Silalat di Angkola,
Bulung Gadung di Mandailing
Ulang marmayam amang di na sikola
Anggo gara-gara ni bujing-bujing



Senin, 27 Oktober 2008

Dalan Kuliling Pasar Kotanopan

"Tolu do salubang boluton!" ning nenek namarjagal bolut di lambung tangga arah tu Partenisan i di Pasar Kotanopan.
"Ape bo, marroan ma tuson, aruting namura-mura" ning si Pardomuan muse ngon siborang dalan, dijolo ni Pajak Daging i.
"Nabo inang, jomudo arutingon" ning si Pardomuan lao maniop aruting i dot dua tangan nia.
"Namenek-menekan do uida!" ning inang-inang namarlewatan i manjawab.
"Adong do ison!" ning ama-ama muse lao manabusi kantang di sabolah nia.
"Nga giot kalak dai aruting na mate" ning poso-poso muse ngon samping.
"Borang doho antong roangku ipar, mangan gulaen namangolu" ning si Pardomuan mangalus (padahal iape inda nai boto nia sanga songon jia borang).
"Na bo ale anggi, aruting on" ningia muse mandok bujing-bujing na mamolus ngon jolo nia.
"Wawww, piga sada?" ning bujing-bujing i lao kehe.
"Anggo sada, leng sada" ning si Pardomuan dohot-dohotan margiri.
.....
Inda sadia onok roma bujing-bujing na lagak sada-sadana, lewat tingon jolo ni parjagalan si Pardomuan i.
"Ho ale anggi, inda jo aruting on?" ning si Pardomuan.
"Sajia mai argana?" ning bujing-bujing i mulak marsapa.
"Lima pulu pala sada, tolu saratus, pitu dua ratus, dua ribu lima ratus sudena, dua ribu pitu ratus dot karanjang nai, tolu ribu dua ratus dohot kalak nai" ning si Pardomuan lao marsianyang.
"Godangan arga ni gulaen pado halak nai?" ning bujing-bujing i marsianyang
"Alaaa, anggo alak nai umpe laku madung syukur mai" ning si Pardomuan muloi mangarayu.
"On ma sudena bo, sajia mon abang?" ning bujing-bujing i muse lao patidaon aruting nadung di pili-i nia nagodang-godang nai markisar pitu ihur.
"Sanga sajia pangalehenmu ma soni, na ponting dokon gorarmu, ijia kampungmu!" ning si Pardomuan asok, tai tarbege. Ngana itabusi nia antong aruting i, baen na mambuka tobat na tinggal do ia di Paya Bayuon dung siap mangguris, rupana bahat disi aruting na manyarsar.
"Purnama abang, kampung nami di Muara Kais, abang ise gorarna?" ning bujing-bujing i muse balik marsapa lao patibal epeng tukaran lima ratus.
"Au Purdomuan, kampung nami Hutabariba, nangkon bayari be, ro au tu Muara Kais dung poken da!" ning si Pardomuan
"Ro ma abang, adong dope dibagas kue ari rayo, tarimo kasi da abang" ning si Purnama muse mangkuling lao jongjong torus ke.
.....
Tar tolu ari dung ni, roma antong si Pardomuan tu Muara Kais marmayam tu bagas ni halak si Purnama.
"Assalamu 'Alaikum!" ning si Pardomuan ma lao masuk.
"Alaikum Salam, bo, nangon jia do hutanta, ahado nangkin maksudna, masuk ma jolo!" ning umak si Purnama
"Na ngon Hutabariba nanguda, gorarku Pardomuan, na sakadar marmayam do au toson, poken nalewat pasuo au dot boru muyu di Kotanopan" ning si Pardomuan mangalus lao juguk di karosi na adong di ruar.
"Boo, juguk ma jolo songoni, so u pio si Purnama!" ning umak si Purnama lao kehe tu dapur.
Inda sajia onok, roma antong si Purnama maroban tes iginjang ni Talam dohot alame nadung mapak baen onokna dung Ari Rayo. Bolnang doma mata si Pardomuan mangaligi si Purnama baen degesna, rupana baen na marjilbab do poken i so inda tangkas ida si Pardomuan parrupona. Rupana baya nasangat lagak na, obukna get manyerep doma baen lanjangnya, alakna ama na bontar, lampas muse, marbaju kurung dope, mar rok panjang, mar losung pipi hurum nai pala mikim. Hodokan si Pardomuan mangaligina, padahal na musim parudan do. "Nangkon ipainte-inte be, idokon masoni langsung maksud niba" ning roa nia sajo ma dibagasan.
.....
Markisar satonga jom, ro musema ayah si Purnama tingon lopo, tarpaida disia adong tamu dibagasi. Dung marsisoloman, ipatandaon si Pardomuan ma iba nia, boti idokon ia muse ma maksud nia.
"Sonon do dabo uda, maksud ku tu son sugari na giot padomu Hutabariba do dohot Muara Kais on" ning si Pardomuan purak-purak mar istilah boti manggoma-goma pat nia lao mayingkat pat ni saraor nia. Rupana tarpaida di ayah si Purnama bitis ni si Pardomuan nalicin do inda marabong.
"Bo, inda sala dai amang, anggo ido sudena si Purnama dei kuncina, cuma hami simatobangna on antong sugari bisa, ulang malarat boru nami on cogot aduan songon hami on be" ning simatobang si Purnama mangalus.
"Maksud ni Uda i?" ning si Pardomuan
"Huida bitis muyu nangkin, hurang do ulala porsayana harana hurang mangizinkon do uida" ning ayah si Purnama.
.....
Heran si Pardomuan sanga aha maksud ni ayah si Purnama i, akhirna dung siap minum, mijurma ia ngon bagas ni halak si Purnama i dohot parasaan na kecewa. Ditongandalan pasuo ia dohot sada ompung-ompung najuguk di topi ni bondar, marsapa ma si Pardomuan.
"Idokon ayah si Purnama, hurang porsaya ia di au harana ningia ida ia bitisku inda mangizinkon ompung" ning si Pardomuan.
"Ligi ma huida antong bitismu anggi" ning ompung-ompungi antong.
Isingkat si Pardomuan saraor panjang nia, martata antong ompung-ompung i.
"Aso martata ompung?" ning si Pardomuan
"Bitismu dabo anggi inda marabong, jadi madung pasti mai karejomu tukang guris, mangkapistak aek ni apeai tu patmu, igosok ko dot sabut pala maridi, marmelaan abong nai, harana pala mangguris polan ni apeami tu toru pat saraormu mei tu ginjang" ning ompungi adop si Pardomuan mur magogo tata na.
"Jadi angkon na sonjia do giot ni ayah si Purnama ompung?" ning si Pardomuan
"Boo, sugari antong marabong ma bitismu, harana pala namarabong do antong bitismu dot patmu, bararti pegawe ma ho i" ning ompung i mangalusi.
.....
"Ho, marabong do bitismu anggi?" ning ompung Jamarsuan muse adop si Tangguli lao jongjong ngon lopo i.
"Inda marabong ompung, inda na bisa muse on mambuat boru tu Muara Kais" ning si Tangguli mangalus.

