Romadhon tu Romadhon (Lima)

SURAT SI PUNJUT TU SI SALEHA
(Inda Bisa Mulak Ari Rayo)

Di partongahan puaso i, ro ma si Punjut sian Simpang Limun tu dongan nia sakampung si Rohana na tinggal di Sampali-Medan, maroban surat get pakirimkonna tu kampung harana sataon on inda bisa mulak.
"Lalu do kakak mulak tu kampung ari rayo on?" ning si Punjut mamamuloi obar
"Pala inda dong halanganna, lalu" ning si Rohana muse antong mangalusi
"Andigan kakak?" ning si Punjut muse
"Mungkin dua pulu ari puaso, harana sadarion muloi ma cuti abangmu, mangua nanga?" ning si Rohana muse margonti marsapa.
"Get pakirimkon surat sugari tukampung, au inda bisa mulak sataonon, maklum ma kakak, na manganggur dope madung onom bulan bo" ning si Punjut muse antong mangalus.
"Baen di etek nai jomui do?" ning si Rohana mulak marsapa
"Inda ba kakak, baen di si Saleha do sugari, marjanji ami dabo sataonon, tai sonon ma bo keadaanna dompak" ning si Punjut mekel-ekel adop toru.
"Boru ni Udak Lobe i do, nailambung musojid i, naporluan doma antong ilala ho bayai disia pado di etek nai jomui, isia pake surat, tu etek aha kirimonmu?" ning si Rohana songon na paingot si Punjut.
"Tu umak kirim solom ma soni, ngoni adong ison epeng sotik bo, saratus pitu pulu lima, lehen kakak ma jolo di umak" ning si Punjut muse antong mangalusi.
"Olo, jiarma soni, uoban pe pala mulak kami cogot" ning si Rohana
"Tarimo kasi parjolo kakak" ning si Punjut baen godang ni rohania
Torang ari nai antong mulak ma halak si Rohana sakeluarga tu kampung mar ALS, lalu ma manyogot-nyogot markisar jam sambilan, torus ipataru si Rohana antong epeng di umak si Punjut torus surat di si Saleha.
...............
Dung itarimo si Saleha surat i, inda tanggung muse be riangna ilala ia, ioban ia ma copat-copat tubagas, torus masuk kamar, gulung ia diasur i mambuka surat ni Abang sayang nia si Punjut, i ummah ia muse antong surat i lao muloi mambaca palan-palan.

Medan, 17 Romadhon 1397 H

Hutostos suhat sada

Tupotpot niurung siala

Hutongos surat sada

Tumopotkon Saleha di Kampung Tonga

.....................................................................

Dung hita sitarak

Jolo Sitangkis podom-podom

Dung hita marsarak Saleha

Lolotan tangis do baya pado namodom

.........................................................

Magodang Aek Sosa

Inda tarbaen naso mandurung

Dung pe Saleha dalan mardosa

Inda tarbaen naso malungun

..................................................

Hancit ni namandurung

Sada-sada incor di batu

Hancit ni namalungun

Sada-sada ilu madabu

......................................

Mandurung ko anggi mandurung

Mayup sanggar di Batanggadis

Molo malungun ko anggi malungun

Dokon gorarku ulangko tangis

....................................................

Sian Botung Tu Muara Botung
Antara Nai Parsabaan
Por ni Roa mulak tu kampung
Bia baenon dompak suada di tangan
..............................................................
Malapat da anggi buntu-buntu
Panyaratan ni ria-ria
Malapat-lapat da Saleha rohangku
Malungun tu ho inda tarida
...............................................
Tor dolok Siojo
Dilombang Nai Ranggasoli
Idok ko di abang najolo
Angkon na ke nimu tu Tano Doli
........................................................
Pasendeng tu Ranggasoli
Bahat halak sauduran
Dung do lalu abang tu Tano Doli
Sampe sannari leng pangangguran
............................................................
Losung di Pidoli
Tumbuk Salapan Indaluna
Janjintai Saleha Nasanoli
Ulang tu halak sugari laluna
.................................................
Mula ke ho anggi marsoban

Ulang lupa maroban bongko

Uharopkon doho Saleha Sobar

Painte Au mulak ngon Ranto

..................................................

Jambatan di Muara Pungkut

marsambung Dua ditonga-tonga

Pandok ni Datu Janggut

Angkon na rap do hita nadua

..................................................

Marmayam tu Sigalangan

Singgah santongkin di Siabu

Pala inda adong halangan

Ari Rayo Taon Naro Mulak Do Au

(Pala Adong Epeng Dot Waktu)

....................................................................

Sian Abang Sayangmu

(PUNJUT BAYOPANGGURIS) Harap di Balas!!!

......................................................

Dung siap ibaca si Saleha surat i, iummah ia sakali nai, ialuk ia laos mangecek "Olo abang Punjut, upainte pe ho" ning si Saleha adop gambarni si Punjut dompak marsaraor pontong na isimpan si Saleha ditoru ni Bantal. Dung i torus ma ia tu bagas ni halak si Rohana get marsapa sanga andigan mulak tu Medan.

"Kakak, andingan do kakak mulak tu Medan?" ning si Saleha

"Hum nabaru ro dope halak antong, madung isapai ho sanga andingan mulak, tako na kaboratan doho na ro on au?" ning si Rohana antong marsianyang.

"Indaba kakak, pala mulak kakak sugari idokon kakak di au tongkin nai, get mambalos surat naioban ni kakak i" ning si Saleha songon namaila.

"O, jiarma, Insya Allah sapoken ari rayo pala inda lupa au udokon pe di ho" ning si Rohana martata.

.......................................

"Sonjia ma le balosan ni surat nai?" ning si Muktar muse dope parebanku marsapa

"Tai sapoken ari rayo do ning si Saleha" ning Mamak Katuman mangalus

"Masusah tu domai uida karejo ni halai i, pake surat bage, i SMS nanga" ning si Muktar muse

"Jia ma adong SMS taon pitu pulu" ning Mamak Katuman muse antong manjawab

"Aha do na dong?" ning si Muktar

"UBS"

"Ahadei?"

"Ulang Bahat Sapamu" ning Mamak Katuman