Ikojar Babiat

Disada lopo manyogot-nyogot marcaritoma si Japarburas,

Natuari ke au mangguris, indape piga batang utakik songon na adong kubege sora na dokung-dokung. Sip au upatangi-tangi sora nai, inda uboto sanga didia. Markolit au tu balik ni batang di apeai, mur magogo sora nai, yakin ma ulala mungkin babiat dei di sampil-pil nai topi ni apeai. Kasidunganna upuntoling marlojong tu huta baen biarna. Tai so iboto hamu, mur marlojong au mur maipas muse dohot mur magogo soranai. Mur upaipas marlojong, sorana mur maisar muse, anggo parbinegeanku madung ibalakangku ma babiat i. Dor magulang dot ramban au, sahinggo kadangan pe inda uboto sanga ijia sangkotna. Dung lalu tu Batang Gadis, upaipas manyiborang, ampot aman ma dabo ning roangku.

Harana aripe mur maginjang, rupana madung bahat halak isabai nakarejo. Biarku pe mulai ma markurang, maradian au diginjang ni batu nagodang, tai so ibotohamu leng binege dope sora nadokung-dokungi. Mamandang au tu siborang, inda dong tarida sanga aha, ubuat sigaret sian cakuk balakang, upatik sabatang, tarsiluk au langsung barsi. Kaluar ngon igungku uang nagodang, sora ni babiat pe madung sip. Upikir-pikir sanga aso sip sora nai, dung onok dope so sodar au, rupana baya sora na ubege nangkinan, uang nai igungku do manutupi lubang nai sabagian sahinggo pala mosa au pas songon sora ni babiat. Martata au sada-sada au di topi ni Batang Gadis i".

"Au pe nasadari uda, madung mulak mau mangguris, marngaok-ngaok sajo ubege inda uboto sanga sora ni aha" ning si Japargabus muse manyambung carito. "Rupana dung lalu tu huta, baru uboto boltokku do marngaok baen malena" ning ia muse.

"Ah.... gabusmu dei, patut mei inda iboto ho marngaok boltokmu" ning si Japargoyak muse lao mambuat goreng sada nai, "tuliskon komu jolo jau da, inda pe adong epengna, tes paet sada goreng lima" ningia muse adop nampuna lopo i.

Manggule Aruting

Najolo disada kampung di Mandailing, tinggal ma disada bagas namargorar Jaduroup. Jaduroup on nadung mabalu (madung parjolo adaboru niai i pio Tuhan tai), ia tinggal disada bagas dot daganak nia dua (2) halak, nagodang nai adaboru markisar umur sapulu (10) taon, napaduana alak lai markisar umur pitu (7) taon. Karejo si Jaduroup on sarupo juo songon halak kabahatan di Mandailing maso i, ima mangguris dot marsaba.

Disada ari, dung mulak si Jaduroup mangguris, ioban ia pamoran dot kail, ke maia mangkail tu Batang Gadis. Dung lalu tu Batang Gadis, i ombus ia juo suling santongkin lao mangidup-idup diginjang batu, maronang-onang ma si Jaduroup di ginjang batui laos pamago-mago arsak ni rohana,

Anggo uboto naharirang jo.......
Ina Ubaen jadi soban dabaya.....
Anggo uboto nangkan marsirang le...
Inda ubaen ko jadi dongan ... untung bagian..

Iambang mur mago arsak ni roha, rupana na mur martamba do, ibuat ia kail, ipasang ia tu pamorani, mangkail maia markisar-kisar sa jom. Bo, rupana deges paruntungan ni si Jaduroup sadari i, harana marrasoki juo doia sada Aruting sagodang ni botohon tangan.

Mulak ia tu huta, ioban ia arutingi tu bagas, ipio ia daganak nia adaborui "Taing, pature gulaenon bo, asom pode da so tabo non mangan, gotap tolu soni" ning si Jaduroup mandokon boru niai. Si Jaduroup pe torus ke tupantar tongai modom, boru niai ke tu aek mambituai gulaeni dohot manggotap tolu salaos mambasuna.

