Jolo Surat-suratan Dei So Baru Ipon (Sada)

“Ligi dabo jolo ombaron, halak si Horas marmotor, halak si Tondi marparabot Jepara, halak si Dingin margonjong berlian marjaring, aggo ho, hum mangurus daganak sada nasikolape inda ture, inda salose!” ning umak si Taing mandok alak lai-i pas songon logu ni Odang Masdani.
“Alaaa, Anggo halak si Horas, si Tondi dot si Dingin, Horas Tondi Madingin” ning uda Abdurrahman namargorar harajaan Jasobaruddin (baen sobarna).
“Na songon itik domada hita uida on” ningia muse palalu obar.
“Olo, pas dontong songon itik, manyosop sajo, angke incogot kaduan mur so adong be panganon, manyosop sajo mai antong, kasidunganna aek sajo mai kaluar” ning umak si Taing muse mur mabekbek.
“Inda-i dabo maksudna, gogoan sora ni boru-boru pado jantan, mardosa do da ho-i” ning Jasobaruddin muse mangalus.
“Na malim gurumu, na malo ilala ho, anggo sonon sajo ma ita, mulak ma au tu amian tu balikan” ning umak si Taing mangancam.
“Ulang ba, ise muse pature iba ison tongkinnai iba natobang, tai udokon do di ho ulang sai ligi ombar banjartai, au do ligi dabo!” ning Jasobaruddin manyobarkon umak si Taing.
“Aha do ligi-ligion ko?, iambang ko ma nanga na ganteng ko?” ning umak si Taing muse.
“Inda pola nian na ganteng, tai sabotol (botohonna do da)” ning Jasobaruddin lao marsianyang.

.....
Bo rupa, inda namarsianyang adaborui, torang ari tarsonggot Jasobaruddin, inda adong inang ni danak i bagas be. Ijalak-jalaki ia tu jae tujulu inda dong pasuo, takar natungkap doma naso ipatalak na manjalakinai.
“Nadung marangkat ma umak si Taing tu balikan mayogoti, abur dope ari dot si Taing pe iobanna do uida” ning ombar banjar nia mandok Jasobaruddin.
Juguk tondo baya Jasobaruddin diginjang tangga mambege obar ni ombar banjar niai lao martungkol isang songon na marangan-angan. Martubi pe manuk dijolo nia inda na isodar niabe, baen namangambur doma manuki tu sia so tarsonggot ia.
.....

Bele-bele marangan-angan Jasobaruddin di ginjang tangga ni bagas niai, inda sodar ia madung pukul sambilan, padahal nagiot kehe do ia nangkin mangguris. Taraso ma ilala ia marngaok boltok nia songon namale harana inda nadong dope masuk muloi manyogoti. Iungkap ia udon korak doma isina, iungkap ia muse uali lasiak-lasiakna doma na adong. Marniat ma ia mardahan jolo sobaru non marpikir sanga songon dia dalan get boluson. Ibuat Jasobaruddin ma induri tingon parapi, ibuat ia muse danon dua takar ngon kaleng danoni, ioban ia tu lambung ni tingkapi, muloi ma Jasobaruddin marsege. Halak tong marsege monis nai dei tujolo, anggo Jasobaruddin ba ngada, rap tujolo sude, sampak bage doma deba danon nai.

"Jiana dooon?" ning jando ni si Tumbur ngon sabolah lao main mata boti martata.

.....

Marsambung....

Dalan Kuliling Pasar Kotanopan

"Tolu do salubang boluton!" ning nenek namarjagal bolut di lambung tangga arah tu Partenisan i di Pasar Kotanopan.

"Ape bo, marroan ma tuson, aruting namura-mura" ning si Pardomuan muse ngon siborang dalan, dijolo ni Pajak Daging i.

"Nabo inang, jomudo arutingon" ning si Pardomuan lao maniop aruting i dot dua tangan nia.

"Namenek-menekan do uida!" ning inang-inang namarlewatan i manjawab.

"Adong do ison!" ning ama-ama muse lao manabusi kantang di sabolah nia.

"Nga giot kalak dai aruting na mate" ning poso-poso muse ngon samping.

"Borang doho antong roangku ipar, mangan gulaen namangolu" ning si Pardomuan mangalus (padahal iape inda nai boto nia sanga songon jia borang).

"Na bo ale anggi, aruting on" ningia muse mandok bujing-bujing na mamolus ngon jolo nia.

"Wawww, piga sada?" ning bujing-bujing i lao kehe.

"Anggo sada, leng sada" ning si Pardomuan dohot-dohotan margiri.

.....

Inda sadia onok roma bujing-bujing na lagak sada-sadana, lewat tingon jolo ni parjagalan si Pardomuan i.

"Ho ale anggi, inda jo aruting on?" ning si Pardomuan.

"Sajia mai argana?" ning bujing-bujing i mulak marsapa.

"Lima pulu pala sada, tolu saratus, pitu dua ratus, dua ribu lima ratus sudena, dua ribu pitu ratus dot karanjang nai, tolu ribu dua ratus dohot kalak nai" ning si Pardomuan lao marsianyang.

"Godangan arga ni gulaen pado halak nai?" ning bujing-bujing i marsianyang

"Alaaa, anggo alak nai umpe laku madung syukur mai" ning si Pardomuan muloi mangarayu.

"On ma sudena bo, sajia mon abang?" ning bujing-bujing i muse lao patidaon aruting nadung di pili-i nia nagodang-godang nai markisar pitu ihur.

"Sanga sajia pangalehenmu ma soni, na ponting dokon gorarmu, ijia kampungmu!" ning si Pardomuan asok, tai tarbege. Ngana itabusi nia antong aruting i, baen na mambuka tobat na tinggal do ia di Paya Bayuon dung siap mangguris, rupana bahat disi aruting na manyarsar.

"Purnama abang, kampung nami di Muara Kais, abang ise gorarna?" ning bujing-bujing i muse balik marsapa lao patibal epeng tukaran lima ratus.

"Au Purdomuan, kampung nami Hutabariba, nangkon bayari be, ro au tu Muara Kais dung poken da!" ning si Pardomuan

"Ro ma abang, adong dope dibagas kue ari rayo, tarimo kasi da abang" ning si Purnama muse mangkuling lao jongjong torus ke.

.....

Tar tolu ari dung ni, roma antong si Pardomuan tu Muara Kais marmayam tu bagas ni halak si Purnama.

"Assalamu 'Alaikum!" ning si Pardomuan ma lao masuk.

"Alaikum Salam, bo, nangon jia do hutanta, ahado nangkin maksudna, masuk ma jolo!" ning umak si Purnama

"Na ngon Hutabariba nanguda, gorarku Pardomuan, na sakadar marmayam do au toson, poken nalewat pasuo au dot boru muyu di Kotanopan" ning si Pardomuan mangalus lao juguk di karosi na adong di ruar.

"Boo, juguk ma jolo songoni, so u pio si Purnama!" ning umak si Purnama lao kehe tu dapur.

Inda sajia onok, roma antong si Purnama maroban tes iginjang ni Talam dohot alame nadung mapak baen onokna dung Ari Rayo. Bolnang doma mata si Pardomuan mangaligi si Purnama baen degesna, rupana baen na marjilbab do poken i so inda tangkas ida si Pardomuan parrupona. Rupana baya nasangat lagak na, obukna get manyerep doma baen lanjangnya, alakna ama na bontar, lampas muse, marbaju kurung dope, mar rok panjang, mar losung pipi hurum nai pala mikim. Hodokan si Pardomuan mangaligina, padahal na musim parudan do. "Nangkon ipainte-inte be, idokon masoni langsung maksud niba" ning roa nia sajo ma dibagasan.

.....

Markisar satonga jom, ro musema ayah si Purnama tingon lopo, tarpaida disia adong tamu dibagasi. Dung marsisoloman, ipatandaon si Pardomuan ma iba nia, boti idokon ia muse ma maksud nia.

"Sonon do dabo uda, maksud ku tu son sugari na giot padomu Hutabariba do dohot Muara Kais on" ning si Pardomuan purak-purak mar istilah boti manggoma-goma pat nia lao mayingkat pat ni saraor nia. Rupana tarpaida di ayah si Purnama bitis ni si Pardomuan nalicin do inda marabong.

"Bo, inda sala dai amang, anggo ido sudena si Purnama dei kuncina, cuma hami simatobangna on antong sugari bisa, ulang malarat boru nami on cogot aduan songon hami on be" ning simatobang si Purnama mangalus.

"Maksud ni Uda i?" ning si Pardomuan

"Huida bitis muyu nangkin, hurang do ulala porsayana harana hurang mangizinkon do uida" ning ayah si Purnama.

.....

