Maturapak

Marayak pukul tonga lima potang-potang i, udan marimbus asok mangagohon abu na tarantongkin habang ibaen kareta angin soni dot motor namarmolusan didalan godang i. Jamandehe nabaru mulak dope tingon masojid sumbayang kotu Ashar marundung-undung anduk, maradian ia dilopo ni halak si Sungkot i manabusi sigaret Gudang Garam dua batang, nasada ipatik ia, sabatang nai antong isolotkon ia disuping nia. Mardalan ma ia torus tu sopo jago na adong di kampung i, tarpaida disia daganak namarsiajar maposo marsisio di sopo jagoi, bulus iogar ia daganak i :

"Hey daganak, aso ison kamu marlugut, inda iboto hamu langa parlugutan ni tobang-tobang do on, naposoan ma ilala ho roangku tie?"

"Painte siang do dabo udan tongkin tobang" ning daganak i antong mangalusina

"Olope na painte siang udan, inda tola marlugut dot tobang-tobang, hum danon pe ngana pe na itandai homu maposo ma ilala homu, tako madung itandai hamu ma danon?" ning Jamandehe mulakan mandok daganaki.

"Nabontar" ning si Minsor

"Iponmu pe nabontar do, danon mai ipon mu i? ning Jamandehe muse

Kasidunganna markean daganaki, tinggal sasada Jamandehe juguk disopo jago i taro leng mangarsik sigaret. Inda sadia onok marmolusan ma inang-inang opat kalak na mulak ngon saba, taro marbaris laos marcarito mangkobari halak opat-opatna, inda dong namanangion.

"Bo, naso dong do uida hamu namanangion, rap marcarito homu na opat?" ning Jamandehe laos mangkardak

"Uruskon so ro nyaemu!!!" ning umak si Mansur lao marisar-isar

Inda sadia onok siani, ro musema Jamandurung tu sopo jagoi marpayung hodong ni pisang, taro marungut-ungut songon na mandemes. Marsapa ma Jamandehe :

"Tujuia sajo do hamu nanga, inda jungada tarida?"

"Tai ale on mabo, inang ni daganak kehe mangaligi namarhorja tu balikan, janjina dua ari do disi, madung opat ari inda pe na mulak, jadi tarpaksa turun tangan tu dapur, mangajari boruntai na kalas lima SD i mardahan jana manggule".

"Bo, awas-awas komu boto dongan, anta naso mulak be alai, kan alak balikan do ning kamu adi najolo dongan nia marrosu dompak bujing-bujing?"

"Na momo ma ilala ia antongan i, aupe malo do au i, cubo mantong uida inda ro santak ari Kamis, ujalaki gontina" ning Jamandurung mur maholas.

"Taringot nai dongan, indape namalo nangan mardahan boruntai?"

"Sondia mantong malona, angkon na ijagoan dope ba torus mangajarina, harana pala itinggalkan ra do botoho manombo gule sibodak doma urangna"

"Bo aso songkoni?"

"Tai dor jadi bubur, sapala manombo madung mata mekat, manggule pe soni juo, ra do manombo lamlam, jadi tarpaksa ipainte jolo santak masak baru bisa itinggalkon" ning Jamandurung, markerut doma boi nia namarcaritoi.

"Peto do bai, molo adong boru bujing di bagas, ingkon na ijarana dei mardahan manggule, soni dot manyapsap sasudena, harana pala dung tu bagas ni alak ia incogot kaduan ulang be homang ia manjama, lagi ulang ro tongkin nai songon carito ni halak kami an" ning Jamandehe laos manyambung sigaret.

"Songon jia nanga carito nai?" ning Jamandurung

Adong ma da sada boru bujing, natopet muse boru sisada-sada, bo rupa inda dong nabinotona satontang tu namar pak-pak didapur, pondok ni caritona maringanan ma boru bujingon tu huta luar. Disada maso marun ma amangboru nia jadi porroana mangan gule pira ni itik na ibul-ibul (ulang itapor harana sar-sar manombo pala itapor), jadi idokon ia di parumaen niaon so manggule pira itik jolo, icampur dot kantang soni asang muring. Sapala naroamu, dompak margulung-gulung amangboru nia di pantar tongai tarbege ma disia sora na Maturapak sian kuali i didapur, mangambur amang boru nia mangkojarsa iambang ia sanga na mangua, sapala tarpaida disia na igule ni parmaen nia do pira ni itik i dohot lampak nai, sip songkoni amang boru nia antong. Dung ro doma anak nia sian apeaan sobaru ipatidaon ia tu anak nia gule pira itik i. Ngaroamuyu antong napaila-ilaon dei?

"Ah, anggo hum songkoni do caritona, jebuan dope najolo carito na diamianan" ning Jamandurung inda ra talu.

"Bo, songkondia museng mai jabat carito nai?" ning Jamandehe sapa-sapa.

Songoni juo mada, inda malo bujing-bujing on marmasak rupana, topek dibulan puaso atiha mambaen parbuko onde-onde. Marsak roa ni anak boru on sanga songkon dia pamasuk gulo nai tu bagasan ni onde-ondei, ijalaki i suntik-suntik, icaer ia gulo bargot i di ayan-ayan, dung masak baru isuntik anak boru on sada-sada onde-onde i dohot aek ni gulo nangkinani, padohal saudon godang onde-onde i bahatna, nga roamu antong naloja manyuntikina i?

"Ah, takik sadari dei carito mon, inda cucek pado ulkel (indo cocok pado aqal), tai taringot nai na get puaso museng ma ita on tile"

"Olo ba, siap-siap kinanma mambaen parbuko" ning Jamandurung manutup carito......