Dung mulak si Taing ngon aek, iligi ia ayah nia madung modom, mungkor doma ara ni lojana na karejoi sadarion, "Toooooorrrrr, Rrrruuuuraaa, Tujae, Tujulu "Toooooorrrrr, Rrrruuuuraaa, Tujae, Tujulu" ning sora ni ungkor nai. Ipatorus si Taing tu dapur mangasom podeh aruting i. Dung get masak ma gulaeni, ro musema si Lian marmayam, muap asom pode ilala ia ibagas ni halai, "Male au kakak" ning ia adop kakak nia. "Olo, naron ma adik, modom dope ayah, rap mangan kita naron dot ayah" ning kakak nia mangalaok adik niai. "Tai namalean au kakak, mangan ma au parjolo" ning si Lian muse.

"Rap mangan ma ita songoni" ning si Taing adop anggi nia i, kehe alai nadua tudapur, ibuat kalai pinggan, iangkat asom podeh aruting sian kuali, mur so tahan be ialal si Lian malena.

"Jia nai ma ita tinggalkon di ayah non", ning kakak nia mandok si Lian.

"Ulu nai masoni" ning si Lian mangalusi, satongkini tarbege ungkor si Jadurop maruba, "piiiiiiirrrrrrrrrr, piiiiiiiiiiiirrrrrrr' ning ungkor nai.

"Pir do ning ayah ulunai adik" ning si Taing adop anggi niai, tonga-tonga nai mai ita tinggalkon di ayah ningia muse adop si Lian. Sa tongkini maruba musema ungkor si Jaduroup, "ggggaaaaaabuuuuurrrrrrr, ggggaaaaaabuuuuurrrrrrr".

"Gabur muse do ning ayah anggo tonga-tonga nai adik, anggo soni ikur nai ma ita tinggalkon" ning si Taing mandok si Lian". Inda binoto sanga namangua, maruba muse ungkor si Jaduroup, "pinnnnnncuuuuuurrrrrrr, ppiiiiiinnnnncuuuuuuuuuuurrr, ning ungkor nai muse. "Pincur do ning ayah anggo ikur nai kakak", ning si Lian mandok kakak nia si Taing.

"Anggo soni ita painte ma ayah ngot jolo" ning si Taing mandok si Lian.
Mar kisar-kisar sajom dung i, dung ngot ayah nia rap mangan ma halai, atiha mangan marcarito alai tu ayah nia, mikim-mikim si Jaduroup mambegena.

"Ah... gabus do sude carito onon", ning roa ni namambaca tulisan on, "nai takik manyogoti dei" ning kalai ibagasan roa ni halai, laos mangisi daftar tamu dot manulis komentar.

Mangarait Di Ginjang Lubuk

Mulak ngon saba potang ni ari i, si Marihan kehe tutopi ni Batang Gadis mangarait jala nabaru, harana jala nai pake ni ibana sannari inda degesbe, madung matotas itompas mera poken nalewat atiha manjala ia borngin. Dung lalu tu topi ni Batang Gadis, juguk ma ia diginjang lubuk itoru ni sada ayu na laung, lao manggulung pusuk dot timbako, muloi ma si Marihan mangarait jala niai.

Asik-asik mangarait, tarpaida rupa disia mompas mera na godang di ujung ni lubuki, "bararti angkon na rangkak do pangarait ni jalaon" ning roa si Marihan sasada ia. Ipatorus ia juo namangaraiti, inda sajia onok tarida musema di ibana nabahatan lelan dot garing di asak namar batu-batui, "anggo sonon carana angkon nai pasosot do sotik on" ning roa nia muse. Sapartolu nai so siap jala niai, manyarsar musema aporas dot sulum di topi ni lubuki, "Ah, angkon na jala rapot do so pade on" ning roa nia muse.

Akhirna dung siap jala ni si Marihan i, inda natontu bontukna be, sapala pas ijalahon ia na renggong doma, ulang majolo mera dot garing, anak ni aporas pe inda dong dapot ia. Milas roa si Marihan, iambungkon ia jala nia laos mulak tu huta torus marende.