Heran si Pardomuan sanga aha maksud ni ayah si Purnama i, akhirna dung siap minum, mijurma ia ngon bagas ni halak si Purnama i dohot parasaan na kecewa. Ditongandalan pasuo ia dohot sada ompung-ompung najuguk di topi ni bondar, marsapa ma si Pardomuan.

"Idokon ayah si Purnama, hurang porsaya ia di au harana ningia ida ia bitisku inda mangizinkon ompung" ning si Pardomuan.

"Ligi ma huida antong bitismu anggi" ning ompung-ompungi antong.

Isingkat si Pardomuan saraor panjang nia, martata antong ompung-ompung i.

"Aso martata ompung?" ning si Pardomuan

"Bitismu dabo anggi inda marabong, jadi madung pasti mai karejomu tukang guris, mangkapistak aek ni apeai tu patmu, igosok ko dot sabut pala maridi, marmelaan abong nai, harana pala mangguris polan ni apeami tu toru pat saraormu mei tu ginjang" ning ompungi adop si Pardomuan mur magogo tata na.

"Jadi angkon na sonjia do giot ni ayah si Purnama ompung?" ning si Pardomuan

"Boo, sugari antong marabong ma bitismu, harana pala namarabong do antong bitismu dot patmu, bararti pegawe ma ho i" ning ompung i mangalusi.

.....

"Ho, marabong do bitismu anggi?" ning ompung Jamarsuan muse adop si Tangguli lao jongjong ngon lopo i.

"Inda marabong ompung, inda na bisa muse on mambuat boru tu Muara Kais" ning si Tangguli mangalus.

Madina Yang Madani

Di Tolu ari rayoi, u ontang Parebani mardalan-dalan lao manggambar-gambar kampung di Madina. Mardalan ma hami sian bagas marpalan-palan markareta (sepeda motor) harana inda bisa marisar-isar be songon najolo. Sobobna madung gok sannari kareta di itaon muloi sian pasar sampe tu palosok songoni muse motor.
“Kehe tusaba markareta, kehe mangguris markareta, kehe maridi markareta, kehe mangulangi markareta, tongkina nai mardahanpe markareta, manggule markareta”. “Sajuta do antong uang mukona, baru kreditna doma parbulan, pala inda tarbayar paling-paling mai isita halai” ning parebani adop au.

Dung lalu tu Pasar Panyabungan, torus ma hami mardalan arah tu pasar lamo. Rupana disimpang Jalan Bhakti Abri (dijolo ni BPDSU najolo, dijolo ni Madina Market sannari) madung adong lampu merah, na i pasang atiha bulan puasoi. Pas lewat hami topek lampu merah, udokon di Parebani i paso ia jolo harana get torus ma ioban ia hami. “Inda uboto antong sanga aha maksudna” ning Parebani adop au.
Bele-bele longang au mamandang-mandang parubahan ni Madina on sian kareta i, rupana madung lampu hijo, mardalani motor dot kareta, inda mardalan Parebani sampae madung lampu merah muse.
Jadi usapai, “Aso ngamardalan ko nangkin dompak lampu hijo?” ningku.
“Ah, inda dong na cocok uida warna ni lampui” ning parebani mangalus
“Jadi angkon warna sonjia do?” ningku marsapa
“Na lomlom sugari, ido warna paporit niba” ningia mangalus
Dung hu torangkon dope sanga aha maksudna baru mangarti Parebani, lao munduk-unduk mandok heran.
“Sonjia ma antong ibaen, angke nadaoan iba tingon lonceng” ningia muse adop au.

Dung mulak hami sian Sihepeng, uontang Parebani mangan di Wek II, harana adong disi rumah makan ala Perancis (marsibuat indahanna dot gulena). Mangida gule namarbaris iginjang mejai, ibuat parebani manuk sangkorot, ikan mas sapotong, rondang salobong, rondang bolut sa sendok, asompodeh aruting saikur, ikuah ia indahan nia dot gule Bulunggadung ipajuguk ia dikarosi. Ubuat muse antong indahan, ubuat rondang bolut sasendok soni dohot gule Bulunggadung, rap mangan ma hami disi.
“Tamba reban ulang maila, sasakali do, lagi dompak ari rayo” ningku adop Parebani nadung martamba indahan sakali.
“Olo ba, martambu dope au on” ningia muse antong lao manyirup Juice Tomat
“On ma somangan gorarna da, saroa-roa niba mambuat” ningia muse adop au.

Salose mangan, ubuka dompet ubayar dikasir nai, lao mangontang Parebani mulak tu huta. Itongandalan marsapa ma ia di au, :
“Sajia male nangkin mambayar namangani?” ning Parebani
“Ah, sajia mai jabat, tarsongon namangani ita nasakali i rumah makan na ijulu” ningku targogo, harana ama na retuk di dalani kendaraan.
“Ha… sapulu ribu?”, “Ah, uoban doma jolo inang ni daganak sasakali mangan disi i” ningia adop au.“Sapulu ribu dope ningia, madung habis epengku onompulu pitu ribu” ning roangku dibagasan lao mikim-mikim di diboncengan i

Tangan Mangambe, Pat Mangkouk

Najolo, waktu baru-baru masuk dope agama Islam di Mandailing ta on, indape ro Isilom Bonjol, agama Islam di son namarcampur baur dope dohot agama ni ompu-ompunta na parjolo ima agama pelbegu. Guru mangaji pe payah dope maso i, jadi agama Islam on sian bibir tu bibir dope, syariatna pe ala kadarna juo dope alak mangkarejohonna. Bahkan bahat dope di kampungi naso manjonjongkon sumbayang Jumahat dope harani miskin ni guru dot keadaan panjajahan maso i.

Inda songon sannarion ba, Mandailing taon nadung terkenal do tu jae dot tu julu anggo masalah Agama Islam. Pasantren nadung marbaris do di hita an muloi sian Siabu santak tu Muara Sipongi diantarana Musthofawiyah Purbabaru, Darul Ulum Muara Mais, Darul Ikhlas Dalan Lidang, Darul Azhar Jambur Padang Matinggi, dohot na lain-lainna. Gorarnape nadung terkenalan do MADINA sampado Mandailing, sampe-sampe KTPngku atiha di diranto pe tempat kelahiranku dohot bangga ni roa utulis doi MADINA.

Jadi imada, disada kampung namargorar Kampung Torang, adongma tolu halak nabaru masuk Islam. Hita dokon masoni gorarna Japanaek, Jamijur dohot Malim Tasaouk.

"Aha muse do ipar Malim Tasouk on? homu dabo adong-adong sajo istilah muyu" ning si Syawal marsapa.

"Bo Malim Tasouk ma, Tangan Mangambe Pat Mangkouk" ning parebani palalu carito.

Harani Malim Tasoukon na tobangna, salalu mai ia ibaen halai manjadi malimna, tukang catat kaji molo kehe mangaji tu Hutanaincat, parsapaan pala lupa. Disada ari, marangkat ma halai natolu mangaji tu Hutanaincat songon nabiaso. Kabotulan sadari i marsiajar sumbayang, jadi dapot halai natolu ma tamba ni pangajian, Pala Atiha sumbayang inda tola margorak, kacuali gorakan ni sumbayang.

Adope, marangkat ma halai natolu mulak tu Kampung Torang hira-hira jam sabolas (11.00) ariani. Satongandalan dope halai, rupana masuk ma Kotu Luhur, jadi mangkuling ma Malim Tasouk. "Sumbayang ma hita jolo dongan, manjawek ma ita jolo di Batanggadisan, so sumbayang kita non di ginjang ni duhut nabolakan" ning Malim i ma. Dung salose manjawek, marbaris ma halai natolu diginjang ni duhut nahapal ditopi ni Batanggadis. Malim Tasouk ma jadi imomna, Japanaek sian siambirang, Jamijur sian siamun jadi makmumna.

Sarokaat atiha sumbayang dabo aman dope, padua rokaatna pe aman dope, tai patolu rokaatna atiha rukuk, mamolus ma ambeng diantara ni halai, dibalakang ni imom dijolo ni makmum nai.

"Beeeeekkkkkk" ning sora ni ambengi salao manjampal

"Hussssss" ning si Japanaek

"Ulang ko margorak" ning si Jamijur

"Untungma au inda margorak" ning Malim Tasouk lao mangaligi tu pudi.

......

"Takik sadari do carito on ipar on?" ning si Syawal marsapa tu parebani.

"Ah marimbar dei nanga, jadi parsiajaran ma dabo dihita i, so ulang sei songon touk nai toru takar sajo hita, baen sangkot ulunia ditakari, iambang ia ma ia nalampasna. Napaduana mula marsiajar kita ulang tanggung-tanggung, so ulang iambang napeto sajo nai karejohoni, di halak naso marelmu iba maroban sosat di alak namarelmu iba jadi partataan ni dongan" ning parebani

"Palalu bayari omu jolo kopingkon da" ning parebani muse adop au lao jongjong, ibuat na muse dope sigaretku sabatang.

