MARSIMOHOPAN

MARADOPKON KOUM SISOLKOT SASUDENA, HAMI MANGUCAPKON :

SELAMAT HARI RAYA IDUL FITRI 1433 H

MOHON MAAF LAHIR DAN BATHIN

Marhaban Ya Ramadhan 1433 H

Assalamu 'Alaikum WW,

Maradopkon mora, kahanggi, boti tu barisan ni anak boru....

Sadarion, markatepatan ma ari Kamis, tanggal 29 Sya'ban 1433 H ato 19 Juli 2012, jadi pala inda adong halanganna Incogot sanga Aduan, Insya Allah masuk muse ma ita tu bulan Ramadhan. Jadi sondia kabiasoan di halak kita, soni dohot tuntutan ni Ugama, diwajibkon ma dihita marsilaturrahmi soni marsimohopan mandonokkon bulan puaso. Jadi Hami pe sebagai Admin ni Blog on mangucapkon juo :

MARHABAN YA RAMADHAN 1433 H

Mohon Maaf Lahir dot Bathin

Semoga Amal Ibadahta sasudena ditarimo Allah SWT,

boti mudah-mudahan Allah SWT menjadion kita jadi ummat na mar Takwa

Amin Ya Arhamarrohimin

FAS Nasution

Nomor Dua

Ari madung kira-kira pukul lima potang, Jamanombeng na lao ro dope tingon lopo sian pukul dua i. Dung do mulak mangguris nangkin, na i pas-pas nia ma marburas dilopoan, taru na induk ni api nia do na marbabo disabaan sada-sadasa. Padohal nangkin pandokon nia tongkin do ia di huta, hum na minum kopi paet do mar dua tolun cirup. Bo jiana dei, angke topek muse dilopi nangking si Jamanggoyang, bo diamai angkan na sude carito. Muloi sian carito ni same, mur rarat tu carito ni pupuk, rarat muse tu carito ni negara. Taru sude doma get i urus kalai na dua, padohal eme nadung pot-potan, bondar naso maraek, ngana iboto halai nadua be.

Ben na tarahim doma Jasobar sian masojid so sodar Jamanombeng nadung potang ari.

"Au Parjolo ma au da pareban" ning Jamanombeng lao manggarari kopi paet nia di parlopoi.

"Olo, au pe ro ma au on" ning Jamanggoyang muse lao mamio Jamangambe nampuna lopo.

"Tulis komu jolo jau da, patop majolo dot dongan nai, ari Jumahat domai pala dung sidung mandaek" ningia muse lao jongjong torus manjalai solop nia sabariba, rupana madung isarat-sarat anak ni uting tu sudutan, roangku muap aso-aso ilala anak ni uting i.

Dung lalu tu bagas, pasuo ma Jamanombeng dohot si Palnat, anak nia nagodangna.

"Madung ijia anggimu si Bingkas?" ning Jamanombeng marsapa

"Inda uboto ba ayah, pot non marmayam koje i parik-parikan" ning si Palnat mangalusi simatobang nia.

"Kei pio dok na udokon, ho madung sumbayang maho?" ning Jamanombeng muse manyuru taro marsapa.

"Olo ayah ujalaki pe, au hum nasidung dope sumbayang" ning si Palnat antong mangalus.

Inda sadia onok tong roma si Bingkas dot si Palnat, madung marsalutap bustak boti madung gok koje itangan nai rupana monang martembak-tembak.

"Aso do langa haor sajo ho, inda iboto ho napotang ma ari, madung sumbayang maho?" ning Jamanombeng mandok si Bingkas.

"Anggo sumbayang antong ayah nomor dua dei" ning si Bingkas mandok ayah nia.

Bo... gur-gur mudar ni Jamanombeng mambegesa,

"Mangua ning babamu, lojana au pagodang-godang ko, pasikola ho, malo maho mandokonna sumbayang nomor dua?" ning Jamanombeng buncilak mata nai adop si Bingkas.

"Nomor dua doba ayahi, Syahadat dei nomor sada" ning si Bingkas lao manarikkon abit sumbayang torus marlojong tu masojid.

Sip Polngit boto hamu Jamanombeng mambege pangalus ni anak niai, sidung i mikim-mikim ia sasada ia. "Olo ba tile, zakat nomor tolu, puaso nomor opat, naik haji nomor lima" ningia dibagasan roa nia.
"Ayah madung sumbayang ma langa?" ning si Palnat mandok simatobang nia namarangan-angan mamatai si Bingkas namarlojong tu masojid.

"Ah, au antong na tobang mau, homu do dabo naporluna" ning Jamanombeng muse mandok si Palnat.

"Ben na dung tobangi mantong ayah so porluan ayah sumbayang sampado ami" ning si Panat muse songon namanggurui simatobang nia.

"Ah, nabahat na ibotomu" ning Jamanombeng lao manjalaki marikin torus kehe muse tu masojid lao sumbayang Ashar.

Sampilulut Sambiroto

Ilombang nai hayu bania

Aso mantong inda hona paoto-oto

Angke pintaran kalak sampado iba

***