Hodo, namangido parsarakan

Kehe manadingkon au dohot hagiot ni rohamu.... ningna sajoma

"Songonimada sada parbandingan dihita sasudena molo marakus tu iba diginjang ni tano on, ulang get iborong sude karejo i, tai sada-sada ikarejohon so adong hasilna" ning ompung Jaji lao manutup carito.,

Parumaen na sian Medan

Japargiri (inda gorar na sabotulna), alak Mandailing Julu na tinggal di antara ni Kotanopan dot Muara Sipongi, karejona marsaba dot mangguris, sikolana sitabar hodong do, songoni juo induk ni api ni ibana tarsarupo do anggo sikolana. Namun jaru songoni, totopdo marcita-cita halai nadua pasikola danak ni halai si Japarelmu natopek muse anak si sada-sada, padahal madung dua pulu lima (25) taon halai rap. Antong, baen harani i, anak ni alaion iparkancitkon si Japargiri do sonjia so lalu sikolana, muloi sian Sikola Rakjat maso i (SD sannari) sampe sikola tu Medan manjalaki Sarjana.

Pondok ni carito madung markarejo si Japaerelmu di Medan disada kantor nacukup deges, dot gajina pe deges apalagi epengna epeng nabaru. Ro targorak di roa nisi Japaelmu giot manjalaki induk ni api (marbagas), harana mur sotahan ilala ia namardagangi sada-sada ia. Tarutamo pala borngin, pamatang le na dung loja dikantor, namamikirkon mardahan manggule dope songoni juo manyapsap.

Sabotulna madung adong kiando nai pataon-taon nia di kampung, ima boru tulang nia nai banjar lombang, tai bia baenon madung parjolo marbagas tu kampung sabolah.

"Maga Laru baya Kotanopan, Indape lalu baya madung ipotong dongan" ning si Japarelmu waktu i marende sasada ia. Akhirna ijalaki si Japarelmu halak Medan katurunan ni alak Jawa, halakna nabontar songoni nalampas, pes-pes doma pala mardalan, lambok muse pangkulingna, denggan rohana, bisuk kalakna, apalagi pas tanggal muda.

Dung sabulan marnikah, por ma roa ni si Japarelmu patandaon adaboru niai tu ayah nia di kampung. Itulis ia ma sada surat so ro ayah nia marangkat tu Medan. Pondok ni carito marangkat ma si Japargiri tu Medan manaek motor ALS sian Kotanopan. Ibalun ia pusuk dot timbako iombuskon ia tuginjang, batuk doma halak samotori pambaen ni muap timbus ni pusuk i.

"Apak, inda tola ison mangidup, AC do on" ning kenek ni motori mandok si Japargiri.

Lalu tu Medan markisar-kisar pukul salapan (8) manyogot, madung disi kinan rupa inte anak nia si Japarelmu dot parumaen nia (ita dokon masoni gorarna Zubaedah, so pas songon judul ni lagu ni Mansyur S.). I solom si Japarelmu ma antong ayah nia, torus si Zubaedah pe isolom ia musema amangboru nia si Japargiri, iummah ia tangan nai. Tarsonggot si Japargiri, iligi ia deges ni parumaen niai denggan muse halakna, bisukna mangalobi i.

"Anggo uboto na songonon deges-degesna bujing-bujing di Kota Medan on, inda nagiot au najolo di Umakmu, pala inda manjalaki muse doma iba on sada nai" ning roa si Japargiri mandok anak niai ibagasan roa nia.

Dung lalu tu bagas, rap mangan ma halai, dung siap mangan kehe ma marlao-lao mangaligi-ligi luak sian kobun Binatang sampe tu Medan Fair. Boto, hum gorarna sajodo halai namangaligi-ligi, harana halak mangaligi-ligi, anggo si Japargiri mangaligi namangaligi do.

Dung potang ari mulak ma halai tu bagas, si Japargiri pe madung loja, tarpodom ia dung abis kotu Isya-i di parsumbayangan niai sampe tu jam dua bolas (12) borngin. Rupa tarida di parmaen nia, ingotina Japargiri mandok pindah tu kamar.

Torang ari nai, si Japarelmu kehe karejo songon nabiaso, lao kehe ia karejo dung rap sarapan kalai natolu, marposen si Japarelmu tu si Zubaedah.

"Nanti bapak dikasih makan siang ya" ningia.

"Iyalah mas, masak bapak nggak dikasih makan", ning si Zubaedah muse mangalus.

"Nggak, abang takut kalau dek Zubaedah nanti lupa", ning si Japarelmu muse marsianyang.

"Ah, Itu kan soal gampang" ning si Zubaedah muse ma mangalus lao main mata.

Rupana tarbege di si Japargiri, "Inang go ianang, idokon parmaen ki au gampang" ning roa si Japargiri emosi sasada ia.

