Sada Dua Tolu

Najolo baen susahna dot miskinna ita namar negaraon, pala ke tusikola inda namaroban buku tulis dot buku paket songon na sannari on i, tai maroban gerep dei dot batu tule (batu tulis), pala tar kayo alak nai dua mai batu tule na, pala na paspasan do antong sada batu tule sada muse gerep. Jadi isikolaan parsiajaran pala dung itulis batu tulei, porlu muse non manulis na asing, tarpaksa mai ibasu batu tulis i. Ima so pintar-pintarna halak najolo, harana maradu copat mangapil, pala inda copat sasa mei non batu tule i. Jadi iajaran mai disikola marlogu, songonon :

Sada dua tolu

Ningna ning gurui

Opat lima onom

Mangiut sipitui

Roma Si Salapan

Dohot Sambilan i

Gonop Ma Bilangan

Dung Ro Sapului

Kehe Tusikola

Pincuri Gerep mi

Oban ma Botolmu

Marisi Aek i

Ulang Ditijuran

Batu Tulis i

Dumenggan ma dibasu

Dot aek tawari

Atiha au sikola najolo, inda dong be batu tulis on, tai bokas-bokasna bahat dope pasuo olopentong taporan ni batu tule atope gerep namatipul. Jadi atiha au i madung kaluar buku jegang gorarna, isina 12 lambar, pala targogo iba manulisna lantas dei ngon alaman 1 torus tu balakangan. Pakean seragam pe indape adong, jadi ima pakean dibagas, imusema tu sikola (inda songon gambar nadi ginjang ba, anggo i antong daganak sannari dei TK dope sonima pakeanna). Anggo iba najolo marsaraor na matombuk, markaco mata dua dibalakang, inda muse marsolop, mancakukkon pining mei so adong naron panganon atiha main-main sikola. "Adong pe piningmu?, jia jolo saparopat e", ning si Canan mei adop au. "Inda dong be", paido isi Jenab" ningku mangalus. Ibuat si Jenab mei pining ngon saraor nia nai kobet nia dot koje bokas panyargutan muse, ....."Alaleeeeeeee capoooot" ning si Canan.