong namanabusi parbuko, adong antong hum namarjuguk-juguk, papotang-potang ari ning dongan gorarna. Muda iangkat alak bagas si Jamanindos kue bongko tu tonga ni mejai, merdet doma ijur si Burhan mangidasa.

"Inda tarpacopat uda jom i i?" ningia ma mandok Jamanindos lao mangaligi jom di dinding ni lopoi.
"Bisa dobai mang, anggo baen jo" ning Jamanindos muse antong songon namargiri.

Jabat do potang-potang songonon, sangajo dabo marpucatan doma nida muko ni jolma i, sojia mantong dongan, gorarna pe namarkampung. Angke ngana jabat sajia parbedaanna dohot ari-ari biaso anggo na marusaho do antong ale gorarna. Manyogot leng na ke do mangguris, arian tusaba, potang doma so ro, aso antong le roa muyu inda poucat muko nai.

Inda sadia onok roma boru bujing ni Jamanindos nasikola di Medan maroban kolak pisang diginjang talam, torus ipatibalna antong di ginjang mejai. Ro pe antong danakon sangajo na Gaul parroana, inda porlu isia nabulan puaso, anggo pamakena totop songon pakean ari-ari di kota Medan, marsaraor pontong marbaju yu ken si. Buncilak mata si Burhan mangidasa, songon nalupa ia napuaso, lao mangkuling adop Jamanggutu.
"Imada uda baru parbuko da" ningna ma
"Parbuko ni ahamu dehe i, madung pukul lima sannari bo, tako naget makoruh do puasomu?" ning Jamanggutu muse lao mancelok boru ni Jamanindos sian pudi, rupana iape inda na tarorom nia na so mangaligi.
Inda sadia onok roma Jamanganggun tu lopoi, dohot semangat na get mardakwah. "Pala, bulan puaso dabo, inda tola sei modom sajo, karejo do iba songon dia nabiaso, marusaho do iba, inda nangkan ra i mijur udan sere tingon langit anggo naso sajo ina dilopo-on" ningna ma mamuloi kecek. "Ulang sai ipa lomah-lomah sajo iba niba, tai totop do ingkon nasemangat marusaho, harana biarpe sanga songondia duniaon pe porlu do ijalakan, harana anggo inda dapot dunia, susah juo dei iba get maribadah". Ijia ibuat ko panabusi ni parbuko, aha panabusi baju ari rayo, aha panabusi ni papah?". "Ulang dabo hita tiru-tiru songon si Burhan on bo, pucat songon mayat doma muko nia na puasoi, antong ngara ho ro tubagas so uajari ho naiparguruon najoloi" ning Jamangganggun muse palalu obar.
"Ah au apak jiarma soni pucat mukongku, daripada parguru apak i" ning si Burhan muse antong inda ra talu
"Bo, aso idokon ko songoni?" ning Jamanganggun marsapa songon na tarsinggung
"Aso antong inda cikar apak i, tai inda na puaso apak" ning si Burhan mangalus
"Mangua ning babamu?", "Ulang ko marsianyang da, natobang ma au, silop au non di ho marmara ho" ning Jamangganggun muse
"Ijia idaho au naso puaso ?" ningia muse palalu hobar
"Inda baen na jungada ba huida apak i mangan, cuma adong kuida sada indahan solot di janggut ni apak i, ngoni muse marmiak bibir ni apak, yakin kulala nabaru mangan dope apak" ning si Burhan lao manudu janggut ni Jamanganggun.
"Ah, ngadong bai", ning Jamanggun lao kaluar sian lopoi sareto mangapus janggut dot bibir nia.
***

Selasa, 25 Agustus 2009

TUNG-TUNG

Oleh : Syarifuddin Siagian
Email : saripuddin.siagian@gmail.com

Tungtung ibaen sian hayu bulat na ilubangi satonga,hampirdo di setiap musojid di daerah tapsel-madina adong do on.

pala inda itandai hamu dope,mulak ma hamu jolo tu hita an,kehe hamu tu masojid,ligi hamuma di sudut ni musojid i.pala adong nida hamu disi gantung hayu nagodang,ningroangku tungtung mai,anggo gulung do nida hamu dursat disi,inda tungtung i,bedug dei ningkalai gorarna.taiba dongan marjanji do ulang tokok kamu apalagi pas waktu arian di bulan puaso.ra dei ikojar halak sakampungi.

baen hita sannari madung di partongaan bulan sa'ban,inda onokbe nangkan na masuk ma hita tu bulan suci Ramadhan,taringot mada au tu tungtung na adong di musojid nami i di huta.

bia langa jabat dongan tungtung nai ?.

imada...pala masuk ma bulan puaso ibo ma roangku paida-ida tungtung i.harana nangkan na modar maia baenon selama bulan puasoon.
anggo di bulan na asing,jarang do ia di tokok,angkon na adong ma musibah baru itokok ia.anggo di bulan puaso naingotan kalak disia,apalagi mandonokkon marbuko.

disada maso najolo, mandonokkon bulan puaso,marpokat ma hami poso-poso di hutai,nangkan na ami makmurkon musojid i selama bulan puasoon.

"madeges amang i...au mandukung sepenuhna" ning amang boruima,kapala desa di hutai.

malam pertama sumbayang taraweh,dohot semangat 45 berangkat ma sude tumusojid an,lalu tusi madung bahat tobang-tobang di bagasan,jadi di suru ma bagian poso-poso dohot daganak di belakang.adong bagema namanggantung di teras ni musojid i harana habis tempat.

dung salose ma sumbayang taraweh,mulai ma martadarus,di buka alim ulama di hutai ma sebagai tanda martadarus di mulai.

saborngin,dua borngin lancar dope torus na sumbayang taraweh dohot tadarus on sampe tu malam sappulu na.harana anggo inda ro iba,ra dei idokon dongan namurtad.

malam pa sabolas na,mulai ma dongan-dongan on manyirik-nyirik tu balik ni tendai( pembatas ni dadaboru dohot alak lai ).

