Utangion di Koran Ubaca Di Radio

Di opatAri Ari Rayo i, atiha mangan manyogot marrami-rami di dapur, mangkuling ma alak bagas Jarundut mandok anak panggoraran ni halai ima si Lindung.

"Ning roangku dabo mang, baen nadung cukup ma umurmu, harana bulan na ro pas maho marumur dua pulu onom taon, jadi madung cocok do pokat nami dohot ayahmu anggo na olo doho, ning roangku manjaki boru ma hita dabo baen di ho" ning umak si Lindung mamangkal kecek.

"Ammanggg, inda pe na giot marbagas au da umak" ning si Lindung antong mangalusisa

.

"Inda soni dabo amang, daripada manjal ko soni tujae tujulu, tongkin nai bo tarihut-ihutan muse ho dohot dongan-donganmu mangkaremuti sanga na asingna maila ita, lagi so malo ho manjalaki na tuho boti dompak poso dope ho sannari margogo" ning inang nia muse mulakan.

.

"Peto do bai na idokon ni umakmu Lian, harana anggo na manjal sajo karejo tujae tujulu, radei tongkin nai tarihut-ihutan ko tunaso pade, harana sian na ubege dikoran ubaca di radio, pangangguran i ma sada sobobna bahat halak mangalangka tu naso pade" ning Jarundut lao martambu napaopat kalina (pangabisan ni gule rondang ari rayo mantong, aso nga ke sajo). Mangkair kalai namangani antong mambege carito ni ayah niai.

"Na balik dei dabo angkang pandokon mi suang songon tot ni manuk, ubaca di koran utangion di dario do dabole katua" ning inang si Lindung muse palidang obar ni ayah si Lindung.

"Radio do dabo umak, inda dario" ning si Jenab muse palidang obar ni inang nia, mur maribur namangani.

"Peto do dabo mang, natuari boto madung ro ma koumta na manyapai si Jenab giot obanon ning kalai tu Kuala Lumpur" (Kuala Lumpur sapetona do dongan on, inda Kuala Lumpur Tombang Bustak ba). "Tai baen na hami dokon inda pe maringanan ko, jadi ima so ami dokon diho, ulang antong tongkin nai ilangkai anggimu muse ho" ning inang nia muse patorus obar.

"Pokokna inda pe nagiot marbagas au, umak ma marbagas sakali nai" ning si Lindung sumbarang dok.

"Anggo umak antong baya marbagas sanoli nai, malarat mai lalu amangmu" ning inang si Lindung lao manyirik Jarundut.

Peto do antong baya aha na didokon ni umak si Lindungi, angke anggo Jarundut do hum gorarna sajodoma na harato pucako ni alai, anggo namarkais inang si Lindung do disi. Ulang do torang ari na dung parjolo do inang si Lindung kehe tu apea mangguris, anggo Jarundut antong baya jianadei, na marpiul-piul dope ia dilopoan salao marburas. Rado do non pukul sambilan so tolap ia tuapeaan. Sidung mangguris non, inang si Lindung torus tusaba, marbabo sanga na pature batangi na dung i taraktor ni nangon durui (babi) borngini. Anggo Jarundut na dung mulak muse mai tuhuta, mardobol di lopo ni Jamarungkaman. Ra muse dei non pukul tolu so ro ia tusaba manolongi inang si Lindung.

"Ehmmm...!!!" ning Jarundut lao mambasu tangan nia namangani, nga binoto sanga baen na goyak pe roa nia sanga na tarsinggung ia sanga na peto na adong nasolot di aru-aru nia.

Pondok caritona baen na isosak ama dot inang nia sajo hampir tiop ari, ra juo do Lindung na matobang i, ima dohot boru tulang nia na sian Muara Losung. Tai boto hamu dongan muloi sian manyapaina santak tu namangkobarisa, ngana jungada dohot si Lindung. Daripada ra dohot degenan keia mangkail tu Batang Gadis, namombo borngin pe na kehe do ia marsulu dohot dongan-donganna lao marmangan-mangan di bagas podoman ni halai ima di sopo godang ni halak si Parlagutan an. Hinggo disada maso mangkuling ma ayah si Lindung tusia manyogot-nyogot, :

"Naron borngin boto mang namarikah ma, inda mungkin naso dohot ko i, ise muse dei antong manjagit nikah nai, inda mungkin au" ning Jarundut songon na holas.

"Olo ayah" ning Silindung antong mangalus lao manjungkit ipon nia lao mambongka pining kumango di tataring i.

..........