Alame Na Mosok

Oleh : Bang Edi Nasution Bayo Suti
Web : http://bayosuti.blogspot.com/
http://editorsiojo85.wordpress.com/
http://gondang.blogspot.com/
http://edinasution.wordpress.com/

Lobi-urang tarsongon carito ni kahanggi na sian Gunung Sorik Marapi an, sapulu taon na solpu, dung tomet si Soma sikola SMA na i lambung beskop i, rap dongan-dongan sasikola, ia marangkat tu Doli i ma na giot manyambung sikola tu na hum gincat, ima nai dok alak sannari “universitas”. Di Doli on antong bahat do universitas bope na i pajongjong pamarentah, atope na dibaen alak partikulir: “sikola sewasta”, ning amangboru Jatumpat. Alai sude hum gogo do roa na marsikola di universitas ni pamarentah arena biayana mura boti hum momo dapot karejo pala dung tomet. Tarlobi-lobi amang dot inang na hatiha sumbayang salalu do mangido tolong tu Tuhan Na Sada i, Na Denggan Roa i, anso si nuan tunas atope si nuan boyu na bisuk-biusk on incogot-aduan manjadi alak na marhasaya tu ugamo dot bangso ni alai, ima alak Mandailing na mian di tano sere, tano hulambu na tumbur, ima sada-sada banua na torkis sapanjang di portibi on.

***
Sampe do opat taon lolotna so tomet si Soma sian Universitas Mandala Holing (UMH). Bope songon i, ibana ma na paling ipas tomet sian UMH umpado dongan-dongan sasikola na rap sian kampung. Sannari ia madung manjadi alak na marsikola tinggi: “sarjana”, ning kalak. Inda piga bulan dungi, ia mangalamar karejo tu kantor pamarentah di Doli. Pas songon hahagiot ni simatobang na, pinomat Asisten Wedana saulak on, ima pangidoan ni alai tu Na Sada i. Rasoki nia antong, si Soma itarimo jadi pegawe ni pamarentah. Dung martugas, karejo nia antong hum na mamarentah kalak maia: ”O ... Jaultop, pasusun jolo surat-suraton, lap jolo mejangkon, dungi alap jolo gaji tu Kantor Pos salaos kirimkon jolo bungkusan on tu tulangku Jasorik di Pijor Koling. Oni ulang ko lupa manabusi pirama manuk tolu, laos mulak ko tu son”. Hatiha get marmulakan ma pagawe sian kantor, i pio ia mulak si Jaultop: ”Arut jolo akku, marngaolan sajo, na lojaan kulala dabo manjuluk-juluk lubang ni bolut na saborngin”, ning ia muse.

Kring ... kring ... kring .... doring sora ni talipon hatiha si Soma mambasa surat nai tongoskon anggi nia si Andor sian kampung. Tarida mikim si Soma mambasa isi ni surat i, arana ning anggi nia, madung santak por sikatutu do roa ni simatobang ni alai anso si Soma ipas ma maringanan, ulang i pa lolot-lolot be, tarlobi-lobi ia madung markarejo boti adong do sada-dua boru tulang, bolas dokonan jagar-jagar ni huta, na dung inte-intean di bagas podomanna so dikusip. Nantulang nia pe dodas muse marsapa-sapa tu anggi ni alai si Rumondang sanga mulak kampung do si Soma di ari rayo taon na ro. Bope antong tulang ni alai tardok do alak na pohom, na beteng, taiba leng na mekel do ia muda pasuo dot anggi nia si Andor muda dompak rap maridi di tapian nai topi godung an. Tarsonggot si Soma hatiha telepon nai meja niai mordoring marulak-ulak, arana sompat do ia marangan-angan tu boru tulang nia si Langgo boru Dalimunte na bontar, na bagak, na manis muda mekel arani marlosung pipit. Inda muse unjung tinggal songkok na, biama antong parsikola Parabek.

”Asalamu’alaikum”, tarbege sora dung i angkat ia talipon i.
”Wa’alaikum salam”, dialusi si Soma.
”Biado, iras do ita, ma bahat isi ni lukah i ?” Ro sapa-sapa ni dongan saparrongitan nia si Lomo na markarejo dot alak Marikin di Batavia.
“Olo. iras, hum bahat do ning roangku isi ni lukah muyu, amuntong margaji dollar, ibale kupiah … eh … rupiah do. Mulak do ho ari rayo on?” Marsapa si Soma.
“Insya Allah mulak, ro dabo tona ni amanta angkon na mulak au, mariari madung sambilan taon au di ranto on !” Ning si Lomo.
“Pade mada i, so manggaor alame jolo ita, madung na lungunan kulala mangecek-ecek dot kamu. Ato inda nahe get i pabagas amangboru amu di ari rayo on ?” Ning si Soma salaos martata-tata mangarisak si Lomo.
”Imada, por roa ni alai le mangompa-ompa dot manatah-natah paompu, tarlobi-lobi iba maia alakalai, iboto-iboto niba madung tu alak do sude. Imada so angkon ma mulak au ning kalai !” Ning si Lomo.
“Jadi biama i naron boru Sunda i, gandak mi, inda baya ibo roamu mangidasa ?” Sapa-sapa ni si Soma.
”Olo, poning ulungku mamikirkonsa. Inda arani lagak, bope nian sabotulna na lobi panghoding boru Sunda on, Moyang Priangan na mian di Paris of Java on. Tai biamantong iba madung lolot marosu, rap marsibotoan roa dot pangalao. Boro Sunda on pe ama na sun reso muse tu iba na dagang di ranto on, muloi do sian mangan santak tu salin niba i pature ia sude, ulang majolo muda dompak manjalak-jalaki roa niba, marsak, markalalungun, leng sobar ia boto mandongan-dongani iba na pogos on. Biama ning roamu ?” Ro mulak sapa-sapa ni si Lomo.
”Au pe da inda pohom au i, Lomo!” Dialusi si Soma.
“Rap ita boto do sanga songondia hahagiot ni amang-inangta bope koum-sisolkotta di ita an, angkon boru tulang do sibuaton. Arana ning kalai, muda i buat na sabangso, rap pade be, saroha, sapangambe-sapanaili, murmasolkot muse ita sude na markoum-koum. Ngada lakna boru Sunda on pe koumta juo do on di paradatan ni alak kita. Inda na angkon boru Lubis, Daulae, Dalimunte, Matondang, Parinduri, Rangkuti atope Pulungan. Muda u pamanat-manati boru Sunda on, muloi do sian parurum santak tu tambiul ni pat nai, inda dong boto u ida beso na sian jagar-jagar na di hutanta an. Beso na u ida, saro nai maia. Muda marsapa iba tu bujing-bujing alak Sunda iba mandok: ”Kumaha atuh, Neng ?”, muda saro Mandailing antong: ”Tudia do ho, Taing !”. Oni antong paradatan niba marbeso arani ita inda sarupo hangoloan bope banua ingananta sorang. I mada so marbeso saro dot paradatan ni alak kita dohot alak-alak na balok. Songon i pe, sindoki, boru Sunda i atope bangso-bangso na asing-asing nai tardok doi koumta di paradatanta, inda angkon alak na marmarga sian kita an, nga songon i do Soma ? Ngadahe dodas do rap tabege hatiha ita na mardongan-dongan mangeceti arani bagak na boru ni jopang i, boru ni cino i, di ita an !!! Imada so adatta ”Dalian Na Tolu” i didok juo dei adat ”Markoum-Sisolkot”, oni muse antong ”adat ombar dohot ugamo” di itaan, inda tarsarak i, songonjia pe panyarakna, sampe mate pe leng nai pa jongjong alak kita i dei !!!” Ning si Lomo.
”Na bahat nai botomu paradatan !!! Na poso-poso dope ho, inda hatobangon ko. Songon na so unjung tarbonggal tu ami di Doli on sasakali kehe do ho marjoget-joget dangdut dohot dongan-donganmu tu Bina Ria, Ancol. Sasaulak i dorngukko muse aek tape muda dompak marsak roamu. Ulang na malim tu ilala ho, Lomo !!!” Mangarsak muse si Soma salaos matukak-kakak di telepon i.
“Jadima songon i, pasuo di itaan ma ita. Assalamu’alaikum, Horas tondi madingin pir tondi matogu sayur matua bulung !!!” Ning si Lomo.
“Wa’alaikum salam, Horas ma di hita sasudena na markoum-sisolkot !!!” I balos si Soma salaos patibal talipon.