"sumbayang do nida hamu kawan si fatimah"....ning si ALI ma.

"sumbayang ..indu bo di baris paduana, patoluon sian pinggir" ning si umar mangalus.

"marjanji ami dabo nagiot marsuo naron habis taraweh di partadarusan ni nauli bulungan"...ning si ali .

"giot do ia langa di ho i" ning si umar busema songon na mangalap -alapi.

"nalayas ma roamu diau,bope kawan songonon nida ho au,nabahatan dei umak-umak namar nazar so au jadi babere nialai".ning si ali busema.

"olo ..uboto madai..aha nazar ni umak-umak i.bunuh diri sanga pindah sian hutaon",ning si umar busema inda tanggung pangarisakna.

salose sumbayang taraweh, sip-sip ma si ali kaluar sian musojid i torus mambelok arah tu parwudu'an an,baru mamintas tu topi dalanan.
lek gobak ma songoni abit karung na,lalu ma ia tu partadarusan ni nauli bulung an.

"e eh...udak ...giot tu dia do udak i",ning si maryam ma....harana tarparogok kalai di gang ni bagasi.

"mangaligi etekmu...disi do ia nida ho"...ning si ali ma laos pature-ture abit karung nia.

"inda pe ro udak"...ning si maryam ma dung ipareso ia tu bagasan.

juguk ma songoni si ali di golap-golapi painte si fatimah.

sian musojid an tarbegema madung mulai alak martadarus,nauli bulung pe mulai ma martadarus.

anggo si fatimah inda pe na mungkap mukona.ma marsak sajo roa nisi ali.

kehe au naron tu musojid an,aha ma udokon disi umar,ning roa nia sajo ma.

sampe tonga borngin ipainte ia,anggo si fatimah inda na marnaro.

akhirna mulak ia tu masojid an.ipa podom-podom ia ma di teras ni musojid i.

kira -kira jam 2 tonga borngin,mulai ma markumpul tu lambung tungtung on giot manokokna.

tibo ma waktuna sahur get itokok ma tungtung,mamago tokok-tokok na.
ijalakan-ijalakan inda tarida.madung adong bage nagiot mambuat batu giot baenon panokokna.
akhirna tarpaida ma , hape nai parbantal nisi ali do tokok-tokok nai.

indabedabe.....baen goyakna roa ni halaki,di angkatma si ali tu keranda ( tempat ni alak na mate ) na adong di sudut ni musojid i.
di tutup halai ma paten-paten dohot sajadah.

sekitar jam tolu mulai ma i tokok tungtung on.inda tanggung simburna,itarik bage dei mik ni musojid i ipadonok tu tungtung on anso martamba kuat sora na.
adopentong...mulaima marsibalosan dohot musojid naibaribai songoni juo musojid nai jului.madung satonga jom anggo tungtung on na torus dope i dakdak.

imantong ributna halak disi,anggo si ali umpe tarsonggot.

sodar ia, baen na sumbayang subuh do alak,iambang ia namanyumbayangkon ia.
golap songoni nida ia,taiba perasaan nia di bagasan musojid i do ia.iligi ia tu kanan sompit,iligi ia tu kiri sompit,akhirna iangkat ia tangan nia tu gincat,bo mangkat antong tutup ni kerandai.

baen songgotna roa nia,sanga aha so dibagasan kerandai ia,mangangguk doma ia lao mangalumpat siani.

bo rupa alak nagiot sumbayang di musojid i pe tarsonggot buse.iambang kalai na adong disi namate mangolu mulak.marlojongi buse sian musojid i.

adong bayo nagiot bahang ,ma mambaca innalloha wamalaikatahuyusolluna alannabi , irambankon ia mik nai ,terbang ia sian i.

bo... baen na rap tarsonggoti antong,akhirna itokok buse tungtung.

heran kalak...nabaru itokok dope waktu subuhi,ma mangkuling buse,marroan kalak tu musojid an.

keuntunganna.....inda tanggung rami ni halak nasumbayang subuh waktui.

akhirna rap mar sipantataan ma songoni dung habis sumbayang subuh.


SELAMAT MEMASUKI BULAN SUCI RAMADHAN 1430 H.SEMOGA KITA MENJADI HAMBA YANG MENDAPAT RAHMAT,MAGFIROH SERTA ITKUMMINANNAR.AMIN.

Marhaban Ya Ramadhan (Satorusna)


Tu Koum-koum sasudena, olope na songon natarlambat, hami mangucapkon "Marhaban Ya Ramadhan 1430 H,

Mangido Mohof Lahir Dot Bathin

Mudah-mudahan ilehen Tuhan tai dihita sasudena Umur, Kekuatan, Songoni Rasoki na Halal untuk bisa hita mar amal-ibadat di bulan na Muliaon, Amin Ya Robbal Alamin.







FAS Nasution & Keluarga
Bulunggadung Mandailing, O Tano Hasorangan, Tano Hatubuan, Inganan Parmayaman, Lubuk Parkatimbungan, Sian Ranjo Batu Santak Tu Sihepeng, Tano Nagambur Nanapu, Ingkon Mulak do au pala marhepeng..... alaleee bayaaa...