Silalat di Angkola,
Bulung Gadung di Mandailing
Ulang marmayam amang di na sikola
Anggo gara-gara ni bujing-bujing



Jumat, 06 Juni 2014

Kasonangan Muyu Dei Tulang.................

 
Marhaban Ya Ramadhan 1435 H (1)
 
"Ulang komu marroan tuson daganak, ke amu dao, inda tola idot-dotan obaran ni natobang-tobang" ning Jamangkahap mandok dak-danak namarsurak ijolo ni lopo Japardamean i.
"Olo ompung...ke ma ami on" ning si Paet muse anak ni Jamargumbal i antong mangalusisa.
"Mangua muse do tunggane, aso do idumpuri ho daganaki?" ning Jaompak marsapa
"Olo'ntong roa muyu, halak namarburas, marsurak muse alai ijolo lopo-on" ning Jamangkahap mangalusi.
"Ooooo, uambang dabo sangan aha, anggo daganak ba nasoni mei, iua dei le, manombo nadung poso-poso pe, sanga ama-ama bage namarsurak dei karejona, so iboto sa obaran jae dot julu, iambang ia dei manombo ia na pistarna, halak do naget jadi presiden, simbur ia marsurak tujae-tujulu marjagal" ning Jaompak palalu obar
"Imada, tarsongon na manonton marbal tile, ia ma na malona, ia na botona, sipak nia na gogona, tangkupan nia na jituna" ning Jamangkahap muse mangalus.
.....
"Baen jolo tes paet le" ning Jamangkahap mandok Japardamean
"Ibaen do sendokna?" ning Japardamean muse antong mangarsak
"Baen pe jadi, madung sondia carito'ntai?" ning Jamangkahap mulak marsapa
"Carito ni aha muse dei?" ning Japardamean
"Tai ipalugut kamu ning kamu Istilah dot pribahasa di Mandailing" ning Jamangkahap
"Alaaaa, tar dua pulu alaman dope, tai iboto hamu do bahat ni karejo maso-on, on ma bo naget puaso muse ma ita, isaba bariba naso manyuan dope, isaba kampung lamo taru na mamuro muse" ning Japardamean songon na mambela diri.
"Ke, na git puaso ma ita langa, jabat dope piga ari nai?" ning Jamonis sapa-sapa
"Bo le baya, modom ko, angke nadaon ko tingon lonceng jiamantong iboto ho i, urang lobi dua poken nai napuaso muse ma ita ba" ning Japardamean lao manauk aek ben tes paet ni Jamangkahap i.
"Inda ben daona tingon lonceng dabole baya, maklum ma hamu  na suang salimpot-pot on, apalagi on na git musim mar bal muse ma ubege, soni dot na git mamili Presiden, bo nadia dehe paihuton niba i" ning Jamonis antong.
....
"Aha do nangkin caritona langa?" ning Jamangkilang mandok Jamangkahap
"Aha muse mei jabat carito ni Jamangkahap, paling-paling carito na simbil, pala inda carito ni lupak i, saba na urang aek i, pala inda gadu nadung pot-potani" ialusi Japardamean lao manjungkiti ipon nia, padohal nadung lobangon do ia.
"Homu peda ipar, botul-botul ma parpinggol linta amu, anggo carito namaraek i rupa nabegean do hamu." "Inda ba ale dongan, carito ni uti-utian ni halak kita dei nangkin, pala ipasari-sari manombo dompak sasada iba di toap an, inda tarbaen boto naso mekel-ekel sasada iba, inda dong dabole mantakna anggo uti-utian ni alak kita on, muloi sian na danak, santak dung ompung-ompung, leng na get margiri sajo karejona, inda ilopo, i tapian, soni tu simpang tolui". "Manombo boto hamu di masojid pe asi" ning Jamangkahap songon na itiop nia sajo mic nai.
"Ah kelek, jia ma mungkin halak margiri di masojid?" ning Jarundut inda porsaya
"Bo, ulang tong dokon kamu naso mungkin, au poken nalewat ida matangku mai, ima si Gundur anak ni Jaseno i, dompak asik khotib i mar khutbah, sapala tarpodom ia santak tu na komat, pala get ingoti si Capot ning roa muyu inda ipatola donganna na ilambung nai". "Sapala dung siap sumbayang baru isonggak kalai, tarsonggot danak, sungka tujae sungka tujulu suang songon nangon durui baen panik na ilalasa, rap mangkardak ma alai sude mangaligi danaki" ning Jamonis lao mangkapistak ijur nia.
"Au pe tai ima naget caritoonkon, uda na tinggal di kampung tongai bo ima udai Jagulo" ning Jamangkahap muse lao pature jugukan nia.
Sapetona, nadung onokma marsak roangku pasari-sari udaon, satiop ro iba tusi diar na antara, atope ari rayo, inda jungada ra sumbayang, adong-adong sajo alasan nia. Manombo ningia inda ias abit nia, manombo inda ida ia ningia kupiah nia, sakali sanoli "pajolo ma ho, ro au non parpudi" ningna muse adop au. Milas roangku pabege-bege alasan abit karung, disada maso utabusi abit karung dua soni dot kupiahna, soulang adong alasan nia be roangku antong.
