Puaso Riuk - riuk

"Ulang komu marsurak daganak, markean jolo marmayam!" ning umak si Lomlom mandok daganak nia na eruk dibagas marmayam koje. "Naron ro hamu mulak tuson dung ngot ayahmu, tarsonggot ia non mangamuk ia!" ning ia muse adop daganak i.

Sadarion puaso na pa onomna ma, on dope so puaso si Kutom, ipe baen ilana do ilala ia mangida nantulang nia na ro sian Taliang natuari maroban eme na baru isabi baen pandaian, lao mangaligi paompu nia di Muara Singkut. Dung do Sahur na modom sajo ma si Kutom, sampe inda binoto ia jabat nadung mulak nantulang nia tu Taliang manyogoti jam salapan i. Puaso napasadana mancit ningia boltok nia, padahal baen naso tarorom nia do lobi-lobi ni gule rondang natuarian dot tulang sup nai, sada satonga kilo ma antong dagingna, dua kilo tulang supna, inda habis rupana sude andostorangi. Di ari napaduana, kehe ia tu kobun inda tar paida-ida ia muse botik namalamun di batangnai, ibotalkon ia muse puaso nia. Napatoluna, baen napoken i, kehe ia manggadis kantalan tu pasar, rupana kehe ia tu pasar bawah marlao-lao, marbuko muse ia disi, untungma inda tartangkup polisi, anggo inda madung maila. Napaopatna puaso, inda dohot ia sahur, na palimana torangan ari. Pokokna adong sajo ma alasan si Kutom so inda puaso, tai jaru songoni anggo adaborui ba napuaso sajo do, songoni muse daganak nia, hum si Lomlom maia naso puaso, ipe baen na tolu taon dope umurna.

Markisar jam 11.00 tarsonggot ma si Kutom, taraso ma iala ia marngaok boltok nia baen malena, mangkuling muse ma ia adop adaborui. "Inda dong indahan dongan isi be?, inda natahan au roangku na puasoon da" ning si Kutom adop adaborui. "Palalu abang ma dabo, madung get kotu ma dongan, satonga ari nai doma, non potang sanga aha giot ni abang parbuko upamasak pe" ning adaborui lao mangarut-arut pat si Kutom. "Naget ro ma parumaen, leng naso ra dope puaso" ning roa ni adaborui ni bagasan roha nia. "Jiar ma soni, pala inda tahan non, ubotalkon doba" ning si Kutom muse dope adop adaborui. "Tahan dei dabo Insya Allah, u ompa abang non pala payah ilala abang" ning adaboru i muse mangelek si Kutom.

Jam 2 dope arian madung margoso adaboru i pature parbuko giot si Kutom muloi sian Pusuk ni Hotang Panyabungan, lopek Maga, Kue Lapis Kayu Laut, Kue Bongko Kotanopan, Gule Incor Tamiang, Gule Apesong Aek Kapesong (adong nanga i?). Es campur, Es batu, madung marsusun ipantar i, tinggal sada nai doma naso masak ima bolgang "Bulunggadung" gule tradisional Mandailing naso tola itinggalkon pala mangan marbuko Magorib. "Ise sajo na so margule Bulunggadung satiop halak Mandailing pala potang, puaso nai sah tai inda botal" ning Ustad Husin disada maso lao margiri, sampe martata halak namambegena (mungkin mikim juo dei na mambaca tulisan on).

"Tambai sirana!", ning si Kutom adop alak bagas nia.

"Madung ma utamba abang" ning alak bagas nia mangalus

"Tambai sotik nai" ning si Kutom muse

Itambai adaborui muse sanggolom nai, "asal torus puaso, capot, capot ma soni" ning roa ni adaborui sasada ia.

Sa jom nai so marbuko, madung ikuah si Kutom kinan indahan nia dot bolgang bulunggadung nangkinani, tangan nia madung di parbasuan i kinan, songon perajurit na get marangkat porang, beker madung ilambung nia, padahal daganak na marmayam dope diluar. Saparopat jom nai, madung igaor-gaor ia kinan indahan nia dot tangan nia, mikim-mikim adaborui mangaligina "sambang do baya kaji-kaji, dohot halak napayah mandalankon agama ni Tuhan on" ning roa nia lao taringot ia tu ombar banjar nia najolo di Taliang, tamatan sikola Purbabaru nadung onok margaul dot ia, tai dohot bayo on do jodoh sonjia ma binaen.

"Tung, tung, tung, tung..... " ning sora ni otuk di Masojid, jomak godang si Kutom mangangkat laos mangan, inda mambaca Bismillah, inda muse mambaca doah, "ngap, ngap, ngaaaaapp" sulang nia laos mangan, "heeekkkk, heekkkk, heeeekkkkkkk", ning sora talonan si Kutom laos muta tu pantari. Rupana, capot macom ja na paet dai ni bulunggadung i baen bahat ni sirana nangkin, inda porsaya iya diadaborui nangkin, itambai ia muse dope dot kecap.