Silalat di Angkola,
Bulung Gadung di Mandailing
Ulang marmayam amang di na sikola
Anggo gara-gara ni bujing-bujing



Rabu, 12 Agustus 2015

MARADU GODANG

"Boooo.... hamu dei ipar, aso torangan ari?" ning Japardamean mandok Jamangalompit lao manjalaki solop nia digolap-golap ni andostorangi, di alaman Masojid i.
"Olo, taru torangan ari muse ma sakalion bo" ning Jamangalompit muse antong lao mambuat salin maridi na litak sian karanjang sabun nia i.
"Inda ben na malom jumahat i dongan on?" ning Japardamean muse mangarsak
"Nabahat ma na binoto muyu lae da, ke ma hamu paombus kamu api i tu lopoan, marnguasi non halak" ning Jamangalompit muse palalu obar.
"Anggo aek do da na madung ipamilas iboto muyu mai parjolo nangkin, tugas ku non na mambaen tes maia dot kopi, goreng pe roangku mang masak mai, pajolo au ipar da....!!!" ning Japardamean marsisosak tu lopo nia an, harana mabiar ia non matubek-bek muse alak bagas nia.
...............
Dung sampe tu lopoan antong, tarida ma di Japardamean madung adong, dua tolu alak namarjugukan di lopo niai, lao mangkobari torus marburas lao mangkardak, sumurung lobi ma Jagundal na juguk di tiang tongai mangadopkon tivi.
"Na lanjang mada aha muyu pareban, halak na get marminuman" ning Jagundal ma mandok Japardamean
"Aha do na lanjang i, ulangko margalangan mangecek" ibalos Japardamean 
"Dzikir muyu mada makasudna" ning Jagundal
"Ooooo, uambang muse dabo sanga aha" ning Japardamean mangalus lao patibal salin maridi nia di dapur.
"Baen kamu jolo tes manis da, so mur mamanis iba" ning Jagulo ma mandok Japardamean
"Au Tes Paet ma, capot da" ning si Capot muse tingon susui ni lopoi
"Au kopi da" ning Jagundal muse dohot-dohotan
.............
Inda sadia onok sian i antong rami ma lopo ni Japardamean i, apalagi dung ro si Jamangalompit, simbur ma kecek muloi sian Saba, kobun, erer tu kecek Politik, santak tu namarnegara. Marsidok-na i dokna soni halak nabahat i. 
Pas atiha mangangkat tapak Jagulo lao get manyirup tes, rupana tarpaida ma di Jaombak tintin ni Jagulo ama nagodang da.

"Ammanggg....na deges ma dongan tintin muyu i, sajia mai ibuat kamu?" ning Jaombak mada songon na mamancing obar.
"Lima juta mon boto hamu ubuat lao Ari Rayoi di Medan" ning Jagulo muse mamangkal
"Ahhhhh lima juta dehe, au on bo, onom juta mon itabusi babere muyu ningia di Jawa, lao mulak i alai puasoi" ning Jarundut songon namangatehi
"Ammannn, bana mei, aha ma dongan hasiatna i?" ning Jamangalompit sapa-sapa
"Anggo pandok ni anakta, tahan tampul ningia, tai ba inda pe unjung utere" ning Jarundut lao mangapus tintin niai songon na get manjalaki alo
Iapan ialala Jamangalompit, jongjong mada ia tingon jugukan niai, lao patidaon tintin nia muse.
"Au tintinkon, pitu juta pe inda ulehen on, harana atiha mardzikir do au on adong mangarambankonsa tu ampuanku, alak alus dei roangku" ning Jamangalompit inda ra talu, padohal ba ngada dong namangarga tintin niai.
"Ahhhh.....anta na Malaikat Maut do dongan, anta homu ma na get parjolo alapon nia, ipartandoisa kinan" ning guru i songon na dohot-dohotan. Sip polngit boto hamu Jamangalompit songon namabiar.
Mur milas muse roa ni Jagundal, sapala jongjong muse ia sian jugukan niai.
"Ho nangkin, sajia, lima juta, ho onom juta, ho Jamangalompit, pitu juta, au tintin kon dua pulu juta pe inda ugadis on" ning Jagundal lao mangela tintin nia tingon tangan nia torus ipatibal ia di ginjang mejai, rupana PIRUS MADINA.
Marsipan boto hamu na salopoi, lao kehe-kehe sada
"Ison epengna bo uda" ning si Capot ma pajolo
"Sajia jau, kopi sada goreng dua, gudang garam sabatang" ning Jaombak muse mandok Japardamean
"Tuliskon kamu jolo da, inda pe adong epengna, tes manis, roti tolu, goreng tolu, kacang dua, union sabungkus" ning Jagulo muse lao aruar tingon lopoi. 
"Au pajolo mau dongan da, naget ke dope tu dolok dabo" ning Jamangalompit muse mandok Jaimbalo.
Asidunganna longon lopoi tinggal Jagundal doma dot Japardamean parjambur i.
Dung markehean halak na bahat i, songon na penasaran ilala Japardamean, marsapa ma Japardamean tu Jagundal.
"Peto mei dongan, dua pulu juta arga ni tintin mi?"
"Ah, dua ratus ribu peda ngana laku on"
"Aso idokon ko soni nangkin inda igadis ko duapulu juta pe?"
"Tai ngada adong antong na mangargana"
"Ngoni aso idok ko soni tu alai?"
"Booo, lek namarsiatehan mantong karejoi, "Maradu Godang"
ning Jagundal lao mangkardak


----oooOooo----

1 komentar:

Aslim_lu315 mengatakan...

Hahahahaha,,,,,,,,,,,,, maradu godang mada...
pas mei lae, memang na simburan najolo i carito tu satont
ang ni parbatuanon..

Bulunggadung Mandailing, O Tano Hasorangan, Tano Hatubuan, Inganan Parmayaman, Lubuk Parkatimbungan, Sian Ranjo Batu Santak Tu Sihepeng, Tano Nagambur Nanapu, Ingkon Mulak do au pala marhepeng..... alaleee bayaaa...