Jolo Surat-suratan Dei So Baru Ipon (Dua Bolas) Tamat

Tanggal sapulu Dzulhijjah nai dung kotu, marangkat ma Jasobaruddin dohot rombongan mangalutar Jumroh Aqobah di Mina. Halak marsosot inda tanggung bahatna, tai inda boto nataraso ilala Jasobaruddin. Dung lalu tu pilar nai, mangalutar ma Jasobaruddin pitu batu, "Bismillah Allohu Akbar" ning Jasobaruddin ma lao mangaramban tiangi sampe abis batu na pitu i. Inda puas ilala ia, irambankon ia muse saroben nia, hurang jou dope puasna irambankon ia muse solop nia. Get irambankon ia muse ma ikat pinggang nia, untung ma copat ia sodar, anggo inda madung sar-sar abit.

Di ari na paduana pe (Hari Tasyrik na partama) mangalutar muse ma Jasobaruddin dohot rombongan muloi sian Jumrotul Ula, Wustho dohot Aqobah. Soni muse ari Tasyrik napaduana dohot napatoluna, torus ma markurban Jasobaruddin di Mina sada Unto.

Dung habis hari Tasyrik potang nai targan so bonom mataniari, marangkat ma Jasobaruddin mulak tu Mokah malaksananaon Tawaf Ifadhoh torus sa'i, baru Tahallul Tsani (dung Tahallul Awal di Mina). Ibotak Jasobaruddin muse ma mulak obuk nia na baru tubui, licin muse mulak songon nabaru salose umroh i. Ilokotkon Pambimbing ni Halai i ma gorar Oji ni Jasobaruddin manjadi "Haji Abdurrahman Bin Abdul Malik".

"Mangan kita oji?" ning Malim Wahab ma mangarisak Jasobaruddin atiha margeler mangan di hotel mangida Jasobaruddin madung Marjubah nabontar, marlobe boti marsaroben di ulu, sada nai isalempangkon ia di abara nia.

"Tafadhdhol, Syukron" ning Jasobaruddin margaya bahasa Arab muse lao maniop-niop Tasbih.

Dua ari nai so marangat tu Jeddah so mulak tu Tanah Air, isompatkon Jasobaruddin juo dope Umroh marmiqot sian Tan'im, 15 rial do antong ongkosna. Marheranan jabat alak nabahat mangida Jasobaruddin baen asyikna na mar ibadah i.

"Tawaf satiop waktu, Umroh dor, Nasantak ma ho namaribadati" ning malim Wahab muse ma

"Ison maia dabo nabisa tawaf dot umroh on guru, jabat dung lalu tu Mandailing marlapu muse mon dot bustak" ning Jasobaruddin lao mikim.

.....

Dung salose mangan di ari napatoluna di Mokah manyogot-nyogot, mangkuling ma ketua rombongan tu sude jamaah anso rap marsiapma barang-barang dohot silua, harana naron angkan namarangkat ma tu Jeddah dung salose sumbayang Dzuhur. Sibuk muse ma Jasobaruddin marbalanjo baen silua, muloi sian tasbih, busayan, miyak wangi, tamar dohot na asing-asingna sampe donok ma waktu Dzuhur. Bahang di Masjidil Harom nasangat gogo, tarsonggot Jasobaruddin, taraso ma ilala ia bahaso nangkan namaninggalkon Mokah ma sadarion. Marangkat ma Jasobaruddin tu Masjidil Harom, ipaksa ia marsosot tu jolo ni Ka'bah i harana dung salose non sumbayang Dzuhur natorus ma Tawaf Wada' (Tawaf Perpisahan). targan so masuk Dzhuhur, tawaf sunat juo Jasobaruddin sakali nai sampe Muazzin Qomat, dapot ia ma pas di samping ni Hijril Ismail, torus ma sumbayang Dzuhur disi.

Dung siap sumbayang Dhuhur, mamutar ma Jasobaruddin tu Rukun Yamani torus tu Rukun Hajarol Aswad mamuloi Tawaf Wada'. Sian putaran napasadana santak salose, natangis sajoma Jasobaruddin harana mur so tartinggalkon ia ilala ia Masjidil Harom be, lobi songon na hamatean doma ilala ia ancitna. Dung Siap Tawaf, sumbayang sunat di Balakang ni Maqom Ibrahim, margese ma Jasobaruddin tu samping palan-palan maninggalkon Ka'bah, lao sasakali mangaligi Ka'bah torus tangis santak tu pintu sada torus kaluar sian masojid i, leng mangaligi juo Jasobaruddin tubalakang sampe bongkak doma mata nia natangis i sajo.

