Marsipanaekan

Bo, ibo roa ni Nasadai marhasil juo doba antong Lubuk Larangani, buktina pas atiha mambuka di Ari Rayonai, rongom doma jolma marsioban jala, lukah dot durung sian huta balian. Tardokon rap marrasoki do sude, paling remis ma lopeh modal, dapot juo mamanggang gulaen di Batang Gadisan. Torang ari nai margulaen muse ma sakampung mangarsik tahalak na adong di Batanggadisan, dapot juo gulaen na bahat, marbagi sahutai sasusuk be sa rumah tangga. Sidung i hira-hira dua hari, marpokatma sude masyarakat di alaman bolak sanga tu aha do baenon epeng sian hasil ni Lubuk Larangani. Marsidok nai dokna antong halak nabahat, tai dapot juo kaputusan bahaso Satonga hasil nai ibaen ma manabusi genset so marlistrik di kampungi pinomat pala borngin, Satonga nai ibaen ma marburu.

"Marburu aha muse dei pareban, carito ni aha muse do nangkinon?" ning Jamungkor na baru masuk tu lopo ni Jamangombak i lao juguk markombang sila sareto mangangkipi karipik-karipik ni goreng pisang na adong diginjang mejai, maksud nia roangku so ulang mambayar .

"Ima so ulang ijagoan sajo ibagasan da, lalu mai tongkina nai inda ibotoho sanga aha namuba di banuaon, bo...sanga aha mantong namangganggu suan-suanan i di hutai, pala dopot antong babi dua ribu saikur, pala herek saribu, kotok lima ratus" ning Tobang Jageduk sian jugukan niai.

"Oooo, soni do caritona nangkin, palalu hamu songkoni so manangion iba, baen komu jolo kopi paet le bae sendokna" ning Jamungkor lao mangkaluarkon gulo pasir sian cakuk nia (iambang ia rongku inda marjagal gulo pasir parlopoi so ioban ia gulo nia).

"Iba'ntong muloi sian najolo angke namarburu babi maia hobi dot tape niba, jadi najop mada roa niba na adongon acara marburu" ning Jageduk lao pature juguk nia. Ari sinayan nai marangkat ma hami pitu alak tu tor Napa-napa marburu babi. Rap marsioban anjingna be songoni dot "Sinapang Tunggu Dulu" sada be (nidok sinapang 'tunggu dulu' atiha paporangan i dei najolo, tarpaksa painteon jolo harana porlu pamasuk sabut, masiu, soni kip na padohal sinapang ni Bolandai 'bren" do, idok kalak juo dei sinapang "Jojal", adong juo mandokna sinapang "Sabut" baen napake sabut ni arambiri).

Aropku dabo tarsabatang pangidupan dope hami manangkok, mangkongkong ma anjing ki git mangkojar babi, upalua antong tali nai, soni juo dongan-dongan sasudena, manyarsar ma hami di arangani mangkopungna. Aupe markolit ma di batang ni tarutung na godang, ampot non lewat sian jolongku babi i ning roangku mada. Inda sadia onok siani, tarbege ma diau maturapak ro sian dolok, rupana botulmada babi nagodang namaranak poso mangadop tu au. Sapala naroa muyu ubingkaskon sinapang inda ra bingkas, padohal babi i madung mangarah tu au sareto mangalo harana madung mabugang pambaen ni anjing nami nabahat i. Upacopat usandang sinapang, uambur tu sada batang ni ayu torus upanaek tu ginjang. Anggo babi i namartaon dope di toru painte au mijur, sapala upareso sinapang "tunggu dulu'ngki" rupana baya na so upasang dope 'kip' nai. Dung hupasang, baru utembakkon.....pangggggggg.... bingkas sinapang. Dung ni dope so tumogar kulala sotik, harana pas tartembak au ulu nai.

Tai boto hamu songon na adong kulala naganjil, muloi sian pat santak tu tangan tarlumobi indorangku songon namanyiak kulala, sapala upareso madung mabarbar sude. Heran au sasada au diginjang ni dangka i. Sapala ning roa muyu dung hu pamanat-manati rupana baya batang ni "Dap-dap" do na upanaeki, pantasma so mangkabar-bar sibukku" ning tobang Jageduk lao mandabu pat nia sabariba (rupana baen asikna namarcaritoi nangkin, madung iginjang bangku ni lopoi ma pat nia aduana).

"Aupe boto hamu, i maia i na biarna au pala markarangan" ning Jamungkor muse manyambut carito ni Tobang Jageduk i. Poken nalewat boto hamu hami pe dohot inang ni daganak najebu ma dongan. Naroha moyu, dompak asik-asik mangguris kami nadua di Laing-laing an, sapala naso binoto-binoto mangalintas babi nagodang. Baen songgotna au, uambur tu batang ni hayu, unggal hayu nai, lao magulang au tu rura an, tarbege di supingku sora na mandoik, rupana baya inang ni daganak do natarpanaek au i baen biarna, bo rap magulang kami nadua 'ntong. Dung lalu tu ruraan indape habis biarku, uambur muse tu batang ni hayu, lupa au jabat inang ni daganak, sapala naroa muyu unggal juo hayu nai, rupana baya batang ni pisang karangan (pisang si uncim) do na upanaeki...

"Anggo i antong madung carito gabus mai ubege, inda mungkin naso tarbedaon ko nadia halak bagasmu, nadia pisang karangan, nadia batang ni hayu" ning Tobang Jageduk mandok Jamungkor

"Homu pe inda mungkin na so sodar komu i manaek batang ni dap-dap" ning Jamungkor muse songon na holas

"Ah, keta le dongan namarpokaton, roma katuai i sadun bo" ning Japardamean lao haruar sian lopo ni Jamangombak i torus manyarak Jamungkor dot Jageduk nadung get marsitanganan di lopoi.