***
Di ari sinayan, dung sumbayang kotu luhur, si Lomo margulung-gulung santongkin di mardesa na adong di siborang kantor parkarejoan nia i, tar satonga kilo sian Monas. Monas on ima “pisang” na paling godang di partibi on, ning sada alak na parburas hatiha alai maruling-kuling anca dot dongan-donganna salaos mamuro unggas silisit sian sopo saba: “Uuuurrrrrrooooooooo ...”, leng pupo i burai alai unggas i, songoni juo erek dohot bodat sirata bitua na ro tu kobun-kobun nai dolok ni saba i: bulus tarsonggot si Lomo. So i pagulung-gulung ia ambaen malena do butua na arani na puaso i. “Tabo nai baya muda marbuko naron mangan sonop”, ro i bagasan roa nia salaos jongjong haruar mangalangka sian mandersa i.

“Kemana aje sech bang, dari tadi gue nyari-nyari, dipanggil bos tau !!”, ning sada boru Jawa dongan sakantor na.
“Tadi ketiduran di mesjid, ada apa” ? Marsopa si Lomo.
“Ora ngarti. Kayaknya bos agak sewot deh ama abang!!! Eh jadi nggak abang ’pulkam’ ke Mandailing ? Titip oleh-oleh donk dari sana, apa kek !!” Ning boru Jawa i muse.
”Boleh, mau ’alame na mosok’, biar kubawakan nanti !!” Alus ni si Lomo.
”Apaan sich ’alame na mosok’ ?” Sapa-sapa ni boru Jawa i.
”Dodol yang hangus !!!” Ning si Lomo.
“Ich abang, siapa sich yang mau makan dodol yang hangus, ora gelem ach !!!” Ning boru Jawa i tarsongon na bunut.
“Ya ... pahit dan memang tidak boleh dimakan, nanti sakit perut, muntah-muntah, bisa-bisa mencret !!!” Dungi i patorus si Lomo obar nia.
”Di kampung abang, dodol itu dinamakan alame yang proses pembuatannya cukup lama, sekitar satu hari satu malam, dengan memasak adonannya di dalam kuali besar dan memakai kayu api untuk memasaknya. Dodol itu dimasak secara bersama-sama (gotong royong) oleh beberapa orang yang bertetangga. Karena itulah dodol yang dimasak untuk keperluan lebaran itu bukan dimasak di dalam rumah, melainkan di luar atau di samping rumah. Mereka secara bergantian mengaduk-aduk adonan dodol sampai matang, hingga dodol itu menjadi kenyal dan lengket serta berwarna coklat tua. Selain membuatnya lama, juga memerlukan bahan-bahan yang cukup banyak seperti tepung beras, santan, dan gula merah yang dibuat dari air pohon enau. Artinya biaya dan tenaga yang dikeluarkan untuk membuat dodol cukup besar. Apabila para pembuatnya tidak berhati-hati dan teliti dalam proses pembuatannya, bisa jadi dodol itu nanti menjadi gosong berwarna kehitam-hitaman dan tidak ada gunanya lagi. Itulah yang disebut alame na mosok !!!” Mangguk-angguk antong boru Jawa i dung i torangkon si Lomo, pohom do ia tamsilan ni ”alame na mosok”, ma pohom ia bahaso inda na hum ”dodol yang hangus” antusanna !!!

***
Manyogot dope sidumadang ari, marombun-ombun dope dingin-dingin na disuan di samping ni sada-dua aratak na di huta i, madung bahat kalak na markean maripas-ipas tu Musojid Godang, alaklai-dadaboru muloi do sian na tobang tu na poso. Tingon topi ni tobat godang nai lambung bagas ni Jaendar Muda na di dolok huta i, tangkas tarbege takbir marulak-ulak sian Musojid Godang na i topi aek godang an. Rupana, inda lolot woktu na be, hira-hira sapangidupan nai get mangkarejooan sumbayang Ari Rayo ma alak na sakampung i.
Topet waktu na, rap sumbayang Ari Rayo ma alak na sakampung i. Dungi mambaco katubah muse ma na jadi imom nangkin ima Tuan Syeh na sian Patorjang. Abisi mandoah jolo. Salose mandoah, alak sude nai Musojid Godang i pe marjongjongan salaos baris marudur marsijalangan, marsimoop-moopan di Ari Rayo na borkat i.
Di alaman ni musojid godang i, bo ... pasuo si Soma dot dongan nia saparrongitan ima si Lomo. Bulus kalai dua marsijalangan, upat-puji lahir-batin marsimoopan. Dungi rap mekel be aduana, songon i jua tu dongan-dongan sahuta.
”U ambang inda lalu ho mulak, Lomo !!!” Ro obar ni si Soma.
“Indaba kele, inda pade ulala muda inda i oloon pangidoan ni simatobangta. Boti au pe mudung lungun do roangku ta amang dainang, angka-anggi niba dohot koum-sisolkotta sasudena di huta on. Andigan do marbukak Lubuk Rarangan di Tamiang ? Get ro do ma dongdong niba bo ... mangan mera, kuah ciak !!!” Ning si Lomo.
”Ningkalai tolu Ari Rayo. Ulang ko comeh, madung siap do dua jala godang di bagas. Sada ambaen di ayah, sada muse di au so rap manjala ita di na mambukak Lubuk Rarangan na i Tamiang ari Rabu on !!!” Alus ni si Soma.
Di na mangeceti i salaos lao marpalan-palan, inda taraso madung lalu alai tu jolo bagas ni si Lomo.
I gorit si Soma ak ni si Lomo salaos marsapa: “I oban ko do boro Sunda i, patandaon na tu amang-inangta dohot koum-sisolkotta na di huta on?”.
Rontong alus ni si Lomo: “Olo, madung mangido isin do au tu amang-inang nia u oban tu kampung taon patandaon sa tu amang-inangta salaos marmayam-mayam di ari rayo on, rap dohot anggi-anggi nia na dompak perei sikola !” Dialusi si Lomo sapa-sapa ni si Soma i.
“Pade mei, so murmabahat koumta !” Ning si Soma.

Dungi, rap mekel kalai na dua. Si Soma pe antong i patorus ia langka nia tu bagas ni alai nai topi bondar saba di Bariang. Indape sadia lolot dung kehe si Lomo tu dolok, bulus i pio si Lomo mulak si Soma.
“Soma …. lalu do nai angan-angankon mi !!!
I balikkon si Soma badan nia salaos manggoyang-goyang tangan nia, mandok ”inda”, harani baen payahna obar haluar sian papanganna. Oni bohi nia pe markerut-kerut tarida songon alak na dompak marpikir godang, marsak mamikirkon paruntungan ni ibana. Paida-ida dongan nia i tarsongon ”tondina dompak lao-lao”, si Lomo pe sip. Songonipe leng i tatap ia antong si Soma na mardalan torus tu dolok sampe mago sian mata, di balik jambu bol na tubu di samping bagas ni si Rohana boru Bayo Sege na bagak i.

***
Rupana, si Soma inda na mulak ia tu bagas, na kehe do ia torus lao tu dolok, tu tupi ni saba an. Inda lolot dungi, jongjong ia di ginjang ni sada batangi salaos manatap-manatap eme na dung gumorsing. Bo, inda lolot be manyabi ma ami i kampung on !!! Mangeceti di bagasan roa nia. Inda dao sia parjongjongan nia i, adong i ida ia sopo. Mangalangka ia palan-palan tu sopo i. Tolap tu si, i pajuguk ia di pantar ni sopo i. Manatap muse ia tu jolo, tu siambirang, dungi tu siamun nia. Alahle baya ... na leng marsak do rupana roa ni si Soma pasari-sari boru Dalimunte na dung solot di bagasan ate-ate.

