Najolo ni narobi, dompak daganak dope iba, pala gule bulunggadung ma ibaen dainang dongan ni indahan, namarsak mai roa niba mangan.
"Alaaaaaa, madung bulunggadung muse antong i baen umak" na ningiba mai.
"Imaia na adong, pala get mangan natabo ho, kei jalaki tu batanggadisan, oban tuson so upamasak" ning dainang muse antong mangalusisa.
Muda hupikir-pikir sannari sangajo peto do dabo ale baya na idokon ni dainang i, anggo adong do i baluang i garing sanga lelan, bo jiama igule dainang i antong bulunggadung. Apalagi dung songonon iba pe matobang ma, taraso juo ma ilala songon na irasoan ni dainang i najolo. Caritona atiha dompak tinggal di Padang hami na jolo taon 90an i, dor mai ipamasak inang ni daganaki gulaen laut harana i maia na momona disi guleon (baen na itopi ni laut i).
"Gulaen sajo, gulaen sajo, inda mangan au" ning anakta siangkaan mai
"Ahado jo so mangan ko?" ning inang ni daganak marsapa songon na holas
"Bulunggadung na iduda do jau" ning daganaki muse ma mangalus
"Ijia do ijalakan ison losung pandudana?" ning inang ni daganak i muse lao manyirik au.
Walhasil i tuktuk inang ni daganak i juo bulunggadung nangkinani tu panggilingan i, dung masak, marsurak muse ma daganaki.
"Inda tabo, pake losung do pandudana" ning na muse ma.
.......
Tulisan on dongan sakadar manggonopi tulisan boti judul ni blog ta on do on, bulunggadung. Isamping ni bulunggadung na i duda, adong dope cara pamasak bulunggadung ima iompapkon.
Tu hamu ale sude inang-inang, pot songon na markurang ida hamu mangan ni amang ni daganaki, ulang dongan padiar-diar komu soni. Harana molo hurang godang jomakna, hurang muse mai naron gogona hurang muse mai angkat ni paculna. Pala hurang angkat ni paculna, alamatna angkan na marlambat mai so siap tohap i. Halak tongkin nai madung manyuan, iba na mambatangi dope, halak madung boltok emena, iba na lao manyuan dope, eme ni alak gumorsing, eme niba na boltok dope, halak siap manyabi, iba na mamuro dope. Tung-tung mai sudena amporik silopak dot lobe-lobe i tu saba ni bai, markoti mada i, inda pe balana na ro sian toru (monci) sidung mai non kaji-kaji. Paisar kamu ale inang-inang buat kamu ma aek di galas, oros tusi unik mar limangkoros, danon sanjomput, bonang sajongkal. Oban ma tu Datu Janggutan, padoahkon ma, ulang lupa nabau-bau so adong naron panulbasisa. Pala inda mampan juo non, pio hamu bidan na i lambung ni bagas i, buncilak dei non mata nia midasa. Tai ulang tinggalkon pala dompak paresona non bidani, itiopi ia muse non bidani, sae muse obaran ni halak. Harana uboto dei anggo amang ni daganaki, obuk dei namamontar, ipon dei manartaldusan, anggo parroa nalumobi dei posona. Tandona ari poken na lewat, na so unjung-unjung dei ia marsilua lopek sian pasar, mangompoti ma sakalion marsilua lopek ia dot katupek. Iambang inang ni daganak baen na mesrana rupana baya baen litakna do namarjagal lopek on.
....
Ahh dongan mur rarat ma naron on carito on.
Olope nadung rap tobang dabo, inda mangua i sasakali i ulakan mulak carito-carito najolo i, dompak martobat-tobat dohot amang ni daganak i. Pot pala tempo daganak i sikola, pala dompak pere muse karejo. Rap mar rami-rami tu sabaan, olope na manajak parsopoan non iparar mai. Papodom ma amang ni daganak i di sopoi, baen anggunanna, bue-bue ma... modom marulak-ulak maho ucoook... modom...modoooommm, balik dei antong tile. Maksudna daganak na menek nai do.
Pala dung marmodoman, get kotu ma ari, mardahan ma mar salapan takar. Painte-inte malampot, calong ma di topi durui so adong gulena non, ima bulunggadung na i ompapkon.
Bahan-bahanna :
1. Bulunggadung, pusuk-pusuk nai, ulang batang nai, muruk non amang ni daganak.
2. Torung (inda marimbar sanga torung aha) tola torung incor (torung tunjuk), torung bombom,
torung balanga (torung manggis).
3. Rimbang
4. Lasiak mar satonga kilo
5. Balanak gilingon (tutungon), pala inda dong ikan tori (macok, badar) tola juo
6. Sira
Cara pamasakna :
Pala get malampot ma indahan i, buat bulung pisang na poso sotik, baen iginjang nai. Bulunggadung, rimbang dot torung basu jolo, baen ma diginjang ni indahan i. Tutung ma balanak (arasak) gilingon i. Pipili lasiak i, torus gilingma dohot balanak nangkinani, ulang lupa manyiraina. ima na idokon i alak sambal tuktuk soro babiat.
Buat bulung pisang mar tolu hodong, paombang di tonga ni sopoi, sungkapkon indahani di tonga nai, ulang lupa pasimbah jolo bulunggadung na iompapkon nangkinani. Baen ma itopi nai dohot sambal tuktuki. Painte-inte ngali, ngoti ma amang ni daganaki, ontang sumbayang satongkin soni dohot daganaki. Dung salose non baru ma rap mangan. Pala indape kehe juo ida homu mangan amang ni daganak i, roangku dongan pade mai itulbas, boo... ampot natarsapo do dongan...
Tidak ada komentar:
Posting Komentar