6 komentar:

nastiti_nastiti mengatakan...

Ooo ale kahanggi... Aso inda marsapa jolo si Pardomuan sanga aha do marga ni Purnama ampit namar iboto do alai... ato.. on ma sada gambaran bahaso kawin samarga inda be jadi pantangan di ita..... tarimokasi da kahanggi....

Fadhly Abadan Syakuro Nasution mengatakan...

He..he..he

Peto mada kahanggi nami, kadang dabo get utulis dei, cuma inda suman ilala manulis marga di son, ampot adong tongkin nai na tarsungging, eh tarsinggung...
Tarimo kasi godang2 komentar muyu, ami partibangkon pe mulak, molo kira2 bisa ita tampilkon, Wassalam

nastiti_nastiti mengatakan...

Ass...
Anggo sabotulna .. nga porlu tarsinggung anggo maslah na songonon, sebagai gambaranna, au kahanggi, kabotulan sam marga do ami dohot umak di daganak, dan pala di ranto ni alakon, selalu do isapai alak aha do anso bisa kawin na sa marga,, dan selalu ujawab bahaso di hami alak mandailing, na ponting syah secara agama madung mei... anggo inda masolkot tu parkoumannai tola dei ningku.... Pala inda sala au kahanggi,, sannari hamu dompak di Pekanbaru, didiana do hamu di pekanbaru ? au pe di Pekanbaru do au di Jl. Setia Budhi...
Tks Wass...

Fadhly Abadan Syakuro Nasution mengatakan...

Wa 'Alaikum Salam WW

Olo mada, pandok ni Jamarombus :
Ra dei Botol Magulang
Ra dei Iboto Jadi Boru Tulang
.....
Malapat bulung ni Bonto
Dibagasan Tobat di Tonga Harangan
Di Adat do antong Namariboto
Anggo di Agama tola Marsibuatan
..... naponting antong ulang iboto na donok.
.....
Olo Dompak di Pakanbaru mada, lehen hamu jolo alamat ni email, so u email alamnatku.
Wassalam

nastiti_nastiti mengatakan...

Kahanggi.. email kamu ma alamat munu tu fatahnas@gmail.com nga binoto bisa hita mar silaturrahmi...

Wass..

Fadhly Abadan Syakuro Nasution mengatakan...

Olo kahanggi nami, madung u-email tu email muyu, Salam

Bulunggadung Mandailing, O Tano Hasorangan, Tano Hatubuan, Inganan Parmayaman, Lubuk Parkatimbungan, Sian Ranjo Batu Santak Tu Sihepeng, Tano Nagambur Nanapu, Ingkon Mulak do au pala marhepeng..... alaleee bayaaa...