Jolo Surat-suratan Dei So Baru Ipon (Sabolas)

Madung sapoken lobi Jasobaruddin dohot rombongan di Mokah, madung dor Jasobaruddin tawaf sunat dohot umroh, harana mura do angkosna tu Tan'im mambuat miqot ni umroh. Di sakitar ni Masjidil Harom pe mur martamba ari mur sompit harana mur marami muse halak namarroan sian sude penjuru dunia. Tai anggo Jasobaruddin ba inda na porlu disia, rami-sorami sarupo do ilala Jasobaruddin sude, pokokna tiop masuk waktu madung di balakang ni Maqom Ibarohim ma ia, kadang muse madung di jolo ni Hijir Ismail.

Tanggal salapan Dzulqaidah (Hari Tarwiah), rombongan pe marangsur-angsur marangkat ma tu Arofah, soni juo Jasobaruddin dohot rombongan madung lalu di Arofah potang-potang nai. Dung sumbayang sunat ihrom di hotel, marangkat ma Jasobaruddin la mangompatas na godang namarbontuk rangsel lao manaek tu motor namardalan-so mardalan baen ramina. Rupana nadung lengkap do sude iparsiapkon Jasobaruddin di Mokah, itabusi ia rangsel, igoki ia air zam-zam 3 deriken, itabusi ia muse kue-kue parsiapan ampot tarlambat ro jatah.

Markumpul ma sude disi jamaah haji markisar tolu juta halak, nabontar doma sude, laik ma so indokon kalak on ma sebagai Padang Mahsyar Kecil di duniaon. Jasobaruddin madung masuk tu tenda, juguk ma ia disi marzikir inda tanggung khusukna. Maneteki ilu ni mata nia taringot dosa nadung salpu na dung tarlanjur dikarejohon. Ibuat ia Qur'an, mangaji ma ia disi dung salose kotu Isya sampe tonga borngin.

Subuh, sumbayang ma Jasobaruddin tu masojid Namiroh di Arofah, torus mulak tu tenda sarapan soni mangulaki mulak marzikir, sumbayang sunat dohot na lain-lainna. Dung masun waktu sumbayang Lhuhur, mur marsitutu muse ma halak maramal di tenda masing-masing, harana on ma muloina na idokon wukuf di Padang Arofah. Sora ni natangis sajo doma na binege sian tenda tu tenda manyosali sude kasalahan di waktu na lewat.

Santak masuk waktu Azhar, Jasobaruddin dohot rombongan nasibuk sajo dope marzikir di bagasan ni tenda sampe masuk waktu magorib. Dung sumbayang Magorib, marsiradu muse ma jamaah nabahat tu Jabal Rohmah (Parsuoan ni Nabi Adam dot Siti Hawa, inganan ni Rasulullah SAW marhutbah di Haji Wadak). Manaek Jasobaruddin tu ginjangan marisar-isar inda sodar baen asyikna nagiot maribadah i, dung lalu dope tuginjang so baru lomos ia mangida halak nabahat i mamontar doma ditoruan. Mandoah ma Jasobaruddin lao mamandang adop langit, mangido ampun soni mangido partolongan tu Tuhan tai ulang nian sugari tubalakang tongkin nai be marbalut dohot bustak ni dosa.

Dung puas ilala ia, mijur ma ia sian Jabal Rahmah, mulak manjalaki rombongan harana marangkat muse ma tu Muzdalifah (Mabit / Bermalam). Iambang Jasobaruddin nadao sian Arofah, rupana baya nadonokan do, cuma antong baen rami ni halak soni inda apil dalan harana ni tenda nasarupo ido so marmotor kalai tu Musdalifah. Mardalan so mardalan juo kendaraan manuju Musdalifah baen ramina, tonga borngin doma so lalu.

Ison Jasobaruddin dohot rombongan maradian musema marmalam lao manjalaki karekel nangkan ipake Malutar Jamroh.

"Denggan ligi, tarjoloki honon te ni ambeng!" ning Malim Wahab adob Jasobaruddin lao margiri

"Inda mangua i, so losi setan i, ulang dot batu sajo iramban, sasakali so iboto setan i na bau" ning Jasobaruddin lao manjalaki karekel di topi dalan i.

Isi ma sude Rombongan saborngini marmalam, modom marpakean umroh inda martenda. Tai antong hum gorarna do namarmalam, anggo Jasobaruddin inda namodom, harana leng urang puas jou ilala ia namarzikir i, jadi tiopma tasbihna lao gulung marbantal tas lao mangan-mangan roti soni lao minum air zam-zam na dioban nia sian Mokah.

Dung salose sumbayang Subuh Torang ari nai (10 Dzulhijjah), marsiap muse mardalan tu Mina get Malutar Jumroh. Targan so i, kehe muse ma marrami-rami tu Masy'aril Harom rap madoah soni mar taubah, torus ma arah tumina. Marlojong saotik di tontang ni Wadi Mahsyar (Tempat turunna Bala ni Tuhan tai) tu tentara Bergajah na ro sian Yaman nagiot manghancurkon Ka'bah.

Dung lalu tu Mina ribur muse jolo Jasobaruddin manjalaki tenda dohot dongan-dongan nadung marmagoan inda binoto sanga tudia, untungma bahat disi peta sanga didia lokasi ni kemah na sian Indonesiaon. Ijalaki muse kemah nasian Mandailing, dung marloja-loja baru marsuo.

Marsambung....