Hatiha juguk-juguk salaos mata nia markosing-kosing, tu gincat tu toru, tu siambirang tu siamun, di ida ia sada suling na solot di dinding ni sopo i. I buat ia antong oni i tiop-tiop ia muse salaos mancubo-cubosa sanga bisa dope ia mangombusna. Bope antong inda jungada ia be marsuling, dung do ia marsikola tinggi di Doli, anggo mangombusna leng bisa dope, bope inda malo botul songon parsuling ni dongan nia si Jatulila. Dung marsuling ia saongok, i patorus ia muse marungut-ungut :

Eme baya dibaboanNa di suan marsada-sadaNa ancit baya na agoanMuda madung somal di ida mata

Ulang tong sitata dirabianSitanggis diroba-robaMartata baya di balianTangis di bagasan roa

Di hatiha si Soma marungut-ungut, sian dolok ni saba adong sora ni alak songon na paciah-ciahkon, mandot-doti ende ungut-ungut nia. Sanga sora ni si ise pe inda binoto alak na, arani i dolok ni saba i bahat tubu bulu lomang, oni disi potpot muse. Sora ni alak na mandotdoti ungut-ungut nia i inda songon sora ni alak na biaso hatiha markarejo di kobun. Muda i patangi-tangi gaduk do ilala, songon na i pisatkon baba ni alak na mandotdoti ungut-ungut i. Bope songon i mangarti do si Soma sanga hai sude nai pardok bayo na paciah-ciahkoni, urang-lobina tarsongon on:

Toskon jo ale bayo na bongak na lobi oto
Iambang ko do sude boru bujing ra diho
Ulang-ulang ma jolo jagar-jagar ni huta
Bope ho sannari ningmu asisten wedana

Muda get jadi alak na bisuk muse pistar
Angkon tabiat ni aek do da bole ita tiru
Ulang songon gayambang osar-osar
Mayup i oban aek tu jae-julu

Mambege-bege sora ni alak sian dolok ni saba i, rara-lomlom muko ni si Soma dibaensa. Bulus jongjong ia torus mardalan tu dolok salaos manjalak-jalaki bayo na paciah-ciahkon i. I pota-pota ia duru-duru, i lojong ia muse tu balik ni bulu-bulu, loja doma ia pae-paulu di kobun-kobun i, inda pasuo juo. ”Ise mei te, na layas ma bayo i jau !!!” Mengecek di bagasan roa ni si Soma. Dung loja ilala ia na manjalak-jalaki bayo na paciah-ciahkoni, bope antong na leng gurgur sajo dope i bagasan indora nia, kehe ia mulak tu huta. Dung tolap tu huta, inda dao dope sian saba i, pasuo si Soma dot tolu alak paramangboruon nia, na hum tobang ima si Jalotup.

Bulus marsapa si Soma: ”Bo, alak amangboru dehe, na ngonjia don paudur-udur ?”.
Ro alus ni amangboru nia Jalotup: ”Tingon kobun, mambuat sibodak dot pisang, mora nami. Aduan get orja pabuat boru ita. Ingot ko do si Langgo boru Dalimunte i, na ron rap ita pabuat obanon tu Runding. Na mambuatsa bayo Rangkuti, na manopot kahanggi tu alak si Tagor sabagas”.
Siiiiiiiiiiiiiiiiiiiirrrrrrrrrrrrrrr ... dosir daro nia pabege-bege gorar ni si Langgo boru Dalimunte i, i oban kalak muse baya tu Rundinng, alale. Dosir muse taroktok nia, humotar muse totnia, songon na golap i rasoi ia ari on, get unggal-singgalak muse tu pudi.
”O ... mora nami, pajolo ami ke, get sosak kami dabo, inte-intean naron alai na get paombus api di pardahananan!!!” Ning amangboru nia Jaloptup.
”Oloma ... oloma ... amangboru, paaaa...joooooloma !!!” Rorap si Soma mangalusisa.

Tar sapulu langka sian parjongjongan ni si Soma i, rap mikim be antong amangboru nia tolu i. Dung lewat sikola Madarasah nai belok i, inda tartahan kalai be, sidungna rap matukol-kol alai tolu, sampe-sampe heran doma umak ni si Kulom.
”Aha dei baya i so matukol-kol alak angkang di si, get marroan doma ilu bo u ida !!!” Mangkuling umak ni si Kulom.
”Inda sanga mangua ba anggi. Adong sada bayo na cilat nangkin di batangi saba nai godung an. Rupana ronjom muko nia tu bustak-bustak. Dung ami angkat sian saba i, songon meknong doma tarida muko ni bayo i !!!” Dialusi si Jalotup.
”Na gaduk mei baya, i pantatai alak na markoti !!!” Ning umak ni si Kulom.
”Ha ... ha ... ha ...” leng pupu alai na tolu mantata.
Milas roa ni umak ni si Kulom, mangkuling muse ia: “Alak na rintik !!!”

***
[EN]

Gandoang, Oktober 2008
http://gondang.blogspot.com/

Tu Poken Kalak Tu Poken Ko

“Baen jolo kopi satonga e gok aekna” ning Tobang Jamangantan mandok parlopo Jajalin
“Aso pake satonga bage?” ning parlopoi marsapa
“Hurang muse non epeng na on bo, palalu oban kamu Gudang Garam sabatang” ning Tobang Jamangantan muse.
“Olo, painte homu jolo tongkin da, hurang milas dope aekna” ning parlopoi mangalus
“Painte-inte ro kopi, baen uda carito i e” ning si Kedan mandok Tobang Jamangantan
“Carito aha muse dei?” ning Tobang i
“Carito najoloi” ning si Kedan
“Ooo, carito Ari Rayo ma songoni, na Ari rayo dope antong” ning Tobang i
“Markisar-kisar taon pitu puluan i najolo” ning Tobang i ma mamuloi carito. Molo kehe alak mangaranto, hampir pasti dei dabo mulak tiop taon. Rata-rata sapulu bulan maia halak karejo sataon, salobi nai dikampung do ma i. Mula get masuk ma bulan puaso marroan ma halak ngon ranto, asal so motor tontang ni kampung i biasona namulak ngon ranto mai. Iba pe dohot mai marlojong manyambutna, dapotan non iba silua olope na roti sangkoping. Jadi sapanjang Ramadhan dikampung ma halak maribadat, muloi sian Puaso, Taraweh pala borngin, Tadarus, pokokna rami sajo mai siang malam, halak namarmulakan pe antong hampir marroan tiop ari sampe tu sadari mangalomang.
“Ison kopi muyu bo” ning parlopoi mandok Tobang Jamangantan
“Ibaen do tu homu kopi on?” ning Tobangi mandok si Kedan lao marsianyag
“Inda bedabe uda, tu udai ma soni ibaen” ning si Kedan songon namambalos

“Adongma sada donganku najolo gorarna si Jamanjojak” ning Tobangi palalu carito. Bayo on songon iba juo do rap tukang guris, jadi mungkin inda tarpaida-ida ia namarmulakan ngon ranto-on. Gorarnape antong na ro ngon ranto, tontu bahat epengna, pakeanna deges-deges, sigaretna tabo-tabo. Mula dung sapoken ari rayo, muloi ma marmulakan muse dongan-dongan tu ranto, tinggal ma iba di kampung longon-longonan boti rongit-rongitan.
Jadi marangan-angan mada si Jamanjojak giot mangadu nasib juo tu ranto, tujia muse dope anggo inda tu Tano Doli (Medan), harana imaia pangarantoan anggo najolo na kerenna.

Pondok ni carito, di sapulu Ari Rayo i, marangkat juo ma si Jamanjojak tu Medan manompang dohot ombar banjar ni halai namargorar Jaubeon nadung opat taon di Tano Doli. Lao marangkat antong, mangido doah bage halai sonjia adat dohot kabiasoan ni halak kita Mandailing. “Lehen ma di halai kaborkatan ni rasoki o Tuhan nami, lehenjuo kasuksesan di pangarantoan” ning Lobe Malim mandoah, “Amiiin” ning halak nabahati antong..
Tibo diwaktuna, ipabuat halak narami juo ma halai tu topi ni dalan godangan painte motor. Isolom si Jamanjojak muse ma alak na adong disi lao tangis, apalagi atiha manyolom si Karlina, alaleee, inda tarcaritoon be, merdet doma monmon nia.

Dung lalu tu Medan, manompang ma si Jamanjojak untuk sementara waktu di bagas ni halak si Jaubeon. Torang ari ioban si Jaubeon ma si Jamanjojak marmayam markisar-kisar jam 9 manyogot. Masuk ma halai nadua tu sada lopo kopi, rencanana get sarapan. I ginjang mejai madung adong antong “Daftar Menu” na, jadi roma parlopoi manyapai sanga aha di halai.
“Saya lontong opor ayam pak” ning si Jaubeon mandok parlopoi
“Au Dan Lain-lain bapak” ning si Jamanjojak adop parlopoi.
Ipareso si Jamanjojak rupa daftar menu, tarida disia ditoruan adong tulisanna “Dan Lain-lain”, “Ah onma jolo, inda pe unjung idai on” ning roa si Jamanjojak
Martata halak salopo, rupana nabahatan disi halak kita namarminuman
“Maksudna dabo, salain nai tulisi adong dope panganon na asing” ning si Jaubeon mandok si Jamanjojak
“Papah Caok” ningia muse adop parlopoi mandok Nasi Goreng, murmartata halak di lopoi.

“Sapoken dung ni, icubo si Jamanjojak ma karejo di kota Medan, muloi sian Mamompa Ban ni Kareta Api, Manahan Ombak dohot Mancet Langit”, “inda ba sianyang dei, Marbeca Dayung do” ning Tobang na marcaritoi adop hami. Bo, rupa inda tahan si Jamanjojak, iambang ia antong saonok naon pala ke tu ranto lagsung sonang mai karejo jadi pegawe. Rupana baya namarbeca do, “anggo sonon sajo do, degenan ma au mulak tu kampung, pir ma lalu bitis niba on” ningna dibagasan roha nia.

