Si Taslim Mar-Ari Rayo

Adong dua halak daganak na mardongan akrab ima si Taslim dohot si Parar, dua-duana rap sikola SD kalas opat. Si Taslim on anak yatim (inda adong ayahna be), tai anggo si Parar on lengkap dope orangtuana. Daganak naduaon salalu mai sauduran, baik atiha disikola atope atiha diluar sikola. Halai tinggal disada kampung namenek di daerah Siabu, kampung na deges songoni dohot nadenggan-denggan lagi ramah-ramah muse pendudukna.

Sabotulna muloi awal ni puasoi, sering mai si Parar cimburu mangaligi si Taslim, harana pala potang dung marbuko, epeng parabur si Parar lima rupia mai ilehen ayah nia, tai anggo si Taslim sering mai duapulu lima rupia, harana bahat halak namasadokah di si Taslim on. Rap maklum ma ita antong anggo bulan puaso, nabahatan i namalim mangompot (contona si Udin, biaso piso guris do tioponna, dung masuk bulan puaso namaniop tasbih sajo doma, dor putarna inda binoto sanga aha bacaanna). Kadang-kadang pas ijolo si Parar ilehen halak i epeng di Taslim, kehe mai si Parar tu topi harana inda tar paida-ida ia. Namun jaru songoni pe si Taslim on anak na tardidik do, pala ilehen halak isia panganon ato pe epeng, ilehen ia juo do di si Parar deba, pala inda dong halak ijagit si Parar mei, tai pala rami halak purak-purak mai inda giot si Parar.

Adope, ari rayo mur donok ma, sadarion madung dua pulu opat ari puaso, adong ma sada-sada namanulak pitarah tu halak si Parar, bahat muse namarsadokah antong. Harana sadarion ari poken di Sinonoan, kehema si Parar tu poken dohot umak nia manabusi baju nabaru dohot saraor nabaru. Dung mulak ngon pasar, marsapa ma si Parar tu si Taslim, :

"Madung piga sude baju ari rayomu?" ning si Parar

"Opat, dua itabusan poken nalewat, dua muse itabusan nangkin, pala ho madung piga?" ning si Taslim muse marsapa.

"Au baya dua maia itabusi ayah, sipatumu madung adong?" ning si Parar marsapa

"Madung, ho?" ning si Taslim

"Au inda dong sipatuna, solop Jepang do itabusi ayah natuari" ning si Parar antong songon na sedih.

"Paraburmu pala ari rayo madung adong?" ning si Parar muse mulak marsapa

"Madung, Opat ratus pitu pulu dope, tai biaso adong dei ngon musojid pala sada ari rayo, pala ho madung?" ning si Taslim antong lao manjawab torus marsapa.

"Au tolupulu lima maia" ning si Parar antong.

Borngin nai atiha marbuko, marcarito ma si Parar di bagas ni halai i tu ayah dot umak nia, : "Umak, ayah, donganku si Taslim tagi doma, bahat doma alak marsadokah disia baen na anak yatim i ia, baju nia ari rayo sajo opat, pake sipatu, epeng parabur nia ari rayo lobi lima ratus, au baya bajuna dua maia, inda dong sipatuna, solopna pe solop Jepang do, epeng paraburna pe ari rayo on tolu pulu lima maia, Sugari songon ia i iba tagi doma roangku".

"Aha ning babamu?" ning ayah nia lao mangkojar si Parar nadung ke marlojong parjolo tutoru. "Aha do namangua?" ning Katua i na lao kehe tu masojid get sumbayang Isya, i da ia ayah si Parar madung mangamuk. "Olo antong, anak tai si Parar, nadung por dei roa nia roangku mate au" ning ayah si Parar lao masuk tubagas.