Romadhon tu Romadhon (Sada)

TARLAMBAT SAHUR

"Pacopat bo sonduk indahani, udokon do ulang modom be jabat dung mardahan sahur, on waktu saparopat jom nai doma, naso mangan dope, get mangidup bage dope iba, kopi pe indape ibaen" ning Sutan Mangkutur mambekbeki adaborui natarpodom di amak sumbayangi salose sumbayang Tahajjud dung siap mardahan andostorang nangkin. "Olo abang, mangido mohop au, cogot Insya Allah ida be ubaen be" ning adaborui antong mangalus dohot lambok ni pangkulingna (marangan-angan doma namambaca tulisanson jabat). "Botulma margamu Margabus" (inda tola idokon margana, mardosa), ning roa ni adaborui ibagasan roa nia sa sada ia.

Isonduk ia antong indahan, soni muse dot gulena, ibaen ia diginjang meja i dijolo ni alak lai i. "Nabo abang, ulang dabo matubekbek sajo, macopat dei iba matobang" ning adaborui lao mambaen parbasuanna. Mangan ma Sutan Mangkutur marisar-isar di ujung ni waktu sahur i (markisar 10 minit nai doma), ipandang ia jom mur sompit, isuru ia muse alak bagas nia i mambuat sigaret nia, dot mangangkat kopi nia. Mur masompit waktuna, tangan siamun Sutan Mangkutur manjomak indahan, tangan siambirang nia maniop sigaret. I sulang sansulang, i arsik muse sigaret sangarsik, isirup muse kopi sansirup. Sonima torus marisar-isar sampe markisar lima putaran.

Pas jomak na pa pituna, ..... Immmmsaakkkkkkkk, ning sora ni Muazzin di Masojid. Sutan i nangkin pas manjomak godang indahan, bolnang mata nia mangiligi jom dot mambege sora ni Muazzin, ipaksa ia monolon indahan nadi papangan niai, ibasu ia tangannia, huk kek ma Sutan Mangkutur harana inda sompat minum. I muse jolo karejo ni adaborui mangarut abara ni Sutan Mangkutur, padahal adaborui nangkin inda namangan sahur, hum na minum maia harana inda sompat mosa pambaen ni Sutan i. "U arut donon palalu urat ni talonanmu bo, ampot Gim ko" ning roa ni adaborui soni ibagasan, get lupa muse ma ia daganak namarkalamotan.