Akhirna mulak si Jamanjojak tu kampung nia, ipatompangkon si Jaubeon dohot motor ABS (Aek Batanggadis Sejati) waktu i. Dung lalu tu huta, ia muse jolo partataon ni dongan baen copatna mulak.
“Bo, inda pe malamun pisang madung mulak ko?” ning si Japarrisak musema mangarsak
“Ala uda, Boratdo namar Panti on” ning si Jamanjojak manjawab
“Inda dapot jiba, ro iba ke iba” ning si Japangarsak muse mangarisak si Jamanjojak
"Tupoken kalak tupoken ko, aha gadisonmu torung sajo" ning si Paet muse ma ngon samping marlogu.

“Ison epengna bo” ning Tobang i lao jongjong ngon jugukan niai
“Nacopat mulak uda” ning si Kedan muse
“Marlinang doma bangku ni lopoon nai jugukan i sajo, kema jolo tongkin tusaba manungkir eme” ning Tobangi adop hami.

Balosan Surat Si Saleha

“Tujia sajo doho nanga so inda unjung tarida?” ning si Rohana adop si Punjut naro tubagas nia di dua pulu ari Ari Rayo.
“Inda na di Medan on au sannari be kakak” ning si Punjut antong manjawab
“Ijia doma ho?” ning Rohana balos marsapa
“Di Tanjung Morawa kakak, disi doma au mangguris di PTP-IV I” ning si Punjut mangalus.
“Na lawak ko antong baya, anggo na leng mangguris do karemu di ranto ni halakon, degenan ma di hita an ko mangguris” ning si Rohana.
“Pala ison iba mangguris, inda dong mambotona” ning si Punjut songon na mambela diri, “tai ulang dokon-dokon kakak ba sanga jise pe” ning si punjut muse mulak patorus obar.
“Ah, jiama ra iba i” ning si Rohana antong (padahal ba asal pasuo dot alak hita an nai caritoon si Rohana do “ulang dokon-dokon ba” ning ia muse, namambege carito pe marcarito muse di alak na asing, “ulang dokon-dokon kamu” ningi halai muse), “walhasil bonggal juo tujae tujulu sampe tu au, onpe ba ulang dokon-dokon kamu” ning mamak Katuman muse manyambung carito di bulan Puaso nalewat.
“Ison do surat si Saleha bo, nalagak ma uida sannari dongani dung magodang, najolo namerdet dei monmonna” ning si Rohana
“Olo dongan, padahal najolo nasalang-salang dope ia ijolo niba pala dung maridi, sannari roangku inda ra ia ibe” ning alak lai si Rohana i muse dohot-dohotan.
“Na urgit natuhoi dabo” ning si Rohana lao manulingkon alaklai niai, unggal doma alaklai-i ngon karosi tu pantari, nagodangan do antong adaborui sampado ia, baen betengna do lala na.
“Tarimo kasi godang-godang kakak” ning si Punjut lao manarimo surat sian si Rohana
“Kirim Solom ni inanta jo ngon kampung, denggan-dengganko ningkalai di ranto on, oban ma jo deba sasagun on bo” ning si Rohana muse lao mangalehen sabungkus sasagun.
“Tarimo kasi kakak, mulak ma au jolo, Assalamu Alaikum” ning si Punjut
“Alaikum Salaaaam” ning kalai manjawab.

Dung lalu tu bagas, ibuka si Punjut ma surat si Saleha, ibaca ia muse palan-palan lao mamandang gambar si Saleha na adong di surat i.

Huta Tonga, 15 Syawal 1397 H
..............................................
Malos ma batang ni galoga
Itopi ni Aek Batanggadis
Itongos abang surat tu si Saleha
Inda tarbaen baya na so tangis
………………………………
Aso mantong inda malos
Itaba halak hayu di kobun julu
Idokon abang angkon na i balos
On ma surat gonti ni diringku
…………………………………
Habang mada Ambaroba
Nasonggop tu batang kopi
Aupe abang jiar dalan mardosa
Tiop borngin au tarnipi-nipi
…………………………….
Itaba mada sabatang hayu
Na unggal di ginjang ni duru
Porsaya ma dabo abang diau
Inda namungkin ujalakibe panggontimu
…………………………………………
Mula kehe au marsoban
Totop do da uoban bongko
Sampe andiganpe au totop sobar
Painte Abang Punjut mulak ngon ranto
………………………………………..
Jambatan di Muara Pungkut
Kiri kanan mardinding papan (najolo dompak magotap)
Madung marsapa juo do au di Datu Janggut
Angkon na abang do baya dongan sapodoman (suiiiiit.....suiiiitttt)
………………………………………………..
Incor Tali-tali
Obanon tu Batu Nadua
Molo mungkir abang janjintai
Inda tartontang uda Katua (aha muse dei urusanna di Katua i)
………………………………….
Itampul batang ni botik
Maneteki ma gotana
Saimajolo suratku nasaotik
Kirim Solom doma tambana
……………………………..

Halak-kalak di tonga saba

Ditoru nai eme na gumorsing

Marsimohopan mada abang hita

Ampot adong sala di pangkuling

Sian Adik Sayangmu di Kampung Tonga
(SALEHA)

Ilompit si Punjut mulak surat i, i simpan ia di toru ni bantal ampot molo modom non ra marnipi tu si Saleha. Dung torang ari kehe ma si Punjut mangguris dohot semangat na godang, molo mulak tu kampung tongkin nai angkon na maroban modal baen pangalamar si Saleha dot modal usaho markobun Batu Loting (ulang marsiayang dabo) markobun kopi do.
Tai songoni ma rupa kehidupan on, angke usoho do na sian kita, anggo kaputusan leng nadi Tuhan tai do. Buktina pokeni atiha manggadis apea si Punjut, rupa baya namamura musedo arga ni Apea, biaso ra dei saratus sakilo, on baya duapulu lima maia. Inda binoto muse sapoken dungi madung masuk muse musim parudan, “Maraek Batang” ning si Dokek dongan si Punjut naro sian Angkola.
“Iambang sanga aha jabat isi ni surat nai, taru get sabulan doma paintena” ning parebani muse dope si Muktar songon na mamprotes mamak Katuman.
“Alaa…… pabahat soban, eh sobar, gorarna pe na mangkarang” ning mamak i antong mangalus

Urat Ni Padang Suhul Ni Tajak, Mangido Mohof Lahir Bathin

Najolo dompak sopo-sopo, eh poso-poso adong ma dongan akrabku namargorar Gozali. Bo, rupa di Ari rayoi pasuo hami di kampung, rupa mulak ia sian ranto. Madung lobi sapulu taon inda pasuo, jadi mulak marcarito-carito hami, mangido ijin au di ibana pamasuk sada carito tu blog ta on na i karang nia atiha poso-poso hami najolo, on ma carito na.

