Ulang Jo, Ulang Jau

Dung sidung sumbayang Ashar, di atiha rimbusan ni udan, ro ma Jaurimbang tu bagas ni Oji Makmun paulak epeng na i solang nia dua bulan nalewat baen modal mambuka kobun lasiak.

"Assalamu 'Alaikum"....

"Wa 'Alaikum Salam, bo homu dei masuk ma jolo" ning oji Makmun mandok Jaurimbang

"Isonbo oji epeng na hami injam narobi, tarimo kasi godang-godang mada, adong ison sotik lasiak bo, pinomat pandaian" ning Jaurimbang mandok oji i.

"Bo, madung adong ma nanga, anggo na porlu dabo pake hamu majolo" ning oji i mulakan. (Ro pe antong oji on ngana tanggung dengganna, na ra sajo anggo manolong. Inda songan dongan na deba, habis manolong get manolon).

"Inda ba oji, tongkin nai tarpake iba muse, ijia porlu sangandigan ro hami mulak" ning Jaurimbang antong

"Anggo soni, roa muyu ma da" ning oji i mandok Jaurimbang

"Roangku mulak ma hami jolo oji" ning Jaurimbang lao jongjong sian jugukan niai.

"Alaaa, tongki nai mada, na ro dope udan na mangarimbus bo, painte jolo siang, non mancit muse ulu muyu"

"Umak taing, baen jolo kopi dua" ning oji mandok alak bagas ni ibana

"Olo, roma" ning alak bagas ni oji i muse tingon dapuran

Inda sadia onok tong roma kopi susu dua galas godang tu ruar soni dot 'roti basumbu' (gadung na i tutung/bolgang), merdet doma ijur ni Jaurimbang midasa, biaso antong ale dongan kopi paet do inumon nia, angkon na ari poken ma so minum kopi manis ia.

"Ape minum komu udakna, tai tar milas dope roangku bo!" ning alak bagas ni oji i mandok Jaurimbang

"Deges do lasiak i nanga sakalion, songon nabahat uida na ioban muyui, olope ningkomu pandaian, anggo ning roangku inda nahabis kami sapoken i"

"Alhamdulillah boto hamu, songon na ra uida dompak sanoli on, ibape'ntong soni maia ilala usahona dot doahna"

"Songoni doba'ntong anggo namarusaho gorarna, angkon na sareto dei dot doah, harana karejo sajo pe iba anggo na so sareto do dot doah, sombong dei gorarna"."Manombo dabo nian iba dei na so sobar, harana biarpe sanga songondia doah niba i, lolot tibuna Insya Allah i kobulkon Tuhan tai dei, baik ia doah na geduk sumurung ma antong na lidang" ning oji i lao mamatik sigaret.

"Adong dei nanga doah nageduk oji?" ning Jaurimbang marsapa

"Bo bahat dobai, songon carito i ma" ning oji i muse lao manyirup kopi susu

"Songon dia dei carito na oji?" ning Jaurimbang mur penasaran

Halak Tadolok mada dongan sa sikola najolo gorarna Jalambok, halakna malim, ringgas mar karejo, rasokina pe rondo. Pinomparnape madung adong dua bangkiang, nagodangna marumur opat taon nameknai pitu bulan dope. Tai sonimada manombo panyakit ni alak kita on, ulang do marrasoki saotik, nabat ma na nidana, ro bagema naget palanjang roa. Pendek ni caritona, usaho ni Jalambok on antong muloi ma maningkat, aha sajope ijama ibana totop do namarhasil. Madung bisa ibana pajongjong bagas, manabusi kobun songoni dot saba, tartabusi ia juo sada honda. Jadi baen na dung adong on honda antong, na jarang doma ia dibagas, doran sajo doma haor tujae tu julu. Mangan pe jarang doma dibagas, totop do namangan dilopo sajo. Hinggo disada maso tumbuk mada roa nia di boru ni par rumah makan i, nakabotulan bujing-bujing dope. Ningroangku harani sunna ia mangan disi totop sajo bujing-bujingi mangaladenisa, jadi songon na adong dosir ilala ia di ate-ate nia mida danakon. Sindokoni, rarat-rarat boti mada, sampe alai nadua mardongan saro jita, tai indape adong namambotosa. Rope antong danakon taru na olo sajo, ning roangku baen na ida niai Jalambokon halak na maradong soni nadenggan roa. Aha sajo pe ipangido danakon totop itabusi Jalambok, manombo inda pe namangido danakon madung i tabusi Jalambok parjolo.