Dung marangkat si Japarelmu karejo, si Japargiri pe madung sip sajo, itahan ia emosi na dung gok di indora nia, "Ima denggan na au dongan, malo-malo ma ia mandokon au gampang" leng pupu di roa nia. Ilehen parumaen nia pe minum kopi, inda di inum ia, ilehen adun muse juice, jou inda iantuk ia. Sampe kotu Lhuhur inda nadapot be obar si Japargiri, sip sajo songon namabodo.

Dung sumbayang kotu Lhuhur, rupana inda tahan si Japargiri naso mangan. Buktina pas isuruon si Zubaedah ia mangan, langsung jong-jong ia manopotkot meja makan. "Olo pe nagoyak roa, mangan ma jolo ipakuat", ning roa si Japargiri laos martambu napatolu kalina. Dung salose mangan butong-butongan, torap ma si Japargiri "Kaaaaakkkkkk" ningna doma sora ni torap nai. Ro si Zubaedah sian dapur maroban pisang dot unte manis, "Pak, ini buah untuk cuci mulut" ning ia. "Kurang ajar, madung nangkin idokon ia au gampang, sannari idokon ia muse pisang pambasu ni baba, iambang ia do roangku nadung rintik au", ning si Japargiri dibagasan ni roha nia. Milas roa nia, isalutapkon ia sude pisangi tu baba nia dot tu muko nia, "na tusi, sodabu roamu" ning roa si Japargiri sasada ia.

Mangaligi tingkah laku ni amang boru nia, si Zubaedah marlojong tu kamar, mabiar muse ia mangaligina.

Hira-hira jam dua (2), roma si Japarelmu karejo, tarida disia madung marsalutap muko ni ayah nia dot pisang, panailina pe madung songon panaili ni halak na get mangamuk.

"Ahado namagua ayah?" ning si Japaerelmu mandok ayah nia.

"Pokokna, sirangkon parmaenki sannari, ima lojana ayah pasikola ho sampae jadi sarjana, dapot parmaen nasongon on, manyogoti idokon ia au gampang, arian on idokon ia pisang pambasu ni baba (cuci mulut)", ning si Japargiri mandok si Japarelmu. Mikim si Japarelmu laos marcarito tu ayah nia, bahaso naidokon gampang i maksuda parkaro na momo, nai dokon cuci mulut maksudna panganon panutup. Tarsonggot si Japargiri mambege anak nia namanorangkon maksud ni Gampang dohot Cuci Mulut" nangkinani.

"Anggo soni ulang sirangkon da ayah, na dengganan do rupana parmaen ki, ayah do baya naso marelmu" ning si Japargiri mangkaluk si Japarelmu.

Ro muse ma si Zubaedah ngon kamar, lupa si Japargiri, ikaluk ia muse parmaen niai laos tangis maribo-ibo torus mangido mohop.

"Kope jau maen" get ningia ma untungma inda sanga tarucap, anggo inda madung sambang.

"Biarma soni ikaluk ayah adaborungki sakalion, najolo adaboru niape dor do ukaluk", roa ni si Japargiri dibagasan.

Dung marsipatorangan, akhirna rap martata alai sudena "Dasar ndeso, ngono wae koq ora mudeng" ning roa si Zubaedah dibagasan ni roa nia.

Pitu Up

On carito ni gurungku Bahasa Inggris atiha SMP najolo di Kotanopan, gorar ni gurungkon ima Mr. Pekos, inda uboto sanga asope idokon dongan-dongani Mr. Pekos, mungkin baen na guru Bahasa Inggris i. Markisar bulan September taon 2007, jungada au pasuo juo dot ibana di motor laos get kehe hami siarah tu Kotanopan, ibana manaek di Maga.

"Najolo ke ami marlao-lao tusada kampung marrombongan", ning gurungki marcarito tu hami. Markisar-kisar jam sada (1) arian, maradian ma hami disada lopo, harana dongan-dongan madung bahat namanguas dot namale.

"Adope, marsipaido giotna ma" ning gurungki ma mandokon rombongan. Adong namangido indahan, adong namangido mie, adong muse antong namangido kopi. Gurungkon, baen ia katua rombongan parpudi ia mangido mangan, jadi marrencana ia minum jolo, ipio iama parlopoi.