Bo rupa, Alhamdulillah, anggo Tuhan tai na giot mangalehen hidayah dot petunjuk tu sasada halaki, inda dong na bisa mangantaisa, jiama ningkomu so songkoni? Dung do ulehen abit karungi, santak sadarion Insya Allah nadung sumbayang do udai, manombo iba muse doma maila paida-idasa. Harana antong saparopat jom nai so masuk wakatu, nadung iontang nia ma iba tu masojid, padohal iba na patik depe sigaret niba.
Tai jarupe songkoni, tarsongon na mulak tupangkal caritoi, baen na ompoti mamalim udai, ibaen halak hutai muse ma tugas nia paias masojid dot pature aek tu masojid, sian bondar manggodangan. Taiba le so rap ita boto, na jop muse do roa ni udai tugas niai, apalagi sasakali manombo ituori alak minum nia dot panganon nia dilopoan, bope ntong na tes paet ale gorarna dot goreng sada, tai jadi juo mai.
Jadi imada, ibulan puaso nalewat pas muse ari jumahat, ira-ira pukul sapulu marangkat ma udai tu bondar manggodangan pature aek soni dot pais topi ni bondari, sondia so ias dot godang aek tu masojid an. Lao mulak i ihutkon ibana bondar i ampot adong na tumpat, sanga pe bulu-bulu ni halak na magodangtu, santak tu kulak ni masojid i. Sidungi, ibuka ia tingkap ni masojid i lao ilap na dot salin maridi. Ipaombangsa muse amak sumbayang torus manyapu marisar-isar, harana mabiar ia tarlambat non. Aek madung ias dot godang, masojid pe madung ias muse, juguk ma udai marongok itiang tonga ni masojid i lao markusandar. Sapala ning roa muyu, tarkelong ia, sanga ben lojana pe, sanga ben na urang podom ben copatna ngot andostorangi inda uboto. Tarsonggot ia, ipamataisa jom, tonga sabolas dope, asidunganna i pabuntang ia diginjang ambali painte mamalu otuk non pukul tonga dua bolas.
...
Bo aha do rupa, ipalu Jamargudembas otuk, inda tarsonggot ia, tarahim pe si Sobaruddin, inda ibege ia. Get ingoti halak inda ipatola si Dapot, "padiar kamu songoni, so modom ia, ia na loja" ningia lao maniopi boltok nia. Asidunganna, bahang na padua kalina pe leng mungkor udai, sapala tarida di khotib i lao manaek tu mimbari, ekel-ekel tong khotib i soni. Anggo na deba bahat na uyom-kuyom, bahat muse na maniopi boltok na, harana manahan ulang jabat martata.
...
Untung nai ma boto hamu ro uda na menek nai pas dung sidung khutbah na parjolo, tarida disia madung payak abang nia itonga masojid i mungkor, dohur-dohur. Songon na mandemes, ingoti uda Jamanis ma uda Jagulo. "Abang, abang, ngot abang, kei manjawek madung sidung ma khutbah parjolo bo" ningia lao mangutuk pat nai. tarsonggot udai Jagulo, tarkalimanman-tarkalimunmun, jama tot jama ulu lao marjolong tu pancuran, marsiompot maridi dot manjawek.
...
Sidung sumbayang, ijalaki udai ma si Moncot na juguk ilambung nia nangkin, lao marsapa songon na holas. "
"Aso inda ingoti ho au lian, padedo lala ho, jadi partataan ni dongan iba", ningia songon na mandumpuri.
"Get ungoti dei nangkin amang boru, tai inda ipatola si Dapot", ning si Moncot lao ekel-ekel adop toru manahan ulang jabat martata.
Mur ma holas ilala udai, haor muse ia manjalai si Dapot, sapala pasuo madung juguk ipantil-pantil sopo jagoi, mangutur tot. Dung tarpaida disia ro udai tingon na dao madung holas, mabiar di Dapot, tai leng dapot ia juo akal.
"Assalamu alaikum mamak, sehat do mamak?" ning si Dapot songon na bile.
"Sehat do mamak ning babamu ho, aso inda ipatola ho ingoti si Moncot au nangkin?" ning udai lao manarik baju si Dapot, mar longangan alak di sopo jagoi.
"Jiamantong barani iba mangngoti tulang niba i, lagina "Kasonangan Muyu Dei Tulang"..... ning si Dapot lao manjai solop nia sabariba torus kehe.
"Sip polngit tong uda i Jagulo, ipasari-sari ia na idokon si Dapot i, peto juo antong ilalasa, jiama mungkin ingoti si Dapot antong Tulang nia i, boti na dompak sinok muse modom, mungkor dope tambana. Harana najolo jungada ingotisa dompak modom di sopo jago i, get isipak timbungna ma si Dapot.
...
Potang nai ro ma si Dapot tu bagas ni Uda i Jagulo an, tiop Kue Bongko Sabungkus, Toge Taing Tumpat Sabungkus, Pusuk ni Ube Otang dua batang. Dao dope tarpaida ma di udai, "Bo, ro hamu bere?" ningia mandok si Dapot.
"Olo mamak, adong ison sotik bo, ben parbuko ni mamak" ning si Dapot tong
"Tarimo kasi mada bere, ison ma ita dabo marbuko" ning udai Mandok si Dapot
"Ibagasan ma soni mamak" ning si Dapot lao kehe, oni marmonok-monok di bagasan ni roa nia "Anggo tu pusuk ni otang i uida sip do" ningia sasada ia.
 
