Layang-layang ni si Andilo
Mangalumpat uting tu parapi
Ayam-ayam ni si tukang paido-ido
Timbako pusuk api-api
"Adong Mamak ku namargoar Jasadaroa na tinggal di Tabaringin (inda tola sidokon sangan Tabaringin jia, harana Tabaringin 5 di Madina on sapambotoanku, Tabaringin Tombangbustak-Kuala Lumpur, Tabaringin Maga, Tabaringin Sabajior, Tabaringin Sinonoan dot Tabaringin Pagur). Disada maso najolo dompak bulan Puaso, ro au mangulangi tu bagas nai, ning umak manyuru au manjalin Silaturrahmi do, tai au natorus santampul dua lancim doba. Sambalik antong get mangulangi, tai sambalik nai nagetmangaligi boru nai do au, harana adong boruna sisada-sada inda tanggung litakna, on naget ari rayo muse, ehmmmmm" ning si Kirman muse ma mamuloi carito.
"Aha do so marcarito na litak-litak ko, mangkehem bage, tako inda napuso ho?" ningku marsapa. "Maksudna pala maridi litak, ho dabo anggo topek tu carito namaraek i, nabegean supingmu" ning si Kirman mangalus.
"Jadi sondia nagkin carito nai?" ning ku muse
Imada, lalu au tusi antong borngin ma markisar kotu Isya, kehe au tudapur mangaligi ampot adong dope lobi-lobi ni parbuko, rupana Pusuk ni Otang doma itoru ni tudung nasi dot lasiak kecap. Jadi inda mangan au be, harana anggo di amian najolo di jae ni Muara Sipongi inda ipangan halak i pusung ni otang, batasan dei pusuk ni singkam pala inda pusuk ni kopi iparulam baen dongan ni indahan. Borngin nai antong modom ma au dibagas i di ruar, markisar jam 4, lingo-lingo ubege mangkuling nantulang "Butet, ngoti abangmu so Sahur kita" ningna ma ubege. U pa purak-purak modom so ingoti na au tu luar, "iparar do-on" ning roangku antong. "Abang, abang, ngot ma abang, madung jam 4, mangan ma ita ning umak" ningna ma manggoti au laos mangalaok. "Mmmmmm", ning ku soni asok (madung ingoti ia na ngot, ning roangku antong), lao u elehen tanganku so itarik na au juguk, isambutna muse antong tanganku, torus ma hami mangan andostorang. "Aha do so ekel ko, mangan indahan do dabo" ning si Kirman manyonggak au. "Ol,ololooo, mangaaaannnn" ningku gogap.
Dung siap mangan, upatik sigaret Listrik (Lucky Strike) sabatang, ibuat mamak muse sigaret ki sabatang. "Na tabo antong sigaret muyu on bere" ning mamak ma adop au. "Ah, ngada ba mamak" ningku mangalus, tai ibagasan roangku "antong i idup mamak sajo Timbako Gayor, aso nga capot". Siap sumbayang subuh, modom au mulak di ruar, ubaen sigaret di ginjang meja dot lotingna. Markisar jam 10 tarsonggot au modom, uligi sigaret inda dong iginjang meja be, usapai inang ni danak (eh, boru tulangi) sanga adong ipasimpan ia sigaretku, inda dong ningia. Markisar jam 11, ro mamak tu bagas, lao mangkuling "Ulang patibal-tibal komu sigaret di ginjang meja i pala arian, inda tahan au i" ning na ma songon na get mambekbeki au. "Imei dabo napayahna ilala mamakmu pala puaso" ning nantulang muse dohot-dohotan. "Olo mamak, nalupa dau i nangkin" ning ku antong. "Sambang do jengkar antong baya, mangaligi sigaret pe inda bisa pula puaso" ning roangku dibagasan.
Potang nai pas marbuko, upangan sada Tamar, baru minum, dung i ubuat sigaret nangkinani sabatang upatik, torus ke au tu Masojid get sumbayang. Dung kaluar au Istinjak ngon WC, u ida tulang i madung juguk marsandar di tiang di sopo-sopo pancur masojid i. "Mangua dei mamak?" ning ku marsapa. "Monggot au baen naso mangani dope, utiru-tiru hamu nangkin dung marbuko ubuat sigaret muyu i sabatang, upatik muse" ning mamak mangalus. "Aso antong itiru-tiru mamak au" ningku mangalus, "Poso-poso ma paiut-iuton ni mamak" ning ku lao manogu mamak tu bagas.
Tidak ada komentar:
Posting Komentar