Ita papondok carito, walhasil marbagas juo Jalambok dohot danak on, olope bahat keluarga na mangorai, tai sondia dope baenon, angke Jalambok ngana tarorai. Najebuna ibaen Jalambok muse bagasna padonok-donok dohot na tobang nai, ngada bedabe.

Dung do paduaon Jalambok, najarang doma da adong keamanan di keluarga ni ibana, tiop ari marbada, tarantongkin martongkar, tarantogkin madung eruk.

"Alak lai ni alak mai na dapot ko" ning na tobang nai

"Ia dei na giot jau, ngana manyompo au tuson" ning naposo nai muse

Jadi tontonan ni ombar balok dohot halak sakampung sajo ma halai tiop ari. Jungada mai disada ari pas sidung Jumahat Jalambok, madung gaor di alaman ni bagas nia marbadai natobang nai dohot naposo nai. Margoso ma Jalambok manyarak namarbadai on, anggo halak madung rami manonton. Sondia dei antong ibaen kalak mangoraina, angke adaboru namarbadaon, tarpaksa ma Jalambok ditonga-tonga ni namarbadai i, sahinggo sar-sar abit karung Jalambok, mur simbur kalak partatai Jalambok nadung salang-salang inda marabit, baru mantak namarbada.

Anggo sanolion sangajo huk-kek ma ilala Jalambok, jale itinggalkon natobang nai, daganak disi dua, ja itinggalkon naposo nai, inda tanggung lagakna, mari-ari poso muse sibukna. Pasma lalu songon isitilah ni natobang-tobang najolo :

Songon na Mangan Pining Sisungkot Kola

Pinangan Mate Ama

So Pinangan Mate Ina

I ulum-ulum Mate Iba

Walhasil, mangiutkon sipaingot ni tobang-tobang, soni dohot dongan sakahanggi, boti muse hatobangon, ingkon na i oban doma halak bagas nia aduana tu Mokah. Pondok ni caritona marangkat ma halai natolu kehe mangarejohon Ibadah Haji tu Tanah Suci.

Songon dia na dung i dokon ni Rosulullah SAW antong dihita sasudena bahaso ibagasan na mandoah hita tu Tuhan adong na idokon waktu-waktu makbul, adong muse na didokon tempat na makbul. Nadidokon waktu makbul mandoah antong ima sepertiga malam pala dibagasan ni sadari saborngin, Ari Jumahat ibagasan ni sapoken khususna pala diantara ni dua katubah, bulan Romadhon di bagasan ni sataon. Pala na didokon tempat-tempat na makbul antong molo dihitaon tarutamo ma antong masojid, apalagi di Masjidil Harom di Mokah, sanga Masjidinnabawi di Madinah, atope Masjidil Aqsho di Palestina.

Jadi imada mur hita papendek carito, rap kehe ma halai natolu mangkarejohon Ibadah Haji tu Mokah, dung siap Tawaf di Masjidil Harom rap mandoah ma halai natolu (rap dibagasan roha ni halai), diantara ni doah ni halai ima :

Jalambok : "O Tuhanku lehen ma diau hasanah (kebaikan)"

Natobang Nai : "O Tuhanku, gorakkon tu roa ni alak laingkon so isirangkon ia alongkon (naposo nai)"

Naposonai : "O Tuhanku, gorakkon tu roa ni alak laingkon so isirangkon ia alongkon (natobang nai)".

Bo rupa rap mukobul doah ni alai na tolu, kasidunganna dung lalu mulak tu Mandailing, isirangkon Jalambok adaboru niai aduana, marbagas muse ia mulak dohot bujing-bujing umur sambilan bolas taon namargorar 'Hasanah' (pas songon doah niai, nalumobi deges muse dohot lumobi denggan tingon adaboru nia nadua naparjolo).

"Tarahim ma ubege dongan, abisi homu kopi muyui le so keta tu masojid" ning oji i mandok Jaurimbang.

"Sangajo Oji, aupe tu masojid sajo doma sumbayang on, binoto cogot kaduan mukobul pangidoan niba" ning Jaurimbang mandok oji i.

"Olo mada, tai ulang tiru-tiru homu ba carito nangkinan" ning oji i lao mambuat saroben nia nasangkot di dindingi.

Rupana carito ni alai i natarbege do di alak bagas ni oji i, lingo-lingo sian dapur, iambang ia naget paduaon muse oji i, isipakkon ia talam na adong dipantari, rentengggggggg..... tarbege sora ni namaturenteng sian dapur.

"Olo angkang, mulak ma hami!!!!" ning Jaurimbang tingon ruar.