Judul Asli : Carito Na di Saba Padang

Pangarang : Gozali

Di Edit Oleh : FA Syakuro Nasution

Di taon lapanpuluan i najolo, di Panyabungan adong ma sada bayo nadung mabalu (nadung parjolo adaborui ipio Tuhan tai) marumur markisar-kisar 50 taon. Disada maso sapoken Ari Rayo, madung marmulakan sudena daganak nia tu ranto, tinggal ma sada-sada ia dibagas songon nabiaso longon-longonan. Baen ompot na longon marsak roa nia, marpikir-pikir ia soni, akhir na ro ibagasan roa nia “ke ma jolo tu saba soni mangaligi namangaligi…eh mangaligi-ligi, madung hampir dua poken inda unjung ipareso saba, sanga namaraek sanga inda, sanga na dung bol-bol duhut nai iginjang gadui, sanga na denggan do kacang panjang nai topi ni bondari” ningna dibagasan ni roa nia.
“Ahado so mekel ko? Ning abang Gozali mandok au lao palalu carito
Akhirna dung salose sumbayang kotu Luhur, marangkat ma ia tu Saba Padang (antara ni Pidoli dot Aek Galoga). Ipainte motor padat sajo baen na Ari Rayoi, icarter le beca nagodangan ongkosna, kasidunganna ilotap ia mardalan (“lao palidang-lidang ak” ningia sasada ia). Mardalan ma ia palan-palan muloi sian pasar torus tu pasar jongjong, lewat musema Wek II, torus tu jambatan sipolu-polu. Songon na reflek (inda sangajo) mangaligi ia tu batang aek i, tarpaida ma disia bujing-bujing namaridi, gur-gur mulak darah muda nia, humitir ia songon namatondik padahal na las do ari. Mardalan muse maia torus tu Wek 8 (najolo Daerah Wajib Senyum dei gorarna), torus tu Pidoli marpalan-palan. Tibo di jambatan Pidoli mancelok ia kiri dot kanan, inda tanggung bahatna muse adaboru namaridi, gorarna pe antong ari rayo. Mur dosir ijiur nia, humotar angkat ni pat nia, ipaisar ia mardalan, sungseng pe motor inda na ibege nia be. Pas diturunan di Pidoli manopotkon sikolai ipangkulingkon ombar banjar nia namarsaba di Saba Padang.
“Tu jia do uda on?” ning bayoi.
“Haa… Pira manuk?, Pak Datu?” ningia.
“Tujia doooon?” ning bayoi ipagogo ia sora nia.
“Oooo.. Tu Saba” ningia mur maisar angkatna.
Lewat Tobat Pangkailan nasannarian, torus tu tano gombung, lalu ma ia tu Saba Padang. Tibo disabai inda napareso kacang ia dibondari, inda muse napareso duhut digadui, apalagi pareso aek ni saba. Tai masuk ia tu sopo, iligi kiri kanan inda adong halak, Horja Godang ia sasada ia disopoi.
“Horja Godang sonjia do?” ning si Badul muse dope marsapa
“Mmmaaaany…. Ah nabongak maho antong, hum soni pe inda mangarti ho” ning abang Gozali mandok si Badul.
“Ooo, olo madung” ning si Badul
I mada, asyik-asyik mar Horja ia, rupana adong dua halak Hansip naitugaskon ni Katuai disi namangintip halak namarjudi, harana sering halak marjudi disopo niai. Mangintip hansip-i ngon nadao, tarida dihalai songon namutur sopoi. Ipadonok kalai tu sopo i torus mangintip tu bagasan, rupana baya do disi nadompak asyik Horja Godang.
“Huuuuueeeehhhhhh” ning Hansip i manyonggak.
Tarsonggot bayoi, mangalumpat ia tu luar laos marlojong tu topi ni duru-i, salose ditongandalan doma Horja niai. Manopotkon batang pisang di duru-i munduk bayoi, dapot ia Urat Ni Padang, ipatidaon ia adop hansip-i, “Apak, Bisa Do Baen Suhul Ni Tajak On?” ningia dohot sora na dung ngos-ngosan. “Minta maaf lahir batin pak” ning hansip-i mandok bayoi.
“Iya, aupe soni juo” ning bayoi lao juguk diginjang ni gadui songon namabodo.

“Untung dei inda idokon ia Urat Ni Padang i Baen tiang ni Sopo” ningku lao martata
“Na martata do sanga natangis ko Badul?” ning abang Gozali mandok si Badul.
“Martata dope ningia, idege ia pat niba” ning si Badul (Rupa jongjong abang Gozali dung siap marcarito, harana ipio adaboru niai ia manyuru mardahan).
“Palalu pasusu daganaki, anggo ho hona pelos maho non, marmayam sajo karejomu” ning si Badul mangarisak abang Gozali.

Angan-angan ni Bayo Parpikek

Sumber : http://bayosuti.blogspot.com/

Oleh : Bang Edi Nasution

Manyogot dope sidumadang ari, marnambur-nambur dope eme di saba an, madung marangkat si Katoid tu dolok ni huta, i ma tu arangan menek na di tor Siojo. Di lombang nai adong bondar saba na melduk-melduk mangihutkon topi-topi ni parsabaan na bolak i. Tu gincat saotik adong kobun-kobun ni alak huta i. Suan-suanan na antong adong torung, lasiak, kacang panjang, pitulo, atope bulung gadung. Oni adong juo manggis, tarutung, lancat dohot na asing-asing. Tar i topi bondar i, adong tubu sada batang ni marapolom na godang. Bope antong batang ni marapolom on godang, taiba biaso do i panaek dakdanak dompak marmayam tu kobun-kobun i salaos pabutong-butongkon bituana mangan marapolom.

Alak na get markerjo tu saba pentong marroan juo ma sada-dua di sogot ni ari na ngali i, jinjing adangan dohot cangkul di abarana, marite-ite di batangi ni saba i. Sasaulak tarbege muse jou-jou ni sada bayo tu bayo na asing: "Joooooooooouuuuuuuu ... !!!" Mamultakkon lungun di sogot ni ari i.

Sampe tu bondar ni saba i, tarbege mada di si Katoid sora ni ambaroba sian marapolom i, i tangan nia leng jinjing cangkah dohot pamikekna ambaroba juo. Adope, "pademon i taon cangkah parpikek on di marapolom i", ning roa nia. Dung mangite jambatan na menek di bondar saba i, mardalan saotik na i, sampe ma ia tu batang ni marapolom i. Bulus i pajuguk ia i toru nai salaos mambuat sigaret sian cakuk. Songon na torang parakalan ni ibana, nida sian parbohi nia, dung mangidup sangarsik-dua arsik, marbual-bual doma timbus na haruar sian papangan na: tarsongon pangarsik ni dongan ni si Jenggo di filim-filim Koboi nai putar di Beskop Sawahan an.

Dung habis sabatang sigaret, i panaek ia ma batang ni marapolom i, oni tali ni cangkah sangkot di tolonan na. Inda sadia lolot, si Katoid madung sampe tu ginjang, jongjong di sada dangka salaos marpikir-pikir sanga idia na pade tibalan ni cangkah pamikek on. Dungi, manek muse ia mulak manopotkan dangka na hum gincat, i sima i patibal ia cangkah pamikek i. Dung salose manaon cangkah pamikek on, ia pe mijur mulak tu toru ni batang marapolom i. Marongok santongkin, dungi i patorus ia pardalanan tu kobun apea nia tar tu dolok saotik. Sampe tu kobun apea i, mangguris ma ia sian batang ni apea na sada tu apea na lain, markuliling-kuliling di kobun apea i, adong do dua jom lolot na.

Salose mangguris, kehe ia mulak tu lombang mangaligin cangkah parpikek nia i. Inda dao sian batang ni mapaolom i, i tatap-tatap ia sanga madung adong amporik na masuk tu cangkah i. Bo, rupana jeges rasoki nia sadari i, adong sada amporik ambaroba na masuk tu cangkah parpikek i. Bulus i lojong ia tu batang ni marapolom an, tolap tu si manaek muse ia maripas-ipas tu gincat manopotkon cangkah parpikek nai taon di dangka na patolu on. Sampe tu lambung ni cangkah, na sonang mada nida roa nia paida-ida amporik ambaroba na dapot on, rupana boru-boru, madabu tama tu amporik pamikek nia jantan. Hatiha get mambuat cangkah parpikek i, i bege ia sora ni alak di bondar saba i, tarpaida ma di sia sada dadaboru dompak maridi mangusa-usa pamatang na. "Alale, na jeges boti na bontar mantong boru-boru na maridi i", mandok di bagasan roa nia. Sasaulak dorsik taroktok nia boti mangkat-angkat dongan simagodang na hatiha boru-boru na dompak maridi i mangusa-usa arumpang dohot kihik na, sasaulak marbukak muse otik-otik salin maridi nai pake ni boru-boru i. Indabe da, humotar doma pat nia. Bope songon i, mata nia leng na totop manatap-natap boru-boru na maridi i. Ro di bagasan roa nia: "Anggo induk ni tataringku da songoni tamana, na sonang mada ngolu on, padiar pe marmate-mate karejo tu saba dohot tu kobun sasadari u taonkon do i". Inda be na diingot nia be amporik dohot cangkah nia i, marangan-angan do ma ia tu dia-dia patunda bagak ni boru-boru na dompak maridi i, lale pangaroai nia, marrarat-rarat tu jae-julu.

Inda binoto-binoto tarbege sora: "pak .... rabaaaaaassssss ... buuurrrrrrrrrrr ...." matipul dangka parjongjongan ni si Katoid i torus madabu muse ia tu bondar saba i, pas tu jolo ni boru-boru na dompak maridi i. "Aaaaaaaaauuuuuuuuuuuuuuuuuuuuuu" manyongkir boru-boru i. Arani panyongkir ni boru-boru on, bulus marlojongan alak na dompak marbabo di saba i tu bondar saba an. Di bondar sabai i, ida alai induk ni tataring ni si Jatorkis tangis tarilu-ilu, i lambung nai si Katoid bajuna maek-maek, pamatang na leng payak inda bisana jongjong arani ancitna na madabu i sian dangka ni marapolom i tu bondar saba i.

"Aha na mangua?" ning alak parsaba i. Anggo boru-boru i leng tangis sajo dope, inda haruar obar na. Si Katoid pe antong sip juo, mur mabiar boti ila na roana paida-ida alak na bahat i. Dua alak mijur tu bondar saba i, i angkat kalai si Katoid tu ginjang, torus i oban kalai tu sopo na donok sian bondar saba i. Dungi i painum kalai antong, baru ma si Katoid marcarito bahaso ia madabu sian marapolom arani dangkana masopak hatiha ia get mambuat cangkah pikek na i taon nia di marapolom i.