.....

Dung lalu tu Hotel, mangan arian, torus ma marsiap mijur tu toru harana madung isi kian ma motor painte rombongan na giot marangkat tu Jeddah. Markisar sajom dung ni marangkatma rombongan ni Jasobaruddin tu Jeddah. Anggo Jasobaruddin natangis sajo ma ia lao manaili tu pudi mangaligi sude Gurun Pasir dohot Mokah na itinggalkon i. Markisar tolu jom lalu ma tu Jeddah, dison maradian muse dope rombongan sumbayang Azhar lalu marmayam satongkin tu Laut Merah di Masojid Terapung painte borngin non markisar pukul sambilan so marangkat Pesawat tu Indonesia.

.....

Pukul salapan borngin marangkat muse ma rombongan tu Bandara King Abdul Aziz. Jasobaruddin baen nadung mangarti, inda be na canggung ia, olope halak namargoso mangurus tiket, pareso paspor sagalo macam, anggo Jasobaruddin madung santai sajo. Pendek ni carito madung di pesawat i Jasobaruddin dohot rombongan nangkan manuju tu Medan - Indonesia. Marangan-angan ma Jasobaruddin dibagasan roa nia, :

"Muloi antong sian Madinah santak tu Mokah, Arofah, Muzdalifah, Mina, mulak mulak tu Mokah, Insya Allah inda dong da ibaen waktu niba kacuali namaribadah sajo do, songoni juo aek na di inum inda nadong salain air Zam-zam". "Samantara pala dung lalu tu Mandailing tongkin nai minum aek Batang Gadis muse mon baya, ulang sugari maruba nian Tuhanku pangalangka niba dung tu Mandailing". "Gorar niba pe madung oji, otik bahatna nangkan jadi panutan ni halak mon, borat pe parjuangan salamo di Mokah, boratan muse dope tongkin nai mampartahankon gorar on, ulang sanga mardosa halak gara-gara niba". "Sumbayang niba angkon na totop mon diwaktuna, tingkah laku niba dohot pandangan niba angkon nai jago mon, obar niba ulang sai purpar be songon najolo, angkon namarsiajar agama muse mon mulak dung tu kampung, tongkin nai isuru halak iba mandoah sanga jadi imom inda bisa ia, maila mon" ning Jasobaruddin sajo ma dibagasan roa nia.

"Apalagi dung lalu muse tongkin nai tu Mandailing, inda songon nai Mokah be napasuo dohot iba, na mamutar dei saratus lapan pulu darajat napasuo jiba di Mokah dohot di Mandailing, sobar angkon nai pabahat mon, so jadi oji nibaon Haji Mabrur songon na idokon di Rasulullah SAW i".

.....

Tarpodom Jasobaruddin namarangan-angan i, tarsonggot ia madung maradian di Polonia Medan, inda na sodar ia be marlewatan pe pramugari ni pesawat i atiha songon naparjolo marangkati. Dung Kaluar sian Bandara torus ma marangkat tu Hotel, painte marangkat cogot tu Mandailing, tano nadung itinggalkon Jasobaruddin lobi opat pulu ari.

.....

Satonga kilo meter nai sian kampung ni Jasobaruddin, madung inte halak nabahat manyambut Jasobaruddin naro sian Mokah. I arak halak nabat ma Jasobaruddin tu Masojid sumbayang lao sujud syukur ma ia disi bahaso nadung siap sude mangkarejoho Rukun Islam na palaimana ima manuneon Ibadah Haji. Torus muse ma tu bagas ipataru halak nabahat, tarsonggot Jasobaruddin harana madung disi umak si Taing dohot si Taing manyambut Jasobaruddin. Dung siap ipagugut dohot sira, i upa-upa dohot danon, juguk ma Jasobaruddin diginjang ni amak lampisan lao marcarito lao mambagi-bagi silua di halak nabahat.

"Adope, kei Taing tu ampuan ni Pak Haji" ning alak bagasnia ma mandok si Taing lao mikim

"Olo, naron borngin ma bagian mu" ning Jasobaruddin ibagasan roa nia lao mikimmuse adop toru.....

TAMMAT