"Au minum ma jolo uda, oban udai jolo tuson 7Up (Seven Up)" ning gurungki (najolo adong minuman tarsongon limun gorarna 7Up (baca : Seven ap) sagodang botol limun, daina pe pas dei songon limun, sannari pe adong dope minumanon, cuma jarang doma dapat anggo di itaon).

"Olo jadima, painte satongkin da guru" ning parlopoi. Ipainte-inte gurungki madung markisar sapulu) 10 minit inda juo ro.

"Oban bo uda, 7Up i ning gurungki mangulaki

"Olo, roma, len jolo ji gurui bo 7Up i" ning parlopoi muse mandokon adaboru niai. "Homa dabo antong, au nasibuk" ning adaborui muse mangalus harana ia pe inda iboto ia sanga aha 7Up (Seven Up) i.

Kasidunganna dung lobi saparopat jom, ro parlopoi manopotkon gurungki, laos markusip, "Nadia do nanga minuman Seven Up i?" ningia. "Ibo, nai lamari i" ning gurungku mangalus satonga manyonggak, roangku goyak roa nia harana baen lolotna.

""Tai isi do", ning Mr Pekos manudu tu rak ni limuni.

"Ooooooo, pitu uuuuupp" ning parlopoi marlojong mambuatna baen riangna roa nia.

Manaek Arambir

Adong sada bayo karejona manaek arambir (hita dokonma gorarna soni si Japanaek). Harana songoni dope kamampuan ni ibana, maklumma halak najolo payah dope manjalaki karejo na umsonang, inda songon sannari bahat lowongan, tai leng payah manjalaki karejo.

Disada ari kira-kira jam 4 potang, leng songon nabiasoma disuru alak si Japanaek manaek arambir i parik ni sada bagas. Batang ni arambiron ama na lampas adongdo 20 meter lobi. Tai jaru songoni, harana si Japanaek nadung biaso do manaek arambir bahkan lobi lampas siani jadi inda dong mabiar ni ibana. Muloi ma ia manaek arambiri sampe tu ginjang ni alopa nai, harana so ulang loja dot adong parjugukan. Muloi musema si Japanaek mamutar tangkil nai, mardabuan ma sada-sada arambiri. Tai rupana potang-potangi get udan sahinggo ro angin nalobi gogo, malapat-lapat doma arambiri i ombus angin. Mamandang si Japanaek tu toru diida ia margeldok-geldok batang nai tujae-tujulu songon naget matipul dot marumbak, humitir pat si Japanaek mangidana, "Anggo sakalion marmara mon" ningia dibagasan roha nia. Antara nasodar dot naso sodar, marnazar si Japanaek. "Ya Tuhanku, pala salamat au non torus tu toru inda madabu, marnazar mau sa orbo" ningia, dat-dat ipupu ia juo mijur palan-palan. Dung lalu markisar-kisar lima (5) meter ia mijur, mangkuling muse ia mulak, "Mangodang tu do da nazar ki-i, ijia muse dei ibuat orbo" ningia asok-asok laos marpupu juo ia mijur, "sa ambeng ma soni ubayar, pangomoan niba naso sajia" ningia muse.

Dung lalu satonga, hurangma ilala ia motarna, iruba ia muse ma mulak nazar niai, "anggo ambeng tong baya manggadisi muse mau i panabusina, manuk ma soni ukoyok sada" ningia muse mangubah nazar nia harana adong dope sada manuk jantan ditaruma niai. Leng marpupu juo ia mijur, angin pe mantak ma marombus, si Japanaek pe get sampe ma tutoru, kira-kira dua (2) meter nai, iambur ia tutoru pas tu ginjang duhut nahapal, mangkuling ma ia adop ginjang "Na madabu do auda Tuhanku, lopeh do au sian nazar ki sudena" ning si Japanaek.

Bulung Gadung Na i Duda

Ari jam 5 dope andostorang, di Mandailing julu madung targebe sora ni losung namartinanggul sian bagas nasada tu bagas nasada. Tarsonggot au modom binaen eruk ni sorana, manindo au tuluar rupana inang-inang namanduda bulung gadung itorangi lampu tellong-tellong laos mangkobari alak. Rencanana bulunggadung nai dudai baen gule mai naron pala mangan manyogot.