Mambege obar ni si Katoid i, sada-dua alak na adong di si mikim-mikim, oni adong juo antong na mantata-tata, matukakkak-matukikkik. Sadebana muse mandok di bagasan roa: "Angkentong, angkon na marpikek di lambung ni tapian ni dadaboru, toskon bayo na oto!!!"

Boa-boa

Bulan Ramadhan bulan na Mulio, di bulan Ramadhan ma bulan-bulan na u lewati sapanjang ngolungku na bahat kenangan manis dot paet naso tarlupahon sapanjang maso. Antara cobaan dot ujian na dilehen Tuhan tai, songoni juo Ramadhan sataonon torus tu Ari Rayo, usompatkon juo manggambar baen ligi-ligion molo malungun songoni juo ligi-ligion ni dongan-dongan na mampir di blog on :

Marposen kahanggi i si Irpan, molo tu Pasar Panyabungan tolong jolo gambar kakak Taing Tumpat dompak manggadis Toge ningia tu au. Madung ujalak-jalaki inda pasuo, rupana marsapa au di halak madung mulak harana nacopatan habis jagal nia, jam opat ma antong au ro tu pasar manjalak-jalai parbuko.

Manjalak-jalaki parbuko

Manjalak-jalaki baju na baru di Lante dua Pasar Baru

Ube Otang (Pusuk ni Hotang)

Mangalame ma hita soni sanga sajiana

Mangalomang bage olope na lima tumba maia

Rap Mangan doma da, gorarna pe antong na mar-Ari Rayo

Baen Bo Salin mu Pareban, So maridi ita di Aek Ngali on

"On pe antong Ari Rayo ma gorarna on" ning pareban na ro sian ranto

Di Toru Ni Kofi-kofi Ih

Si Ali Musin, katurunan Mandailing na tinggal di Pakanbaru na dung bangkang marbahasa hita harana baen onokna di ranto. Namun jaru songoni anggo si matobangna leng porsaya an do pasikola si Ali Musin di Madina (Mandailing Natal) harana bope bahat Pasantren di Pakanbaru, tai inda songon di Madina sosot di parsiajaranna, muloi sian Kitab Kuning sampe tu Tasauf. Jadi imada sobobna so ipasikola simatobang nia si Ali Musin di sada Pasantren di Madina (inda tola sidokon sanga di Pasantren jia). Si Ali Musin on gorarna do nasikola di Pasantren Madina, harana tardokon do halai halak namaradong do, jadi inda na dohot ia namar Gubuk Derita di Sikola i, tai tinggal si Ali Musin Kost dibagas ni halak si Misbah di kampung i, na donok muse Pasantren i. Sannari si Ali Musin madung kalas lima, jadi inda onok be nagiot tammat muse ma.

Marayak puasoi mulak ma si Ali Musin tu Pakanbaru harana Sikola pe madung tempo, tai boto naboratan do langka si Ali Musin on naget mulaki. Rupana inda binoto, na manaksir muse do si Ali Musin on tu si Mibah boru ni panompangan niai nadung kalas opat muse di Pasantren i. Mulo-mulo marsisirikan, habis i mar sitatapan, dungi mar sigoritan, pala dung rap marsisonggakan (inda ba sianyang dei) pokokna pas songon logui. Ibuka buku Tarekh taringot mikim si Misbah, ibuka buku Bahasa Arab tarida muse pangambe si Misbah. Soni ma torus ari tu ari muloi sian sataon nalewat sampe tu sadarion. Bo rupa, cinta si Ali Musin inda na martopap sabariba tangan, buktina isambut si Misbah muse do Cinta si Ali Musin olope antong inda torang-torangan harana mabiar ia di umak nia pala tarboto. Jadi na giot mulaki pe wajar ma antong na sangat borat ilala si Ali Musin, tai bia baenon, simatobang nia pe madung malungun di Pakanbaru, tarpaksa juo ia mulak lao mar Ari Rayo di Pakanbaru painte so masuk mulak sikola.

Tolubolas ari ari rayo, ro muse ma mulak si Ali Musin tu Mandailing harana masuk muse ma sikola lima bolas ari ari rayo. Dung lalu tu bagas panompangan niai, dung mambori solom masuk ma si Ali Musin torus manjalang umak si Misbah dot ayah nia. "Minta maaf Ali segala kesalahan ya etek" ning si Ali Musin lao manjalang. "Iya, ibuk maabkannya kau, tai antong homupe soni juo, manombo ida homuma etekmu naparjolo do matubekbek pado marsapa" ning umak si Misbah mar bahasa Malayu namarpasir. Songon namanjalak-jalaki mata si Ali Musin, mmmm... ise muse dope anggo inda si Misbah, inda adong tarida dibagasi. Songon namangarti umak si Misibah "Pigi si Misbah ke Horja, yang rumahnya disebelah bendar itu" ningia muse mur mar pasir, adong muse dei roa nia bahasa ni bondar jadi bendar.

Jam tolu potang roma si Misbah tu bagas, inda tanggung be ilala si Ali Musin sonangna dung ijalang si Misbah ia, get mangalumpat doma ia tu parapi, untungma isi umak si Misbah. "Sonjia doma roai pasangna?", ning roa ni si Ali Musin sajo ibagasan. Iontang le marmayam, ampot inda ipatola umak nia, lagi jia mai antong marmayam pokir dot patayat apalagi tu Aek Sijorni atope tu Aek Godang apalagi tu Dano Marambe, aha muse non ning halak.

Pikir punya pikir ari pe mur potang, leng mar sitatapan ma halai nadua songoni lao mangan kue ari rayo muloi sian alame na dung mapak, pake sirup muse, dor tamba minum. Inda dapot jiba sanga namanguas sanga na male, tarsargut si Ali Musin bage doma jari nia, atiha mangan kue kombang loyang.

Dung siap sumbayang Maghorib, leng juguk ma si Ali Musin di kamar niai marpikir-pikir sanga songondia carana so bisa mangecek padua-dua, harana molo ibagas dor ijagoi umak si Misbah sajo halai. Akhirna dapot ia juo akal, "ehmmmmm....." ning si Ali Musin ngon kamar niai. "mmmm" ning si Misbah muse ngon kamar sabolah. Muloi mai si Ali Musin manarik sora namangaji pas songon atiha ia dohot Tilawah opat bulan nalewat. "Rooo mahooo naaaron adiqqq tutooooooruuuuu ni koooofi kofi iiihhhhhhh" ning si Ali Musin sajo ma ngon kamar pas songon sora ni halak namangaji atiha Tilawah. Mulo-mulo palan-palan sian Bayati akhirna mur magogo sampe tu Jawabuljawab. Bo rupa mangarti langsung si Misbah, ipasang ia muse songon namangaji ngon kamar niai. "Rooooo manon au abanggggkkuuuuu tu toooooruuuuu niiii kooofi-kofi iihhhhhh" ning sora si Misbah muse sian kamar niai pas muse songon sora ni halak namangaji.

"Nasonting antong anggo sora si Alimusin pala mangaji tie, pantasma so dapot ia juara sada pala Tilawah" ning ayah si Misbah mandok umak si Misbah.

"Si Misbah pe ba tagido sora nai, tar ihutkon ia muse do antong kaji si Ali Musin olope na marlain kalas halai" ning umak si Misbah muse mangalus.

Inda sajia onok mijur ma si Ali Musin sian bagas, alasan nia get ke Sumbayang Isya tu Masojid. Si Misbah pe ke musema tu toru, anggo pandok nia get kehe mulak mangaligi namarnasyid di Horja an padahal na pasuo do halai nadua di toru ni kopi-kopi an.

Untungna ma kehe umak si Misbah tu Aek Singolot giot Qodho Hajat lao manjawek.... "haaaa... kan matardokon au lalu tempat nai" ning udak Rakhmat adop au lao patorus carito. Di tonga dalan di toru ni kopi-kopi tarpaida ma disia dua sejoli nadompak juguk mambalakangi ia marsitiopan tangan (khusus 17 tahun ke atas). "Oooooo.... on do rupa nai toru ni kofi-kofi i tie, pacopat mulaaaaak!!!!!!" ning umak si Misbah manyonggak dohot-dohotan muse mandokon kofi-kofi songon na marbahasa Arab, marroan doma ombar banjar ni alai i mangaligi sanga aha namangua.

"Dung ni udak?" ning ku

"Dua taon dung i, inda mar etek si Alimusin be tu umak si Misbah, tai mar Nantulang doma" ning udak Rahmat manutup carito.