Na Muapan Do Ulala

"Pala sompat ko non kei jolo tu sabantan da, simprot jolo emei, ro au non parpudi, palalu tabusi ubat na non di lopo ni alak si Porngasan!", ning ompung Jamanduda mandok si Bundong di lopo na di topi dalanan disada maso manyogot-nyogot.

"Jiarma ompung, mangan jolo satongkin tu bagas, so marangkat au!" alus si Bundong lao manggarari kopi nia salao kaluar sian lopoi.

Dung salose mangan, ibuat si Bundong simprot, ibuat ia muse epeng, torus marangkat tu lopo ni alak si Porngas manabusi ubat ni eme, soni sigaret sabungkus.

Di hutai dabo sangajo si Bundong sajo mai na dodasna isuru-suru halak pala adong karejo natarborat, imaia i pangomoan nia, muloi sian manajak, manaru eme, manyangkul, manyimprot dot na asing-asing na. Si Bundong on halakna na togos, songoni na ringgas, ima so jopna roa ni halak manyuru ibana.

Taringot di Ompung Jamanduda, ibana on dung lobi ma opat taon nadung bariba tangan do, tai sondia hangoluan di namar kampung, angkon na leng markais juo do baya so bisa manuduk. Jadi biarpe nadung tobang ompungon, leng na marsaba juo dope soni tu na mangguris. Tarlobi-lobi muse saba dot gurisonna nadaon sian hutai.

Jadi imada, marangkat juo si Bundong maroban pompa soni ubat ni eme, marpalan-palan manangkok, manuat, mangarereng tu saba ni Ompung Jamanduda an. Mulbas kodok si Bundong satangandalan dope pardalanan, natangkok pe simulak anjing, rupana tangkokan dope dalan tu saba ni ompungi, tai bia bahenon, madung di olo'on nangkin, tarpaksa juo marangkat.

Markisar dua jom, lalu ma si Bundong tu saba ni Ompung Jamanduda, maradian 'ntong si Bundong di sopoi marongok satongkin baen lojana didalan. Siap mangidup sabatang, muloi ma manyimprot eme si Bundong di sabai. Habis satonga teng (tangki), inda tahan be ilala si bundong lojana, kasidunganna dapot ia akal. Iboja-boja ia sabai so pas songon nabaru karejo manyimprot, siap dung i, isimprot si Bundong dinding ni sopoi ni ompung Jamanduda i, baru i puntoling ia modom painte-inte ro umpungi sian huta. Mungkor dot merdet doma ijur bari nia di las ni ari i baen sinok ni namodom, sampe inda sodar ia madung kotu ari.

Inda sadia onok tong roma ompung Jamanduda tusabaan, tarida disia madung modom si Bundong di pantil-pantil ni sopoi, torus ingoti ia:

"Madung siap do nanga simproton i mang?"

"Madung ompung"

"Bo, na isar doho manyimprot tie?"

"Uompot nangkin ompung, dompak so las ari i"

"Ooo, imada, naisar ulala, ubatna pe nadegesan roangku, namuapan do ulala torus tu sopo on".

Aso'ntong nga muap, angke isimprot si Bundong sopo ni ompungi, hum naget paoto-oto'on halak sajo, apalagi sonon, ompung-ompung, ulang dongan ita tiru on.