Di Toru Ni Kofi-kofi Ih

Si Ali Musin, katurunan Mandailing na tinggal di Pakanbaru na dung bangkang marbahasa hita harana baen onokna di ranto. Namun jaru songoni anggo si matobangna leng porsaya an do pasikola si Ali Musin di Madina (Mandailing Natal) harana bope bahat Pasantren di Pakanbaru, tai inda songon di Madina sosot di parsiajaranna, muloi sian Kitab Kuning sampe tu Tasauf. Jadi imada sobobna so ipasikola simatobang nia si Ali Musin di sada Pasantren di Madina (inda tola sidokon sanga di Pasantren jia). Si Ali Musin on gorarna do nasikola di Pasantren Madina, harana tardokon do halai halak namaradong do, jadi inda na dohot ia namar Gubuk Derita di Sikola i, tai tinggal si Ali Musin Kost dibagas ni halak si Misbah di kampung i, na donok muse Pasantren i. Sannari si Ali Musin madung kalas lima, jadi inda onok be nagiot tammat muse ma.

Marayak puasoi mulak ma si Ali Musin tu Pakanbaru harana Sikola pe madung tempo, tai boto naboratan do langka si Ali Musin on naget mulaki. Rupana inda binoto, na manaksir muse do si Ali Musin on tu si Mibah boru ni panompangan niai nadung kalas opat muse di Pasantren i. Mulo-mulo marsisirikan, habis i mar sitatapan, dungi mar sigoritan, pala dung rap marsisonggakan (inda ba sianyang dei) pokokna pas songon logui. Ibuka buku Tarekh taringot mikim si Misbah, ibuka buku Bahasa Arab tarida muse pangambe si Misbah. Soni ma torus ari tu ari muloi sian sataon nalewat sampe tu sadarion. Bo rupa, cinta si Ali Musin inda na martopap sabariba tangan, buktina isambut si Misbah muse do Cinta si Ali Musin olope antong inda torang-torangan harana mabiar ia di umak nia pala tarboto. Jadi na giot mulaki pe wajar ma antong na sangat borat ilala si Ali Musin, tai bia baenon, simatobang nia pe madung malungun di Pakanbaru, tarpaksa juo ia mulak lao mar Ari Rayo di Pakanbaru painte so masuk mulak sikola.

Tolubolas ari ari rayo, ro muse ma mulak si Ali Musin tu Mandailing harana masuk muse ma sikola lima bolas ari ari rayo. Dung lalu tu bagas panompangan niai, dung mambori solom masuk ma si Ali Musin torus manjalang umak si Misbah dot ayah nia. "Minta maaf Ali segala kesalahan ya etek" ning si Ali Musin lao manjalang. "Iya, ibuk maabkannya kau, tai antong homupe soni juo, manombo ida homuma etekmu naparjolo do matubekbek pado marsapa" ning umak si Misbah mar bahasa Malayu namarpasir. Songon namanjalak-jalaki mata si Ali Musin, mmmm... ise muse dope anggo inda si Misbah, inda adong tarida dibagasi. Songon namangarti umak si Misibah "Pigi si Misbah ke Horja, yang rumahnya disebelah bendar itu" ningia muse mur mar pasir, adong muse dei roa nia bahasa ni bondar jadi bendar.

Jam tolu potang roma si Misbah tu bagas, inda tanggung be ilala si Ali Musin sonangna dung ijalang si Misbah ia, get mangalumpat doma ia tu parapi, untungma isi umak si Misbah. "Sonjia doma roai pasangna?", ning roa ni si Ali Musin sajo ibagasan. Iontang le marmayam, ampot inda ipatola umak nia, lagi jia mai antong marmayam pokir dot patayat apalagi tu Aek Sijorni atope tu Aek Godang apalagi tu Dano Marambe, aha muse non ning halak.

Pikir punya pikir ari pe mur potang, leng mar sitatapan ma halai nadua songoni lao mangan kue ari rayo muloi sian alame na dung mapak, pake sirup muse, dor tamba minum. Inda dapot jiba sanga namanguas sanga na male, tarsargut si Ali Musin bage doma jari nia, atiha mangan kue kombang loyang.

Dung siap sumbayang Maghorib, leng juguk ma si Ali Musin di kamar niai marpikir-pikir sanga songondia carana so bisa mangecek padua-dua, harana molo ibagas dor ijagoi umak si Misbah sajo halai. Akhirna dapot ia juo akal, "ehmmmmm....." ning si Ali Musin ngon kamar niai. "mmmm" ning si Misbah muse ngon kamar sabolah. Muloi mai si Ali Musin manarik sora namangaji pas songon atiha ia dohot Tilawah opat bulan nalewat. "Rooo mahooo naaaron adiqqq tutooooooruuuuu ni koooofi kofi iiihhhhhhh" ning si Ali Musin sajo ma ngon kamar pas songon sora ni halak namangaji atiha Tilawah. Mulo-mulo palan-palan sian Bayati akhirna mur magogo sampe tu Jawabuljawab. Bo rupa mangarti langsung si Misbah, ipasang ia muse songon namangaji ngon kamar niai. "Rooooo manon au abanggggkkuuuuu tu toooooruuuuu niiii kooofi-kofi iihhhhhh" ning sora si Misbah muse sian kamar niai pas muse songon sora ni halak namangaji.

"Nasonting antong anggo sora si Alimusin pala mangaji tie, pantasma so dapot ia juara sada pala Tilawah" ning ayah si Misbah mandok umak si Misbah.

"Si Misbah pe ba tagido sora nai, tar ihutkon ia muse do antong kaji si Ali Musin olope na marlain kalas halai" ning umak si Misbah muse mangalus.

Inda sajia onok mijur ma si Ali Musin sian bagas, alasan nia get ke Sumbayang Isya tu Masojid. Si Misbah pe ke musema tu toru, anggo pandok nia get kehe mulak mangaligi namarnasyid di Horja an padahal na pasuo do halai nadua di toru ni kopi-kopi an.

Untungna ma kehe umak si Misbah tu Aek Singolot giot Qodho Hajat lao manjawek.... "haaaa... kan matardokon au lalu tempat nai" ning udak Rakhmat adop au lao patorus carito. Di tonga dalan di toru ni kopi-kopi tarpaida ma disia dua sejoli nadompak juguk mambalakangi ia marsitiopan tangan (khusus 17 tahun ke atas). "Oooooo.... on do rupa nai toru ni kofi-kofi i tie, pacopat mulaaaaak!!!!!!" ning umak si Misbah manyonggak dohot-dohotan muse mandokon kofi-kofi songon na marbahasa Arab, marroan doma ombar banjar ni alai i mangaligi sanga aha namangua.

"Dung ni udak?" ning ku

"Dua taon dung i, inda mar etek si Alimusin be tu umak si Misbah, tai mar Nantulang doma" ning udak Rahmat manutup carito.