"Keta le dongan, maridi madung mangkuling ubege otuk" ning Jamangkahap mandok Jaompak, soni Jamonis torus tu Japardamean.
"Sajia jau, tes paet sada, goreng dua, gudang garam sabatang?" ningia muse palalu obar
"Saratus dua pulu ipar" ning Japardamean mangalusi
"Tuliskon komu jolo da, non domai dung itimbang gotai, pot adong lobina tingon balanjo" ningia muse mandok Japardamean.
Sip polngit tong soni Japardamean, inda ialusisa be, angke na binoto dei anggo bayoi, tarsoni dei umbat ni Jamangkahap on, inda lobi i sian na Tuliskon Jolo, Patop dot dongan nai, inda pe adong epengna.
 
 
Selamat Menyongsong Bulan Ramadhan 1435 H
Mudah-mudahan Allah SWT panjanglan Umur kita sekalian,
Dan Memberikan Kita Kesehatan dan Tenaga Serta Rezeki Yang Halal dan Berlimpah.
Amin Ya Arhamarrohimin
...
Ramadhan Berarti,
Kita Kembali Masuk Madrasyah Masjid
Perbanyak Ibadah, Iktikaf, Tadarus dan Lainnya
karena,
Siapa Tahu Tahun Depan Kita Sudah Tidak Ikut Lagi
 
MOHON MAAF LAHIR DAN BATHIN
 
 
 
FAS Nasution
dan
Keluarga

Tidak ada komentar:

Bulunggadung Mandailing, O Tano Hasorangan, Tano Hatubuan, Inganan Parmayaman, Lubuk Parkatimbungan, Sian Ranjo Batu Santak Tu Sihepeng, Tano Nagambur Nanapu, Ingkon Mulak do au pala marhepeng..... alaleee bayaaa...