Romadhon tu Romadhon (Opat)

MANCIT OBUK NIA

Disada maso najolo, di sada kampung namargorar Hutanaginjang, pas dompak bulan Puaso (songon sinetron sajo doma) adong ma sada danak namargorar si Ilman. Si Ilman on kalas dua dope esde (SD), tai tingkah lakuna madung songon na dewasa, apalagi danakon sipajuak-juakon (pala iangkat-angkat, aha sajo pe idokon ikarejohon ia). Namun ulang lupa, sijuak-juakon naon tu na denggan do, khusuna di bidang Agama.

Harana ia anak na godangna, orang tua nai marmaksud mandidikna di bidang agama, pas muse antong bulan puaso jadi tontu iajari muse ma puaso.

"Anggo abangmuyu na tahanan puaso i" ning umak nai sajo ma atiha mangelehen mangan anggi-anggi nai di pukul 10 manyogoti.

Itahan si Ilman muse antong inda mangan, padahal merdet doma ijur nia mangaligi namangani, manaek mijur muse baya talonan ni danaki mangaligi tabo ni gulena. Gorar na pe bulan puaso, napatabo-tabohon sajo dei anggo panganon, paling menek mei bolgang "bulunggadung", salainna Lelan Batanggadis na isale, Garing na i panggang, Ikan Mas na i asom podeh, Incor na i arsikkon, Aruting na igule siak, Bolut na i rondang sareto dot joring, soni muse na lain-lainna. Aso ma nga dosir ijur ni si Ilman antong mangidana baya (saling namambaca tulisanon pe dosir ijur nai). Disamping ni i muse si Ilman danak namenek dope, tai baen na idokon ni umak nia nangkin tahan dei puaso, itahan-tahan ia sajo olope dor mangapus ijur sian topi ni bibir nia.

Nasonting na inda soni, umak si Ilman di Puaso na pa lima bolasna inda dohot be puaso (biaso mantong, gorarnape adaboru tontu adong halanganna).

"Halangan sonjia do ompung, jelas mantong dokon ompung da?" ning si Moncot muse dope adop ompung Dolok namarcaritoon.

"Ima da so marbagas iba da, so binoto sanga sonjia adaboru, ulang sei namarmahan Orbo sajo karejo" ning ompung Dolok antong mangalusi. Rupana Ompung Dolok antong madung tolu kali marbagas, jadi wajar mai molo nabotoan ia anggo masalah ni adaboru.

Jadi, rupana pas mangalehen mangan adik-adik si Ilman i dot muse ma umak si Ilman mangan, tarpaida disi Ilman.

"Ida homu mei, pado-pado umak pe tahanan dei abang muyu Ilman puaso" ning umak nai muse ma. Inda sajia onok ro muse ma ayah nia manakik (mangguris), torus muse mangan (rupana baya inda na puaso muse), maila ia di anak nia si Ilman, dohot-dohotan muse ma mangecek bayo i "Anggo abang Ilman da, pado-pado ayah pe tahanan do ia dongan puaso" ningna muse ma. Ro muse ma ompung nia ngon bilik tiop roti dot kopina sagalas godang, "Salingkan daripada ompung pe tahanan si Ilman" ning ompung nia muse ma. Mijur baya danaki ngon bagas, tangis juguk di anak tangga na partoru lao manatap adop langit, mandoah tu Tuhan "O Tuhanku, salamatkon da keluarga nami on!" ningia.

Rupana tarbege di umak nia dot ayah nia na tangis ia, "Aso tangis ko Ilman?" ning kalai.

"Inda dong ba ayah, mancit obukku" ning si Ilman lao mangalap abit karung tu bagas torus kehe tu Masojid sumbayang Kotu Luhur.