Sampe sannari leng tarbege dope sora ni losungi, olope inda songon najolo be riburna, harana sannari madung bahat marmasukan gule-guleon na-asing tu Mandailing taon.

Najolo dompak daganak iba, pala dung habis ma ari poken (di Mandailing Julu ari pokenna ari Sabtu di Kotanopan), abis muse mai gulaen naitabusi ni umak di pasar Kotanopan, paling-paling mai sampe ari Akad, jabat dung masuk ari Sinayan muloi muse ma baya dainang manggule bulung gadung sampe tu ari Jumahat.

Antong molo sonima, inda salada idokan pala pamatangon nai pagodang-godang ni bulung gadung do, tarutamoma bulung gadung naiduda dot losung nangkinani.

Sampe tu ari sadarion, pala mulak au tu kampung, leng udokon juo do alak bagas manggule bulung gadung, harana gule bulunggadung on inda natarlupaon biarpe sampe tujia iba mangaranto. Bahkan pangaranto na tu Medan pe anggo caritona, bahatdo namaroban losung songoni indalu sian Mandailing harana ning kalai mabiar lupa tu kampung pala inda mangan bulung gadung nai duda pinomat tolu (3) kali sadari.

Molo mangan iba dirumah makan didia sajope anggo di Mandailing, totop dei adong sayur bulung gadung nai duda. Rupana sampe tu Pasaman pe songoni juo dei asalma leng bahat di daerahi halak kita, harana jungada au mangan di Panti songoni di Ujung Gading, totop ma adong bulung gadung nai duda.

Sakadar manaringoti pala get margule bulung gadung naiduda, porlu mai ita siapkon :

1. Losung

2. Indalu

3. Bulung Gadung (jalaki naposo-poso nai dot na lambok bulung nai)

4. Arambir

5. Rimbang

6. Arias (pala adong bungo nai, so mur matabo)

7. Lasiak (pala adong tambai dot Antarsa)

8. Alas sacukupna

9. Habo (pala adong, pala ngadong baen joring, pala inda adong juo nangkon baen)

10. Ikan sale pangaronca (pala adong, tarlobi-lobi lelan ma sugari sanga garing)

11. Sira

12. Sangge-sangge

Cara pamasakna :

Kuhur arambir sacukupna, poro santan nai masukkon tu kuali, masukkon muse lasiak nadung igiling dot alas nadung igiling, tuk-tuk tu panggilingan i sangge-sangge sanjongkal, pudun sakali, masukkon tu santannai, gaor ma palan. Pagara api, baen tu ginjang niapi i, suru si Taing manyaok-nyaokna so ulang boku santannai. Partarikkon bulung gadung ngon tangkil nai, ulang baen batang nai, capot non, kacuali ujung nai inda mangua. Pipili rimbang, gotap-gotap arias, obanma tu pariki. Buka tutup ni losung, pala natungkap, patalak, pala nadung talak, pamasukma saotik bulung gadungi, gepu tu losungi (ning kalak so ulang muap losung). Duda ma, ulang lupa mar Bismillah pala mandudana, naron tarduda ho patmu. Ontang ombar banjarmi mangkobari, tai ulang mangkobari alak, sapai kaji napokeninan sanga apil dope ia. Pala mandudana ulang maradian, ning kalak radei muap losung, sakali duda ma sudena bulunggadung dot rimbang. Arias nai ulang mamasastu so adong non incop-incopon ni daganak, obanma tu bagas. Pala dung gur-gur santan nai, masukkon ma bulung gadung nai duda i parjolo, pala get masakma, pamasuk pangaroncanai, gulaen salei. Ulang lupa baen sirana, non inda mardai sira mangamuk ayah di daganak, angke ayah ni daganak sira pe ilen gule na asi sajo do, buktina natuari pas ngadong gule sira do ibuat ia ngon parapi.

Adope, mangan ma ita da.... ulang lupa mar Bismillah, non ngohanko tartolon ko oli-oli ni bulung gadungi, eh oli-oli ni gulaeni.

Gule bulung gadung tahan dei markisar 4 jom inda bari, pala bahat dope, pamilas so ulang bari da inaaaang.

Boa-boa

INDA PE ADONG ISINA, SOBAR JOLO DA, UDA, NANGUDA, MAMAK, NANTULANG, INSYA ALLAH GET DI ISI MA ON